Yehova Oonikhalihera ‘Ophuwela Khuta Opuro Naaliwa Nhu’

Mats ni Ann-Catrin asomme Eskola ya oXileyaadi mwaakha wa 1979. Ndho miruku dha wiira “mphuwele opuro mwaaliwe nnyu,” yaavahiwe ni munna Jack Redford mmodha a anamahudhiha a eskola ele. Nuuvira okathi, anamathelana ale “yaahaaliwa” aahiidho yaahaakhela dhoothanleliwa dha orumeela mapuro oovirikana nkhama: WIrã, oMaurício oMianmar, oTanzânia, wUganda ni oZaire. Miruku idho dhahaakhalihera ivaara dhawaatta okathi “yaaliwa awa,” “yaapholiwa awa” ni “yaaseiwa awa.” Mwaahiye yooleeleni moopora elo yaairanen’ye awa.

Mats, niire nnoowerya onileela moopora nhundhe nnyu ekhweeli?

Mats: Okathi wa Ekhotto Yanaili ya Olumwinku Wootheene, apaapa yaaira ekhalaka oPolônia ni yaanona itthu dhawaatta dhoolavilavi dhaapakiwa ni atthu a ekerexa Katoolika. Masi hata eri dhiidho, apaapa yaanilotta yiiraka: “Ekhweeli yookhala ni woonawene elo wookhala opuro eri awa!” Nuuvira okathi kaahoona mathowa yaawiiriha apaapa olotta moolumo ale. Miyo waanikidhivela othuma iliivuru dhaarumeeliwe, ni emodha wa iliivuru idho kaathumme aka yaari A Verdade Que Conduz à Vida Eterna. Muru wa eliivuru ele waahikiphara nrima vawaatta, ndho miyo kaahisoma yootheene ohiyu wa nihiku nne kaathumme aka. Mmeelo mmwa, miyo kaahoona wiira kaahiphwanya ekhweeli!

Okhuma Abril a 1972, miyo kaahipacera osoma iliivuru dhawaatta dha Anamoona a Yehova ni kaahiphwanya waakhuliwa wa makoho kaaraakana voohima dha Biibiliya. Miyo kaaidhoona nkhama nlipa a nakoso a nlikanyiho na Yeesu, yoowo aairale nuumala ophwanya nluku na nsurukhu wawaatta athumiha itthu dhootheene aariiyena wiira athume nluku nne. Emodha-modharu, miyo “kaahithumiha” yoolukama aka ya osoma wuuniversitaati ni okhala meetiku wiira kiwerye othuma “nluku” neekhweeli nenno kaaphwannye aka. (Math. 13:45, 46) Miyo kipatisiwe 10 a Dezembro a 1972.

Mwaakha waattharelana, anaan’yari aka vamodha ni nhimaaka yaahaakhulela ekhweeli ni yaahipatisiwa. Julho a 1973, kaahipacera orumeela nkhama piyoneeru ookilaatheya. Wa mapiyoneeru ooluttuweliwa a muloko aka, aahikhala nrokora mmodha aaitthaniwa Ann-Catrin yoowo aari ooreera ni ampheta Yehova. Hiyo naahidhivelana ni naahithelana mwaakha wa 1975. Miyaakha misese dhaattharelana, hiyo naakhala esitati yooreera eniitthaniwa Strömsund ya oSuécia weiwo atthu awaatta yaatthuna awa ohudhera voohima dha Biibiliya.

Ann-Catrin: Apaapa ahundhe ekhweeli ehalaka vakhaani omaliha osoma wuuniversitaati elapo ya wEstocolmo. Hata okathi owo karina miyeeri miraru pahi, apaapa yaanikikusa yaaya aka onthukumanoni ni nteko woolaleerya. Masi amma khiyaahakalala vaavo apaapa yaakikusa awa ni yaanilotta voohiloka dhoohudhiha dha Anamoona a Yehova wiira ewiirihe apaapa ohiya okhupali, masi awo khiyaawenrye. Moohakalaliha nuuvira okathi, amma yaahipatisiwa. Nitho okathi kaaraakana iyaakha 13, kaahipatisiwa ni nuumala ophiyeriha iyaakha 16, kaahipacera orumeela nkhama piyoneera ookilaatheya. Nuumala orumeela nttetthe woothowa anamalaleerya wUmeå, kaahikhala piyoneera avameekhaaya.

Nuumala miyo vamodha ni Mats othelana, naanihakalala vawaatta waakhalihera atthu ohudhera ekhweeli. Ntthu mmodha naakhalihenre nhu ohudhera ekhweeli, mwaamwali mmodha oniitthaniwa Maivor yoowo aahin’ye nteko wa oweetta axooku wiira apacere orumeela nkhama piyoneera ni nhimaaka. Ndho awo yaahilaleiwa orowa eskola ya oXileyaadi mwaakha wa 1984 ni nenna-va anrumeela nkhama mamisiyonaariya wEquador.

Miruku dhini “mphuwele opuro mwaaliwe nnyu,” atthu dhaakhalihenre dhai okathi yaakhenla awa dhoothanleliwa dha orumeela mapuro oovirikana nkhama mamisiyonaariyu?

Mats: Hiyo nihaakhela dhoothanleliwa dhoovirikana ivaara dhawaatta. Masi etthu yaanikhalihera olamalela makhalelo mapheya, waari wiilipihera otakiha mikhalelo dha Yeesu, saasaasa wiiyeviha. (aKol. 2:6, 7) Mwa ntakihero, ohiya olipelela wiira anna a mapuro naathanleliwa nhu elamalele makhalelo nhu, hiyo naaniilipihera odhuwela moopora yaapaka awa itthu, dhoolema-dha ni moopora yuupuwela awa. Ndho vaavo naailipihera nhu ontakiha Yeesu, waaninikhweela olamalela makhalelo mapheya ni ohakalala ni dhoothanleliwa naakhela nhu.—Esal. 1:2, 3.

Ann-Catrin: Vaavo nttaikho onseiwa awa, wiira wunnuwe ohaana ophwanyiwa oviha ni waarya wa ndhuwa. Ndho Yehova aari nkhama ‘waarya wa ndhuwa’ waanimwaleela okathi wootheene. (Esal. 84:11) Owo oonivaha emudhi ya omunepani ya anna ni arokora a olumwinku wootheene, yaawo anoonihera oreera nrima ni opheta wuulupale. Mwa ntakihero, hiyo naataka orumeela muloko nkhaani wa oTeerã, elapo ya wIrã. Anna ni arokora a wIrã yaari oowaakhela aletto, elo yaaninuupusera atthu anromoliwa mbiibiliyani yaawo yaari oowaakhela aletto. Hiyo yaaninidhivela yoothanleliwa nhu ya orumeela elapo ele. Masi Julho a 1980 kuveernu a elapo ele aahikhoottiha nteko nhu ni naahileeliwa wiira nikhume elapo ele mpuwa wa mahiku maili. Ndho hiyo naahithanleliwa orowa orumeela oZaire (weiwo olelo-va ondhuweliwa okhala oCongo) elapo ya wÁfrica.

Nuumala odhuwela wiira naathanleliwe orowa orumeela wÁfrica, miyo kaahinla. Itthu kaaiwaka voohima dha inowa ni iretta dha wÁfrica, dhaakiiriha woova. Anamathelana amodha yaawo yaari axirikha nhu uulupale ni atanke orumeela wÁfrica mwa iyaakha dhawaatta, yaahinileela wiira: “Nyuwo atthu khantanke ophiya wÁfrica. Mwaakhulelaru orowa, nnawoona wiira onawoodhivelanwo!” Ni ti yeelo yaairanen’ye. Anna ni arokora tooreera nrima ni oopheta. Ndho nuumala miyaakha 6 vaavo naatthuneya nhu okhuma oZaire mwaha wa okhoottihiwa nteko nhu woolaleerya, miyo kaahitikiniheya vawaatta kikatheya meekhaaka okhala wiira kaaninvekela Yehova kiiraka: “Safatali Yehova, nnihiye wiira nikarumeela wenno.”

Mareeliho seeni atthu aphwannye awa mmutekoni wa Yehova?

Mats: Nimodha wa mareeliho nimphwanye nhu, ori waadhuwela ni waapaka oxirikha mamisiyonaariyu yaakhumme ilapo dhoovirikana. Ohiya-vo, naanihakalala vawaatta okhala wiira mapuro makina naarumeela nhu, khuta ntthu aanikhalana dhoosoma dha Biibiliya dhaaphiya 20. Nitho nkinkhala-khala kiliyalaka opheta ni nkhalelo woowaakhela aletto wa anna ni arokora a wÁfrica. Okathi naasekurya nhu miloko dha oTanzânia, hata anna a opuro ole yaari ohaawa, awo yaanipaka itthu dhootheene yaawerya awa wiira enaakhele. (2 aKor. 8:3) Mwa ntakihero, hata nuumala ophiya naarupa nkaroni mwihu, anna yaaninikoha akhala wiira naahikhalana itthu dhootheene naaramela nhu. Khuta nihiku odhoodhilo, waakhala okathi wavameekhaaya okhala wiira miyo vamodha ni Ann-Catrin naanikilaathi wiira nivaanele voohima dha itthu dhaairanen’ye nihiku nno ni wiira ninxukhurele Yehova mwaha wa onikhalihera.

Ann-Catrin: Miyo, mareeliho muulupale ankihakalaliha, ori waadhuwela anna ni arokora a olumwinku wootheene. Hiyo noohudha ilottelo ipheya ohela mpuwa efarisi, efaranseexi, elukanda ni eswaahili. Nitho nihaakhalihera anna ni arokora yaampatisiwaru wunnuwa nkhalelo wa omunepani, waapaka axirikha ooreera ni ovara vamodha naawo mmutekoni wa Yehova.—Sof. 3:9.

Etthu ekina yaanihakalaliha, waari woona itthu dhooreera ni dhoovirikana Yehova opattunse iye. Khuta yoothanleliwa naakhela nhu, waakhala nkhama Yehova aanileela ephuro naareerela nhu otthara. Owo oonihudhiha itthu dhawaatta nahaaya nhu owerya ohudha meekhinhu.

Mixankiho seeni atthu avirinhe awa ni eseeni yaakhalihenre ovilela?

Mats: Mwa miyaakha dhawaatta, hiyo noorava iretta dhawaatta mwaha wa mapuro naarumeela nhu, nkhama malaariya. Waahikhala okathi Ann-Catrin ampake iye operasaawu mwaha wa eretta yamphwannye mootutusera. Nitho naanixanka okhala wiira anaan’yari nhu, yaahipacera wuuluvala. Tivondho ninnaaxukhurela ahima nhu mwaha wa onikhalihera waakhapelela anaan’yari nhu. Awo yaapaka elo moopheta, moopisa nrima ni moohakalala. (1 Tim. 5:4) Hata naari ottaiwene, naanipaka itthu dhootheene naawerya nhu wiira naakhalihere anaan’yari nhu. Masi hata eri dhiidho, ivaara dhikina naaniriipiwa nrima ni wiivaha nthowa okhala wiira naanitthuna waakhalihera niri vamodha naawo.

Ann-Catrin: Mwaakha wa 1983 vaavo naarumeela nhu oZaire, miyo kaahinrava koolera ni kaahiwereiwa vawaatta. Ndho meetiku aahinleela Mats wiira: “Atthu ahaana okhuma elapo ela mwawaakuveya!” Ndho okhala wiira khinaamphwannye aviyaawu aakusa atthu, mmeelo mmwa naahinwela aviyaawu aahaakhulelihiwa waakusa atthu nikarowa oSuécia.

Mats: Ndho hiyo naahinla vawaatta nuupuwelaka wiira khinaatthikela nteko nhu wa omisiyonaariyu. Masi moovirikana ni ele meetiku uupuwela iye, Ann-Catrin aahipenuwa. Ndho nuumala mwaakha mmodha, hiyo naahitthikela yoothanleliwa nhu oZaire. Ekwaha ela, naathanleliwe orowa orumeela muloko nkhaani wa elottelo ya eswaahili esitati ya oLubumbashi.

Ann-Catrin: Niri oLubumbashi miyo kaahirupala, masi mooriipiha nrima erukulu yaahikhumamo. Nnaamwi okhalana mwaana yahaari yoolakela nhu, miyo kaahiriipiwa nrima vawaatta mwaha wa on’yeleela mwanaka. Masi okathi ole wooxankiha, Yehova aahinivaha etthu nahaalipelela nhu. Hiyo naahiwerya okhalana dhoosoma dha Biibiliya dhawaatta nahaatanke nhu okhalana. Mwa ntakihero, muloko nhu waarina anamalaleerya 35, ndho ohimanle mwaakha mmodha yaahaacerereya mpakha ophiya 70, ni atthu yoona mithukumano dhihu yaari 40 masi yaahaacerereya mpakha ophiya 220. Hiyo naaniluttuweliwa ni nteko woolaleerya, ni mareeliho ala a Yehova yaanikimaaliha. Masi mpakha olelo-va, hiyo ninnimuupuwelela mwanihu ni ninnivaanela voohima dha owo. Ninnilipelela woona moopora Yehova on’ya iye omaliha owereya ninoona nhu Mparayiisu.

Mats: Nuuvira okathi vakhaani, Ann-Catrin aahipacera wooceya ni ohikhalana ikuru. Okathi omodharu ni miyo-tho kaahiphwanyiwana kanseri, ndho kaatthuneya opakiwa operasaawu muulupale. Nenna-va, miyo koopenuwa ni Ann-Catrin onnipaka itthu dhootheene onwerya iye mmutekoni wa Yehova.

Hiyo nihoona wiira kahi meekhinhu ninviriha mixankiho. Nuuvira mixankiho dhootheene dhaakhumelenle oRuanda mwaakha wa 1994, hiyo naahaasekurya anna awaatta yaakhala opuro ankhala atthu atthanwe ekhotto. Naahoona waamini-wa, ovilela-wa ni nkhalelo-ya woowaakhela aletto hata okathi wooxankiha. Elo yoonihudhiha wiira Yehova okhalana owerya wa waakhapelela arumeyi-ye, moohixikha mixankiho anviriha awa.—Esal. 55:22.

Ann-Catrin: Nxankiho nkina waakhumelenle okathi naakele nhu woona ovahereriwa wa ebeteeli ya wUganda, mwaakha wa 2007. Nuumala nthukumano ole, hiyo vamodha ni mamisiyonaariyu 25 ni mabeteliita makina, naahipacera weetta nkwaha nirowaka oNairóbi, oQuênia. Masi nihinaphiye efronteira ya oQuênia, ekamiyawu emodha yaahirowa laatu naavira nhu ni yaahinkoma karera naanwenle nhu. Mooriipiha nrima naanaanoru motoriista vamodha ni anna 5, yaahuukhwa opuro ole. Nitho nuuvira okathi vakhaani, nrokora mmodha aahuukhwa ari ospitaale. Hiyo ninnilipelela moopisa nrima okathi nin’ya nhu otthikela owoona axirikha nhu awo!—Yobi 14:13-15.

Hata nuuvira okathi makhwatta aka yaavonle, nanlelo miyo, Mats vamodha ni atthu akina naawenlenhuna karera mmodha naaniriipiwa nrima mwaha wa asitenti ole. Ivaara dhikina ohiyu, miyo kaanituthuwa ni ovenya mwawaakuveya. Ndho elo yanikoopiha. Masi onvekela Yehova, osoma vamodha ni wuupuwelela dhawaatikhiwa dha mbiibiliyani dhinnidhivela, dhaaninikhalihera okhala oomaleleya. Nitho oveka nikhalihero wa mameetiku woonikhalihera vawaatta. Nenna, oxanka noona nhu onnivukuwa ni ninninvekela Yehova wiira aakhalihere ale anviriha nxankiho mmodharu.

Vaavo atthu yaalotta awa moopora anwerya awa ovilela mixankiho-dha, atthu alontte wiira Yehova ohaakhapelela nkhama dhiidhaale ntthu “onkhapelela iye mooce.” Moolumo ala antaphulelani?

Mats: Etthu eniirinhe olotta moolumo ala, mwaha wa nhapu wa eswaahili onlotta wiira: “Tumebebwa kama mayai mabichi.” Owo ontaphulela wiira: “Naahikusiwa nkhama mooce makithi.” Nkhama dhiidhaale ntthu onkusa iye mooce ni ephoole wiira ehiphweeye, mwa enamuna emodharu, Yehova onninikhalihera ni khuta yoothanleliwa ninaakhela nhu. Okathi wootheene ninnikhalana itthu dhinnithowa oxira idhe ninramela nhu. Enamuna emodha ninoona nhu opheta wa Yehova, ori moopora onaarumela iye anna a Nikhuru Noolamulela yaawo annoonihera ooreera nrima.

Ann-Catrin: Miyo kinoohakalala atthu waaleela yawiiraneya emodha enoonihera moopora Yehova onikhapelenle iye moopheta. Nihiku nimodha, kaahilikareliwa kikaleeliwa wiira apaapa yaawo yaakhala oSuécia yaaniwereiwa vawaatta ni yaahiroihiwa ospitaale. Okathi owo, Mats aaira awereiwaka malaariya ni khinaarina nsurukhu wa nkwaha. Tivondho naahilakela othumiha ekaaro nhu. Moohakalaliha naahaakhela ixaamata piili. Emodha yaari ya anamathelana amodha yaadhuwenle nxankiho nhu ni yaatthuna onivaha nsurukhu wiira niwerye orowa oSuécia. Examaata yanaaili yaari ya nrokora mmodha awuuluvala aapwenhe nsurukhu nkaaxani yeelo aatinkhe iye wiira: “Wa atthu ale antthuna okhaliheriwa.” Mootikiniha, Yehova aahiphuka nxankiho nhu naanaanoru!—aHeb. 13:6.

Itthu seeni atthu ahundha awa mwa iyaakha 50 ivinre atthu evaraka nteko wa Muluku wa okathi wootheene?

Ann-Catrin: Miyo koohudha wiira ikuru dhihu dhinlipa ni ‘ohihiya okhala oomaleleya ni onroromela’ Yehova. Vaavo nininroromela nhu Yehova moomalela, owo onninikhalihera ovilela mixankiho. (Yes. 30:15; 2 Wah. 20:15, 17) Mwaha wa wiilipihera waakhwanihera khuta yoothanleliwa, nihaakhela mareeliho awaatta nahaaya nhu ophwanya naathanlale ovara nteko nkina.

Mats: Miyo koohudha onroromela Yehova moohixikha mixankho kinviriha aka ni woona moopora onkikhalihera iye. (Esal. 37:5) Okathi wootheene Yehova onnikikhalihera nkhama olaihenre iye. Nitho nenna-va, ninnoona moopora Yehova onnikhalihera iye ni yoothanleliwa nhu ya orumeela ebeteeli ya oMianmar.

Hiyo ninlipelela wiira marapasi antthuna waacerera nteko aninvarela awa Muluku, yoone opheta omodharu Yehova onnoonihera iye. Nitho ninnikhupali wiira marapasi anoowerya woona elo, akhala wiira anawaakhulela okhaliheriwa ni Yehova wiira ekaphuwela khuta opuro an’ya awa ekaaliwa.