Niire Kihaana Ohiya Weettiha?

Niire elo enniiraneya ni nyuwo? Akhala wiira ti dhiidho, eseeni en’ya wookhaliherani othanla akhala wiira pooti ovikaniha weettiha aahiidho naari?

Ilapo dhikina, vaavo atthu awuuluvala antthuna awa ovikaniha weettiha, annivareryiwa ni meetiku wiira yooniwe akhala wiira pooti ovikaniha opaka elo aahiidho naari. Ndho makiristau ankhala ilapo idho, anniiwelela malamulo makhulupale ankhumihera awa voohima dha mwaha owo. (aRoma 13:1) Moohixikha elapo munkhala nnyu, dhookhala inamuna dhoovirikana nkhenle nnyu ovarerya wiira moone akhala wiira nlelo munniwerya weettiha saana ekaaro, moota aahiidho ncinka moophareleleya.

NVARERYE MOOPORA NNEETTIHA NNYU

Ntthenkeso wa atthu awuuluvala wa wEstados Unidos, onnaatumererya atthu awuuluvala wiipakela makoho ala anttharelana:

• Niire onnikiliperya osoma mapawe aahiidho woona saana ohiyu vaavo kineettiha aka ekaaro, moota aahiidho ncinka?

• Niire nanlelo onnikikhweela orukunsa muru aka wiira kilipele vaspeelyuni ni mapuro ooriipela?

• Niire nanlelo kinniwerya okhumiha nnawu naka mwawaakuveya va aseleratooreni ni onnyakela taravau?

• Niire kinnaataranyela atthu akina aneettiha mwaha miyo weettiha vakhaani?

• Niire mahiku avinre ottuli, kaahala vakhaani ompaka asitenti? Niire ekaaro, moota aahiidho ncinka aka, woosileya aahiidho ofottokhowa mwaha wa okoma itthu dheemenle?

• Niire kaataka weemesiwa ni mapoliisiya mwaha wa weettiha vawaatta?

• Niire kaataka otitheela keettihaka?

• Niire wookhala nrette kinca aka okhanle okikhumihera mixankiho vaavo kineettiha aka?

• Niire amudhi aka aahiidho axirikha aka aataka okileela wiira annixanka ni moopora kineettiha aka?

Akhala wiira nnaakhula wiira aayo nimodha aahiidho maili wa makoho ala, elo enoonihera wiira nhaana opaka marukunuso. Mwa ntakihero, nyuwo pooti othanla ivaara dhikina oheettiha ekaaro, moota aahiidho ncinka, saasaasa ohiyu. Khuta okathi nhaana ovarerya moopora nneettiha nnyu. Nnoonela dhai onkoha mmudhi nnyu aahiidho nxirikha nnyu wiira ooleeleni moopora nneettiha nnyu? Etthu ekina nkhanle nnyu opaka ori ompaka kuursu wiira nhudhere inamuna dhikina dha moopora wa weettiha moophareleleya. Masi akhala wiira makoho awaatta ari odhulu mwaakunle wiira aayo, woonawene etthu yooreerela opaka, ori ohiya weettiha.a

MWEETTIHIWE NI MALAKIHERO A MBIIBILIYANI

Woonawene pooti oniliperya odhuwela wiira khanineettiha saana nkhama khalai. Ndho wuupuwelela wiira nhaana ohiya weettiha pooti owiirihani oriipihani nrima. Masi Biibiliya on’ya wookhaliherani dhai ovarerya makhalelo nnyu wiira mpake yoothanla yooreera? Nirowe nithokorerye malakihero maili.

Nhihiye okhala awiiyeviha. (Mir. 11:2) Vaavo ninuuluvala nhu, ikuru dhihu dhinnivukuwa ni pooti opacera ohiwerya woona, wiiwa ni wuupuwela saana. Mwa ntakihero, atthu awaatta vaavo anuuluvala awa annihiya oweetta axooku yoovaka wiivulaliha. Etthu emodharu enniiraneya vaavo nineettiha nhu. Ntthu awiiyeviha pooti othanla ohiya weettiha mwaha wa otthuna okhala oophareleleya. (Mir. 22:3) Nitho vaavo atthu akina anlotta awa wiira annixankiheya nuuwo, onnaawiriyana ni ephoole.—Mmoone 2 Samuweli 21:15-17.

Nxake okhalana nthowa na ephome. (Otum. 22:8) Ekaaro, moota aahiidho ncinka pooti okhala itthu dhawoopiha akhala wiira khaineettihiwa moophareleleya. Vaavo ntthu ohinwerya iye weettiha saana, owo pooti opweha ekumi-ye mmaxakhani vamodha ni ya atthu akina. Ndho akhala wiira onoompaka asitenti, owo pooti okhalana nthowa na ephome.

Akhala wiira onnooliperyani othanla ohiya weettiha, nhixanke muupuwelaka wiira nnoohiya ottittimihiwa ni ovahiwa efaita. Yehova onnoophetani mwaha wa mikhalelo dhinyu dhooreera nkhama oreera nrima, wiiyeviha ni okoca winyu nreerelo wa atthu akina. Yehova onnilaihera wookhaliherani ni woomaalihani. (Yes. 46:4) Yehova khankhala-khala oonyanyalakani. Ndho munvekele owo wiira oovaheni akhili wiira yookhalihereni orumeela malakihero a mbiibiliyani wiira nthanle akhala wiira pooti ohiya weettiha ekaaro, moota aahiidho ncinka.