Awo Khiiyaakhwanihenre Etthu Yaalaihenra awa

Yehova aahinleela Moise wiira: ‘Nwele mwaako ola mpakha opuro kiraka. Miyo kinawaatikha dhooruma dhaka vamalukuni ni kinawoovahani.’ Moise aahiwela ni aahikhala omwaako iwe mahiku 40 othana ni ohiyu. Nanlelo Moise ari omwaako, Yehova ahatikha malamulo 10 arumelaka ipetaaso piili dha maluku. Malamulo awo annidhuweliwa okhala dhooruma 10.

Noovira okathi vakhani, Aisarayeeli yahipacera wuupuwela wiira Moise aahirimeela. Awo yahinleela Arooni wiira: ‘Ninintthuna ntthu wiira anikhumihe opuro ola. Nnipakele muluku nhu!’ Nuuvenya, Arooni ahavekela Aisarayeeli ewooru ni aahikusa ewooru ele atotosa apaka estatuwa ya emompe. Okathi Aisarayeeli yoonna-wa emompe ele, awo yaahipacera okokhorela ni yaahipaka efesta yuulupale ni yanilootta yiiraka: ‘Emompe ela Muluku nhu, ti yeela enikhuminhe Weexiitu!’ Niire wiira Aisarayeeli yaanireerela opaka etthu nkhama ele? Naari! Okhala wiira awo yaahilaihera onkokhorela Yehova pahi. Masi mooripiha nrima awo khiyakhwanihenre ele yaalaihenra awa.

Okathi Yehova onna iye ele, aahinleela Moise wiira: ‘Mwaakuve nkhuruwe. Anaisarayeeli aakitthekela, aapacera opaka itthu dhootakhala. Awo ahiipakela muluku-ya ekankokhorela.’ Moise aahikhuruwa Omwaako Sinaayi ni ipetaaso piili dha maluku.

Okathi Moise aattamela iye opuro ole, ahipacera owiiwa atthu yiipaka. Ndho ahalaka vakhaani ophiya, aahiwoona atthu yiinaka ni erukureryaka emompe ele. Moise aahinanariwa vawaatta. Owo ahirihela vaathi ipetaaso idhe piili dha maluku ni ikuuru-dhe dhootheene mpakha ophweeya. Moottharelana aahiphwesavo emompe ele. Ndho akankoha Arooni wiira: ‘Etthu seeni ewiirinheni waahiya atthu ala ewiirihakani opaka etthu yoohirya nkhama ela? Nyuwo khimwatthuneya opaka etthu nkhama ela!’ Arooni ahimwakhula Moise wiira: ‘Safatali nhinanariwe. Nyuwo moodhuwela saana mirima dha Anaisarayeeli. Awo yantthuna muluku-ya, tivondho kahavekela ewooru ni kitootosa vaikho ekhuma emompe ela!’ Nuuvenya Moise aahitthikela owela Omwaako Sinaayi ni aahinvekela Yehova wiira aalevelele Aisarayeeli.

Yehova aahaalevelela ale yaatthuna omwiiwelela. Nyuwo munniwerya woona? Para Yehova, wiwelela etthu yootepa otthuneya.