Anamahottela 12

Aisarayeeli yaahikhuma omwaako Sinaayi ni yaaheetta eviraka moothakoni. Okathi yaaphin’ya awa nttetthe onitthaniwa oKaati, Yehova aahinleela Moise wiira: ‘Mwaathanle alopwana 12, khuta nloko ntthu mmodha, wiira eroowe yaahottele oKanaani, elapo yeelo kintthunaka waavaha Aisarayeeli.’ Ndho Moise aahaathanla alopwana 12 ni aaleela wiira: ‘Atthu erowe oKanaani wiira yoone akhala wiira elapo elo ti yoodhivala. Nitho atthu yoone moopora era awa epoma elo vamodha ni atthu-ya akhala wiira toovatta aahindho tookhweya.’ Alopwana ale 12 yaahirowa elapo ya oKanaani, onhela mpuwa Yooxuwa ni Kalebi.

Nuuvira mahiku 40, anamahottela ale yaahitthika ekunse ifiiku, ewuuva, ni itthu dhiikina. Ndho yaahaleela Aisarayeeli itthu dhootheene yoonna awa yiiraka: ‘Etthaya ya wuuwu ti yoodhivala. Masi atthu ankhala elapo ele toovatta ni makokoro a epoma-ya toottaivela odhulu.’ Masi Kaleebi namahottela mmodha aahakhula wiira: ‘Ekhweeli, masi ata eri dhiidho nihiwoove, hiyo ninawawerya nkarowa naanano-va!’ Niire nyuwo munniwerya woona etthu yaamwiirinhe Kaleebi olotta dhiidho? Okhala wiira Kaleebi vamodha ni Yooxuwa yaaninroromela vawaatta Yehova. Masi anamahottela akina yalotta wiira: ‘Nhootothiwe! Atthu a oKanaani toovatta ni toottaiva! Nailattaniha ni awo naakhala nkhama itororope.’

Okathi Aisarayeeli yaaiwala awa moolumo ale, yaahiwoova vawaatta atthu a oKanaani. Awo yaahipacera wiidhinliha ni otthuna otthikela Weexiitu. Masi Yooxuwa ni Kaleebi yaahaamaaliha Aisarayeeli yiiraka: ‘Khanintthuneya owoova atthu a oKanaani, Yehova onoonikhapeleela masi nintthuneya ohiihiya omwiiwelela.’ Masi ata eri dhiidho Aisarayeeli khiyatthunne wiiwa miruku idhe ni yaanitthuna omwiipha Kaleebi ni Yooxuwa!

Yehova oonenle dhai ele? Owo aahinleela Moise wiira: ‘Kihaapakela itthu dhawaatta Aisarayeeli; masi ata eri dhiidho awo khantthuna okiiwelela. Ndho mwaha awa elo anooviriha miyaakha 40 yeettaka moothakoni ni anookhwa muumu. Ntthu on’ya ophiya elapo yoolaiheriwa ti Kaleebi, Yooxuwa ni anaahima an’ya ekayariwa ni anaaya Aisarayeeli.’