Omwene On’ya Olamulela Mahiku Ootheene

Ohiyu omodha, mwene Nabukodonosore aahiloha etthu yaantikininhe vawaatta ahikawerya orupa. Tivondho aahiwiitthana anahako-ye akaleela wiira: ‘Atthu ekileele etthu kilonhaka.’ Awo yaahakula wiira: ‘Ninawooleelani! Masi safatali, nnileele toko ethu nlohe nnyu.’ Nabukodonosore aahiwaakhula wiira: ‘Naari! Atthu veena ekileele pahi ele kilonhaaka, atthu yaahipake elo atthu kinoowiipha ootheene.’ Masi anahako ale yaahimwaakhula wiira: ‘Safatali nnileele etthu nlonhe nnyu, wiira noleeleni saana ele enttaphulela-wa.’ Mwene aahiwaakhula airaka: ‘Atthu veena antthuna okoototha, atthu ekileele naanaano-va yolohaka!’ Awo yaahimwaakhu mwene wiira: Etthu nvekenle nnyu amwene ti yoovila, khavo ntthu Onwerya otaphulela.

Nabukodonosori aahinanariwa vawaatta mpakha orumiha wiira yiipiwe adhuweli ootheene oBabiloniya, onhela mpuwa Daniyeeli, Sadrakhi, Mesahki, ni Abedineeku. Daniyeeli aahirowa onvekela mwene wiira anlipeleele okathi vakhaani. Ndho Daniyeeli vamodha ni axirikha-ye yaahinvekela Yehova wiira aakhalihere. Eseeni Yehova aapanke iye?

Yehova aahinleela Daniyeeli yooloha ya Nabukodonosore ni ele yaatapulela awa. Nihiku naattharelana, Daniyeeli aahinleela nrumeyi mmodha a mwene wiira: ‘Nhimwiipe ata ndhuweli mmodha! Miyo kinootaphulela yooloha ya mwene.’ Ndho, nrumeyi a mwene aahinkusa Daniyeeli anroiha wa Nabukodonosore. Ndho Daniyeeli aahinleela mwene airaka: ‘Muluku eekweeli ontthuna woodhuwelihani etthu en’ya wookhumelelani nhoolo. Itthu nlonhe nnyu ti idha: Nyuwo nhoona elatarato yaarina muru wa ewooru; etthirima ni miyoono-dha dhaari dheeparatha. Erukulu ni itara-dha dhaari dha ekoobiri; metto-dha dhaari dha eyuuma, manawu-ya yaari ayuuma yaattakaiheriwa ni oloko. Noomala-vo, naahimeiwa nluku vamwaako niphwesa elatarato elo, elo yaahiphweya ni yaahivavihiwa ni ettheku. Nluku nne naahipakeya mwaako muulupale waadhanle elapo yootheene.’

Daniyeeli aahinleela-tho Nabukodonosore wiira: ‘Muru wa eweero monne nnyu ni elatarato ele onthoonyera omwene nnyu. Eparatha entthoonyera omwene on’ya okhumelela nhoolo. Noomala-vo onookhumelela omwene nkina onlikana ni ekoobiri, yoowo on’ya okalaamulela elapo yootheene. Mottharelana onookhumelela nkina woolipa nkhama efeero. Omwene owo onookawanyeya; Mphantta mmodha onoolipa nkhama eyuuma, masi mphantta nkina on’ya okhala wookhweya nkhama oloko. Nluku moonne nnyu naapaken’ye mwaako nintaphulela Omwene wa Muluku. Owo onoopwetesa omwene wootheene wa nlaponi ni on’ya okhala wa mahiku ootheene.’

Noomala wiiwa elo, Nabukodonosori aahikokhora ohoolo wa Daniyeeli, akaanleela Daniyeeli wiira: ‘Muluku nnyu oholelani etthu kilonhaka! Khaavo Muluku nkina onlikana nuuwo.’ Ohiya omwiipha Daniyeeli, Nabukodonosore aahinkhaliha nkhulupale a adhuweli ootheene a oBabilooniya. Munniwerya woona moopora Yehova aakhunle iye nivekelo na Daniyeeli vamodha ni axirikha-ye?