Nlaikha Gabriyeeli Nilottaka ni Mariya

Esidadi ya oKalileeya aahikhala mwali mmodha aaitthaniwa Mariya. Owo aari mmudhi-ye Elizabeeti ni aanooivariwe ni nlopwana mmodha kalapinteero yoowo aaitthaniwa Yooseefe. Okathi Elizabeeti aavirinhe iye miyeeri 6 arupanle, nlaikha Gabriyeele naahinkhumelela-tho Mariya nikanleela wiira: ‘Nrettele okhale ni nyuwo Mariya! Yehova ohoothanlelani nteko wavameekhaaya.’ Mariya khaadhuwela ele yaataphulela awa moolumo ale, ndho Gabriyeele aahinleela wiira: ‘Nnoorupala ni nnoon’yara mwaana nnanlopwana, ndho nhaana onvaha ndhina nawiira Yeesu. Owo on’ya okhala Mwene ni Omwene-ye on’ya okhala wa mahiku ootheene.’

Mariya aahaakhula wiira: ‘Miyo nkinatake orupa ni nlopwana, ndho elo en’ya oweryaneya mooporani?’ Nlaikha Gabriyeele naahimwaakhula wiira: ‘Muluku khiyaavo etthu onoocela iye. Nnepa wawaarya onawookhuruwelani ni nnookhalana mwaana annanlopwana. Nitho mmudhi nnyu Elizabeeti nenna oorupala.’ Mariya aahaakhula wiira: ‘Miyo kanrumeyi a Yehova yiiraneye ni miyo nkhama nyuwo mmanle nnyu olotta.’

Moottharelana Mariya aahirowa onsekurya Elizabeeti, ndho okathi Mariya aankonhe iye ihaali Elizabeeti, mwaana aari mmirimani mwe aahiittikinya; ni Elizabeeti aahilotta wiira: ‘Mariya Yehova ohooreelihani! Eparakha yuulupale osekuriwa owannyaka ni maama a Pwiyaaka.’ Mariya ahaakhula wiira: ‘Elo ekhweeli kinnimuxukhurela vawaatta Yehova.’ Mariya aahikhala miyeeri miraru ni Elizabeeti, nuumala-vo aahitthikela elapo-ye oNazareeti.

Ndho noomala Yooseefe odhuwela wiira Mariya aahirupala, owo aahuupuwela onhiya moohidhuweliwa. Masi nlaikha naahinkhumelela Yooseefe moolohani nikanleela wiira: ‘Nhoove onthela Mariya! Khiyaavo etthu yootakhala Mariya opanke iye.’ Ndho Yooseefe aahinthela Mariya ni aahinkusa anthaamihera owannye.