Yeesu Aahinthanla Saulu

Saulu oyaariwe esidadi ya oTaarsi. Owo aari Nfarisi aadhuwela saana Malamulo aYuuda ni aanaanyookha makiristawu. Owo aanaakhanyerera alopwana ni athiyana yaari makiristau okhuma mmawannya akaatthukela nkateya. Nitho nihiku nhudheri Esteevau aavonyiwe iye ni maluku, Saulu aariweemela akanlipela pahi.

Okhala wiira Saulu aananyookha makiristawu ootheene, aahinvekela nkhulupale a anankuttho wiira amwaakhulelihe orowa esidadi ya oDamaasku, wiira aatthukele makiristawu a weeiwo. Ahalaka vaakhani ophiya esidadi ele, aahoona waarya wuulupale waammwalela, ndho aahimorela vathi. Moottharelana, aahiiwa ndhu ninkohaka wiira: ‘Saulu, munkinyokhelani?’ Saulu ahikoha wiira: ‘Nyuwo mwaani?’ Ndhu nne nahaakhula wiira: ‘Miyo ka Yeesu, nenna-va nrowe oDamaasku, weehiwo nnoodhuwela etthu munrereela nnyu opaka.’ Naanaanoru Saulu aahihiya woona, alopwana aariyena yaahimphareela ntata mpakha ophiya oDamaasku.

Odamasku, ahikhala-wo nlopwana mmodha aaitthaniwa Ananiiya. Ndho Yeesu aahinkhumelela moolohani akanleela wiira: ‘Nrowe ephuro eniitthaniwa yawookowa owannye Yuuda, mwankoce Saulu.’ Ananiiya aahilotta wiira: ‘Pwiya, miyo koodhuwela itthu dhootheene nlopwana ola ompaka iye! Owo onnatthukela ahudheri nnyu ootheene nkateya!’ Yeesu ahaakhula wiira: ‘Nroowe mwakumane nuuwo, miyo koontthanla Saulu wiira aalaleerye atthu a maloko ootheene ihapari dhoorera.’

Ananiiya aahirowa ni ahimphwanya Saulu akanleela wiira: ‘Saulu, Yeesu okiruma wiira kire koopenuseni.’ Naananoru, Saulu aahitthikela woona. Owo aahihudhera voohima dha Yeesu ni ahikhala nhudheri-ye. Nuumala Saulu opatisiwa, aahipacera olaleerya nsinakooka ni makiristau makina. Ayuuda yahittikinihiwa vawaatta nuumala omoona Saulu alaleyaka voohima dha Yeesu. Ni atthu yaanikohana yiiraka: ‘Ola kaahi nlopwana yoole aanyoka ahudheri a Yeesu?’

Saulu ahiviriha miyahka 3 aalaleeryaka atthu a oDamaasku. Masi aYuuda yaaninnyoka ni yaahilakela omwiipha. Okathi anna yaadhuwenla awa ele, yahinkhalihera Saulu wiira atthyawe. Wiira awerye othyawa, awo yaahinpweha nnikhankalani nuulupale ettula nikokoro na esidadi ele emphoviha.

Okathi Saulu aphin’ye iye oYerusaleemu, aanitthuna otakaihana ni makiristau aweeiwo masi awo yaanimoova. Ndho nhudheri mmoodha aitthaniwa Baarnaba, ahinrereela nrima Saulu. Owo aahinkusa Saulu anroiha wa ahudheri akaaleela wiira nlopwana ola oorukunsa mweettelo-ye. Saulu aahipacera olaleya ihapari dhooreera ni nthiti vamodha ni muloko wa oYerusaleemu. Nhoolomwa nuvira okathi ahihiiya witthaniwa Saulu akaitthaniwa Paaulu.