Mun’ya Owerya Dhai Ottottela Nreerelo Onsoma Biibiliya?

Niire nyuwo mootaka okhulumuwa mwaha wa wuupuwela nteko muulupale, mwahaadhuwela nnyu masi mwaaya nnyu ovara? Wiira nkhweihere itthu, woonawene nyuwo mwaahikawanya nteko owo miphantta mikhaani-mikhaani. Ndho akhala wiira ti dhiidho nyuwo nnoowerya opaka etthu emodharu ni yoosoma nnyu ya Biibiliya. Woonawene nyuwo munniikoha wiira: Masi kipacere vaai? Yoosoma ela, nin’ya woona itthu vakhaani dhookhweya muntthuneya nnyu opaka wiira yoosoma nnyu ya Biibiliya etepe woodhivelani ni wiiriha yoosoma nnyu okhala yootepa otthuneya.

1. Seeni eraawa etthu yootthuneya onsoma Biibiliya khuta nihiku?

Ntthu oninsoma Biibiliya, aahiidho “nlamulo na Muluku,” onnihakalala ni onnikhumela saana mweekumini-mwe. (Nsome Esalimo 1:1-3.) Wiira mpacere, mweeherere onsoma Biibiliya minuutu vakhaani khuta nihiku. Ndho vaavo mun’ya nnyu otepa odhuwela Nuulumo na Muluku, mun’ya nkatepa odhiveliwa onsoma Biibiliya.

2. Mun’ya owerya dhai ottottela nreerelo yoosoma nnyu ya Biibiliya?

Wiira nittottele nreerelo yoosoma ya Biibiliya, nihaana ‘wuupuwelela’ ele ninsoma nhu. (Yoxuwa 1:8) Elo entaphulela wiira nihaana weemela ni wuupuwelela ele nimanle nhu osoma. Okathi munsoma nnyu mwiikohe wiira: ‘Ela kinsoma aka enkihudhihani voohima dha Yehova? Kin’ya ovarihela dhai nteko mweekumini mwaka? Kin’ya orumeela dhai wiira kakhalihere atthu akina?’

3. Mun’ya ophwanya dhai okathi wiira munsome Biibiliya?

Niire onnooliperyani ophwanya okathi wiira munsome Biibiliya? Atthu awaatta anoona dhiidho. Masi mwehererye ‘orumeela saana okathi nnyu.’ (aEefeso 5:16) Nyuwo nnoowerya opaka elo akhala wiira khuta nihiku munniivaha okathi wiira munsome Biibiliya. Atthu akina anaaputi onsoma Biibiliya ohiihiyu ene. Akina osiyevo saaneene ni noomala onca almoosu. Nitho atthu akina onadhivela onsoma Biibiliya ohiyu ehinarowe wumpathi. Khi nyuwo ewoora seeni enoodhivelani?

NHUDHE ITTHU DHIKINA

4. Ndhiveliwe Onsoma Biibiliya

Ekhweeli wiira olipa ompacera onsoma Biibiliya. Masi nyuwo pooti ohudha okhalana “otthuna wuulupale” woopaka elo, niire dho, woodhiveliwa onsoma Biibiliya. Emodha-modharu enniiraneya ni okathi empacera awa woodhivelani eyooca nhinatake nnyu oca. Munsome 1 Pedru 2:2, nuuvinya mwaakhule nikoho ninttharelana:

• Nnoona wiira onsoma Biibiliya khuta nihiku, onawookhaliherani odhiveliwa onsoma?

Moone EVIIDIYU ni moone etthu atthu akinaku apanka awa wiira waadhivele onsoma Biibiliya. Nuuvinya mwaakhule makoho anttharelana.

EVIIDIYU: Marapasi Anhudha Opheta Nuulumo na Muluku (5:33)

• Nkhama moone nnyu eviidiyu, mixankiho seeni dhaakhottihera marapasi ale onsoma Biibiliya?

• Eseeni yaakhalihenre marapasi ale ohihiya onsoma Biibiliya khuta nihiku?

• Eseeni marapasi ale apanke awa wiira onsoma-wa Biibiliya okhale woohakalaliha?

Itthu dhin’ya wookhaliherani:

• Munthanle Biibiliya otaphuleliwe saana, ni ookhweya omwiiwasasa. Mwa ntakihero, Tradução do Novo Mundo akhala wiira onniphwanyaneya ni elottelo nnyu.

• Mpacere onsoma Biibiliya ipaarti nnoona nnyu wiira ti dhootepa otthuneya. Moone itthu dhikina dhiri vakwaaduruni yeelo eni: “Mpacere Onsoma Biibiliya.”

• Mwaatikhe etthu nsomme nnyu mBiibiliyani ehireere woodhivelani. Wiira mpake elo moone ekwaaduru eni: “Munnuupuwela Vatthu Nkhidhenre Nnyu-vo”.

• Munrumeele Apilikatiivu JW Library^®. Munrumeeka apilikatiivu ola, nyuwo nnoowerya onsoma Biibiliya ni owiiriyana osommwa wa Biibiliya munrumeelaka dixitale, tabeleti aahiidho komputatore.

• Mwarumeele maapendisi a Tradução do Novo Mundo. Maapendisi awo, akhalana maapha, itabela ni moolumo ootthokiheriwa an’ya owiirihayani otepa odhiveliwa onsoma Biibiliya.

5. Mpereparari yoosoma nnyu ya Biibiliya

Nsome Esalimo 119:34, nuuvinya mwaakhule nikoho ninttharelana:

• Seeni oraawa vootthuneya opaka nivekelo nhinatthi toko-toko opacera onsoma Biibiliya aahiidho nhinatthi okocihera yoosoma nnyu ya Biibiliya?

Mun’ya ottottela dhai nreerelo khuta yoosoma ya yoosoma ela ya Biibiliya? Vaavo mun’ya nnyu okocihera yoosoma nnyu mweeherere opaka itthu idha:

1. Nsome ittima dhoopacera dha yoosoma.

2. Nsome dhawaatikhiwa dha mBiibiliyani ni moone moopora yawaatikhiwa elo envarihana awa ni yoosoma elo.

3. Nkwerethe moolumo aahiidho ilinya dhinaakhula khuta nikoho; Elo enawookhaliherani ovaanela saana voohima dha yoosoma elo ni ole onoosomihani.

Niire mwaanidhuwela?

Anamoona a Yehova aharumeela aBiibiliya awaatta oovirikana. Masi hata eri dhiidho, Anamoona a Yehova onnaadhivela onrumeela Tradução do Novo Mundo da Biblia Sagrada okhala wiira tookhweya onsoma ni omwiiwasasa, ni onirumeela ndhina na Muluku. Moone mwaha ori nsaaitini “Niire Anamoona a Yehova Arina Biibiliya Oovirikana?”

WUULUULA

Wiira nttottele nreerelo ele Nuulumo na Muluku ninlotta awa mwiivahe okathi wiira munsome Biibiliya, nvekele wiira mwiiwasase ele munsoma nnyu ni mpereparari saana yoosoma nnyu ya Biibiliya.

Ipontu dhuulupale

• Eseeni en’ya wookhaliherani ottottela nreerelo ele Biibiliya onhudhiha iye?

• Mun’ya wiivaha liini okathi wiira munsome ni omwiiwasasa Biibiliya?

• Seeni oraawa vootthuneya opereparari yoosoma nnyu ya Biibiliya?

NTHOKODHE ITTHU DHIKINA

Moone itthu dhikina dhin’ya okhalihera onsoma winyu Biibiliya otepa woodhivelani.

“Eseeni En’ya Okhalihera Onsoma Winyu Biibiliya Otepa Woodhivelani” (A Sentinela N.º 1 de 2017)

Moone itthu tthaaru dha moopora wa onsoma Biibiliya.

“Biibiliya On’ya Okikalihera Dhai? Epaarti 1: Ondhuwela Saana Biibiliya” (Mwaha ori nsaaitini jw.org)

Nhudhe moopora woodhiveliwa onsoma Biibiliya.

“Biibiliya On’ya Okikalihera Dhai? Epaarti 2: Mwiirihe Onsoma Winyu Biibiliya Okhala Woohakalaliha” (Mwaha ori nsaaitini jw.org)

Moone itthu dhikina anlotta awa atthu apacenre khalai onsoma Bibiliya.

Nttottele Nreerelo Yoosoma Nnyu Ya Omwaneene (2:06)