YOOSOMA 01
Biibiliya On’ya Wookhaliherani Dhai?
Ootheene nhu ninnitthuna waakhuliwa wa makoho anlotta voohima dha ekumi, ohaawa, okhwa ni ele en’ya wiireya nhoolo. Nitho ninnixanka mwaha wa itthu dha wa khuta nihiku, nkhama moopora woophwanya eyooca ni moopora wookhalana ettheko yoohakalala. Ndho atthu awaatta ahoona wiira Biibiliya onnaakhula makoho ootepa otthuneya a mweekumini. Ohiya-vo, Biibiliya onninivaha miruku dhinnikhalihera ophwanya ohakalala weekhweeli. Nnoonela dhai, niire Biibiliya onoowerya onkhalihera mmudhi nnyu aahidho ntthu nkina nnindhuwela nnyu?
1. Makoho seeni Biibiliya onaakhula iye?
Biibiliya, onnaakhula makoho ootepa otthuneya nkhama ala: Ekumi epacenre dhai? Tiivi eri yoolakela ya ekumi? Seeni atthu anhaawa aya? Eseeni eniiraneya ntthu nuukhwa? Seeni dhihireera aya ikhotto atthu awaatta etthunaka nrettele? Eseeni en’ya wiiraneya ni elapo ela nhoolo? Kahiyo etthu yootakhala opaka makoho nkhama ala, maana atthu awaatta nlaponi ahoona wiira Biibiliya onnaakhula saaneene makoho ala.
2. Biibiliya on’ya onikhalihera dhai ophwanya ohakalala khuta nihiku?
Biibiliya, onninivaha miruku dhooreera. Mwa ntakihero, owo onninilela moopora atthu a vatthekoni an’ya aya ophwanya ohakalala weekhweeli. Nitho onninivaha miruku dhooloka dha moopora woovilela oriipiwa nrima ni odhiveliwa ni nteko ninvara nhu. Eliivuru ela, enawookhaliherani odhuwela ele Biibiliya onhudhiha iye voohima dha miyaha idho ni miyaha dhikina. Woonawene, munnikhupali wiira ‘Dhoolempwa dhootheene [aahiidho itthu dhootheene Biibiliya onlotta iye] dhinnivareleya nteko.’—2 Timootheyo 3:16.
Ebroxuura ela kheninranttela Biibiliya. Ohiya-vo, enawookhaliherani ondhuwela saana Biibiliya. Tivondho, mwiilipihere osoma dhawaatikha dhootheene dha khuta yoosoma, nlikanyihaka ele Biibiliya onlotta iye ni itthu munhudha nnyu.
NHUDHE ITTHU DHIKINA
Moone moopora Biibiliya aakhalihenra iye atthu awaatta, moopora mun’ya nnyu odhiveliwa onsoma Biibiliya, ni seeni eri aya etthu yooreera okhaliheriwa wiira mwiiwasase ele Biibiliya onhudhiha iye.
3. Biibiliya pooti weettiha ekumi nhu
Biibiliya ori nkhama ekamaama ya lanterna empatta vawaatta. Owo onoowerya onikhalihera opaka dhoothanla dhooreera ni onnilotta itthu dhin’ya wiiraneya nhoolo.
Nsome Esalimo 119:105, nuuvinya mwaakhule makoho anttharelana:
Nlipa-aatinkhe Esalimo ela aamoonela dhai Biibiliya?
Khi nyuwo nnimoonela dhai Biibiliya?
4. Biibiliya onniwerya waakhula makoho nhu
Safatali moone moopora Biibiliya aakhunle iye makoho a nthiyana mmodha, yaawo ahaadhuwela iye waakhuliwa-wa mwa iyaakha dhawaatta. Moone EVIIDIYU, nuuvinya mwaakhule makoho anttharela.
Nkhama moonne nnyu eviidiyu, makoho seeni aarin’yena nthiyana ole?
Ndho onsoma Biibiliya waankhalihenre dhai?
Biibiliya onninitumererya waadhya odhuwela waakhuliwa wa makoho nhu. Munsome Matheyo 7:7, nuuvinya mwaakhule nikoho ninttharelana:
Makoho seeni nrinnyuna mwaatthuna nnyu woona yaakhuliwaka mBiibiliyani?
5. Onawoodhivelani onsoma Biibiliya
Atthu awaatta onnaadhivela onsoma Biibiliya, ndho opaka elo ennaakhalihera vawaatta. Moone EVIIDIYU, nuuvinya mwaakhule makoho anttharelana.
Nkhama moonne nnyu eviidiyu, eseeni yaawiiriha amiravo ale ohidhiveliwa onsoma Biibiliya?
Ndho eseeni yaakhalihenre odhiveliwa onsoma Biibiliya?
Ele Biibiliya onlotta iye enoowerya onivaha nimaaliho ni nlipelelo. Munsome aRoma 15:4, nuuvinya mwaakhule nikoho ninttharelana:
Niire mwaanitthuna odhuwela moopora Biibiliya onnivaha iye nimaaliho ni nlipelelo?
6. Atthu akinaku anoowerya onikhalihera omwiiwasasa saana Biibiliya
Ohiya onsoma meekhaya pahi, atthu akinaku ahoona wiira anniwerya omwiiwasasa saana Biibiliya nenno ankhaliheriwa aya ni atthu akina. Munsome Miteko 8:26-31, nuuvinya mwaakhule nikoho ninttharela:
Nin’ya omwiiwasasa dhai Biibiliya?—Moone iversiikulu 30 ni 31.
Eliivuru ya Miteko enninlotta nlopwana mmodha a wEthiyopiya yoowo aakhaliheriwe wiiwasasa saana Dhawaatikhiwa. Nitho atthu awaatta olelo-va anoona wiira ti vooreera okhaliheriwa ni atthu akina wiira emwiiwasase saana Biibiliya
ATTHU AKINAKU ANLOTTA WIIRA: “Onsoma Biibiliya ntthu omperteri etempo ene mahala.”
Ndho nyuwo nnoonela dhai? Mwaha wa seeni?
WUULUULA
Biibiliya onninivaha miruku dhinnikhalihera khuta nihiku, onnaakhula makoho ootepa otthuneya a mweekumini, ni onninivaha nimaaliho ni nlipelelo.
Ipontu dhuulupale
Miruku seeni nimphwanya nhu mBiibiliyani?
Makoho seeni Biibiliya onnaakhula iye?
Itthu seeni muntthuna nnyu ohudha mBiibiliyani?
NTHOKODHE ITTHU DHIKINA
Moone moopora miruku dha mBiibiliyani dhinnikhalihera aya olelo.
“Miruku dha mBiibiliyani dhinnivareleya nteko okathi wootheene” (A Sentinela N°. 1 de 2018)
Moone moopora Biibiliya onkhalihenra iye nlopwana mmodha owanana miyuupuwelo dhoohiloka ovinya enamwana iye.
Moone miruku dha mBiibiliyani dhin’ya wookhaliherani okhalana ettheko yoohakalala.
“Ixiiri 12 Dhiniiriha Ittheko Okhala Dhoohakalala” (Despertai! N°. 2 de 2018)
Atthu awaatta anlotta wiira Muluku tonlamulela olumwinku. Niire elo ekhweeli? Moone ele Biibiliya onlotta iye.