YOOSOMA 16
Eseeni Yesu Aapanke iye Okathi Aaraiye Valaponi?
Vaavo atthu awaatta ammuupuwela awa Yesu, ammuupuwela nkhama mwaana, profeta aakhili aahiidho ammupuwela nlopwana aahala vakhaani okhwa. Masi okathi ninsoma nhu itthu Yesu aapanke iye okathi aaraiye valaponi ninnihudha itthu dhawaatta. Ndho yoosoma ela, nin’ya woona itthu Yesu aapanke iye ni moopora itthu idho dhin’ya awa wookhaliherani mweekumini mwinyu.
1. Tuuvi waari nteko wootepa otthuneya wa Yesu?
Nteko muulupale Yesu aavara iye waari ‘olaleya ihapari dhooreera dha Omwene wa Muluku’. (Munsome Luka 4:43.) Yesu aalaleerya ihapari dhooreera dha Omwene wa Muluku, niire dho, Ekuvernu ya Muluku yeelo en’ya omaliha mixankiho dhootheene dha apinaatamu.a (Moone enoota.) Mwa miyaakha miraru ni nuusu, Yesu aahivara nteko muulupale wiira aalaleerye atthu ihapari idha dhooreera dhinvaha nlipelelo.—Matheyo 9:35.
2. Seeni Yesu aapaka iye miiriirya?
Biibiliya onnilotta ‘miteko dhootikiniha, miiriirya ni ithoonyero dha Muluku opanke iye anrumeelaka Yesu.’ (Miteko 2:22) Arumeelaka ikuru aavahiwa iye ni Muluku Yesu ahiwerya omaaliha ettheku yuulupale, waaciha atthu yaavoliwe etala, waapenusa aretta ni waahihimusa atthu yaakhwiye. (Matheyo 8:23-27; 14:15-21; Marko 6:56; Luka 7:11-17) Miiriirya Yesu aapaka iye dhihoonihera wiira owo aarummwe ni Muluku. Nitho dhinoonihera wiira Yesu ookhalana owerya wuulupale wa omaliha mixankiho dhootheene dha apinaatamu.
3. Eseeni ninhudha nhu ni ekumi ya Yesu?
Okathi wootheene Yesu aanimwiiwelela Yehova. (Munsome Yohani 8:29.) Owo aahipaka elo ekumi iye yootheene hata okathi yoole dhamphwanya awa mixankiho. Yesu ohoonihera wiira apinaatamu anoowerya onrumeela Muluku hata dhaaphwanyaka mixankiho. Mwaha wa ovilela mixankiho idho, Yesu ‘oonivaha ntakihero wiira nitthare vakhiviru vene icampo dhe’.—1 Pedru 2:21.
NHUDHE ITTHU DHIKINA
Moone moopora Yesu olaleenrye iye ihapari dhooreera ni miiriirya opanke iye.
4. Yesu aanilaleerya ihapari dhoorera
Yesu aahetta ikiloometuru dhawaatta ilapo dhoovirikana aviraka iphuro dhawaatta ntthupi ni yoolakela emodha: Waalaleerya atthu awaatta ihapari dhooreera. Munsome Luka 8:1, nuuvinya mwaakhule makoho anttharela:
Niire Yesu aalaleerya pahi atthu yaale yaarwa opuro ariiye?
Eseeni enoonihera wiira Yesu aaniilipihera wiira aaphwanye atthu?
Muluku aahilaihera khalayiru wiira Mesiya anlaleerya ihapari dhooreera. Munsome Yesaya 61:1, 2, nuuvinya mwaakhule makoho anttharelana:
Yesu aakhwanihenre dhai eprofesiya ela?
Nnoona wiira tivootthuneya atthu olelo-va wiiwa ihapari idha dhoorera?
5. Yesu aahihudhiha ikhweeli dhootepa ootthuneya
Ohiya pahi olaleerya ihapari dhoorera dha Omwene wa Muluku, Yesu oovaha miruku dhooreera. Moone matakihero vakhaani ni mwaha muulupale aalontte iye vamwaako. Munsome Matheyo 6:14, 34 ni 7:12, nuuvinya mwaakhule makoho anttharelana:
Miruku seeni Yesu ovanhe iye iversiikulu idha?
Nnoona wiira miruku idha pooti waakhalihera atthu olelo-va?
6. Yesu aahipaka miiriirya
Yehova aahinvaha Yesu owerya wa opaka miiriirya dhawaatta. Moone ntakihero nimodha, Munsome Marko 5:25-34 aahiidho moone EVIIDIYU. Nuuvinya mwaakhule makoho anttharelana.
Nkhama moonne nnyu eviidiyu, nthiyana ole aaniwereiwa vawaatta. Masi hata eri dhiidho eseeni aakhupala iye?
Mwa mwiiriirya ola, eseeni etempe woodhivelani?
Munsome Yohani 5:36, nuuvinya mwaakhule nikoho ninttharelana:
Miiriirya Yesu aapaka iye dhaavaha onamoona wawani, aahiidho, dhooniherani?
Niire mwanidhuwela?
Itthu dhootheene nindhuwela nhu voohima dha Yesu dhiri mBiibiliyani eliivuru ya Matheyo, Marko, Luka ni Yohani. Iliivuru idho iniitthaniwa Ivanxeelyu. Mootikiniha khuta namaatikha oolotta itthu dhikina dhoovirikana voohima dha ekumi ya Yesu. Ndho vaavo ninsoma nhu itthu idho dhootheene, hiyo ninnihudha itthu Yesu aapanke iye mweekumini mwe okathi aariiye valaponi.
MATHEYO
Evanxeelyu epacenre waatikhiwa. Elo yookhalana itthu dhawaatta Yesu ohudhinhe iye, saasaasa dhoohudhiha voohima dha Omwene wa Muluku.
MARKO
Evanxeelyu yoomalela oyeva. Masi, elo eliivuru enhudhiha itthu dhuulupale ni dhootikiniha.
LUKA
Evanxeelyu ela, ennilotta moopora Yesu aavaha iye efaita ovekela ni moopora owo aacala iye athiyana.
YOHANI
Evanxeelyu ela, ennoonihera wiira Yesu aniviriha okathi wawaatta oopaka mwaha ni axirikha iye ni atthu akina. Elo enniwerya onikhalihera odhuwela mikhalelo dha Yesu.
ATTHU AKINAKU ANLOTTA WIIRA: “Yesu khaari Mwaana a Muluku. Owo ari ntthu ooreera nrima pahi”.
Nyuwo nnoonela dhai?
WUULUULA
Yesu aanilaleya omwene wa Muluku, aanipaka miiriirya ni aanimwiiwelela Yehova mwa itthu dhootheene.
Ipontu dhuulupale
Tuuvi waari nteko wootepa otthuneya wa Yesu okathi aaraiye valaponi?
Miiriirya dha Yesu dhooniherani?
Miruku seeni dhooreera Yesu ovanhe iye?
NTHOKODHE ITTHU DHIKINA
Etthu seeni yahaareera ondhivela Yesu olotta ni atthu?
“Seeni Yesu Onvaha iye Efaita Omwene wa Muluku” (A Sentinela, 1 de Outubro de 2014)
Moone etthu ennikhupaliha wiira miiriirya dha Yesu dhihiiraneya.
“Miiriirya dha Yesu Dhinnihudhihani?” (A Sentinela, 15 de Julho de 2004)
Nsome yawiiraneya ya nlopwana mmodha yoowo aarukunsale makhalelo a ekumi iye noomala ohudha moopora Yesu aathokorerya iye atthu.
“Miyo Kaakoca Itthu Dhaakiphwanyiha Mireerelo” (A Sentinela, 1 de Outubro de 2014)
Moone itthu dhootepa otthuneya Yesu opanke iye moovarihana ni okathi dhaaireya awa.
“Dhawiiraneya Dhootthuneya dha Mweekumini mwa Yesu valaponi” (Tradução do Novo Mundo da Bíblia Sagrada, Apêndice A7)
a Enoota: Yoosoma 31-33 dhin’ya olotta voohima dha Omwene wa Muluku.