YOOSOMA 17
Yesu Ari Ntthu a Nkhalelo Seeni?
Vaavo ninhudha nhu itthu Yesu aalontte iye ni apanke iye okathi araiye valaponi ninniwerya odhuwela mikhalelo-dhe. Ndho elo eninaattamaniha ni yeene ni Tiithi-ye Yehova. Mikhalelo seeni Yesu oriyeena? Nin’ya ontakiha dhai Yesu mweekumini mwihu?
1. Yesu onlikana dhai ni Tiithi-ye Yehova?
Yesu aakhala wiirimu vamodha ni Tiithi-ye oopheta iyaakha ibiliyawu dhawaatta ni aahihudha itthu dhawaatta ni Atiithi-ye. Tivondho, Yesu anuupuwela, aanoonela itthu ni onnipaka itthu mwa enamuna emodharu ni Tiithi-ye. (Munsome Yohani 5:19.) Veekhweeli, onnitakiha moomalela mikhalelo dha Tiithi-ye. Tivondho aalontte iye wiira: ‘Ole okoonne, nitho owoona Atiithi.’ (Yohani 14:9) Vaavo muntepa nnyu odhuwela mikhalelo dha Yesu, nyuwo nnootepa ondhuwela Yehova. Mwa ntakihero, woona moopora Yesu athokorerya iye atthu, enoonihera wiira Yehova onnoocalini.
2. Yesu oonihenre dhai wiira aanimpheta Yehova?
Yesu alontte wiira: ‘Wiira olumwenku odhuwele wiira miyo kinnaapheta Atiithi, kinniira nkhama dhiidhale Atiithi akirumme awa.’ (Yohani 14:31) Okathi aaraiye valaponi, Yesu aahoonihera wiira aanimpheta Tiithi-ye mwaha wa omwiiwelela mwa itthu dhootheene hata okathi wooxankiha. Ohiya-vo, Yesu waanindhivela vawaatta olotta voohima dha Tiithi-ye ni waakhalihera atthu okhala axirikha a Muluku.—Yohani 14:23.
3. Yesu oonihenre dhai wiira onnapheta atthu?
Biibiliya onlotta wiira Yesu ‘aanoona okhala vooreera okhala vamodha ni atthu.’ (Miruku 8:31) Okathi aaraiye valaponi, Yesu aanaareerela nrima atthu. Owo khaathokorerya atthu akina mootepana waaxira atthu akina. Ohiya-vo, owo aanirumeela moolumo ooreera wiira aalipihe atthu ni aanipaka dhootheene wiira aakhalihere akina. Miiriirya Yesu aapaka iye khidhoonihera pahi owerya aariiyena, masi-tho dhaanoonihera wiira yeene aanamorela ikharari atthu. (Marko 1:40-42) Moolumo a Yesu yaanaamaaliha ni waavaha nlipelelo atthu ootheene yarina nrima wooreera. Yesu aahaakhulela okhwa ni ohaawa okhala wiira aanapheta atthu. Masi owo onnaapheta saasaasa ale aniiwelela dhoohudhiha-dhe.—Munsome Yohani 15:13, 14.
NHUDHE ITTHU DHIKINA
Ndhuwele itthu dhikina ni mikhalelo dha Yesu. Nitho moone moopora wa woonihera opheta ni ovaha nkhama owo oonihenre iye.
4. Yesu onnaapheta Atiithi-ye
Ntakihero na Yesu, ninnoonihera moopora nin’ya nhu woonihera wiira ninnimpheta Muluku. Munsome Luka 6:12 ni Yohani 15:10; 17:26. Noomala osoma dhawaatikhiwa idha, mwaakhule nikoho ninttharelana:
Nintakihaka Yesu, nin’ya woonihera dhai wiira ninnimpheta Yehova?
Yesu anaapheta Atiithi-ye ni okathi wootheene aanilotta naawo apakaka nivekelo
5. Yesu onathokorerya atthu antthuna okhaliheriwa
Yesu aanitepa waathokorerya atthu wiihiya yeene. Owo aanirumeela okathi ni ikuru-dhe wiira aakhalihere atthu hata okathi aakhumuwa iye. Munsome Marko 6:30-44, nuuvinya mwaakhule makoho anttharelana:
Yesu oonihenre dhai wiira aanathokorerya atthu? —Moone eversiikulu 31, 34, 41, ni 42.
Etthu seeni yaamwiiriha Yesu waakalihera atthu? —Moone eversiikulu 34.
Nihoona wiira Yesu ontakiha mikhalelo dha Tiithi-ye. Ndho mikhalelo dha Yesu dhinnihudhihani voohima dha Yehova?
Nintakihaka Yesu, nin’ya woonihera dhai wiira ninaathokorerya atthu akina?
6. Yesu ntthu oovaha
Yesu, khaarina itthu dhawaatta, masi owo aanavaha atthu itthu aariiyeena. Nitho Yesu, ontthuna wiira hiyo nikhale atthu oovaha. Munsome Miteko 20:35, nuuvinya mwaakhule nikoho ninttharelana:
Moovarihana ni moolumo a Yesu, eseeni en’ya oniiriha okhala oohakalala?
Moone EVIIDIYU, nuuvinya mwaakhule nikoho ninttharelana.
Hata nihikhalakana itthu dhawaatta, nin’ya owerya dhai okhala ntthu oovaha?
Niire mwaanidhuwela?
Biibiliya onnihudhiha wiira nihaana onvekela Yehova mwa ndhina na Yesu. (Munsome Yohani 16:23, 24.) Okathi nimpaka nhu elo, ninnoonihera wiira ninnivaha efaita ele Yesu opanke iye wiira niwerye okhala axirikha a Yehova.
ATTHU AKINAKU ANLOTTA WIIRA: “Muluku khancali ohaawa wihu.”
Noohudha wiira khuta etthu Yesu onipaka iye, ontakiha mikhalelo dha Tiithi-ye. Itthu Yesu opanke iye dhinoonihera dhai wiira Yehova onninicali?
WUULUULA
Yesu onnimpheta Yehova ni onnaapheta atthu. Okhala wiira Yesu onnintakiha Tiithi-ye, ndho vaavo mun’ya nnyu ondhuwela Yesu, mun’ya ootepa ondhuwela Yehova.
Ipontu dhuulupale
Nintakihaka Yesu, nin’ya woonihera dhai wiira ninimpheta Yehova?
Nin’ya woonihera dhai wiira ninnaapheta atthu nkhama Yesu?
Mikhalelo seeni dha Yesu dhihireere woodhivelani?
NTHOKODHE ITTHU DHIKINA
Moone mikhalelo dhikina dha Yesu ninreerela nhu otakiha.
“Mutakihe Mikhalelo dha Yesu . . .” (Yesu—ti Ephiro, Ekeekhai ni Ekumi, epaaxina, 317)
Moone moopora oraawa vooreera ovekela mwa ndhina na Yesu.
“Seeni Ninreerela nhu Ovekela Mwa Ndhina na Yesu?” (A Sentinela, 1 de Fevereiro de 2008)
Niire Biibiliya onnilotta moopora ethoni ya Yesu yaaraawa?
“Ethoni ya Yesu Yaari Dhai?” (Mwaha ori nsaaitini jw.org)
Eseeni ninhudha nhu dha moopora Yesu aathokorerya iye athiyana?
“Nttittimiho ni Nlemeliho Muluku Onaavaha iye Athiyana” (A Sentinela, 1 de Setembro de 2012)