YOOSOMA 20
Muloko Okocihiwe Dhai?
Yehova Muluku ookociheya. (1 aKorinto 14:33) Tivondho arumeyi-ye ari awa ookociheya. Ndho muloko okocihiwe dhai? Nin’ya okhalihera dhai muloko okhala wookociheya?
1. Taani ori nhooleli a muloko?
“Kristu . . . [tori] muru wa muloko” (aEefeso 5:23) Ari wiirimu, Yesu onnihoolela miteko dha atthu a Yehova dhinvariwa olumwinku wootheene. Yesu onthanla ‘nrumeyi oororomeleya ni aakhili’, ekhurupu ekhaani ya alopwana arina waamini woolipa, yaawo aniitthaniwa Nikhuru Noolamulela. (Munsome Matheyo 24:45-47.) Khalai arummwa ni asitokweene a oYerusaleemu yaanivaha malakihero miloko dhootheene dha okathi ole. Emodha-modharu olelo, Nikhuru Noolamulela ninnivaha malakihero miloko dha olumwinku wootheene dha Anamoona a Yehova. (Miteko 15:2) Masi alopwana awo kahiyo ahooleli a ntthenkeso nhu. Awo anninsoma Biibiliya wiira edhuwele ele Yehova ontthuna iye wiira epake ni annitthara ohoolela wa Yesu Kiristu.
2. Asitokweene a mmulokoni taani ni eseeni anipaka awa?
Asitokweene alopwana arina waamini woolipa ni anninrumeela Biibiliya wiira yaahudhihe atthu a Muluku. Nitho awo ahivaherera wiira yaakhalihere ni waalipiha atthu aninrumeela Yehova. Awo khanlinvwa etthu mwaha wa nteko owo, ohiya-vo annivara ‘ni nrima wootheene, nkhama Muluku onitthuna iye. Annikhapelela ni nthiti, ohiya mwaha wootthuna ophwanya etthu.’ (1 Pedru 5:1, 2) Asitokweene annikhaliheriwa ni arumeyi ookhalihera, nuuvira okathi arumeyi awo ookhalihera awo annitthanliwa wiira ekhale asitokweene akhala wiira aakhalana mikhalelo dhinvekeliwa ni Biibiliya.
Nikhuru Noolamulela ninnaathanla asitokweene akina wiira ekhale asitokweene a esirkwiitu. Alopwana awo annisekurya miloko dhawaatta wiira evahe malakihero ni waalipiha anna. Asitokweene a esirkwiitu annitthara malakihero anvekeliwa mBiibiliyani wiira yoone akhala wiira munna onniphwanelela okhala ntokweene aahiidho nrumeyi ookhalihera.—1 Timootheyo 3:1-10, 12; Tito 1:5-9.
3. Nritti seeni khuta Namoona a Yehova oriiyena?
Atthu ootheene mmulokoni ‘annittottopela ndhina na Apwiya [Yehova]’, okathi wa mithukumano ni elaleeryaka ihapari dhooreera moovarihana ni makhalelo-ya.—Nsome Esalimo 148:12, 13.
NHUDHE ITTHU DHIKINA
Moone moopora Yesu oriiye nhooleli ooreera nrima ni moopora asitokweene aniilipihera awa otthara ntakihero one. Nitho moone moopora nin’ya nhu omwiiwelela Yesu ni waakhalihera asitokweene.
4. Yesu nhooleli ooreera nrima
Yesu oonivaha nlaleyo noophara nrima. Munsome Matheyo 11:28-30, nuuvinya mwaakhule nikoho ninttharelana:
Yesu nhooleli a nkhalelo seeni? Ndho owo ontthuna wiira noonele dhai ohoolela awe.
Asitokweene antthara dhai ntakihero na Yesu? Moone EVIIDIYU.
Biibiliya onnilotta moopora asitokweene akhanla awa ovara saana nteko-ya.
Munsome Yesaya 32:2 ni 1 Pedru 5:1-3, nuuvinya mwaakhule makoho anttharelana:
Nyuwo nnoonela dhai noomala odhuwela wiira asitokhweene anniilipihera wiira ekhale ooreera nrima entakihaka Yesu?
Inamuna seeni dhikina asitokweene anintakiha awa Yesu?
5. Asitokweene anninihudhiha enivahaka ntakihero nooreera
Yesu ontthuna wiira asitokweene yoonele dhai nteko anvara awa? Moone EVIIDIYU
Yesu ohaavaha malakihero atthu ootheene ale anhoolela miloko. Munsome Matheyo 23:8-12, nuuvinya mwaakhule nikoho ninttharelana:
Biibiliya onlotta wiira asitokweene ethokoreriwe dhai? Nyuwo nnoona wiira ahooleli a itiini annipaka elo?
Asitokweene annilipihera waatana awa ni Yehova ni annaakhalihera atthu a ettheko-ya opaka etthu emodharu
Asitokweene annaakhalihera atthu ootheene a mmulokoni
Asitokweene anniluttuweliwa olaleerya
Asitokweene annihudhiha Nuulumo na Muluku. Nitho annikhalihera oreerihiwa Empa ya Omwene ni miteko dhikina
6. Nihaana waakhalihera asitokweene
Biibiliya onninivaha mathowa ooreera wiira naakhalihere asitokweene. Munsome aHeeberi 13:17, nuuvinya mwaakhule nikoho ninttharelana:
Seeni Biibiliya onlotta iye wiira nihaana owiiwelela asitokweene ni nrima nhu wootheene? Nyuwo nnoonela dhai elo?
Munsome Luka 16:10, nuuvinya mwaakhule nikoho ninttharelana:
Seeni nintthuneya nhu owiiwelela asitokweene hata noonaka wiira mwaha owo kahi muulupalesa?
ATTHU AKINAKU ANLOTTA WIIRA: “Khivantthuneya okhalana etiini wiira ninkokhorele Muluku.”
Seeni onkokhorela Muluku vamodha ni atthu ale aninrumeela on’ya awa onikhalihera?
WUULUULA
Yesu tori nhooleli a muloko ni asitokweene antthara malakihero-ye. Ninnihakalala mwaha wa waakhalihera asitokweene okhala wiira awo tooreera nrima ni anninihudhiha enivahaka ntakihero nooreera.
Ipontu dhuulupale
Taani ori nhooleli a muloko?
Asitokweene ankhalihera dhai muloko?
Nritti seeni khuta ntthu oriiyena mmulokoni?
NTHOKODHE ITTHU DHIKINA
Moone itthu dhinooniheera wiira Nikhuru Noolamulela ni asitokweene akina annaacali Makiristau.
Moone nteko asitokweene a esirkwiitu anvara awa.
Nteko wa Ntokweene a Esirkwiitu Mapuro Oottaivela Ositati (4:51)
Moone nteko wootthuneya athiyana anvara awa mmulokoni.
“Niire Athiyana Ari Anamoona a Yehova Annikhala Ahooleli?” (A Sentinela, 1 de Setembro de 2012)
Moone moopora asitokweene anvara awa nteko wiira yaalipihe anna ni arokora.
“Asitokweene a Makiristau, Annivara Nteko ni Hiyo Wiira Nihakalale” (A Sentinela, 15 de Janeiro de 2013)