YOOSOMA 22
Mun’ya Waaleela Dhai Atthu Akina Ihapari Dhooreera?
Mpakha-va, nyuwo moohudha itthu dhawaatta dha mBiibiliyani, masi nyuwo pooti wuupuwela wiira, ‘Atthu oothene ahaana odhuwela itthu idha!’ Ekhweeli, wiira atthu ootheene annireerela odhuwela itthu idha! Hata eri dhiidho, woonawene nyuwo pooti owuulihani muru waaleela atthu akina itthu munhudha nnyu. Yoosoma ela, nin’ya woona moopora mun’ya nnyu owerya ohiya woova iwo ni ohakalala mwaha wa waaleela atthu akina voohima dha ihapari dhooreera.
1. Nyuwo mun’ya waaleela dhai atthu akina voohima dha itthu munhudha nnyu?
Ahudheri a Yesu yaalontte wiira: ‘Hiyo, khaninwerya ohiya olotta itthu noonale nhu ni niwale nhu.’ (Miteko 4:20) Awo yaanipheta ekhweeli, tivondho yaanitthuna awa waaleela atthu akina voohima dha itthu yaahudhe awa. Niire nyuwo nnoona dhiidho? Ndho, mwaadhye okathi wiira mwaaleele mwa nttittimiho amudhi nnyu ni axirikha nnyu voohima dha itthu munhudha nnyu.—Munsome aKolosi 4:6.
Moopora woopacera ovanela
Okathi mumpacera nnyu olotta ni mmudhi nnyu, itthu dha mBiibiliyani nyuwo woonawene pooti onleela dhaala: “Esumana ela koohudha etthu yootepa otthuneya”.
Mmoonihere yawaatikhiwa ya mBiibiliyani wiira mummaalihe nxirikha nnyu onwereiwa aahiidho oxankale.
Akhala wiira atthu ale munvarannyuna nteko ahookohani moopora mmalinhe nnyu esumana, mwaaleele etthu nhudhe nnyu yoosoma nnyu ya Biibiliya aahiidho omithukumanoni.
Nwoonihere axirikha nnyu esaaiti jw.org.
Munlaleye ntthu mmodha okathi nninsoma nnyu Biibiliya aahiidho mmoonihere moopora wa ovekela yoosoma ya Biibiliya nsaaitini jw.org.
2. Seeni oraawa vooreera olaleerya ni muloko?
Ahudheri a Yesu yaanipaka itthu dhikina ohiya pahi waalaleerya ihapari dhooreera atthu yaadhuwela awa. Masi yaanilaleerya mwa enamuna yookociheya. Yesu ‘aaharuma aili-aili orowa ipooma ni mapuro ootheene aaya iye ophiya’ wiira yalaleerye. (Luka 10:1) Elo yahavaha atthu awaatta eparakha yawiiwa ihapari dhooreera. Ohiya-vo, olaleerya vamodha ni atthu akina waanahakalaliha. (Luka 10:17) Niire nyuwo nnoowerya olaleerya vamodha ni muloko?
NHUDHE ITTHU DHIKINA
Moone moopora nyuwo mun’ya nnyu owerya ohiya woova ni ophwanya ohakalala mwaha wa okhalihera nteko woolaleerya ihapari dhooreera.
3. Yehova onawookhaliherani
Atthu akina annitthuna olaleerya, woonawene annixanka mwaha wa wuupuwela moopora atthu akinaku an’ya awa owoonela.
Niire nyuwo munnoova waaleela atthu akina voohima dha itthu munhudha nnyu? Mwaha wa seeni?
Moone EVIIDIYU, nuuvinya waakhule nikoho ninttharelana.
Marapasi ala Anamoona a Yehova nwenrye dhai ohiya woova?
Munsome Yesaya 41:10, nuuvinya mwaakhule nikoho ninttharela:
Akhala wiira nnyuwo munnoova olaleerya ovekela on’ya wookhaliherani dhai?
Niire mwaanidhuwela?
Atthu awaatta olelo ari Anamoona a Yehova, yoona wiira khanre ewerye olaleerya ihapari dhooreera. Moone ntakihero na munna mmodha a oRussia onitthaniwa Sergey. Owo oona wiira khana efaita ni waalaleerya atthu akina waninxankiha. Masi noomala aahipacera onsoma Biibiliya. Owo onlotta wiira: “Hata koova, kaahipacera waaleela atthu akina itthu khaahudha aka. Moohakalaliha, opacera waaleela atthu akina itthu kaahudha aka mBiibiliyani ohaacerera olipa waka nrima. Nitho elo yoolipiha vanrima vaka dhookhupali dhaka dha naanaano”.
4. Nlotte mooreera nrima
Okathi nnaaleela nnyu atthu ihapari dhooreera muupuwelele etthu mun’ya nnyu olotta ni moopora mun’ya nnyu olotta. Munsome 2 Timootheyo 2:24 ni 1 Pedru 3:15, nuuvinya mwaakhule makoho anttharelana:
Okathi nnaleela nnyu atthu akina voohima dha itthu munhudha nnyu mBiibiliyani mun’ya ovarihela dhai nteko itthu iversu idha dhinlotta awa?
Akhala wiira amudhi nnyu aahiidho axirika nnyu khankhupali itthu nnaleela nnyu. Etthu seeni mun’ya nnyu opaka? Etthu seeni mun’ya nnyu ohipaka?
Tiivi eri yootepa oreera: Olotta ni awo mwa waareerela nrima aahiidho waakhanyerera owiiwelelani? Mwaha wa seeni?
5. Waaleela atthu akina ihapari dhooreera onnihakalaliha
Yehova onvaha Yesu nteko woolaleerya ihapari dhooreera. Yesu oonela dhai nteko owo? Munsome Yohani 4:34, nuuvinya mwaakhule makoho anttharelana:
Ohiya pahi oniphwanyiha ekumi yooreera, oca onnihakalaliha. Seeni Yesu olikanyihale iye opaka yotthuna ya Muluku, (ohela mpuwa olaleerya ihapari dhooreera) ni eyooca?
Eseeni nyuwo nnoona nnyu wiira olaleerya ihapari dhooreera onnihakalaliha?
Itthu dhoopaka
Nthukumano wa eriyari ya esumana nvahe ephoole malakihero ninvahiwa nhu a moopora woolaleerya ihapari dhooreera.
Mwiidhatikhihe wiira nkapaka iphantta dha anaskola mithukumano dha eriyari ya esumana. Dhoothanleliwa dha anaskola pooti wookhaliherani ohoova waaleela atthu akina voohima dha itthu munhudha nnyu.
Nrumeele ikwaaduru dhini: Atthu Akinaku Anlotta Wiira” aahiidho “Atthu Akinaku Yookohani Wiira” wiira mwaakule makoho ni ndhuwele etthu yoolotta akhala wiira atthu khankhupali etthu munlotta nnyu.
ATTHU AKINAKU YOOKOHANI WIIRA: “Ihapari seeni nrinnyuna”?
Mwaaya orumeela dhai okathi owo wiira mwaaleele ele nhundhe nnyu okathi mwaansoma nnyu Biibiliya?
WUULUULA
Waaleela atthu akina ihapari dhooreera onnihakalaliha ni nteko wootepa okhweya.
Ipontu dhuulupale
Seeni ninaaleela nhu ihapari dhooreera atthu akina?
Nyuwo mun’ya owerya dhai opaka elo mooreera nrima?
Nyuwo mun’ya owerya dhai ohiya woova olaleerya?
NTHOKODHE ITTHU DHIKINA
Moone inamuna sese dhookhweya dha moopora woolaleerya ihapari dhooreera nrumeelaka ekartau ya osekurya ya esaaiti jw.org.
Moone itthu sese dhin’ya wookhaliherani owerya olaleerya ihapari dhoooreera.
“Niire Moolikana Wiira Nkhale Namaamedha a Atthu?” (A Sentinela, Setembro de 2020)
Moone moopora ntakihero na mBiibiliyani nin’ya awa wookhaliherani owerya olaleera ihapari dhooreera hata nri rapasi.
Ndhuwele moopora mun’ya nnyu waaleela itthu dha mBiibiliyani amudhi nnyu ahikhanle Anamoona a Yehova.
“Moopora wa Waaphara Nrima Amudhi Ahikhanle Anamoona a Yehova” (A Sentinela, 15 de Março de 2014)