Ntata na Yehova Kahi Nookhuveya

1. Moise oonihenre dhai wiira aninroromela Yehova vaavo aakhuminhe iye aIsarayeeli Weexiitu?

ELIIVURU ya aHeeberi ennaalotta atthu awaatta yaawo yoonihenre omwaamini Yehova. Mmodha a atthu awo ti Moise, yoowo arina waamini wuulupale. (aHeb. 3:2-5; 11:23-25) Owo aahoonihera waamini vaavo akhuminhe iye aIsarayeeli Weexiitu, ahimoovaka Farawu vamodha ni atoropa-ye. Anroromelaka Yehova, owo aahaahoolela aIsarayeeli okhuma Nlima Nooseera, mpakha ophiya moothakoni. (aHeb. 11:27-29) Moise khahin’ye ororomela Muluku hata aisarayeeli awaatta yaapacenre waakanyera wiira Yehova amwaakhapelela. Nitho waamini wa Moise khiwaamwiirinhe onyooniheya, noomala mwa mwiiriirya Yehova waavaha aIsarayeeli eyooca ni maadhi okathi yaaraawa moothakoni.a—Okhu. 15:22-25; Esal. 78:23-25.

2. Seeni Muluku aankonhe iye Moise wiira: ‘Niire ntata na Yehova ti nookhuveya?’ (Mothakoni 11:21-23)

² Nnaamwi Moise aarina waamini woolipa, noovira mwaakha mmodha Yehova awooponle aIsarayeeli Weexiitu, owo aahipacera wiikoha akhala wiira Yehova anwerya waavaha enama aIsarayeeeli ootheene nkhama aalaihenre iye. Moise khaadhuwela moopora Yehova aaya iye waavaha enama yaakhanle waaphiyera aIsarayeeli ootheene, okhala wiira yaahikhala atthu imilyawu dhawaatta ni moothakoni khiyarimo eyooca. Noomala Yehova aahinkoha Moise wiira: ‘Niire ntata na Yehova ti nookhuveya?’ (Munsome Mothakoni 11:21-23 Tradução do Novo Mundo da Bíblia Sagrada.) Yawaattikhiwa ela noolumo nawi ‘ntata na Yehova’ nintaphulela munepa wawaarya wa Muluku, niire dho, ikuru onrumeela iye wiira apake etthu ontthuna iye. Ndho ni moolumo makina, Yehova aankoha Moise wiira: ‘Nyuwo nnoona wiira nkinwerya opaka etthu kilaihenraaka?’

3. Seeni oraawa vootthuneya wuupuwelela nikoho Yehova ampakenle iye Moise?

³ Niire mootaka wiikoha akhala wiira Yehova onawookhapelelani oovahakani itthu dha veerutthuni munramela nnyu nyuwo ni emudhi nnyu? Voohixikha akhala wiira mootaka aahiidho naari, nikoho Yehova ampakenle iye Moise pooti wookhaliherani. Yoosoma ela, nin’ya woona etthu yaamwiiriha Moise ni aIsarayeeli waakanyera wiira Yehova amwaavaha itthu dha veerutthuni dhaathowa. Nitho ninawoona malakihero a mbiibiliyani an’ya onikhalihera olipiha onroromela wihu wiira ntata na Yehova kahi nookuveya.

NHUDHE ETTHU NI YAWIIRANEYA YA MOISE NI AISARAYEELI

4. Eseeni yaawiirinhe aIsarayeeli awaatta opacera waakanyera akhala wiira Yehova anwerya waavaha itthu yaaramela awa?

⁴ Eseeni yaawiirinhe aIsarayeeli awaatta opacera waakanyera akhala wiira Yehova anwerya waavaha itthu yaaramela awa? Awo vamodha ni ‘atthu awaatta yaakhale aIsarayeeli’ yaaneetta nkwaha muulupale ekhumaka Weexiitu erowaka Elapo Yoolaiheriwa. (Okhu. 12:38; Otum. 8:15) Nttitthi ole wa atthu yaakhanle aIsarayeeli vamodha ni aIsarayeeli yaahipacera wiidhiliha yiiraka yaahaaphwela oca emana. (Moth. 11:4-6) Noomala awo yaahipacera wunlela enama ni iyooca dhikina yaaca awa Weexiitu. Okhala wiira atthu awo yaaninva nthowa Moise, owo aahuupuwela wiira aahaana waavaha enama aIsarayeeli ootheene, masi Moise khaadhuwela moopora woopaka elo.—Moth. 11:13, 14.

5-6. Aisarayeeli yaaravihiwe dhai ohixukhuru ni atthu akina, ndho eseeni ninhudha nhu?

⁵ Okhala wiira atthu yaakhanle aIsarayeeli yaari oohixukhuru, woonawene nkhalelo owo yaahaaraviha aIsarayeeli. Etthu yaakhumelele aIsarayeeli pooti oniiraneela. Okhala wiira ninkhala eriyari ya atthu oohixukhuru, ndho hiyo pooti opacera wiidhiliha aahiidho ohixukhurela itthu Yehova onnivaha iye. Elo pooti wiireya akhala wiira ninoopacera wuupuwelela itthu naarinhuna khalai aahiidho okhalela nrima itthu dha atthu akina. Masi ninoowerya okhala atthu oxukhuru akhala wiira ninoohakalala ni itthu nirinhuna, moohixikha makhalelo nhu.

⁶ Aisarayeeli yaanitthuneya wuupuwelela itthu Yehova aalaihenre iye. Owo aahaaleela wiira noomala ophiya Elapo Yoolaiheriwa amwaavaha itthu dhawaatta dha veerutthuni oxira idhe yaaramela awa. Masi yoolaihera ela yaaya wiiraneya pahi Elapo Yoolaiheriwa, ohiya moothakoni. Mwa enamuna emodharu, ohiya wuupuwelela itthu nihinwerya nhu ophwanya olumwinku ola, nihaana wuupuwelela pahi itthu Yehova onlaihera iye onivaha elapo epheya. Ohiya-vo, tivootthuneya wuupuwelela dhawaatikhiwa dha mbiibiliyani dhinaacerera onroromela wihu Yehova.

7. Seeni ninreerela nhu okhupali wiira ntata na Yehova kahi nookhuveya?

⁷ Woonawene, nyuwo pooti wiikoha nthowa naamwiirinhe Muluku onkoha Moise wiira: ‘Niire ntata na Yehova ti nookhuveya?’ Yehova aatthuna onkhalihera Moise odhuwele wiira owerya-we khonkota ni onoowerya onkhalihera khuta ntthu voohixikha opuro oriiye. Ndho nnaamwi aIsarayeeli yaari moothakoni, Yehova anwerya waavaha enama yaaphiyera. ‘Ni ntata-ne na ikuru ni ookonle moono-ye,’ Muluku aahoonihera owerya-we. (Esal. 136:11, 12) Ndho okathi ninhoolela nhu nxankiho muulupale, nikhupali wiira Yehova onoowerya onikhalihera voohixikha opuro nri nhu.—Esal. 138:6, 7.

8. Nin’ya owerya dhai oxaka opaka yoovonya emodharu yaapanka awa aIsarayeeli moothakoni? (Moone-tho efootu.)

⁸ Yehova aahaakhwanihera etthu aalaihenre iye aavahaka enama yawaatta ya anapiri. Masi aIsarayeeli kiyaaxukhurele mwiiriirya Yehova aapakenle iye. Ohiya-vo, awo yaahoonihera ohiphiyeriwa ivirihaka nihiku nootheene yaattottelaka anapiri awaatta oxira ale yaaramela awa. Yehova aahinanariwa ni ale ‘yoonihenre ohiphiyeriwa’ ni ahaahukhuma. (Moth. 11:31-34) Yawiiraneya ela enninihudhiha etthu yuulupale. Nihaana oxaka okhala atthu oohiphiyeriwa. Voohixikha akhala wiira na atthu oothaciri aahiidho oohaawa, nihaana opweha nipuro noopacera wiithukumanyera ‘mihakhu wiirimu,’ nilipihaka waataana wihu ni Yehova vamodha ni Yeesu. (Math. 6:19, 20; Luka 16:9) Napaka elo, nikhupaliwa wiira Yehova onoonivaha itthu dhootheene dhinnithowa.

9. Eseeni munreerela nnyu okhupali?

⁹ Yehova ori oolikaneene wiira aakhalihere arumeyi-ye okathi wootheene. Masi elo khentaphulela wiira khaninkhala-khala nithoiwaka nsurukhu aahiidho ovoliwa etala.b Masi nkhupali wiira Yehova khankhala-khala aninyanyalaka. Owo onoonivaha ikuru ninramela wiira nivilela mixankiho dhoovirikana. Nin’ya woonihera dhai wiira ninninroromela Yehova wiira onoonikhalihera anivahaka itthu dhinnithowa? Nirowe noone inamuna piili nikhale nhu opaka elo: (1) Vaavo ninviriha nhu nxankiho wa othoiwa nsurukhu ni (2) vaavo ninuupuwela nhu moopora woophwanya nsurukhu on’ya onikhalihera nuuluvala.

VAAVO NINVIRIHA NHU NXANKIHO WA OTHOIWA NSURUKHU

10. Mixankiho seeni dhikhanle oniiriha othoiwa nsurukhu?

¹⁰ Hiyo ninnidhuwela wiira vaavo ninaattamela nhu wookhidherani wa olumwinku ola, makhalelo a ekumi ekaantepa okhala ooxankiha. Ndho, elo pooti wiiraneya mwaha wa ohiiwanana wa anapoliitika, ikhotto, ihasara dha ephattu aahiidho iretta dhawaakuva wuunlaana. Itthu idho pooti oniiriha othama opuro ninkhala nhu, oyeleela nteko nhu aahiidho ohiwerya ophwanya nsurukhu woociha ettheko. Eseeni en’ya onnikhalihera opaka yoothanla enoonihera wiira ninniroromela owerya wa Yehova?

11. Eseeni en’ya wookhaliherani ovilela nxankiho wa othoiwa nsurukhu? (Luka 12:29-31)

¹¹ Etthu yoopacera ni yootepa ootthuneya en’ya wookhaliherani vawaatta, ori onleela Yehova mixankiho dhootheene munviriha nnyu. (Mir 16:3) Munvekele Yehova akhili wiira mpake dhoothanla dhooreera, ni nxaka ‘oriipiwa nrima mootepana’ vaavo munviriha nnyu nxankiho. (Munsome Luka 12:29-31.) Munveke Yehova wiira ookhalihereni okhala oohakalala ni itthu nrinnyuna. (1 Tim. 6:7, 8) Nrumeele iliivuru dhihu wiira nthokodhe moopora woovilela nxankiho wa othoiwa aahiidho omaleliwa nsurukhu. Nitho iviidiyu ni miyaha dhiri esaati jw.org dhinlotta voohima dha othoiwa nsurukhu, dhihaakhalihera atthu awaatta.

12. Makoho seeni akhanle onkhalihera nkiristau opaka yoothanla yooreera wiira akhalihere emudhi-ye?

¹² Atthu akina anithamela opuro nkina woottaivelana ni emudhi-ya wiira evare nteko. Noovira okathi, awo annoona wiira aapaka yoothanla yoohiloka. Ndho nhinatthi waakhulela nteko, nhaana wuupuwele mixankiho nteko owo nkhanla awa wookumiherani nkhalelo wa omunepani, ohiya pahi wuupuwelela nsurukhu mun’ya nnyu waakhela. (Luka 14:28) Wiira mpake elo, nhaana wiikoha makoho anttharelana: ‘Mixankiho seeni dhikhanle okhumelela akhala wiira kinooviriha okathi wawaatta kiri ottaiwene ni emudhi aka? Niire kapacera ovara nteko ola okankiiriha orowa omithukumano, ovara nteko woolaleerya ni oviriha okathi wawaatta ni anna ni arokora?’ Akhala wiira mookhalana anamwane nhaana wiipakela nikoho nna nootepa ootthuneya: ‘Kiire kinoowerya waakhalihera anaaka ‘omwaattamela Yehova ni omwiiwelela’ kiri ottaiwene?’ (aEefe. 6:4) Ndho mpake dhoothanla dhinvarihana ni moonelo wa Yehova, ohiya ele anlotta awa amudhi nnyu, aahiidho axirikha nnyu ahintthara malakihero a mbiibiliyani.c Tony yoowo onkhala wÁsia Ocidental, aahivahiwa eparakha ya ovara nteko elapo ekina aaya iye waakhela nsurukhu wawaatta. Masi noomala ovekela voohima dha mwaha ole ni ovaanela ni amwaariye, aahilakela okhotta eparakha ele ni waadhya inamuna dhoovirikana wiira akhweihe ekumi-ye. Tony onlotta wiira: “Mwaha wa opaka yoothanla ele, kaahikhalana eparakha ya waakhalihera atthu awaatta ohudha ekhweeli ni waakhalihera ana aka opacera ompheta Yehova. Emudhi aka yoohudha wiira akhala wiira ninootthara miruku dhiri Matheyo 6:33, Yehova onoonikhapelela.”

VAAVO NNUUPUWELA NNYU MOOPORA WOOPHWANYA NSURUKHU NOOMALA WUULUVALA

13. Etthu seeni ninreerela nhu opaka nenna-va wiira niwerye okhalana itthu dhinnithowa noomala wuuluvala?

¹³ Nitho ninnoonihera wiira ninninromela Yehova vaavo nnuupuwela nhu moopora ekumi nhu en’ya awa okhala nhoolo nuuluvala. Biibiliya onninitumererya ovara nteko wiira niwerye okhalana nhoolo itthu veerutthuni dhinnithowa. (Mir. 6:6-11) Vaakhala wiira onniweryaneya, nhaana opweha nsurukhu, okhala wiira owo onniwerya okhapelela. (Mus. 7:12) Masi nihikhala-khake nihihiyaka nsurukhu okhalaka etthu yootepa otthuneya mweekumini mwihu.

14. AHeeberi 13:5 onnikhalihera dhai ohitepa oxanka ni itthu dhin’ya onikhumelela nhoolo noomala wuuluvala?

¹⁴ Yeesu aahilotta nlikanyiho nimodha ninoonihera wiira tivoololo wiithukumanyera mihakhu, ohiya okhala ‘thaaciri wa Muluku.’ (Luka 12:16-21) Khaavo ondhuwela etthu en’ya oniiraneela meelo. (Mir. 23:4, 5; Yak. 4:13-15) Nkhama atthareli Yeesu nookhalana nxankiho. Yeesu olontte wiira nihaana ‘ohiya dhootheene nirinhuna’ wiira nikhale ahudheri a Yeesu. (Luka 14:33) Elo yaahaakhumelela Makiristau a eseekulu yoopacera yaakhala oYudeya. Masi hata yaapwetheiwe mireerelo-dha, owo khiyaahin’ye okhala oohakalala. (aHeb. 10:34) Olelo-va, anna awaatta aayelela nteko ni mireerelo mwaha wa ohikhalihera epartiitu emodha ya epoliitika. (Wiis. 13:16, 17) Eseeni yaakhalihenre opaka elo? Awo anniroromela ni nrima wootheene yoolaihera ya Yehova eni: ‘Miyo nkinkhala-khala koohiyakani, nitho nkinkhala-khala koonyanyalakani.’ (Munsome aHeeberi 13:5.) Tivondho, nipake itthu dhootheene ninwerya nhu wiira nikhalena itthu nin’ya nhu oramela noomala wuuluvala ni nikhupali ni nrima wootheene wiira yaanikhumelela etthu yootutusera Yehova onoonikhalihera.

15. Moonelo seeni anaan’yari ari Makiristau anreerela awa okhalana vaavo anaahuwa awa aana? (Moone-tho efootu.)

¹⁵ Ilapo dhikina, anamathelana anilakela waayara anamwane wiira noomala wuuluvala yaakhapelele. Awo annaathokorerya anamwane anaayara awa nkhama “ntthawelo wiira akhapeleliwe.” Masi Biibiliya onlotta wiira anaan’yari tarina nritti wa waakhapelela ana, yaavahaka itthu dhinaathowa. (2 aKor. 12:14) Ekhweeli wiira vaavo anaan’yari anuuluvala awa, woonawene pooti otthuna okhaliheriwa ni ana yaavahaka nsurukhu. Ndho anamwane awaatta annihakalala opaka elo. (1 Tim. 5:4) Anaan’yari aninroromela Yehova annidhuwela wiira ohakalala khonra mwaha wa waahuwa anamwane wiira yaakhalihera nhoolo noomala wuuluvala yaavahaka nsurukhu, masi awo annahuwa wiira enrumeela Yehova.—3 Yohani 4.

16. Anaan’yari an’ya owerya dhai waakhalihera ana nenna-va, wiira nhoolo ewerya okhalana itthu dhinaathowa? (aEefeso 4:28)

¹⁶ Vaavo nninhudhiha nnyu mwaninyu nteko okhanle onkhalihera okhalana itthu dhininthowa, munvahe ntakihero ni moonihere wiira munninroromela Yehova. Okhuma enamwane, mwaakhalihere aninnyu woona wiira tivootthuneya ovara nteko. (Mir. 29:21; Munsome aEefeso 4:28.) Ndho, vaavo aninnuuwa awa mwaakhalihere okhumela saana oskola. Anaan’yari ahaana othokodha malakihero a mbiilbiliyani ni waakhalihera ana opaka dhoothanla dhooreera voohima dha osoma. Yoolakela yuulupale ya anaan’yari ehaana okhala waakhalihera ana owerya ophwanya nsurukhu wiira ekawerya othuma itthu dhinaathowa ni wiilipihera ovara nteko woolaleerya ni vaaweryaneyaka orumeela nkhama piyoneeru.

17. Eseeni ninreerela nhu okhupali?

¹⁷ Arumeyi oororomeleya a Yehova ahaana okhupali ni nrima wootheene wiira Yehova ontthuna waakhalihere avahaka itthu dhinaathowa. Vaavo ninaattamela nhu wookhidherani wa olumwinku ola, nihaana waacerera onroromela wihu Yehova. Ndho voohixikha etthu enkhanle onikhumelela, nihihiye onroromela Yehova wiira onoonivaha itthu dhinnithowa arumeelaka owerya-we. Tivondho nikhupali ni nrima wootheene wiira ntata noowerya na Yehova ni moono ookolenle iye kahi wookuveya wiira onikhalihera opuro nri nhu.