YOOSOMA YA MWAHA 26
NCIPO 123 Nimwiiweleleke Yehova ni Mutthenkeso Awe
Mwawiiyeviha Mwaakhulele Wiira Dhookhala Itthu Nhindhuwela Nnyu
“Hiyo khaninwerya omusuwela saana Muluku Oowerya Sootheene.”—YOBI 37:23.
ETTHU NIN’YA NHU OHUDHA
Nin’ya woona moopora woovilela mixankiho naakhuleleka mwawiiyeviha wiira dhookhala itthu nihindhuwela nhu, nilipaka ni itthu nindhuwela ni ohihiya onroromela Yehova.
1. Owerya seeni Yehova onivanhe iye, ni eseeni emwiirinhe opaka elo?
YEHOVA onipattunse mwa enamuna yootikiniha enniiriha owerya wuupuwelela, ohudha itthu ipheya ni woona moopora woovarihela nteko itthu ninhudha nhu. Eseeni emwiirinhe Yehova onipattusa mwa enamuna elo? Owo ontthuna wiira ‘niphwanye odhuwela wa Muluku’ ni nipaka dhoothanla nirumeelaka muupuwela nhu ohudhihiwe ni Biibiliya wiira ninrumeele.—Mir. 2:1-5; aRoma 12:1.
2. (a) Nnaamwi nipattusiwe mwa enamuna yootikiniha, eseeni nihinwerya nhu opaka? (Yobi 37:23, 24) (Moone-tho efootu.) (b) Mireerelo seeni nimphwanya nhu vaavo mwawiiyeviha ninaakhulela wiira khanidhuwele itthu dhootheene?
2 Nnaamwi nipattusiwe mwa enamuna yootikiniha enniiriha owerya ohudha itthu dhawaatta, hiyo khaninwerya odhuwela itthu dhootheene. (Munsome Yobi 37:23, 24.) Nkahaya muupuwele ntakihero na Yoobi. Yehova aahimpakela makoho awaatta Yoobi yaamwiirihe woona wiira dhaahikhala itthu dhawaatta aahaadhuwela iye. Ndho elo yaahikhalihera Yoobi woona wiira aanitthuneya okhala awiiyeviha ni orukunsa muupuwelo-ye. (Yobi 42:3-6) Nitho ninniphwanya mireerelo dhawaatta vaavo mwawiiyeviha ninaakhulela nhu wiira khanidhuwele itthu dhootheene. Elo enninikhalihera onroromela Yehova ni nrima wootheene nihaakanyera wiira okathi wootheene onoonileela etthu ninreerela nhu odhuwela wiira niwerye opaka dhoothanla dhooreera.—Mir. 2:6.
Nkhama Yoobi, akhala wiira ninawaakhulela wiira dhookhala itthu nihindhuwela nhu ninoophwanya mireerelo (Moone ettima 2)
3. Eseeni nin’ya nhu woona yoosoma ela?
3 Yoosoma ela, nin’ya woona itthu vakhaani nihindhuwela nhu ni mixankiho woonawene dhikhanle okhumelela mwaha wa ohidhuwela itthu dhootheene dhinhela mpuwa miyaha idho. Nitho ninawoona seeni eri awa etthu yooreera ohidhuwela itthu dhikina. Ndho othokorerya miyaha idho inoonikhalihera olipiha ororomela wihu Yehova ‘yoowo orina odhuwela woomalela’ ni onwerya onnileela itthu ninreerela nhu odhuwela.—Yobi 37:16.
HIYO KHANINDHUWELA NIHIKU AN’YA AWA OMALA MAKHALELO A OLUMWINKU OLA
4. Moovarihana ni Matheyo 24:36, etthu seeni nihindhuwela nhu?
4 Munsome Matheyo 24:36. Hiyo khanindhuwela nihiku an’ya awa omala makhalelo a olumwinku ola. Hata okathi Yeesu aari iye valaponi, owo khaadhuwela nnakhala ‘nihiku ni ewoora.’a Nuuvira okathi, Yeesu aahaaleela arummwa wiira Yehova tori Mwaneene okathi ni okhalana ‘owerya wa othanla okathi dhin’ya awa wiiraneya’ itthu. (Mit. 1:6, 7) Yehova oothanla nihiku on’ya iye omaliha makhalelo a olumwinku ola wootakhala, masi hiyo khininwerya odhuwela okathi ene en’ya awa wiiraneya elo.
5. Mwaha wa ohidhuwela nihiku an’ya awa omala makhalelo a olumwinku ola, eseeni woonawene ekhanle onikhumelela?
5 Nkhama Yeesu olontte iye, hiyo khanindhuwela nihiku an’ya awa omala makhalelo a olumwinku ola. Mwaha wa elo, woonawene pooti oniiriha ohiya okhala atthu oopisa nrima ni okhulumuwa, saasaasa akhala wiira nipacenre khalai olipelela nihiku na Yehova. Nitho pooti opacera oriipiwa nrima okathi amudhi nhu aahiidho atthu akina annitheya awa vaavo anoona awa olokela ophiya nihiku nno. (2 Ped. 3:3, 4) Woonawene elo pooti oniiriha wuupuwela wiira vankhala vookhweya okhala atthu oopisa nrima ni ovilela okathi nintheiwa nhu atthu akina, vaakhanle wiira noodhuwela nihiku an’ya awa omala makhalelo a olumwinku ola.
6. Seeni ori awa vooreera ohidhuwela nihiku Yehova on’ya iye omaliha makhalelo a olumwinku ola?
6 Ndho okhala wiira Yehova khanileenla nihiku on’ya iye omaliha makhalelo a olumwinku ola, owo onninivaha eparakha wiira noonihere wiira nininrumeela okhala wiira ninnipheta ni onroromela. Hiyo khanininrumeela Yehova nikontarelaka mahiku, okhala wiira yoolakela nintthuna onrumeela Yehova mahiku ootheene. Tivondho ohiya oxanka mwaha wa ohidhuwela “nihiku na Yehova”, nihaana wuupuwelela itthu dhooreera dhin’ya okhumelela nuumala ophiya nihiku nno. Akhala wiira ninoopaka elo, enoonikhalihera otepa omwaattamela Muluku ni opaka itthu dhootheene ninwerya nhu wiira ninhakalalihe.—2 Ped. 3:11, 12.
7. Eseeni nindhuwela nhu?
7 Etthu yootthuneya wuupuwelela itthu nindhuwela nhu. Hiyo noodhuwela wiira mahiku ookhidhera apacenre mwaakha wa 1914. Arumeelaka Biibiliya, Yehova onninileele iprofesiiya inoonihera wiira mahiku ookhidhera apacenre mwaakha wa 1914. Nitho onninileela moopora makhalelo a olumwinku yaaya awa okhala okhuma mwaakha ole. Ndho vaavo ninoona nhu iprofesiiya idho dhaakhwanelaka, dhinniniiriha okhupali wiira ‘nihiku nuulupale na Yehova nri vakhiviru.’ (Sof. 1:14) Nitho nkhama nindhuwela nhu Yehova oonivaha nteko muulupale wiira nivare, ori waalaleerya atthu ootheene ‘ihapari dhooreera dha Omwene.’ (Math. 24:14) Olelo-va ihapari dhooreera dha Omwene dhinnilaleiwa ilottelo dhinxira 1.000 ilapo dhimphiyera 240. Tivo khanintthuneya odhuwela ‘nihiku ni ewoora’ wiira nilottuweliwe ovara ni ntithi nteko ola wootepa otthuneya.
HIYO KHANINDHUWELA MOOMALELA MOOPORA YEHOVA ON’YA IYE OPAKA ITTHU
8. Antaphulelani moolumo awi ‘miteko dha Muluku?’ (Musuweli 11:5)
8 Ivaara dhikina khaninwerya odhuwela ‘miteko dha Muluku.’ (Munsome Musuweli 11:5.) Moolumo ala antaphulela wiira Yehova onipaka etthu aahiidho onihiya wiiraneya etthu wiira apake yootthuna-ye. Hiyo khanindhuwela mathowa ootheene ammwiiriha Yehova ohiya yiiraneyaka etthu emodha aahiidho etthu on’ya iye opaka wiira anikhalihere. (Esal. 37:5) Biibiliya onlotta wiira ‘miteko dha Muluku’ ti dhootikiniha nkhama dhiidhaale ori awa vootikiniha odhuwela moopora mwaana orupaliwe oninnuwa iye mmirimani mwa amaamaye. Hata masiyentiista yiilipiheraka othokodha itthu dhawaatta, awo khanwerya odhuwela moomaleela moopora elo eniiraneya awa. Mwa enamuna emodharu, hiyo khaninwerya odhuwela moomalela moopora Yehova on’ya iye opaka itthu nhoolo.
9. Mwaha wa ohidhuwela etthu Yehova on’ya iye opaka wiira anikhalihere, eseeni ekhanle wiiraneya?
9 Mwaha wa ohidhuwela ele Yehova on’ya iye opaka wiira anikhalihere. Woonawene elo pooti oniiriha woovelela waacerera nteko nininvarela nhu Yehova, nkhama okhweihera ekumi nhu aahiidho othamela nttetthe woothowa anamalaleerya. Ohiya-vo, pooti opacera wuupuwela wiira Yehova oohiya onireeliha akhala wiira nlelo khaninwerye waakhwanihera yoolukama nhu, khaninoona mireerelo dhinkhumelela vaavo niniilipihera nhu ovara nteko woolaleerya aahiidho akhala wiira dhookhalana mixankiho ninviriha nhu wiira naakhwanihere yoothanleliwa naakhenle nhu mmutthekesoni mwa Yehova.
10. Nkhalelo seeni wootepa otthuneya onnikhalihera wuunnuwihera mwaha wa ohidhuwela ele Yehova on’ya iye opaka wiira anikhalihere?
10 Voohaakanyera, ohidhuwela ele Yehova on’ya iye opaka wiira anikhalihera, onninikhalihera wunnuwihera mikhalelo dhootepa otthuneya nkhama wiiyeviha. Dheidho dhinnikhalihera odhuwela wiira miyuupuwelo dha Yehova ti dhuulupale oxira miyuupuwelo dhihu. (Yes. 55:8, 9) Nitho mikhalelo idho dhinnikhalihera onroromela Yehova moomalela wiira onoonikhalihera okhumela saana. Ndho vaavo ninkhumela nhu saana nteko woolaleerya aahiidho miteko dhikina ninthanleliwa nhu ovara mmutthekesoni, elo enniniiriha onvaha ovuwa wootheene Yehova. (Esal. 127:1; 1 aKor. 3:7) Masi akhala wiira itthu khadhinkhumela saana nkhama naalipelela nhu, nihiliyale wiira Yehova onnoona itthu dhootheene dhiniiraneya. (Yes. 26:12) Tivondho akhala wiira ninoopaka mphantta nhu ni ninoororomela Yehova wiira onoonikhalihera, nikhupali ni nrima wootheene wiira Yehova onoonivaha malakihero ooreerela otthara, hata ahirowaka opaka elo mwa mwiiriirya nkhama aapaka iye khalai.—Mit. 16:6-10.
11. Itthu seeni dhootepa otthuneya nindhuwela nhu voohima dha Yehova?
11 Nkahaya muupuwele ela: Hiyo nookhalana eparakha yuulupale ya odhuwela wiira Yehova, Muluku oopheta, axariya ni aakhili. Owo onnihakalala ni onnivaha efaita miteko nininvarela nhu ni itthu dhooreera ninaapakela nhu anna ni arokora. Nitho nkhama nindhuwela nhu, Yehova onawaatthuvela ale aninroromela ni nrima wootheene.—aHeb. 11:6.
HIYO KHANINDHUWELA ETTHU EN’YA ONIKHUMELELA MEELO
12. Moovarihana ni Yakobo 4:13, 14, eseeni nihindhuwela nhu?
12 Munsome Yakobo 4:13, 14. Voohaakanyera, hiyo khanindhuwela moopora ekumi nhu en’ya awa okhala nuumala oseliwa meelo. Ndho okhala wiira ninkhala olumwinku ola wootakhala, ivaara dhikina pooti onikhumelela itthu nahaalipelela nhu aahiidho nihindhuwela nhu moopora dhikhumelenla awa, elo pooti wiiraneya okhala wiira ‘oreeriwa ni otakhaliwa khoninthanla ntthu.’ (Mus. 9:11) Tivondho hiyo khanindhuwela akhala wiira itthu nintthuna nhu opaka nhoolo inookhumela saana aahiidho akhala wiira ninoophiya okathi owo niri haayi wiira niwerye waakhwanihera.
13. Mixankiho seeni ikhanle oniphwanya mwaha wa ohidhuwela moopora makhalelo a ekumi nhu an’ya awa okhala nhoolo?
13 Okathi dhinniphwanya awa mixankiho pooti okhala vooxankiha ovilela. Mwaha seeni? Okhala wiira okathi owo pooti oriipiwa nrima ni oxanka, ni opacera wuupuwelela moopora ekumi nhu en’ya awa okhala nuumala oseliwa meelo. Nitho makhalelo a ekumi nhu pooti orukunuwa mootutusera aahiidho onikhumelela mixankiho nahaalipelela nhu, ndho okathi eniiraneya awa elo pooti oriipiha nrima ni oxanka. Nitho okathi itthu naatthuna nhu opaka dhihinkumela awa saana nkhama naalipelela nhu, pooti okhulumuwa vawaatta.—Mir. 13:12.
14. Ohakalala wihu weekhweeli onlipa ni eseeni? (Moone-tho efootu.)
14 Moohixikha mixankiho ninviriha nhu aahiidho etthu en’ya onikhumelela, ninoowerya woonihera wiira nininrumeela Yehova okhala wiira ninnimpheta. Dhawiiraneya dha arumeyi a khalai anromoliwa mbiibiliyani dhinnoonihera wiira Yehova khankhoottihera mixankiho wiira dhihaaphwanye arumeyi-ye ni khannaatikhela wiira dhiniphwanye mixankiho mweekumini mwihu. Yehova odhuwela wiira ninoowerya okhala atthu oohakalala hata nihidhuwelaka itthu dhin’ya onikhumelela nhoolo. Masi ohakalala wihu onlipa ni odhuwela malakihero a Yehova ni wiiwelela. (Yer. 10:23) Ndho akhala ninoovekela Yehova nikhalihero okathi nintthuna nhu opaka dhoothanla, elo enoonikhalihera ohitepasa oxanka nuupuwelaka ele en’ya onikhumelela. Nitho ninookhalana moonelo mmodharu wa Yakobu, yoowo olontte wiira: ‘Yehova atthunaru, ninookhala akumi ni ninoopaka elese ni elese.’—Yak. 4:15.
Vaavo ninaadhya nhu odhuwela ni wiiwelela malakihero a Yehova, anninikhapelela (Moone ettima 14-15)b
15. Eseeni Yehova on’ya iye opaka nhoolo, nindhuwela nhu?
15 Hata nihiweryaka odhuwela mixankiho dhikhanle onikhumelela nhoolo, hiyo ninnidhuwela wiira Yehova oolaihera onivaha ekumi yoohimala. Nitho noodhuwela wiira owo khanootha ni khiyaavo etthu ekhanle omooceeliha waakhwanihera dhoolaihera-dhe. (Tito 1:2) Yehova pahi torina owerya wa ‘olaleya itthu dhin’ya wiiraneya; Okhuma khalai onnilaleya dhihinatthi okhumelela.’ Ninniwerya woona elo okathi ninthokorerya nhu itthu Yehova aalaihenre iye khalai dhaakhwanela. Ndho nikhupali ni nrima wootheene wiira itthu onlaihera iye opaka nhoolo dhinawaakhwanela. (Yes. 46:10) Nitho nikhupali wiira khiyaavo etthu ekhanle onkhoottihera Yehova onipheta. (aRoma 8:35-39) Tivondho voohixikha mixankiho dhikhanle onikhumelela mweekumini mwihu, nikhupali nrima wootheene wiira Yehova onnoonivaha nimaaliho, akhili ni ikuru ninramela nhu wiira niwerye ovilela. Hiyo khannaakanyera wiira okathi wootheene Yehova onoonikhalihera ni onireeliha.—Yer. 17:7, 8.
HIYO KHANIDHUWELA MOOMALELA MOOPORA YEHOVA ONNIDHUWELA IYE
16. Nkhama enoonihera awa Esalimo 139:1-6, odhuwela seeni wa Yehova nihinwerya nhu odhuwela saana?
16 Nsome Esalimo 139:1-6. Mpattusa nhu Yehova, onnidhuwela saana nkhalelo nhu wa veerutthuni, itthu dhinnidhivela ni moopora ninuupuwela nhu. Owo onnivaha ephoole! Ohiya pahi Yehova wiiwa itthu ninlotta nhu ni woona itthu nimpaka nhu, owo onnidhuwela etthu enniiriha olotta aahiidho opaka khuta etthu. Mwene Davidi aalontte wiira Yehova ori oolikane ene wiira aakhapelele ni aakhalihere arumeyi-ye. Nnoonela dhai? Niire kahi etthu yootikiniha odhuwela wiira Pwiya Muulupale yoowo opattunse erimu ni elapo, onninivaha ephoole? Woonawene moonelo nhu onoolikana ni wa Davidi, yoowo olontte wiira: ‘Nyuwo munnikidhuwela saana. Elo etthu yootikiniha, kihinweryaka odhuwela saana.’—Esal. 139:6.
17. Itthu seeni dhikhanle oniiriha oniliperya okhupali wiira Yehova onninidhuwela saana?
17 Woonawene mwaha wa moopora nihuiwale nhu, dhoolema dhihu ni itthu naakhupali nhu khalai nihinatthi ohudha ekhweeli, pooti oniiriha woona okhala etthu yoolipa okhupali wiira Yehova Tiithi oopheta ni onninivaha efaita. Aahiidho nkhama Davidi, hiyo pooti opacera wuupuwela wiira khanimphwanelela okhala axirikha a Yehova ni owo ori ottaiwene ni hiyo, mwaha wa itthu dhootakhala nipanke nhu khalai. (Esal. 38:18, 21) Nitho woonawene ntthu onilipihera vawaatta opaka marukunuso mweekumini-mwe wiira akhale moovarihana ni malamulo a Muluku, pooti opacera wiikoha wiira: ‘Akhala wiira Muluku onnikidhuwela saana, seeni onkivekela iye wiira kihiye mweettelo onkidhivela?’
18. Seeni ori awa vooreera okhupali wiira Yehova onnoona wiilipihera wihu? (Moone-tho efootu.)
18 Tivondho nikhupali wiira Yehova onninidhuwela saana ni onnoona itthu dhooreera wa hiyo dheidho naakaneene nihinwerya nhu woona. Ndho hata Yehova oonaka dhoovonya dhihu, owo onnoona wiira ninniilipihera wiira nipake itthu dhooreera ni onninipheta vawaatta. (aRoma 7:15) Vaavo nindhuwela nhu wiira Yehova onnoona wiilipihera wihu, elo enninivaha ikuru ninramela nhu wiira nihihiye onrumeela moororomeleya ni okhala oohakalala.
Okathi dhinniphwanya awa mixankiho naahaalipelela nhu, Yehova onninikhalihera ovilela alipihaka waamini wihu dhoolaihera dha nhoolo (Moone ettima 18-19)c
19. Eseeni nindhuwela nhu voohima dha Yehova?
19 Hiyo noodhuwela wiira Yehova opheta. Ndho khaninaakanyera mwaha owo. (1 Yoh. 4:8) Nkhama nindhuwela nhu, malamulo a Yehova annoonihera wiira owo onninipheta ni ontthuna wiira nikhalena ekumi yoohakalala. Nitho ninnidhuwela wiira Yehova ontthuna wiira niphwanye ekumi yoohimala. Ndho wiira elo eweryaneye, Yehova oovaha yawoopola. Nkuttho wa wawoopola, onnoonihera wiira ninoowerya onhakalaliha Yehova hata niri atthu oohimalela. (aRoma 7:24, 25) Ni ninnidhuwela wiira ‘Muluku ti muulupale oxira mirima dhihu ni onnidhuwela itthu dhootheene.’ (1 Yoh. 3:19, 20) Yehova onnidhuwela nkhalelo nhu wootheene ni onnikhupali wiira ninoowerya opaka itthu onnivekala iye.
20. Eseeni en’ya onikhalihera oxaka oriipiwa nrima nuupuwelelaka itthu nihindhuwela nhu?
20 Voohaakanyera, Yehova oonileela itthu dhootheene ninreerela nhu odhuwela. Ndho vaavo mwawiiyeviha ninaakhulela nhu elo, enninikhalihera oxaka oriipiwa nrima nuupuwelelaka itthu nihindhuwela nhu dhin’ya wiireya nhoolo ni enninikhalihera okhala ohakalala ni itthu nindhuwela nhu dheidho dhiri dhootepa otthuneya. Okathi nimpaka nhu elo, ninnoonihera wiira na atthu awiiyeviha ni ninninroromela Yehova ‘yoowo ondhuwela moomalela itthu dhootheene.’ (Yobi 36:4) Ndho hata olelo-va nihiweryaka odhuwela itthu dhootheene, ninnilipelela ophiya okathi nin’ya nhu okhala mahiku ootheene nihudhaka khuta nihiku itthu ipheya voohima dha Muluku nhu Muulupale, Yehova.—Mus. 3:11.
NCIPO 104 Munepa Woottela ti Yoovaha ya Muluku
a Yeesu onoohoolela ekhootto ya Armaxedooni wiira amalihe olumwinku ola wootakhala wa Satana. Ndho ti vookhalela olotta wiira nenna-va Yeesu onniduwela nihiku en’ya awa opacera ekhotto ya Armaxedooni ni nihiku on’ya iye ‘omaleliha oxira-we.’—Wiis. 6:2; 19:11-16.
b OLEELIHERIWA WA IFOOTU: Paapa mmodha ni mwane enkociheraka paasta ootthawana wiira eemudhi ekhale yoolikane ene akhala wiira onookhumelela nxankiho mootutusera.
c OLEELIHERIWA WA EFOOTU: Munna mmodha onviriha mixankiho uupuwelelaka ekumi yoohakalaliha on’ya iye okhalana elapo epheya.