‘Munthanle Muntthuna Nnyu Onrumeela’

1. Wiira niphwanye ohakalala weekhweeli eseeni ninreerela nhu opaka, ni mwaha wa seeni? (Yesaya 48:17, 18)

TIITHI nhu a wiirimu, onninipheta vawaatta. Owo ontthuna wiira nikhalena ekumi yooreera nenna-va ni nhoolo. (Mus. 3:12, 13) Yehova onipattunse mwa enamuna enniiriha owerya opaka itthu dhootikiniha. Masi owo khanivanhe ehakhi ya wiilamulela aahiidho othanla meekhinhu etthu yooreera aahiidho yoonanara. (Mus. 8:9; Yer. 10:23) Yehova oodhuwela wiira nihaana onrumeela ni omwiiwelela wiira niphwanye ohakalala weekhweeli.—Munsome Yesaya 48:17, 18.

2. Eseeni Satana ontthuna iye wiira nikhupali, ndho eseeni Yehova opanke iye wiira oonihere wiira Satana nawoothe?

² Satana ontthuna wiira nikhupali wiira apinaatamu anoowerya okhala oohakalala ni okhumela saana ehilamuleliwaka ni Yehova. (Maph. 3:4, 5) Wiira Yehova oonihere wiira Satana nawoothe, owo ohaahiya apinaatamu wiira yiilamulela okathi vakhaani. Tivondho okathi wootheene ninnoona nhu mixankiho dhinkhumiheriwa ni olamulelo wa apinaatamu. Ohiya-vo, Biibiliya onnilotta matakihero a alopwana ni athiyana awaatta yaarina ekumi yoohakalala mwaha wa othanla onrumeela Yehova. Ntthu mmodha ti Yeesu Kiriistu. Yoosoma ela, nin’ya woona mathowa yaamwiirinhe Yeesu othanla onrumeela Yehova ni seeni ninreerela nhu onkokhorela Yehova. Wookhidherani, ninawuupuwela mathowa anniiriha othanla onrumeela Yehova.

ESEENI YAAMWIIRINHE YEESU OTHANLA ONRUMEELA YEHOVA?

3. Eseeni Satana anlaihenre iye onvanha Yeesu, ndho eseeni Yeesu aathanlale iye?

³ Okathi Yeesu aariiye valaponi, aahikhala eparakha ya onthanla ole aatthuna iye onrumeela. Noomala Yeesu opatisiwe, Satana aahimweehererya anlaiheraka onvaha omwene wootheene wa valaponi akhala wiira aammukokhorela evaara emodha pahi. Yeesu aahimwaakhula wiira: “Khuma-va, Satana! Okhala wiira ehaatikhiwa wiira: ‘Munkokhorele Yehova Muluku nnyu, ni munrumeele yoowo pahi.’” (Math. 4:8-10) Eseeni yaamwiirinhe Yeesu opaka yoothanla ela? Nirowe noone mathowa maili.

4-5. Mathowa seeni yaamwiirihe Yeesu othanla onrumeela Yehova?

⁴ Nthowa noopacera ni nuulupale namwiirinhe Yeesu othanla onrumeela Yehova okhala wiira anaapheta vawaatta Atiithi-ye. (Yohani 14:31) Ohiya-vo, Yeesu onninrumeela Yehova okhala wiira elo etthu onreerela iye opaka. (Yohani 8:28, 29; Wiis. 4:11) Owo oodhuwela wiira Yehova tonivanhe ekumi, itthu dhootheene dhinniiriha okhala akumi ni toororomeleya. (Esal. 33:4; 36:9; Yak. 1:17) Okathi wootheene, Yehova aaninleela Yeesu ekhweeli ni aninvaha itthu dhootheene Yeesu aaramela iye. (Yohani 1:14) Moovirikana ni Yehova, Satana oonikhumihera etampi ni okhwa. Owo nawoothe, khamphiyeriwa ni nanrima. (Yohani 8:44) Yeesu aanindhuwela saana Yehova ni Satana. Tivondho khanatake wuupuwelela hata vakhaani othuna ontakiha Satana athanlaka anrukunuwela Yehova.—aFil. 2:5-8.

⁵ Nthowa nanaili namwiirinhe Yeesu othanla onrumeela Yehova, okhala wiira owo aanuupuwelela itthu dhooreera aaya iye ophwanya nhoolo akhala wiira kaahiya okhala oororomeleya. (aHeb. 12:2) Nitho aanidhuwela wiira, akhala wiira khaahiya okhala oororomeleya, antteeliha ndhina na Tiithi-ye ni aamwiiriha oweryaneya omalihiwa mixankiho dhootheene dhikhumiheriwe ni Satana.

SEENI NINREERELA NHU ONKOKHORELA YEHOVA?

6-7. Seeni atthu awaatta olelo-va ahininrumeela awa Yehova, masi eseeni ninreerela nhu onkokhorela Yehova?

⁶ Atthu awaatta olelo-va khaninrumeela Yehova okhala wiira khandhuwela mikhalelo-dhe dhooreera ni itthu dhootheene dhooreera onaapakela iye. Etthu emodharu yaahiiraneya ni atthu a wAatena yaawo nrummwa Paaulu aalalenrye iye.—Mit. 17:19, 20, 30, 34.

⁷ Paaulu aahaaleela atthu a wAatena wiira Muluku eekhweeli ‘tonaavaha atthu iphumu, ekumi ni itthu dhootheene.’ Nitho aahaacerera airaka: ‘Mwaha wa yoowo, hiyo nookhalana ekumi, ninneetta, ni ninnikhala.’ Muluku toopattunse itthu dhootheene, ndho ‘oreela wa ntthu mmodha, Muluku ohaakhumihera atthu a maloko ootheene.’ Tivondho ootheene nhu ninreerela nhu onkokhorela.—Mit. 17:25, 26, 28.

8. Etthu seeni Yehova ohinkhala-khala iye apakaka? Ntthokihere.

⁸ Nkhama Mpattusa ni Nkhulupale a Olumwinku Wootheene, Yehova anwerya waakhanyerera atthu ootheene onrumeela. Masi owo, khankhala-khala apakaka elo. Ohiya-vo, Yehova oonivaha itthu dhawaatta dheidho dhinoonihera wiira owo ookhala ni onnimpheta khuta mmodha a hiyo. Owo ontthuna wiira atthu awaatta endhuwele ni ekhale axirikha-ye mahiku ootheeene. (1 Tim. 2:3, 4) Tivondho Yehova onnihudhiha iye wiira niwerye waakhalihera atthu akina odhuwela dhoolakela-dhe ni itthu dhooreera on’ya iye waapakela apinaatamu nhoolo. (Math. 10:11-13; 28:19, 20) Nitho oonivaha muloko, opuro yoowo ninwerya nhu onkokhorela ni ninaakhela nhu nikhalihero na asitokweene oopheta.—Mit. 20:28.

9. Yehova onoonihera dhai wiira onaapheta apinaatamu ootheene?

⁹ Ninoowerya woona wiira Yehova toopheta vaavo ninoona nhu moopora onaathokorerya iye atthu ankhootta okhupali wiira ookhala. Mwa ntakihero, okhuma khalai, atthu imilyau dhawaatta annithanla opaka itthu anoona awa okhala dhooreera ni dhoonanara ohiya omwiiwelela Yehova. Masi hata eri dhiidho, Yehova onnaareerela nrima avahaka itthu anramela awa wiira ekhale akumi ni opuhe ekumi. (Math. 5:44, 45; Mit. 14:16, 17) Nitho Yehova ohaavaha eparakha ya okhalana axirikha ni amudhi anaapheta, waayara anamwane, ovara miteko ni ohakalala ni mireerelo dhinkhumelela mwaha wa miteko anvara awa. (Esal. 127:3; Mus. 2:24) Ndho idha, itthu inoonihera wiira Tiithi nhu a wiirimu onnaapheta apinaatamu ootheene. (Okhu. 34:6) Vano, nirowe nuupuwelele mathowa aniirinhe othanla onrumeela Yehova ni moopora Yehova onnireeliha iye.

ESEENI ENNIIRIHA OTHANLA ONRUMEELA YEHOVA?

10. (a) Nthowa seeni nuulupale ninniiriha othanla onrumeela Yehova? (Matheyo 22:37) (b) Opisa nrima ni omoriwa ikharari wa Yehova wookhalihereni dhai? (Esalimo 103:13, 14)

¹⁰ Nkhama Yeesu, nthowa nuulupale ninniiriha othanla onrumeela Yehova okhala wiira ninnimpheta vawaatta. (Munsome Matheyo 22:37.) Vaavo nindhuwela nhu mikhalelo dha Yehova dhinniniiriha otthuna omwaattamela. Mwa ntakihero, nirowa nithokorerye opisa nrima ni omoriwa ikharari wa Yehova. Noomala aIsarayeeli ohiya omwiiwelela Yehova, owo aavekela airaka: ‘Safatali, nttharuwe makhalelo nnyu ootakhala.’ (Yer. 18:11) Moolumo ala anoonihera wiira Yehova onnidhuwela wiira na atthu ohimalela ni nantthupi. (Nsome Esalimo 103:13, 14.) Vaavo nnuupuwelela nnyu opisa nrima, omoriwa ikharari ni mikhalelo mikina dha Yehova, niire elo khenwiiriha otthuna onrumeela mahiku ootheene?

11. Mathowa seeni makina anniiriha othana onrumeela Tiithi nhu a wiirimu?

¹¹ Etthu ekina enniiriha othanla onrumeela Yehova okhala wiira elo etthu ninreerela nhu opaka. (Math. 4:10) Ohiya-vo, noodhuwela wiira naahihiye okhala oororomeleya ninoophwanya mareeliho awaatta. Vaavo nininrumeela nhu Yehova moororomeleya, ninnikhalihera otteelihiwa ndhina-ne, woonihera wiira Satana nawoothe ni ninnihakalaliha nrima wa Tiithi nhu. Ndho akhala wiira nenna-va ninoothanla onrumeela Yehova, ninookhalana eparakha ya onrumeela mahiku ootheene!—Yohani 17:3.

12-13. Eseeni ninhudha nhu ni yawiiraneya ya Jane ni Pam?

¹² Anaahima aahiidho marapasi, anoowerya ohudha ompheta vawaatta Yehova ni olipiha ompheta-wa. Nirowe nithokorerya yawiiraneya ya arokora aili aniitthaniwa Jane ni Pam.a Jane opacere osoma Biibiliya arina iyaakha 10 ni Pam arina iyaakha 11. Nnaamwi anaan’yari-ya yahaakhulenle onsoma Biibiliya, awo yahaakhulela Jane ni Pam onsoma Biibiliya ni Anamoona a Yehova, ehihiyaka woomalani wa esumana waatthara okerexa. Jane onlotta wiira: “Itthu dhiri mbiibiliyani Anamoona a Yehova akihudhinha awa dhookikhalihera oxaka itthu yaapaka awa makoleeka aka oskola, nkhama oca mirette dhoohapala ni orupihana woohiloka.”

¹³ Noovira iyaakha vakhaani, Jane ni Pam yaahinnuwa ekhala anamalaleerya. Moottharelana, yaahipacera orumeela nkhama mapiyoneera, okathi omodharu yaakhapelelaka anaan’yari-ya awuuluvala. Uupuwelaka itthu dhinkhumelenle, Jane onlotta wiira: “Miyo koohudha wiira Yehova onnaakhapelela axirikha-ye ni nkhama onlotta iye 2 Timootheyo 2:19, ‘Yehova onnaadhuwela atthu-ye.’” Ndho hiyo nihaakanyera wiira okathi wootheene Yehova onaakhapelela ale anthanla ompheta ni onrumeela!

14. Nin’ya owerya dhai waakihera ndhina na Yehova? (Moone-tho efootu.)

¹⁴ Hiyo nintthuna waakihera ndhina na Yehova itthu dhootheene dhawootha nnootheriwa awa. Wiira muupuwelele mwaha ola: Nkahaya muupuwele wiira mookhalana nxirikha nnyu muulupale ooreera nrima, oovaha ni oolevelela. Masi nihiku nimodha, nkamwiiwa ntthu nkina amootheraka nxirikha nnyu owo, alottaka wiira tootakhala ni toohiroromeleya. Eseeni mwaaya nnyu opaka? Voohaakanyera mwampaka etthu wiira mmwaakihere nxirikha nnyu. Mwa enamuna emodharu, Satana vamodha atthu onaarumeela iye annilotta itthu dhawootha voohima dha Yehova. Ndho nihaana opaka itthu dhootheene ninwerya nhu wiira naakihere ndhina na Yehova naaleelaka atthu akina ekhweeli voohima dha veene. (Esal. 34:1; Yes. 43:10) Hiyo ninoowerya woonihera wiira nintthuna onrumeela Yehova ekumi nhu yootheene oreela wa moolumo nhu ni miteko.

15. Mareeliho seeni Paaulu aaphwannye iye mwaha woothanla onrumeela Yehova? (aFilipi 3:7, 8)

¹⁵ Ohiya-vo, ninnihakalala opaka marukunuso mweekumini mwihu wiira ninhakalalihe Yehova ni naacerere nteko nininvarela nhu. Mwa ntakihero, nrummwa Paaulu aahikhalana opuro woottittimiheya eriyari ya etiini ya ayuuda. Masi owo aahihiya itthu idho dhootheene wiira akhale ntthareli a Kiriistu ni anrumeele Yehova. (aGal. 1:14) Mwaha wa opaka elo, owo aahikhalana ekumi yoohakalala ni ohaakhela eparakha ya olamulela ni Kiriistu wiirimu. Paaulu khatanke othanana mwaha woothanla onrumeela Yehova ni hiyo khaninkhala-khala nipakaka elo.—Munsome aFilipi 3:7, 8.

16. Eseeni ninhudha nhu ni yawiiraneya ya Julia? (Moone-tho efootu.)

¹⁶ Akhala wiira onrumeela Yehova enookhala etthu yootepa ootthuneya mweekumini mwihu, Yehova onoonitthuvela nenna-va ni nhoolo. Nirowe nithokorerye yawiiraneya ya nrokora mmodha oniitthaniwa Julia. Okathi Julia aariiye mwaana aaniipa macipo okerexa. Okhala wiira anidhuwela wiipa saana, aahivahiwa eparakha yoosoma eskola emodha enaahudhiha atthu wiipa wiira akhale nlipa awiipa macipo muulupale. Noovira okathi, owo aahidhuweliwa okhala mwali aadhuwela wiipa saana ni aahiipa macipo mapuro muulupale oovuwa. Nihiku nimodha ari oskola, koleeka-ye mmodha aahipacera ovaanela nuuwo voohima dha Muluku ni aahinleela wiira Muluku okhalana ndhina, Yehova. Noovira okathi vakhaani, Julia aahipacera onsoma Biibiliya ivaara piili vasumanani. Moottharelana, owo aahihiya osoma eskola ele ni aahithanla orumeela okathi-ye ni ikuru wiira anrumeele Yehova, ohiya okhala nlipa awiipa macipo muulupale. Opaka yoothanla elo khivaakhwen’ye. Julia onlotta wiira: “Atthu awaatta yaalotta wiira kaahirahela okhupi eparakha aka ya odhuwela wiipa. Masi miyo kaatthuna orumeela ekumi aka yootheene wiira kinrumeele Yehova.” Julia onoonela dhai vaavo onnuupuwela iye yoothanla opanke iye iyaakha 30 dhivinre? Owo onlotta wiira: “Miyo kinnihakalala mwaha woothanla onrumeela Yehova ni kinnikhupali wiira Yehova onookivaha itthu dhootheene kinramelaaka nhoolo.”—Esal. 145:16.

NHIHIYE ONRUMEELA YEHOVA

17. Seeni oraawa vootthuneya odhuwela okathi ninkhala nhu?

¹⁷ Hiyo ninkhala wookhidherani wa makhalelo a olumwinku ola. Nrummwa Paaulu aatinkhe wiira: ‘Ndho, mwa okathi vakhaanisa, ole onra onoophiya ni khanrowa olekela.’ (aHeb. 10:37) Seeni oraawa voothuneya odhuwela elo? Okhala wiira okathi ohanle wiira atthu ethanle onrumeela Yehova ori vakhaani. (1 aKor. 7:29) Ndho akhala wiira noothanla onrumeela Yehova, nikhupali wiira mixankiho ninviriha nhu ti dha “okathi vakhaanisa.”

18. Eseeni Yehova ni Yeesu antthuna awa opaka?

¹⁸ Yeesu khaatumererya ahudheri-ye pahi opacera ontthara, masi aahaathumererya ohihiya opaka elo. (Math. 16:24) Voohixikha akhala wiira nipacenre khalai onrumeela Yehova, nikhalena yoolakela ya ohihiya opaka elo. Ootheene nhu nihaana wiilipihera vawaatta wiira nikhale moovarihana ni yoolakela nhu ya ohihiya onrumeela Yehova. Woonawene pooti ohikhweya opaka elo. Masi nikhupali wiira yoothanla ela enooniphwanyiha ohakalala ni mareeliho awaatta nenna-va ni nhoolo!—Esal. 35:27.

19. Eseeni ninhudha nhu ni yawiiraneya ya Gene?

¹⁹ Atthu akina anuupuwela wiira othanla onrumeela Yehova onimwiiriha ntthu oyeleela opuha ekumi. Akhala wiira mwa rapasi, niire nnoona wiira yookhala etthu mun’yeleela nnyu mwaha woothanla onrumeela Yehova? Munna mmodha yoowo ori rapasi oniitthaniwa Gene, onlotta wiira: “Miyo kuupuwela wiira kaaniyeleela oraara mwaha wookhala Namoona a Yehova. Ndho kaahipacera woona wiira marapasi karaakana iyaakha dhimodharu yaanipuha ekumi, okhala wiira yaanirowa ofeestani, onamorari ni oweetta axooku ootakhala. Masi miyo kaaviriha okathi pahi kirowaka onthukumanoni ni nteko woolaleerya.” Muupuwelo owo waahononne dhai mweettelo wa Gene? Owo onlotta wira: “Miyo kahipacera opaka itthu dhootakhala marapasi ale yaapaka awa. Masi mooriipiha nrima itthu idho khidhaakiphwaninhe ohakalala weekhweeli. Noomala kaahipacera wuupuwelela mareeliho kaaphwanya aka vaavo keettela aka malakihero a mbiibiliyani. Ndho elo yaakiiriha olakela otthikela onrumeela Yehova ni nrima aka wootheene. Okhuma okathi ole mpakha nenna, kinniwerya woona moopora Yehova onaakhula iye mavekelo aka ootheene.”

20. Yoolakela seeni ninreerala nhu okhalana?

²⁰ Nasaalimu mmodha aahimwiipela Yehova airaka: ‘Oohakalala tuule munthanlale nnyu ni muninruuha nnyu ori nnyu, wiira akhale vaate vinyu.’ (Esal. 65:4) Tivondho ootheene nihaana okhalana yoolakela emodharu ariiyena Yooxuuwa, yoowo alontte wiira: ‘Masi miyo ni atthu a ettheko aka nintthuna onrumeela Yehova.’—Yox. 24:15.