Yehova Onnikhalihera Dhai Ovilela?

1. Seeni nintthuneya nhu ovilela, ni taani okhanle onikhalihera? (1 Pedru 5:10)

MAHIKU ala ookhidhera ninkhala nhu, tivootepa otthuneya hiyo nkhama arumeyi a Yehova woonihera ovilela. Woonawene akina a hiyo ninniviriha mixankiho nkhama owereiwa eretta yuulupale, okhweliwa ntthu naampheta nhu ni ottharatthariwa ni amudhi aahiidho makhulupale a ikuveernu. (Math. 10:18, 36, 37) Masi moohixikha nxankiho munviriha nnyu, nkhupali ni nrima wootheene wiira nkhaliheriwaka ni Yehova nnoowerya ophwanya ikuru munramela nnyu wiira nwerye ovilela.—Munsome 1 Pedru 5:10.

2. Hiyo nkhama makiristau, eseeni ennikhalihera ovilela?

² Ovilela ontaphulela ohihiya okhala oolipa ni ohiyeleela nlipelelo okathi ninviriha nhu mixankiho nkhama ottharatthariwa aahiidho dhaweeha. Ndho hiyo nkhama makiristau ovilela wihu khonlipa ni ikuru dhihu, masi Yehova tonnikhalihera ovilela anivahaka ‘owerya onxira wa ntthu.’ (2 aKor. 4:7) Yoosoma ela, nin’ya woona itthu sese Yehova onivanhe iye wiira anikhalihere ovilela. Ohiya-vo, ninawoona moopora nikhanle nhu ottottela nreerelo itthu idho.

NIVEKELO

3. Seeni ninlotta nhu wiira nivekelo etthu yootikiniha Yehova onivanhe iye?

³ Yehova oopaka etthu yootikiniha wiira ekanikhalihera ovilela. Owo ohiiriha oweryaneya olotta nuuwo hata niri anatampi. (aHeb. 4:16) Muupuwele ela: Hiyo ninoowerya olotta ni Yehova oreela wa nivekelo khuta okathi ni onleela khuta mwaha. Nitho moohixikha elottelo nhu, owo onoowerya oniwiriyana vaavo nininvekela nhu khuta opuro hata niri meekhinhu aahiidho niri nkateya. (Yona 2:1, 2; Mit. 16:25, 26) Vaavo ninriipiwa nhu nrima vawaatta aahiidho oxanka nihikawerya onleela Yehova muupuwelo nhu okathi nininvekela nhu, owo onoowerya odhuwela etthu nintthuna nhu olotta. (aRoma 8:26, 27) Voohaakanyera, eparakha yuulupale olotta ni Yehova oreela wa nivekelo!

4. Eseeni ennikhupaliha wiira Yehova onniiwa vaavo nininvekela nhu wiira anikhalihere ovilela?

⁴ Mbiibiliyani, Yehova onninilaihera wiira ‘onooniwiriyana wa khuta etthu nininvekala nhu, enivarihana ni yootthuna-ye.’ (1 Yoh. 5:14) Niire elo enhela mpuwa onvekela wiira anikhalihere owerya ovilela? Aayo! Okhala wiira elo ennivarihana ni yootthuna-ye. Mooporani? Vaavo ninvilela nhu nihihiyaka okhala oororomeleya, ninninkhalihera Yehova omwaakhula Satana. (Mir. 27:11) Ohiya-vo, Biibiliya onlotta wiira Yehova ori oolikaneene wiira ‘aakhalihere ale aninroromela ni nrima-ya wootheene.’ (2 Wah. 16:9) Tivondho nikhupali ni nrima wootheene wiira Yehova ookhalana owerya ni ontthuna onikhalihera wiira niwerye ovilela.—Yes. 30:18; 41:10; Luka 11:13.

5. Ovekela onnikhalihera dhai ophwanya nrettele wa mmuupuweloni? (Yesaya 26:3)

⁵ Biibiliya onlotta wiira vaavo nininvekela nhu Yehova ninleelaka mixankiho dhihu, ‘nrettele wa Muluku yoowo onxira odhuwela wootheene wa apinaatamu, onookhapelela mirima [dhihu] ni miyuupuelo [dhihu].’ (aFil. 4:7) Hiyo ninnixukhurela vawaatta odhuwela elo. Vaavo atthu ahininrumeela Yehova dhinnaaphwanya mixankiho annirumeela inamuna dhoovirkina wiira ekhalena nrettele wa mmupuweloni. Mwa ntakihero, akina anneehererya omala-maliha miyuupuwelo-dha wiira ekhale oomaleleya. Masi inamuna dhoovirikana atthu akina anrumeela awa wiira ephwanye nrettele wa mmuupuweloni ti dhawoopiha, okhala wiira pooti ohonona nkhalelo wa omunepani wa ntthu. (Mmoone Matheyo 12:43-45.) Ohiya-vo, nrettele Yehova onnivaha iye vaavo nininvekela nhu, wooxira ole atthu amphwanya erumeelaka inamuna dhoovirikana. Okathi nininvekela nhu Yehova, ninnoonihera wiira ninninroromela wiira onoonivaha ‘nrettele ohinimala.’ (Munsome Yesaya 26:3; Tradução do Novo Mundo da Bíblia Sagrada.) Enamuna emodha Yehova onrumeela iye wiira anivahe nrettele ori onikhalihera wuupuwelela dhawaatikhiwa dha mbiibiliyani dhinnimaaliha. Dhawaatikhiwa idho, dhinninuupusera wiira Yehova onninipheta vawaatta ni ontthuna wiira nikhumele saana.—Esal. 62:1, 2.

6. Eseeni munreerela nnyu opaka wiira nivekelo niwerye wookhaliherani ovilela? (Moone-tho efootu.)

⁶ Eseeni munreerela nnyu opaka? Vaavo munviriha nnyu nxankiho, ‘munrahelele Yehova nritti nnyu woolemela’ ni munvekele wiira oovaheni nrettele. (Esal. 55:22) Nitho munvekele akhili an’ya wookhaliherani woona etthu nkhanle nnyu opaka okathi munviriha nnyu nxankiho. (Mir. 2:10, 11) Masi-tho vaavo nninvekela nnyu Yehova wiira oovaheni ikuru wiira nwerye ovilela, nhiliyale onxukhurela. (aFil. 4:6) Muupuwele inamuna inoonihera wiira Yehova onnookhaliherani ovilela khuta nihiku, ni munxukhurele mwaha wa itthu dhooreera onoovahaiyeni. Nhihiye mixankiho munviriha nnyu iwiirihakani ohiya woona mareeliho mumphwanya nnyu.—Esal. 16:5, 6.

BIIBILIYA

7. Onsoma Biibiliya on’ya onikhalihera dhai ovilela?

⁷ Yehova oonivaha nuulumo-ne Biibiliya wiira anikhalihere ovilela. Nitho mbiibiliyani dhookhalamo dhawaatikhiwa dhawaatta inoonihera wiira Yehova onninikhalihera. Nirowe nithokorerye ntakihero nimodha. Matheyo 6:8 onlotta wiira: ‘Tiithi nnyu onnidhuwela itthu dhinoothowani, hata nhinanvekele.’ Yeesu yoowo olontte moolumo ala, onnindhuwela saana Yehova waaxira atthu ootheene. Tivondho nikhupali ni nrima wootheene wiira Yehova onnidhuwela mixankiho dhihu dheidho nintthuneya nhu okhaliheriwa. Biibiliya onnilotta dhoolaihera dhawaatta dhooreera dha Yehova dheidho dhinnivaha ikuru wiira niwerye ovilela mixankiho.—Esal. 94:19.

8. (a) Malakihero Biibiliya onnivaha iye annikhalihera dhai ovilela? Nvahe ntakihero. (b) Eseeni en’ya onikhalihera wuupuwelela malakihero a mbiibiliyani okathi ninramela nhu?

⁸ Biibiliya onninivaha malakihero yaawo annikhalihera ovilela okathi wooxankiha. Malakihero awo anninivaha akhili wiira niwerye opaka dhoothanla dhooreera. (Mir. 2:6, 7) Mwa ntakihero, Biibiliya onninileela wiira nihaana onroromela Yehova ohiya otepasa oxanka nuupuwelaka moopora ekumi nhu en’ya awa okhala nihiku na omeelo. (Math. 6:34) Akhala wiira ninookhalana yoolema ya onsoma Biibiliya ni wuupuwelela ele ninsoma nhu, onoonikhweela wuupuwelela malakihero a mbiibiliyani okathi ninramela nhu.

9. Vaavo ninuupuwelela nhu dhawiiraneya dhinoonihera moopora Yehova aakhalihenre iye arumeyi-ye khalai, dhinlipiha dhai onroromela wihu?

⁹ Nitho mbiibiliyani dhookhalamo dhawiiraneya dha atthu yaari makhalelo nkhama hiyo, yaawo yoonihere onroromela Yehova ni yaakhaliheriwe nuuwo. (aHeb. 11:32-34; Yak. 5:17) Vaavo ninuupuwelela nhu moopora Yehova aakhalihenre iye arumeyi-ye khalai, ninnilipiha onroromela wihu Yehova wiira owo ‘ntthawelo nihu ni ikuru dhihu, tonnikhalihera mwawaakuveya, okathi wooxankiha.’ (Esal. 46:1) Ndho vaavo ninuupuwelela nhu matakihero a arumeyi oororomeleya a Yehova a khalai, yaawo yoonihenre ovilela hata okathi wooxankiha, elo enninikhalihera otakiha waamini ni ovilela-wa.—Yak. 5:10, 11.

10. Eseeni munreerela nnyu opaka wiira Biibiliya atepe wookhaliherani ovilela mixankiho dhinyu?

¹⁰ Eseeni munreerela nnyu opaka? Nkhalena yoolema ya onsoma Biibiliya khuta nihiku ni waatikha dhawaatikhiwa ihinreera woodhivelani. Nitho atthu akina ahoona wiira osoma yawaatikhiwa ya nihiku ohiihiyu, onnaakhalihera opaceriha nihiku ni muupuwelo woolipiha wa mbiibiliyani. Ti yeelo yaankhalinhere nrokora mmodha oniitthaniwa Mariaa nuumala anaan’yari-ye ophwanyiwana eretta ya kanseri. Eseeni yaankhalihenre nrokora Maria ovilela vaavo aakhapelela iye anaan’yari? Owo onlotta wiira: “Khuta nihiku ohiihiyu, miyo kaanisoma yawaatikhiwa ya nihiku kirumeelaka ebroxuura Ovarerya Soolempwa Khuta Nihiku. Opaka elo waahikikhalihera okhalana muupuwelo wa Yehova ni wuupuwelela itthu dhooreera onnihudhiha iye anrumeelaka Biibiliya, ohiya wuupuwelela nxankiho kaavirihaaka.”—Esal. 61:2.

ANNA NI AROKORA

11. Odhuwela wiira mixankiho ninviriha nhu dhinnaaphwanya anna ni arokora a olumwinku wootheene, onnikhalihera dhai?

¹¹ Yehova oonivaha anna ni arokora a olumwinku wootheene wiira enikhalihere ovilela. Ndho vaavo nindhuwela nhu wiira mixankiho ninviriha nhu ‘dhinnaaphwanya annihu a olumwinku wootheene,’ elo enninimaaliha. (1 Ped. 5:9) Ndho moohixikha nxankiho ninviriha nhu, nikhupali ni nrima wootheene wiira anna akina aataka oviriha nxankiho mmodharu ewerya ovilela. Elo enoonihera wiira ni hiyo-tho ninoowerya ovilela.—Mit. 14:22.

12. Anna ni arokora annikhalihera dhai, ni hiyo nin’ya owerya dhai opaka etthu emodharu? (2 aKorinto 1:3, 4)

¹² Anna ni arokora anoowerya onikhalihera ovilela oreela wa itthu anlotta awa ni ampaka awa. Makiristau a eseekulu yoopacera, yaahipaka elo wiira enkhalihere nrummwa Paaulu. Mwa ntakihero, ivaara dhawaatta nrummwa Paaulu aahaaxukhurela anna ni arokora yaankhalihera okathi aatthukeliwe iye nkateya, aromolaka madhina-ya. Nitho awo yaahimmaaliha Paaulu enlipihaka ni onvaha itthu dhaanthowa. (aFil. 2:25, 29, 30; aKol. 4:10, 11) Olelo-va anna ni arokora anoowerya onikhalihera ovilela vaavo ninviriha nhu mixankiho. Nitho hiyo ninoowerya opaka etthu emodharu naakhaliheraka okathi wooxankiha.—Munsome 2 aKorinto 1:3, 4.

13. Eseeni yaankhalihenre nrokora Maya ovilela?

¹³ Ophetana wihu nkhama anna waahinlipiha vawaatta nrokora Maya yoowo onkhala oRússia. Mwaakha wa 2020, mapoliisiya yaahikukurya empa ya nrokora Maya ni nuuvira okathi yaahinroiha otribunaale mwaha woolaleya ihapari dhooreera. Owo onlotta wiira: “Okathi ole wooxankiha, anna ni arokora khiyaahin’ye okoonihera wiira yaanikipheta ekilikarelaka ni okaatikhela iwarakha dheidho dhaakilipiha vawaatta. Okathi wootheene miyo kinnidhuwela wiira anna ni arokora annikipheta. Masi okhuma mwaakha 2020, kinnitepa okhupali elo nuumala woona moopora awo akikhalihenre awa.”

14. Eseeni ninreerela nhu opaka wiira nittottele nreerelo nikhalihero na anna ni arokora okathi ninviriha nhu mixankiho? (Moone-tho efootu.)

¹⁴ Eseeni munreerela nnyu opaka? Okathi munviriha nnyu nxankiho, nkhale vakhiviru ni anna ni arokora ni mwaaleele nxankiho nnyu. Nitho nhoovelele waavekela nikhalihero asitokweene. Awo pooti okhala nkhama ‘ntthawelo okathi enoopa awa ettheku yooriirya, okathi enrupa awa epula ya nvevele.’ (Yes. 32:2) Nhiliyale wiira mixankiho munviriha nnyu dhinnaaphwanya anna ni arokora a olumwinku wootheene. Opaka itthu dhinoonihera waareerela nrima atthu akina mwaavahaka itthu dhinaathowa, enawookhaliherani okhala oohakalala ni owerya ovilela mixankiho dhinyu.—Mit. 20:35.

NLIPELELO NIHU NA NHOOLO

15. Nlipelelo na nhoolo naankhalihenre dhai Yeesu, ni nin’ya owerya dhai onikhalihera hiyo olelo-va? (aHeeberi 12:2)

¹⁵ Yehova oonivaha nlipelelo na nhoolo nenno ninnikhalihera ophwanya ikuru wiira nihihiye ovilela. (aRoma 15:13) Nkahaya muupuwele moopora nlipelelo naankhalihenre awa Yeesu ovilela mixankiho nihiku nookhidhera na ekumi-ye valaponi. (Munsome aHeeberi 12:2.) Yeesu aanidhuwela wiira aahihiye okhala oororomeleya, aankhalihera otteeliha ndhina na Yehova. Nitho Yeesu aanidhuwela wiira nuumala otthikela wiirimu, nhoolo-mwa aanthanliwa wiira akhale mwene ni aanlamulela vamodha ni anne oothanliwa. Mwa enamuna emodharu, nlipelelo nihu na okhala mahiku ootheene Mparayiisu, ninninikhalihera ovilela mixankiho dha olumwinku ola wa Satana.

16. Nlipelelo na nhoolo naankhalihenre dhai nrokora Alla, ni eseeni nhudhenre nnyu ni moolumo-ye?

¹⁶ Vano, nirowe noone moopora nlipelelo na Omwene wa Muluku naankhalihenre awa nrokora mmodha oniitthaniwa Alla yoowo onkhala oRússia. Amamune yaahitthukeliwa ekateya ampwehiwa anaperesu alipelela ophukeliwa elipelelaka ophukiwa nlattu-ya. Nuumala wiiraneya elo, Alla aahilotta airaka: “Ovekela voohima dha nlipelelo na nhoolo ni wuupuwelela, onnikikhalihera ohitepa oriipiwa nrima. Miyo kinnidhuwela wiira vanihikuni mixankiho idha dhootheene dhinoomaliha. Yehova onawaawerya awanani-ye ni onoonitthuvela nhoolo.”

17. Eseeni ninreerela nhu opaka wiira noonihere wiira ninnixukhurela nlipelelo nihu na nhoolo nenno ninkhuma mbiibiliyani? (Moone-tho efootu.)

¹⁷ Eseeni munreerela nnyu opaka? Mwiivahe okathi khuta nihiku wiira muupuwelele moopora en’ya awa okhala etthu yoohakalaliha okhala ni amudhi ni axirikha nnyu elapo epheya. Ndho vaavo ninuupuwelela nhu mareeliho awaatta ni oohimala a nhoolo, anninikhalihera woona wiira mixankiho ninviriha nhu ti dha “okathi vakhaani.” (2 aKor. 4:17) Nitho nhihiye waaleela atthu akina nlipelelo na nhoolo. Nkahaya muupuwele moopora eri awa etthu yooxankiha wa atthu ale ahindhuwela itthu Yehova onlaihera iye opaka nhoolo, ovilela mixankiho dha olumwinku ola wa Satana. Akhala wiira nnawaaleela itthu vakhaani voohima dha Omwene wa Muluku, woonawene elo enoowiiriha awo otthuna wiiwa itthu dhikina Yehova onlaihera iye nhoolo.

18. Seeni nintthuneya nhu okhupali dhoolaihera dha Yehova?

¹⁸ Nuumala Yoobi ovilela mixankiho dhaamphwannye ni ohihiya okhala oororomeleya, owo aahinleela Yehova wiira: ‘Vano koodhuwela wiira munniwerya opaka itthu dhootheene, ni wiira khiyaavo etthu nnuupuwela nnyu, nhinwerya nnyu opaka.’ (Yobi 42:2) Yoobi aahihudha wiira khiyaavo etthu ekhanle omooceeliha Yehova waakhwanihera etthu olaihenre iye. Ndho vaavo ninuupuwela nhu wiira Yehova onoomaliha mixankiho dhinniphwanya ni waakhwaanihera itthu olaihenre iye nhoolo, elo enninivaha ikuru wiira niwerye ovilela. Wiira nilikanyihe, nkahaya mmuupuwele nthiyana mmodha onwereiwa eretta yuulupale. Owo ooriipiwa nrima okhala wiira mameetiku awaatta khawenrye onkhalihera openuwa eretta elo. Masi nuumala nihiku nimodha omphwanya meetiku ororomeleya ni ondhuwela saana oloola eretta elo, owo onnileela etthu emmwiiriha woona owereya ni etthu en’ya okhalihera openuwa. Nuumala wiiwa elo, nthiyana owo onnihakala, hata adhuwelaka wiira onoovira okathi wawaatta wiira apenuwe. Ndho elo enikhalihera ovilela okhala wiira ookhalana nlipelelo wiira vanihiku onoora apenuwe. Mwa enamuna emodharu, okhupali wiira enawaakhwanela yoolaihera ya Yehova ya wiiriha elapo okhala Eparayiisu enoowerya onikhalihera ovilela.

19. Eseeni ninreerela nhu opaka wiira nihihiye ovilela?

¹⁹ Nkhama noonne nhu yoosoma ela, Yehova onninikhalihera ovilela oreela wa nivekelo, Biibiliya, anna ni arokora ni nlipelelo nihu na nhoolo. Akhala wiira ninoorumela itthu idho dhootheene Yehova onivanhe iye, ninoowerya ovilela mixankiho dhinniphwanya, mpakha okathi Yehova on’ya iye omaliha makhalelo ootakhala a olumwinku ola wa Satana.—aFil. 4:13.