YOOSOMA YA MWAHA 34
NCIPO 3 Yehova ti Ikuru, Nlipelelo ni Nroromelo Nihu
Mwaakhulele Olevelela wa Yehova
“Nyuwo mwaahikilevelela itampi saka.”—ESAL. 32:5.
ETTHU NIN’YA NHU OHUDHA
Nin’ya woona seeni nintthuneya nhu waakhulela olevelela wa Yehova ni dhawaatikhiwa dha mbiibiliyani inoonihera wiira Yehova onnilevelela itampi dha ale anttharuwa.
1-2. Ninoonela dhai vaavo nindhuwela nhu wiira Yehova oolevelela itampi dhihu? (Moone-tho efootu ya.)
MWENE Davidi aahiriipiwa nrima mwaha wa dhoovonya aapanke iye khalai. (Esal. 40:12; 51:3; muru) Owo aahipaka itampi dhuulupale. Masi nuumala woonihera ottharuwa ni nrima wootheene, Yehova aahinlevelela. (2 Sam. 12:13) Ndho, Davidi aahihakalala vawaatta nuumala woona wiira Yehova aahinlevelela.—Esal. 32:1.
2 Nkhama Davidi, hiyo ninnihakalala vawaatta nuumala odhuwela wiira Yehova oonimorela ikharari ni oolevelela itampi dhihu. Etthu yoomaaliha odhuwela wiira Yehova onoonilevelela, hata nipanke etampi yuulupale, akhala wiira ninawoonihera ottharuwa ni nrima wootheene, waaleela asitokweene etampi nipanke nhu ni wiilipihera oxaka otthikela opaka yoovonya emodharu! (Mir. 28:13; Mit. 26:20; 1 Yoh. 1:9) Nitho ninnihakalala vawaatta odhuwela wiira vaavo Yehova onnilevelela iye, owo onniliyala moomalela ni khankhala-khala anihukhumaka mwaha wa etampi onilevelenle iye!—Ezek. 33:16.
Mwene Davidi ohaatikha Isaalimu dhawaatta dhinlotta olevelela wa Yehova (Moone ettima 1-2)
3-4. (a) Nrokora Jennifer oonela dhai nuumala opatisiwa? (b) Eseeni nin’ya nhu woona yoosoma ela?
3 Masi ivaara dhikina, woonawene atthu akina pooti waaliperya waakhulela olevelela wa Yehova. Moone ele yaamwiiraneenle nrokora Jennifer, yoowo ohudhihiwe ekhweeli ni anaan’yari-ye okathi aari iye mwaana. Mooriipiha nrima, nuumala owo wunnuwa, aahipacera opaka itthu dhootakhala ni waakhuwa anaan’yari-ye itthu aapaka iye. Nuuvira okathi, owo aahipaka marukunuso mweekumini-mwe aivahererya wa Yehova ni apatisiwa. Owo onlotta wiira: “Khalai waanikidhivela vawaatta nsurukhu, orupihana woohiloka, ohapaliwa ni kaari ntthu oowali. Miyo kaanidhuwela wiira nuumala onvekela Yehova wiira akilevelele ni ottharuwa ni nrima wootheene, owo anwerya okilevelela oreela wa nkuttho wa Yeesu. Masi hata kaapaka itthu idho dhootheene, nanlelo vanrimani vaka kaanaakanyera vakhala wiira Yehova ookilevelela moomalela.”
4 Niire nyuwo ivaara dhikina onnooliperyani okhupali vanrimani vinyu wiira Yehova oolevelela moomalela itampi dhinyu dha khalai? Nkhama Davidi, Yehova ontthuna wiira nikhupali wiira toomoriwa ikharari ni onninilevelela moomalela. Yoosoma ela, nin’ya woona seeni eri awa etthu yootthuneya waakhulela olevelela wa Yehova ni etthu en’ya onikhalihera opaka elo.
SEENI NINTTHUNEYA NHU WAAKHULELA OLEVELELA WA YEHOVA?
5. Eseeni Satana ontthuna iye onikhupaliha? Nvahe ntakihero.
5 Waakhulela olevelela wa Yehova, onninikhalihera oxaka omorela nraakho wa Satana. Nhiliyale wiira Satana onipaka itthu dhootheene onwerya iye wiira aniirihe ohiya onrumeela Yehova. Satana onnipaka elo, eehereryaka onikhupaliha wiira khuta etampi nimpaka nhu Yehova khankhala-khala alevelelaka. Mwa ntakihero, mooone ele yaamwiiraneenle nlopwana mmodha a oKorintu aakhumihiwe mmulokoni mwaha wa orupihana woohiloka. (1 aKor. 5:1, 5, 13) Nuuvira okathi, owo aahittharuwa mweettelo-ye woonanara. Masi hata eri dhiidho, Satana aatthuna wiira anna a muloko ole ehinlevelele ni ehimwaakhulelihe otthikela mmulokoni. Ohiya-vo, Satana aatthuna wiira nlopwana ole okhupali wiira hata aattharuwe opaka etampi Yehova khaakhala-khala anlevelelaka wiira ‘atepe oriipiwa nrima mpakha okhulumuwa’ ni elo emwiirihe ohiya onrumeela Yehova. Nitho olelo-va Satana onnirumeela nraakho omodharu wiira aniirihe ohiya onrumeela Yehova. Masi hiyo, ‘khanintikhina olavilavi-we.’—2 aKor. 2:5-11.
6. Eseeni en’ya onikhalihera ophwanya ohakalala ni oxaka wiivaha nthowa mootepana?
6 Waakhulela olevelela wa Yehova, onninikhalihera ophwanya ohakalala ni oxaka wiivaha nthowa mootepana. Okhala wene, vaavo nimpaka nhu etampi ninniivaha nthowa. (Esal. 51:17) Ndho elo kahi yootakhala, okhala wiira yawuupusera ya nrima nhu pooti onitumererya opaka marukunuso ni opaka itthu dhooreera. (2 aKor. 7:10, 11) Masi akhala wiira ninawuumelela oriipiwa nrima ni wiivaha nthowa hata nuumala ottharuwa, elo pooti oniiriha okhulumuwa ni ohiya onrumeela Yehova. Masi vaavo ninaakhulela nhu olevelela wa Yehova, onninikhalihera oxaka wiivaha nthowa. Nitho elo enniniiriha ohihiya onrumeela Yehova ni yawuupusera ya nrima yooreera ni moohakalala. (aKol. 1:10, 11; 2 Tim. 1:3) Masi nin’ya owerya dhai waakhulela olevelela wa Yehova?
ESEENI EN’YA ONIKHALIHERA WAAKHULELA OLEVELELA WA YEHOVA?
7-8. Eseeni Yehova aanleenle iye Moise voohima dha ontthu-ye, ni eseeni ninreerela nhu okhupali? (Okhuma 34:6, 7)
7 Muupuwele ele Yehova onlotta iye voohima dha ontthu-ye. Mwa ntakihero, moone ele Yehova aanleenle iye Moise omwaako Sinaayi.a (Munsome Okhuma 34:6, 7.) Nnaamwi Yehova arina mikhalelo dhawaatta dhooreera, owo aahilakela onleela Moise wiira owo ‘Muluku oomoriwa ikharari ni oolekela onanariwa.’ Ndho niire Muluku orina mikhalelo idho dhooreera, aankhootta onlevelela nrumeyi-ye opanke etampi ni oonihenre ottharuwa ni nrima wootheene? Nnakhala vakhaani! Okhala wiira opaka elo, yaamoonihera wiira tootakhala nrima ni khanimoriwa ikharari. Masi nkhama nindhuwela nhu, Yehova khari dhiidho ni khankhala-khala apakaka elo!
8 Nihaana okhupali ni nrima wootheene vaavo Yehova onlotta iye wiira toomoriwa ikharari okhala wiira owo Muluku eekhweeli ni khanootha. (Esal. 31:5) Tivondho nookhalana mathowa anniiriha okhupali khuta etthu onlotta iye. Ndho akhala wiira onnooliperyani oxaka wiivaha nthowa mwaha wa itampi mpanke nnyu khalai, mwiikohe wiira: ‘Niire tthiri miyo kinnikhupali wiira Muluku toomoriwa ikharari, oolekela onanariwa ni khankhootta onlevelela ntthu opanke etampi ni oonihere ottharuwa? Ndho, niire kihaana waakhanyera vakhala wiira owo ookilevelela?’
9. Ontaphulelani Yehova olevelela itampi dhihu? (Esalimo 32:5)
9 Muupuwele ele Yehova owuupusenre iye olotta atthu amwaatinkhe Biibiliya voohima dha olevelela-we. Mwa ntakihero, moone ele Davidi aatinkhe iye voohima dha olevelela wa Yehova. (Nsome Esalimo 32:5.) Davidi aalontte wiira: ‘Nyuwo moolevelela itampi dhaka.’ Nuulumo na eheeberi nawi “olevelela” pooti otaphulela “ovenyiha,” “okhumiha” aahiidho “okusa.” Nuumala Yehova onlevelela Davidi, vaaphwana nkhama Yehova aakhumihe itampi dha Davidi apweha ottaiwene nuuwo. Ndho Davidi aahihakalala nuumala woona wiira Yehova aahinlevelela moomalelala. (Esal. 32:2-4) Nitho hiyo ninoowerya okhalana moonelo mmodharu wa Davidi. Tivondho akhala wiira noottharuwa ni nrima wootheene, nihaana oxaka wuumelela opwesera nritti woolemela niivahaka nthowa itampi Yehova onilevelenle iye aahiidho okhumihe iye apweha ottaiwene ni hiyo.
10-11. Moolumo a wiira ori ‘oolikana ene wiira alevelele’ annihudhihani voohima dha Yehova? (Esalimo 86:5)
10 Nsome Esalimo 86:5. Yawaatikhiwa ela, Davidi olontte wiira Yehova ori ‘oolikana ene wiira alevelele.’ Elottaka ele antaphulela moolumo ala, ereferensiya emodha ya Biibiliya elottaka voohima dha Yehova, eniira: “Okhala wene [owo] toolevelela.” Eseeni emmwiiriha Yehova opaka elo? Mphantta onttharelana wa eveersu ela onlotta wiira: ‘Opheta winyu woororomeleya, ti wuulupale para atthu anoovekelani.’ Nkhama noonne nhu yoosoma evinre, Yehova onnilaihera owoonihera opheta woororomeleya ale animpheta ni khankhala-khala aanyanyalaka. Mwaha wa opheta-we woororomeleya, Yehova onnaalevelela ni ‘nrima wootheene’ ootheene ale anttharuwa. (Yes. 55:7) Akhala wiira nanlelo onnooliperyani waakhulela olevelela wa Yehova, mwiikohe wiira: ‘Niire kinnikhupali wiira Yehova toolevelela ni ori oolikana ene wiira aalevelela ootheene ale anttharuwa ni aninvekela wiira aamorele ikharari?’ Ndho, niire kihaana waakanyera vakhala wiira Yehova ookilevelela nuumala onvekela wiira akimorele ikharari?
11 Nitho ninniphwanya nimaaliho odhuwela wiira Yehova khantikhina wiira na atthu oohimalela. (Esal. 139:1, 2) Nirowe noone Esaalimu ekina Davidi aatinkhe iye yeelo ennikhalihera okhupali wiira Yehova ontthuna onilevelela.
NHILIYALE WIIRA YEHOVA ONNINIDHUWELA SAANA
12-13. Moovarihana ni Esalimo 103:14, eseeni Yehova onuupuwela iye voohima dha hiyo, ni eseeni elo emmwiiriha awa opaka?
12 Nsome Esalimo 103:14. Eveersu ela, Davidi onnitthokihera nthowa nimodha nimmwiiriha Yehova waalevelela arumeyi-ye anttharuwa. Owo onlotte wiira Yehova “onnuupuwela wiira hiyo na ntthupi.” Elo ennoonihera wiira Yehova onnidhuwela saana wiira na atthu oohimalela. Wiira niiwasase saana elo, nirowe noone ele antaphulela awa moolumo a Davidi.
13 Davidi olontte wiira Yehova ‘onnidhuwela saana moopora nipattusiwe nhu.’ Yehova aampattunse Adamu ‘arumeelaka etthaya.’ Ndho elo enoonihera wiira Yehova onnidhuwela moopora onipanke iye ni itthu ninramela nhu. Mwa ntakihero, owo onnidhuwela wiira ninnitthuneya oca, orupa ni omumula. (Maph. 2:7) Masi nuumala Adamu ni Eeva ottheka, nuulumo na wiira “na ntthupi” pooti otaphulela wiira na atthu oohimalela mwaha wa etampi niranve nhu, yeelo enniiriha opaka itthu dhoonanara. Ohiya pahi odhuwela wiira na atthu oohimalela, Davidi olontte wiira Yehova “onnuupuwela” elo. Nuulumo na eheeberi nirumeeliwe nva, pooti otaphulela opaka etthu yooreera. Ndho ni moolumo ookhweya, moolumo a Davidi antaphulela wiira: Yehova onnidhuwela wiira ivaara dhikina ninoovonya, ndho elo ennimwiiriha onimorela ikharari ni onilevelela vaavo ninoonihera nhu ottharuwa ni nrima wootheene.—Esal. 78:38, 39.
14. (a) Etthu seeni ekinaku Davidi olontte iye voohima dha moopora Yehova onnilevelela iye? (Esalimo 103:12) (b) Eseeni ninhudha nhu ni moopora Yehova aanlevelenle iye Davidi? (Moone ekwaaturu eni: “Moopora Yehova Onlevelela iye ni Oliyala.”)
14 Etthu seeni ekina ninhudhera nhu ni Esalimo 103 voohima dha olevelela wa Yehova? (Nsome Esalimo 103:12.) Davidi olontte wiira vaavo Yehova onlevelela iye itampi dhihu, owo onnirahela ‘ottaiwene wa hiyo nkhama dhiidhaale onkhuma ndhuwa ottaivelanne awa ni omputuwela ndhuwa.’ Mphantta onkhuma ndhuwa woottaivelana vawaatta ni omputuwela ndhuwa, mapuro awo maili khankumanela. Ndho elo ennihudhihani voohima dha itampi Yehova onlevelela iye? Ereferensiya emodha etthokiheraka eveersu ela, enlotta wiira: “Muluku orahelela itampi dhihu ottaiwene wa hiyo, onlikana ni wunkha wa etthu aahiidho nlepa nenno ninrimeela moomalela. Tivondho nikhupali ni nrima wootheene wiira Yehova khankhala-khala atthikelaka wuupuwelela etampi olevelenle iye.” Nkahaya muupuwele ele: Ivaara dhikina vaavo niniiwa nhu wunkha elo pooti oniiriha wuupuwela etthu yaairanen’ye khalai. Masi wiira Yehova ahitthikele wiiwa wunkha aahiidho wuupuwelela itampi onilevelenle iye, owo onnirahela ottaiwene wa hiyo.—Ezek. 18:21, 22; Mit. 3:19.
15. Akhala wiira nlelo ninnuumelela wiivaha nthowa mwaha wa itampi nipanke nhu khalai, eseeni ninreerela nhu opaka?
15 Moolumo a Davidi ari Esalimo 103 annikhalihera dhai waakhulela olevelela wa Yehova? Akhala wiira nlelo ninnuumelela wiivaha nthowa mwaha wa itampi nipanke nhu khalai, nihaana wiikoha wiira: ‘Kiire kinnuupuwela wiira Yehova onnidhuwela wiira ka ntthu oohimalela ni onnilaihera onlevelela khuta ntthu onttharuwa ni nrima wootheene, okihela mpuwa miyo? Kiire kinnuupuwela wiira Yehova onnithanla oliyala moomalela itampi okilevelenle iye ni khankhala-khala arumeela itampi idho wiira akihukhume? Yehova khanuumelela olipela dhoovonya dhihu dha khalai. Ndho hiyo nihaana opaka etthu emodharu. (Esal. 130:3) Vaavo ninaakhulela nhu olevelela wa Yehova, elo enninikhalihera oxaka wiivaha nthowa mwaha wa dhoovonya dhihu dha khalai ni ohihiya onrumeela Yehova moohakalala.
16. Seeni eri awa etthu yawoopiha wuumelela wuupuwelela itampi Yehova olevelenle iye? Nvahe nlikanyiho. (Moone-tho efootu.)
16 Nkahaya muupuwele nlikanyiho nna: Wuumelela wiivaha nthowa mwaha wa itampi dhihu dha khalai pooti onlikana ni ntthu oneettiha ekaaro alipelaka okathi wootheene espeelyu wiira awerye woona etthu enra ottuli-we. Ekhweeli wiira ivaara dhikina opaka elo etthu yooreera, masi akhala wiira onawuumelela olipela espeelyu okathi wootheene, elo pooti omwiiriha ompaka asitenti. Ndho wiira ntthu owo oneettiha ekaaro awerye weetta moophareleleya, ohaana ovaha ephoole alipelaka ohoolo on’yaiyewo. Mwa enamuna emodharu, ivaara dhikina wuupuwelela itampi nipanke nhu khalai pooti onihudhiha etthu ni olipiha yoolakela nhu ya ohitthikela opaka etthu emodharu. Masi akhala wiira ninawuumelela wuupuwelela itampi Yehova olevelenle iye, elo pooti ovukula ohakalala wihu ni itthu nimpaka nhu wiira ninrumeela Yehova. Tivondho nihaana wiilipihera onrumeela Yehova ni ohiliyala nlipelelo nooreera olaihenre iye wiira miyuupuwelo dhootheene dhoonanara ‘khandhirowa wuupuweliwa-tho.’—Yes. 65:17; Mir. 4:25.
Nkhama dhiidhaale ntthu oneettiha ekaaro ontthuneya iye olipela ohoolo on’yaiyewo ohiya olipela espeelyu, hiyo nihaana olipela mareeliho a nhoolo ohiya olipela itampi dhihu dha khalai (Moone ettima 16)
NHIHIYE OKHUPALI NI NRIMA NNYU WOOTHEENE
17. Seeni nintthuneya nhu ohihiye okhupali ni nrima nhu wootheene wiira Yehova onninipheta ni ori oolikana ene wiira anilevelele?
17 Hiyo nihaana ohihiye okhupali ni nrima nhu wootheene wiira Yehova onninipheta ni ori oolikana ene wiira anilevelele. (1 Yoh. 3:19) Mwaha wa seeni? Okhala wiira Satana onipaka itthu dhootheene onwerya iye wiira aniirihe okhupali wiira nootepa okhala anatampi ni Yehova khankhala-khala aniphetaka ni onilevelela. Masi owo onipaka elo, okhala wiira yoolakela-ye yuulupale ori oniiriha ohiya onrumeela Yehova. Ndho vaavo ninaattamela nhu wookhidherani, nilipelele wiira Satana onootepa wiilipihera opaka elo okhala wiira oodhuwela wiira ohanlena okathi vakhaani. (Wiis. 12:12) Tivondho nihihiye niweriwaka ni Satana!
18. Eseeni munreerela nnyu opaka wiira nkhupali ni nrima nnyu wootheene opheta ni olevelela wa Yehova?
18 Yoosoma evinre, ehoonihera etthu munreerela nhu opaka wiira mwaakhulele opheta wa Yehova. Nitho nkhama moonne nnyu yoosoma ela, wiira nkhupali ni nrima nnyu wootheene olevelela wa Yehova, nhaana wuupuwela ele Yehova onlotta iye voohima dha ontthu-ye, wiivaha okathi wiira muupuwele ele Yehova owuupusenre iye olotta atthu amwaatinkhe Biibiliya voohima dha olevelela-we, ohiliyala wiira Yehova onnidhuwela saana wiira mwa ntthu oohimalela ni onnoomorelani ikharari, ni wuupuwelela wiira vaavo Yehova oninlevelela iye ntthu ompaka elo moomalela. Ndho mwapaka elo, nkhama Davidi nnoowerya okhupali wiira Yehova toomoriwa ikharari, nlottaka wiira: “Kooxukhurela Yehova, mwaha ‘woolevelela yoottheka aka ni itampi dhaka’!”—Esal. 32:5.
NCIPO 1 Mikhalelo dha Yehova
a Moone mwaha oni: “Achegue-se a Deus—Jeová descreve a si mesmo” ori A Sentinela a 1.º a Maio a 2009.