Nin’ya Owerya Dhai Okhootta Muupuwelo wa Otthuna Opaka Itthu Dhoonanara?

1. Nxankiho seeni onaaphwanya atthu ootheene?

NIIRE mootaka okhalana muupuwelo wa otthuna opaka etthu eninnanara Yehova? Akhala wiira mootaka, nhixanke okhala wiira akhala atthu awaatta anviriha nxankiho mmodharu. Biibiliya onlotta wiira: ‘Weehereriwa onoophwanyani, nitho onnaaphwanya atthu ootheene.’ (1 aKor. 10:13) Elo entaphulela wiira moohixikha muupuwelo munwanana nnyu, atthu akina anniviriha nxankiho mmodharu. Tivondho nyuwo khanri meekhannyu, nkhaliheriwaka ni Yehova nnoowerya okhootta muupuwelo owo.

2. Dhaweeha seeni ikhanle waaphwanya anna ni arokora akina waahela mpuwa anaskola a Biibiliya? (Moone-tho ifootu.)

² Biibiliya onlotta wiira: ‘Khuta ntthu onneehereriwa ni otthuna-we dhootakhala, weiwo ommoototha, onanhapusa.’ (Yak. 1:14) Eveersu ela enninikhalihera woona wiira yaweeha enimphwanya ntthu mmodha pooti ovirikana ni ele enimphwanya ntthu nkina. Mwa ntakihero, makiristau makina pooti weehereriwa ni yootthuna ya orupihana woohiloka, masi makina pooti waaphwanya yaweeha ya otthuna orupihana alopwanaru aahiidho athiyanaru. Nitho ale ahin’ye woona epornokarafiiya, pooti waaphwanya yaweeha ya otthuna otthikela woona. Ohiya-vo, ale ahin’ye oca mirette dhoohapala aahiidho ohapaliwa pooti waaphwanya yaweeha ya otthuna otthikela itthu idho. Ndho idha, mixankiho anviriha awa makiristau ootheene waahela mpuwa anaskola a Biibiliya. Ivaara dhikina ootheene nhu ninnikhalana moonelo mmodharu aarina nrummwa Paaulu, yoowo aatinkhe wiira: ‘Kaatthunaka opaka yooreera, onnikireela muupuwelo wa otthuna opaka etthu yootakhala.’—aRoma 7:21.

3. Ntthu opacenre khalai owanana miyuupuwelo dha otthuna opaka itthu dhoonanara, oniidhoonela dhai?

³ Akhala wiira mpacenre khalai owanana muupuwelo mmodha wa otthuna opaka etthu yoonanara, woonawene nyuwo pooti opacera wuupuwela wiira khamunwerya oxira yaweeha elo. Nitho nyuwo pooti opacera wuupuwela wiira Yehova ohooliyalani ni khanaakhulela okokhorela winyu mwaha wa miyuupuwelo nrinnyuna dha otthuna opaka itthu dhoonanara. Masi nkhupali ni nrima wootheene wiira elo kahi ekhweeli. Ndho wiira niiwasase saana elo, yoosoma ela enoonikhalihera waakhula makoho maili: (1) Eseeni enwiirihani wuupuwela wiira khamunwerya oxira miyuupuwelo dha otthuna opaka itthu dhoonanara ni wiira Yehova ohooliyalani? (2) Mun’ya owerya dhai okhootta miyuupuwelo dha otthuna opaka itthu dhoonanara?

ESEENI SATANA ONTTHUNA IYE WIIRA NUUPUWELE?

4. (a) Eseeni Satana ontthuna iye wiira nuupuwele vaavo nineehereriwa nhu? (b) Eseeni ennikhupaliha wiira ninoowerya okhootta miyuupuwelo dha otthuna opaka itthu dhoonanara?

⁴ Okathi enniphwanya awa yaweeha, Satana ontthuna wiira nuupuwele wiira khaninwerya oxira miyuupuwelo dha otthuna opaka itthu dhoonanara. Yeesu aahoonihera wiira Satana anneehererya vaavo aahudhinhe iye atthareli-ye ovekela yiiraka: ‘Nhinihiye nimoraka okathi nineehereriwa nhu, masi nnaakihere ntakhali.’ (Math. 6:13) Satana onlotta wiira apinaatamu khanwerya okhala oororomeleya wa Yehova okathi dhinaaphwanya awa mixankiho. (Yobi 2:4, 5) Eseeni emmwiiriha Satana wuupuwela dhiidho? Okhala wiira okathi owo eehereriwe iye ni muupuwelo wa otthuna opaka etthu yoonanara, aahihiya okhala oororomeleya wa Yehova. Woonawene Satana onkhupali wiira niri nkhama veene, uupuwelaka wiira okathi en’ya awa oniphwanya yaweeha ya otthuna opaka itthu dhoonanara ninoohiya okhala oororomeleya wa Yehova. Hata Satana, uupuwela wiira aanwerya omweehererya Mwaana oomalela a Muluku amwiirihaka opaka etthu yoonanara! (Math. 4:8, 9) Vano, nkahaya muupuwele nikoho nna: Niire hiyo na atthu ookhweya ni khaninwerya okhootta miyuupuwelo dha otthuna opaka itthu dhoonanara? Nnakhala vakhaani! Hiyo ninnikhupali moolumo nrummwa Paaulu aatinkhe iye airaka: ‘Tthiri kinniwerya opaka itthu dhootheene mwaha wa ole onkivaha ikuru.’—aFil. 4:13.

5. Eseeni enoonihera wiira Yehova onnikhupali wiira hiyo ninoowerya okhootta miyuupuwelo dha otthuna opaka itthu dhoonanara?

⁵ Moovirikana ni Satana, Yehova onnikhupali wiira hiyo ninoowerya okhootta miyuupuwelo dha otthuna opaka itthu dhoonanara. Eseeni enniiriha okhupali elo? Okhala wiira Yehova olontte wiira nttitthi muulupale wa atthu oororomeleya onawoopowa okathi maxakha muulupale. Vano, muupuwele ele moolumo ala antaphulela awa. Yehova khanootha, owo olontte wiira nttitthi muulupale wa atthu, ohiya wa atthu vakhaani, masi wa atthu awaatta, ‘waanfula malaya-ya ni waantteeliha mphomeni mwa mwaapwittipwitthi’. Ndho elo enoonihera wiira Yehova onawaathokorerya atthu awo okhala awaarya vamaithoni-ve ni waavaha eparakha ya ovolowa elapo epheya. (Wiis. 7:9, 13, 14) Ennooneya wiira Yehova onnidhuwela ni onnikhupali wiira hiyo ninoowerya okhootta miyuupuwelo dha otthuna opaka itthu dhoonanara.

6-7. Eseeni Satana ontthuna iye wiira nuupuwele?

⁶ Satana khantthuna wiira nikhulumuwe pahi, masi ontthuna wiira nuupuwela wiira Yehova oniliyala ni khanaakhulela okokhorela wihu mwaha wa miyuupuwelo dhihu dha otthuna opaka itthu dhoonanara. Eseeni emmwiiriha Satana wuupuwela dhiidho? Okhala wiira owo onyanyaliwa ni Yehova ni khanlipelela waakhela ekumi yoohimala. (Maph. 3:15; Wiis. 20:10) Mweekhweeli Satana onninikhalela nrima, okhala wiira owo khaana nlipelelo na nhoolo. Tivondho owo ontthuna wiira nikaidhoona nkhama atthu ahaana nlipelelo, nkhama veene. Masi moovirikana ni elo, hiyo khanirimeenle okhala wiira moohakalaliha Biibiliya onnilaihera wiira Yehova ontthuna onikhalihera wiira nhoolo niphwanye ekumi yoohimala. Owo ‘khantthuna wiira nnakhala ntthu mmodha apwetesiwe, masi ontthuna wiira atthu ootheene erukunuse mirima.’—2 Ped. 3:9.

⁷ Ndho akhala wiira ninookhupali wiira khaninweya okhootta muupuwelo wa otthuna opaka itthu dhoonanara ni opacera wuupuwela wiira nooliyaliwa ni Yehova, nihiliyale wiira muupuwelo owo ti wa Satana. Odhuwela elo enoonikhalihera ophwanya ikuru wiira nikhootte muupuwelo owo wa Satana.—1 Ped. 5:8, 9.

ESEENI ETAMPI EKHANLA AWA ONIIRIHA OPACERA WUUPUWELELA?

8. Ohiya pahi itthu dhoothakhala, etampi enhela mpuwa eseeni? (Esalimo 51:5) (Moone-tho “Oleeliheriwa wa Nuulumo.”)

⁸ Ohiya Satana pahi, yookhala etthu ekina ekhanle oniiriha wuupuwelela wiira na ntthu ookhweya ni khaninkha-khala niweryaka okhootta miyuupuwelo dhoonanara. Etthu seeni elo? Etampi niravihiwe nhu ni anaan’yari nhu oopacera.a—Yobi 14:4; nsome Esalimo 51:5.

9-10. (a) Adamu ni Eeva yoonenle dhai nuumala opaka etampi? (Moone-tho efootu.) (b) Mwaha wa etampi niravihiwe nhu, miyuupuwelo seeni nikhanle nhu okhalana?

⁹ Nkahaya muupuwele moopora Adamu ni Eeva oonenle iye nuumala opaka etampi. Nuumala awo woona wiira khiyaamwiiwelenle Yehova, yaahiipitha ni yaahirukula makukhu yiikhuneela. Elottaka voohima dha mwaha owo, eliivuru ya Estudo Perspicaz, enlotta wiira: “Etampi elo yaahiwiiriha wiivaha nthowa, oxanka, wiidhoona ohikhala oophareleleya ni wuuliwa muru.” Ndho ni moolumo makina, vaakhala nkhama Adamu ni Eeva yaawaleliwe mpani ekarukurerya mommo, masi ehikawerya okhumela vaate. Awo khiyaakhala-khala ehiyaka okhala anatampi.

¹⁰ Masi nkhalelo nhu ti woovirikana vawaatta ni wa Adamu ni Eeva. Mwaha wa yawoopola, yeelo ehivareleya nteko wa Adamu ni Eeva, enniiriha oweryaneya hiyo oleveleliwa itampi dhihu ni okhalana yawuupusera ya nrima yooreera. (1 aKor. 6:11) Masi hata eri dhiidho, mwaha wa etampi niravihiwe nhu ni Adamu ni Eeva, ivaara dhikina pooti wiivaha nthowa, oxanka, wiidhoona ohikhala oophareleleya ni wuuliwa muru. Tivondho Biibiliya onlotta iye wiira etampi khehin’ye waalamulela apinaatamu. Nitho elo enniwiiraneela atthu ootheene waahela mpuwa ‘ale ahitthenke nkhama yaatthenke awa Adamu.’ (aRoma 5:14) Hata niyariwe ni etampi, nihuupuwele wiira khaninwerya opaka itthu dhooreera ininhakalaliha Yehova aahiidho wuupuwelela wiira khinaana nlipelelo. Hiyo ninoowerya okhootta miyuupuwelo idho dhoonanara. Mooporani?

11. Eseeni munreerela nnyu ohiliyala okathi mumpacera wuupuwela wiira khamunwerya okhootta miyuupuwelo dha otthuna opaka itthu dhoonanara? (aRoma 6:12)

¹¹ Okathi nimpacera nhu wuupuwela wiira khaninwerya okhootta miyuupuwelo dha otthuna opaka itthu dhoonanara, nihiliyale wiira hiyo pooti opacera wuupuwela dhiidho mwaha wa ohimalela. Masi nihikhala-khale naakhulelaka muupuwelo owo. Mwaha seeni? Okhala wiira Biibiliya onlotta wiira nihihiye etampi “yeetthihaka” ekumi nhu. (Munsome aRoma 6:12.) Elo entaphulela wiira nookhalana eparakha ya othanla okhootta opaka itthu nittharaka muupuwelo nhu wa otthuna opaka itthu dhoonanara. (aGal. 5:16) Yehova onninitumererya okhootta dhaweeha okhala wiira onniniroromela ni onnikhupali wiira ninoowerya opaka elo. Owo khaakhala-khala anivekelaka opaka elo, adhuwelaka wiira khaninwerya. (Otum. 30:11-14; aRoma 6:6; 1 aTes. 4:3) Moohaakanyera, hiyo ninoowerya okhootta miyuupuwelo dha otthuna opaka itthu dhoonanara!

12. Okathi nimpacera nhu wuupuwela wiira Yehova ooniliyala eseeni nihinreerela nhu opaka, ni mwaha wa eseeni?

¹² Emodha-modharu, okathi nimpacera nhu wuupuwela wiira Yehova ooniliyala aahiidho khanaakhulela okokhorela wihu mwaha wa miyuupuwelo dha otthuna opaka itthu dhoonanara, nihiliyale wiira muupuwelo owo onkhumiheriwa ni ohimalela. Tivo nihikhala-khale naakhulelaka muupuwelo owo. Mwaha wa eseeni? Okhala wiira Biibiliya onlotta wiira Yehova onnidhuwela saana wiira hiyo na atthu oohimalela. (Esal. 103:13, 14) Yehova ‘onnidhuwela itthu dhootheene’ voohima dha hiyo, ohela mpuwa itthu dhoovirikana dhikhanle oniiriha opaka dhoohiloka mwaha okhala atthu oohimalela. (1 Yoh. 3:19, 20) Tivondho akhala wiira ninawiilipihera okhootta opaka itthu nittharaka muupuwelo nhu wa otthuna opaka itthu dhoonanara, Yehova onoonithokorerya okhala atthu awaarya vamaithoni-ve. Eseeni enniiriha okhupali elo?

13-14. Niire okhalana muupuwelo wa otthuna opaka etthu yoonanara ontaphulela wiira Yehova khannaakhulela? Ntthokihere.

¹³ Biibiliya onnoonihera wiira wookhala ovirikana wuulupale eriyari ya opaka etthu yoonanara ni okhalana muupuwelo wa otthuna opaka etthu yoonanara. Okhala wiira ninoowerya okhootta opaka etthu yoonanara, masi khaninwerya okhootta moomalela okhalana muupuwelo wa otthuna opaka etthu yoonanara. Mwa ntakihero, atthu akina a oKorintu ehinatthi okhala makiristau yaahikhalana yoolema ya orupihana alopwanaru aahiidho athiyanaru. Tivondho nrummwa Paaulu aahaatikha wiira: ‘Akina a nyuwo, khalai mwaari dhiidho.’ Niire elo entaphulela wiira awo khiyaatthikenle okhalana muupuwelo wa otthuna orupihana alopwanaru aahiidho athiyanaru? Moohaakanyera khivaaweryaneya okhala wiira yoolema elo yaahinnuwa mmuupuweloni wa atthu ale. Masi makiristau yoonihenre wiihiiha ni yaakhontte opaka itthu ettharaka muupuwelo-ya wa otthuna opaka etthu yoonanara, yaahaakhuleliwa ni Yehova. Ndho nrummwa Paaulu aaniwoona makiristau awo okhala ‘ooreerihiwa.’ (1 aKor. 6:9-11) Ni nyuwo-tho pooti owiiraneelani etthu emodharu.

¹⁴ Moohixikha muupuwelo woonanara nrinnyuna, nyuwo nnoowerya okhootta muupuwelo owo. Hata nhiweryaka omaliha moomalela miyuupuwelo dhoonanara, nyuwo nnoowerya okhala awiihiiha ni oxaka opaka ‘itthu wiira nhakalalihe erutthu nnyu aahiidho muupuwelo nnyu.’ (aEefe. 2:3) Nin’ya owerya dhai opaka elo ni okhootta muupuwelo wa otthuna opaka etthu yoonanara?

MUN’YA OWERYA DHAI OKHOOTTA DHAWEEHA?

15. Wiira niwerye okhootta muupuwelo wa otthuna opaka itthu dhoonanara seeni nintthuneya nhu okhala oororomeleya na akaneene?

¹⁵ Wiira nwerye okhootta muupuwelo wa otthuna opaka etthu yoonanara, nhaana okhala oororomeleya mwanneene ni odhuwela otteettheya winyu. Masi nkhalena ephoole wiira nhidhootothe ni ‘muupuwelo wawootha.’ (Yak. 1:22) Mwa ntakihero, ntthu orina yoolema ya owurya eviinyu yawaatta pooti wuupuwela wiira khampaka etthu yootakhala, uupuwelaka wiira: ‘Aakhala atthu anwurya eviinyu yawaatta okixira miyo.’ Aahiidho nlopwana mmodha orina yoolema ya woona epornokarafiiya pooti onvaha nthowa ntthu nkina. Owo pooti opaka elo uupuwelaka wiira: ‘Waakhanle wiira amwaaraka annikipheta, miyo nkaarowa woona epornokarafiiya.’ Okhalana muupuwelo nkhama owo pooti owiirihani opaka etthu yoonanara. Mwa inamuna dhootheene nhaana oxaka waadhya mathowa hata ni mmuupuweloni wiira mwiidhaakihe mwaha wa itthu dhoonanara mpanke nnyu. Nitho mwaakhulele itthu dhootheene dhinkhumelela mwaha wa itthu mumpaka nnyu.—aGal. 6:7.

16. Mun’ya owerya dhai olipiha yoolakela nnyu ya opaka etthu yooreera?

¹⁶ Ohiya pahi odhuwela otteettheya winyu, nhaana olipiha yoolakela nnyu ya okhootta opaka itthu dhoonanara. (1 aKor. 9:26, 27; 1 aTes. 4:4; 1 Ped. 1:15, 16) Moone etthu eniiriha okhumelela yaweeha elo ni okathi enoophwanyaawani. Woonawene pooti okhala yaweeha emodha enookhumelelani aahiidho wookhala okathi vanihikuni enoophwanyaawani. Mwa ntakihero, niire onnooliperyani okhootta yaweeha elo okathi enoophwanyaawani nkhumunwe aahiidho ohiyu? Mwiikocihere ni muupuwele etthu mun’ya opaka nuumala okhumelela yaweeha. Nyuwo nhaana opaka elo ehinatthi okhumelela yaweeha.—Mir. 22:3.

17. Eseeni ninhudhera nhu ni ntakihero na Yooseefi? (Maphattuwelo 39:7-9) (Moone-tho ifootu.)

¹⁷ Muupuwele ntakihero na Yooseefi. Okathi mwaara a Potifaare anvekenle iye orupa nuuwo, owo aahikhootta yaweeha elo naanaanoru. (Nsome Maphattuwelo 39:7-9.) Eseeni ninhudhera nhu? Yooseefi aahilakela wiira khaakhala-khala arupaka ni mwaara aaneene, ahinatthi mwaara a Potifaare onvekela orupa nuuwo. Mwa enamuna emodharu, nyuwo nnoowerya olipiha yoolakela nnyu ya opaka etthu yooreera ehinatthi okhumelela yaweeha. Ndho mwapaka elo, onawookhwelani opaka yoothanla yooreera nttharaka etthu nlakenle nnyu khalairu.

NHIHIYE WIIVARERYA

18. Mun’ya owerya dhai okhootta miyuupuwelo dha otthuna opaka itthu dhoonanara? (2 aKorinto 13:5)

¹⁸ Wiira nwerye okhootta miyuupuwelo dha otthuna opaka itthu dhoonanara nhaana ohihiya wiivarerya, niire dho, okathi wootheene nhaana wiivarerya wiira moone akhala wiira vaavo enkhumelela awa yaweeha munniwerya opaka etthu yooreera aahiidho naari. (Munsome 2 aKorinto 13:5.) Elo entaphulela wiira nihaana okathi wootheene ovarerya muupuwelo nnyu ni itthu mumpaka nnyu wiira moone marukunuso munreerela nnyu opaka. Mwa ntakihero, khuta okathi munkhootta nnyu yaweeha, nhaana wiikoha wiira: ‘Niire kooviriha okathi wawaatta kihaakhunle wiira naari?’ Ndho moona wiira mwaahilokela okhootta, nhikhulumuwe. Masi mwiilipihere opaka itthu dhootheene munwerya nnyu wiira nwerye okhootta mwawaakuveya yoophwanyani yaweeha ekina. Wiira nwerye opaka elo nhaana wiikoha wiira: ‘Niire kinoowerya ovukula okathi kinviriha aka wiira kikhootte muupuwelo wa otthuna opaka itthu dhoonanara? Niire maraarelo kinthanla aka annikiiriha ohiwerya okhootta okathi enkiphwanya awa yaweeha? Niire kinnikhootta naanaanoru woona ifootu aahiidho iviidiyu inoonihera mweettelo wa orupihana woohiloka? Nnaamwi kitthuneyaka wiilipihera vawaatta wiira kikhale awiihiiha, niire kinnidhuwela wiira wiiwelela malakihero a Yehova etthu yootepa ooreera wa miyo?’—Esal. 101:3.

19. Seeni nintthuneya nhu okhala oolikana ene wiira nikhootte khuta muupuwelo woonanara hata okhalaka nkhama wiira nkhaani?

¹⁹ Vaavo nnivarerya nnyu, nxake wiidhaakiha. Biibiliya onlotta wiira: ‘Khiyaavo etthu yootakhala enxira nrima wa wootha, owo khonttharuwa.’ (Yer. 17:9) Yeesu olontte wiira ‘vanrimani dhinnikhumavo miyuupuwelo dhootakhala.’ (Math. 15:19) Mwa ntakihero, ntthu ohin’ye woona epornokarafiiya, nuuvira okathi pooti opacera wuupuwela wiira kahi etthu yootthekeya woona ifootu dhintumererya orupihana woohiloka, okhala wiira khadhiwoonihera atthu ehiwanre ikuwo. Aahiidho owo pooti wuupuwela wiira: ‘Kahi etthu yootthekeya wuupuwela kipakaka etthu yoonanara, masi etthu eri yootthekeya ori miyo opaka etthu elo.’ Ntthu onuupuwela dhiidho, Biibiliya onlotta wiira: ‘onnimpaka palano a moopora woopaka etampi’ aahiidho ohakalaliha erutthu-ye. (aRoma 13:14) Eseeni munreerela nnyu opaka wiira nxake miyuupuwelo nkhama idho? Nkhale oolikana ene wiira nkhootte khuta muupuwelo hata okhalaka nkhama wiira nkhaani okhala wiira owo pooti owiirihani opaka yoothanla yoohiloka aahiidho ohiwerya okhootta yoophwanyani yaweeha.b Tivondho nkhootte miyuupuwelo dhootheene dhoonanara ikhanle owiirihani otthuna waadhya mathowa a opaka etthu yoonanara.

20. Eseeni ninlipelelo nhu nhoolo, ni mpakha ophiya okathi owo nikhalihero seeni nrinhuna nenna-va?

²⁰ Nkhama nihudhenre nhu, Yehova onninivaha ikuru wiira niwerye okhootta dhaweeha. Nitho yawoopola enniiriha oweryaneya oleveleliwa itampi dhihu ni okhalana nlipelelo na okhala mahiku ootheene mparayiisu. En’ya okhala etthu yoohakalaliha onrumeela Yehova okathi owo, okhala wiira khadhinre ikhalewo miyuupuwelo dha otthuna opaka itthu dhoonanara! Masi mpakha ophiya okathi owo, nikhupali ni nrima wootheene wiira Yehova khaniliyanle. Ndho akhala wiira ninawiilipihera opaka itthu dhootheene ninwerya nhu, Yehova onoonivaha ikuru wiira niwerye okhootta miyuupuwelo dha otthuna opaka itthu dhoonanara!