Eliivuru ya Yoobi Enoowerya Onikhalihera Vaavo Ninvaha nhu Miruku

1-2. Seeni yaari awa etthu yoolipa Elifaazi, Bilidaadi, Sofaari vamodha ni Elihu ommaaliha Yoobi?

NUUMALA Yoobi opwetheiwa mireerelo-dhe dhootheene, ihapari idho dhaahimwara-mwareya nkhama mooro eriyari ya atthu yaakhala mittetthe dha oKanaani. Okathi axirikha-ye araru Elifaazi, Bilidaadi ni Sofaari yaadhuwenle awa etthu yaankhumelenle Yoobi, yaahirowa oWuusi, nttetthe yoowo aakhala Yoobi wiira yammaalihe. Ndho nuumala ophiya ni yoona itthu dhaankhumelenle, awo yaahixanka.

² Nkahaya muupuwele. Yoobi aahoona owereya vawaatta nuumala opwetheiwa mireerelo-dhe dhootheene. Ndho inama-dhe dhawaatta, nkhama ipwittipwitthi, imompe, ikameelu ni apuuru, dhaahuukhwa ni ikina dhaahiiyiwa. Arumeyi-ye awaatta yaahuukhwa. Nitho ane ootheene yaahimoreliwa ni empa ekhwa. Wookhidherani, Yoobi yaahimphwanya eretta yuulupale yeelo yaankhumihenre makhwatta oowereya erutthu-ye yootheene. Ndho nuumala Elifaazi, Bilidaadi vamodha ni Sofaari ophiya, yaahimoona Yoobi akilaanthi vattuurani ariipiwe nrima vawaatta. Ndho awo yaapankeni? Mpuwa wa mahiku 7, awo khiyaalotte etthu yaakhanle omaaliha nlopwana owo oona owereya vawaatta. (Yobi 2:12, 13) Nuuvira okathi, aahiphiya rapasi mmodha aaitthaniwa Elihu akilaathi vamodha naawo. Wookhidherani, Yoobi aahipacera olotta atakhaliha nihiku ayariwe iye ni alottaka wiira fataari ahaayariwe. (Yobi 3:1-3, 11) Moohaakanyera, Yoobi aanitthuna vawaatta okhaliheriwa! Ndho ele alopwana ala yaaya awa olotta ni moopora yaaya awa olotta, yaamoonihera akhala wiira tthiri yaari axirikha ekhweeli a Yoobi ni yaanitthuna onkhalihera.

3. Eseeni nin’ya nhu woona yoosoma ela?

³ Yehova aahimuupusera Moise waatikha itthu yaalontte awa ni yaapanke awa axirikha araru a Yoobi vamodha ni Elihu. Moolumo makina aalontte Elifaazi amphwana nkhama yaakhuma wa nlaikha nootakhala. Masi moovirikana ni Elifaazi, moolumo aalontte Elihu uupuseriwe ni Yehova. (Yobi 4:12-16; 33:24, 25) Tivondho khanintikhina vaavo nimphwanya nhu eliivuru ya Yoobi miruku dhootepa ooreera ni otakhala. Yoosoma ela, nin’ya woona moopora eliivuru ya Yoobi en’ya awa onikhalihera okathi nintthuna nhu onvaha ntthu miruku. Woopacerani, nin’ya woona matakihero oohiloka a axirikha araru a Yoobi. Moottharelana, ninoothokorerya ntakihero nooreera na Elihu. Nitho ninawoona moopora matakihero awo woonawene yaakhalihera awa aisarayeeli khalai, ni itthu annihudhiha awa olelo-va.

MOOPORA ELIFAAZI, BILIDAADI NI SOFAARI YAANVANHE AWA MIRUKU YOOBI

4. Seeni axirikha araru a Yoobi yahaawenrye awa onlipiha? (Moone-tho efootu.)

⁴ Biibiliya onlotta wiira nuumala axirikha araru a Yoobi odhuwela itthu dhaankhumelenle, ‘yaahirowa okumana nuuwo wiira emmaalihe.’ (Yobi 2:11) Masi mooriipiha nrima, awo khiyaawenrye opaka elo. Mwaha wa seeni? Mwaha wa mathowa mararu. Noopacera, awo yaahaahuvela omphukela Yoobi, ohiya onwiriyana ni ephoole wiira edhuwele saana nxankiho-ye. Mwa ntakihero, awo yaalontte wiira Yoobi aahukhummwa ni Yehova mwaha wa itampi aapanke iye.a (Yobi 4:7; 11:14) Nanaaili, miruku dhawaatta alopwana ale yaanvaha awa Yoobi, khidhaarina efaita, dhaari dhootakhala ni dhookhulumula. Mwa ntakihero, nnaamwi miruku alopwana ale yaavanhe awa dhaaphwana nkhama ti dhooreera, dhaari dhoohiloka. (Yobi 13:12) Nitho awo yaahilotta moolumo yahaareere onwereya Yoobi. Mwa ntakihero, Bilidaadi aahilotta ivaara piili wiira Yoobi aanilotta vawaatta. (Yobi 8:2; 18:2) Nitho Sofaari aahilotta muulumo yaamwiirihe Yoobi woona wiira aari ‘nlolo.’ (Yobi 11:12) Naneeraru, nnaamwi awo yahaalotta ni Yoobi ni ndhu nuulupale, moopora yaalotta awa khiwoonihera onttittimiha ni ompheta, ni yaahimoothera Yoobi okhalana nthowa. (Yobi 15:7-11) Ndho wookhidherani, ohiya ommaaliha ni onlipiha, alopwana awo yaahiilipihera omoonihera Yoobi wiira aahipaka etthu yootakhala.

5. Yoobi oonenle dhai nuumala Elifaazi, Bilidaadi ni Sofaari omariha olotta?

⁵ Nuumala Elifaazi, Bilidaadi ni Sofaari omariha olotta, Yoobi aahiriipiwa nrima vawaatta oxira khalai. (Yobi 19:2) Tivondho ninoona wiira Yoobi aanitepa wiidhaakiha. Ndho mwaha wa elo aahilotta ahuupuwenle. (Yobi 6:3, 26) Axirikha araru a Yoobi, khiyaavanhe miruku dhaavarihana ni yootthuna ya Yehova, ni khiyaamoonenle othunku Yoobi. Mwaha wa opaka elo, yaahirumeeliwa ni Satana. (Yobi 2:4, 6) Yawiiraneya ela woonawene yaawerye dhai waakhalihera aisarayeeli, ni en’ya onikhalihera dhai hiyo olelo-va?

6. Itthu seeni woonawene asitoweene a Wiisarayeeli yaahundha awa ni ntakihero noohiloka na axirikha araru a Yoobi?

⁶ Yawiiraneya ya Yoobi woonawene yaawerye dhai waakhalihera aisarayeeli? Nuumala Yehova okhumihera nloko na aisarayeeli, aahaathanla alopwana oophwanelela yaarumeela nkhama asitokweene wiira ekaaphukela atthu-ye ettharaka malamulo-ye a xariya. (Otum. 1:15-18; 27:1) Alopwana awo yaanitthuneya owiriyana ni ephoole ehinaathi ovaha miruku aahiidho ophuka mwaha mmodha. (2 Wah. 19:6) Nitho ohiya waakuvela opaka yoothanla, awo yaanitthuneya opaka makoho wiira edhuwele itthu dhootheene voohima dha mwaha owo. (Otum. 19:18) Ohiya-vo, alopwana awo yaanitthuneya oxaka waalottela moowali atthu yaavekela nikhalihero. Mwaha wa eseeni? Okhala wiira opaka elo pooti omwiiriha ntthu ohikhala ootaphuwa wiira alotte itthu ininxankiha. (Okhu. 22:22-24) Woonawene idha itthu asitokweene a Wiisarayeeli yaahundha awa ni yawiiraneya ya Yoobi.

7. Ohiya pahi asitokweene, taani-tho yaakhanle waavaha miruku aisarayeeli, ni yawiiraneya ya Yoobi yaaya waakhalihera dhai? (Miruku 27:9)

⁷ Masi khiyaari asitokweene pahi yaatthuneya waavaha miruku aisarayeeli. Tivondho, moohixikha akhala wiira aari rapasi, ntthu awuuluva, nlopwana aahiidho nthiyana, khuta ntthu aanwerya onkhalihera nxirikha-ye otepa omwaattamela Yehova ni vaareerelaka onttarusa. (Esal 141:5) Vaavo ntthu aapaka iye elo, aanoonihera okhala nxirikha eekhweeli. (Nsome Miruku 27:9.) Vaakhanle wiira aisarayeeli yaahuupuwelela moopora axirikha araru a Yoobi yaalontta awa, elo yaamwaakhalihera odhuwela etthu yaareerela awa oxaka olotta aahiidho opaka vaavo yaavaha awa miruku.

8. Itthu seeni ninreerela nhu oxaka vaavo nininvaha nhu ntthu miruku? (Moone-tho ifootu.)

⁸ Yawiiraneya ya Yoobi en’ya owerya dhai onikhalihera? Nkhama makiristau, ninnitthuna waakhalihera anna ni arokora vaavo dhinaaphwanya awa mixankiho. Masi wiira niwerye opaka elo, nihaana oxaka itthu tthaaru axirikha araru a Yoobi yaapanke awa. Yoopacera, nihaana odhuwela itthu dhootheene dhinhela mpuwa mwaha owo nihinaatthi ntthu owo onvaha miruku. Yanaaili, nihaana oxaka ovaha miruku nittharaka odhuwela wihu, nkhama Elifaazi aapanke iye ivaara dhawaatta, masi nivahe miruku nirumeelaka Nuulumo na Muluku. (Yobi 4:8; 5:3, 27) Yaneeraru, nihaana oxaka olotta moowali. Nhiliyale wiira Elifaazi vamodha ni axirikha-ye yaahilotta moolumo makina yaari eekhweeli, yaawo nuuvira okathi nrummwa Paaulu aatinkhe iye. (Munlikanyihe Yobi 5:13 ni 1 aKorinto 3:19.) Masi moolumo awaatta awo yaalontte awa, yaahinriipiha nrima Yehova vamodha ni Yoobi. Tivondho Yehova aahaaleela wiira khiyaalontte ekhweeli. (Yobi 42:7, 8) Ndho vaavo nininvaha nhu ntthu miruku, nihaana oxaka olotta moolumo akhanle omwiiriha wuupuwela wiira Yehova khaninthokorerya aahiidho ompheta. Vano, nirowe noone etthu ninhudha nhu ni ntakihero na Elihu.

MOOPORA ELIHU AANVANHE IYE MIRUKU YOOBI

9. Seeni Yoobi aatthuneya iye okhaliheriwa nuumala axirikha-ye araru omaliha olotta, ni eseeni Yehova aapanke iye wiira ankhalihere?

⁹ Yoobi vamodha ni axirikha-ye araru, yaahiviriha okathi wawaatta elottaka. Moolumo ootheene alopwana awo alontte awa, ahaatikhiwa mbiibiliyani ikapiitulu dhimphiyera 28. Masi moolumo awo annoonihera wiira yaalotta enanariwe vawaatta ni enyoonyihen’ye. Tivondho khanintikha vaavo ninoona nhu wiira Yoobi aahiriipiha nrima vawaatta! Ndho Yehova aankhalihenre dhai Yoobi? Owo aahinrumeela Elihu wiira anvahe miruku Yoobi. Seeni Elihu aalipelenle iye axirikha araru a Yoobi omaliha olotta? Owo aalontte wiira: ‘Miyo ka rapasi, ni nyuwo mwa alopwana uulupale. Tivondho kihaalotta aka etthu mwaha wa woottittimihani.’ (Yobi 32:6, 7) Elihu aanidhuwela wiira atthu uulupale aakhalana akhili ni dhawiiraneya dhawaatta waaxira marapasi. Nuumala Elihu onwiriyana moopisara nrima Yoobi ni axirikha-ye araru, aahoona wiira khaareerela omaala. Owo aalontte wiira: ‘Iyaakha pahi khadhimmwiiriha ntthu okhalana akhili, nnakhala kahi atthu awuuluva pahi andhuwela etthu yooreera.’ (Yobi 32:9) Moottharelana eseeni Elihu aalontte iye, ni aalontte mooporani?

10. Eseeni Elihu aapanke iye ahinathi onvaha miruku Yoobi? (Yobi 33:6, 7)

¹⁰ Ahinathi Elihu opacera onvaha miruku Yoobi, owo aahinkhalihera okhala oomaleleya wiira awiriyana ni ephoole etthu aaya iye olotta. Mooporani? Woopacera, owo aahikasoopa miyuupuwelo-dhe. Hiyo ninnidhuwela elo okhala wiira Biibiliya olotta wiira woopacerani Elihu aahinanariwa vawaatta. (Yobi 32:2-5) Masi hata eri dhiidho, Elihu aahixaka olotta ni Yoobi moowali. Ohiya-vo, owo aahoonihera wiiyeviha ni aahilotta ni Yoobi nkhama nxirikha-ye eekhweeli, airaka: “Mwiiwe! Miyo ni nyuwo nnoolikana ohoolo wa Muluku.” (Munsome Yobi 33:6, 7.) Ndho ooniheraka wiira Elihu aahinwiriyana ni ephoole Yoobi, aahitthikela olotta ipontu dhuulupale Yoobi aalontte iye ahinathi onvaha miruku. (Yobi 32:11; 33:8-11) Nitho Elihu aahivikaniha opaka elo vaavo aanvaha iye miruku Yoobi.—Yobi 34:5, 6, 9; 35:1-4.

11. Elihu aanvanhe dhai miruku Yoobi? (Yobi 33:1)

¹¹ Okathi Elihu aanvaha iye miruku Yoobi, owo aahipaka elo mwa enamuna yoonihera wiira aaninttittimiha. Mwa ntakihero, moovirikana ni alopwana ale araru, Elihu aahirumeela ndhina na Yoobi. (Munsome Yobi 33:1.) Woonawene Elihu uupuwelelaka wiira Yoobi aanitthuna waakhula vaavo axirikha-ye araru yaalotta awa, owo aaninvaha eparakha Yoobi wiira aakhule vaavo aanvaha iye miruku. (Yobi 32:4; 33:32) Nitho Elihu aahimoonihera Yoobi wiira itthu dhikina aapanke iye ni aalontte iye dhaari dhoohiloka. Owo aahipaka elo mooreera nrima aamuupuseraka Yoobi mikhalelo dha Yehova nkhama akhili, owerya, exariya ni opheta woororomeleya. (Yobi 36:18, 21-26; 37:23, 24) Moohaakanyera, miruku Elihu aanvanhe iye Yoobi, dhaahinkhalihera okhala oolikana ene wiira awiriyane ni ephoole miruku aaya iye ovahiwa ni Yehova. (Yobi 38:1-3) Ntakihero nooreera na Elihu woonawene naaya owerya dhai waakhalihera aisarayeeli, ni ninnikhalihera dhai hiyo olelo-va?

12. Yehova aarumeenle dhai maprofeeta wiira yaakhalihere atthu-ye, ni woonawene ntakihero nooreera na Elihu naawerye dhai waakhalihera aisarayeeli?

¹² Yawiiraneya ya Yoobi woonawene yaawerye dhai waakhalihera aisarayeeli? Okathi wootheene wa Isarayeeli, Yehova aahaathanla maprofeeta wiira yaakhalihere atthu odhuwela yootthuna-ye. Mwa ntakihero, okathi wa Makhulupale, Yehova aahinrumeela profeeta anthiyana aaitthaniwa Deebora wiira aavahe malakihero atthu-ye. Nitho Yehova aahinrumeela Samuweeli okhuma erapasi-ye wiira aavahe malakihero atthu-ye. (Makh. 4:4-7; 5:7; 1 Sam. 3:19, 20) Nitho okathi wootheene mamwene yaalamulela awa, Yehova aahaarumeela maprofeeta moohihiyerera wiira yaalipihe atthu-ye nkhalelo wa omunepani ni waavaha miruku ale yaahin’ye wiirela mphantta onkhokorela wooloka. (2 Sam. 12:1-4; Mit. 3:24) Ndho ntakihero na Elihu neeno naatikhiwe eliivuru ya Yoobi, woonawene naahiwerya waakhalihera alopwana ni athiyana oororomeleya odhuwela etthu yoolotta ni opaka vaavo yaavaha awa miruku.

13. Nkhama makiristau, nin’ya owerya dhai waalipiha anna ni arokora?

¹³ Yawiiraneya ya Yoobi en’ya owerya dhai onikhalihera? Nkhama makiristau, hiyo ninnaadhuweliha atthu akina yootthuna ya Muluku naaleelaka ele Biibiliya onhudhiha iye. Enamuna ekina yoopaka elo, ori orumeela moolumo oolipiha ni oomaaliha vaavo ninlotta nhu ni anna ni arokora. (1 aKor. 14:3) Nitho okathi wootheene asitokweene ahaana wiilipihera olotta mooreera nrima vaavo aanaavaha awa miruku anna ni arokora, waahela mpuwa ale arina nxankiho wa mmuupuweloni aahiidho arina nkhalelo wa olotta ehuupuwenle saana.—1 aTes. 5:14; Yobi 6:3.

14-15. Asitokweene an’ya otthara dhai ntakihero na Elihu vaavo anvaha awa miruku? Nvahe ntakihero.

¹⁴ Nkahaya muupuwele wiira ntokweene mmodha onnidhuwela wiira nrokora mmodha mmulokoni ooriipiwa nrima. Nuumala-vo, owo vamodha ni munna nkina annipaka etthu yooreera erowaka onsekurya nrokora owo wiira enlipihe. Masi vaavo aninsekurya awa, nrokora owo onnilotta wiira hata ailipiheraka orowela mithukumano ni nteko woolaleerya, owo khanhakalala. Eseeni ntokweene owo onreerela iye opaka?

¹⁵ Yoopacera, woonawene ntokweene owo onawilipihera odhuwela etthu emwiiriha nrokora owo olotta dhiidho. Ndho wiira awerye opaka elo, ohaana onwiriyana moopisa nrima wiira awerye wiiwasasa saana akhala wiira nrokora owo onuupuwela wiira khamphwanelela ophetiwa ni Yehova aahiidho akhala wiira etthu emmwiiriha olotta dhiidho mwaha wa mixankiho onviriha iye khuta nihiku. (Luka 21:34) Yanaaili, ntokweene owo ohaana waadhya inamuna ya onttottopela mwaha wa itthu dhooreera oniilipihera iye opaka. Mwa ntakihero, owo pooti onttottopela mwaha wa wiilipihera orowela mithukumano ni nteko woolaleerya hata ohikhweyaka opaka elo. Yaneeraru, nuumala wiiwasasa nxankiho wa nrokora owo ni etthu emmwiiriha oriipiwa nrima, ohaana onrumeela Biibiliya wiira ankhalihere okhupali wiira Yehova onimpheta.—aGal. 2:20.

NHIHIYE OHUDHA ITTHU DHOOTEPA OTTHUNEYA NI ELIIVURU YA YOOBI

16. Eseeni ninreerela nhu opaka wiira nihihiye ohudha itthu dhootepa otthuneya ni eliivuru ya Yoobi?

¹⁶ Mweekhweeli, eliivuru ya Yoobi enoowerya onihudhiha itthu dhawaatta. Nkhama noonne nhu yoosoma evinre, yawiiraneya ya Yoobi khennikhalihera pahi odhuwela etthu emmwiiriha Muluku ohiya ohaawa okhumelelaka, masi-tho enninihudhiha moopora woovilela mixankiho dhinkumiheriwa ni ohaawa. Nitho nkhama nithokorenrye nhu yoosoma ela, ootheene nhu ninoowerya ovaha miruku dhooreera nittharaka ntakihero nooreera na Elihu, ohiya na axirikha araru a Yoobi. Nnoonela dhai nhoolo otthikela osoma itthu nhudhenre nnyu yoosoma ela nhinaatthi onvaha ntthu miruku? Akhala wiira woovira okathi wawaatta nhisomme eliivuru ya Yoobi, nnoonela dhai okhalana yoolakela ya otthikela osoma eliivuru elo? Akhala wiira nnoopaka elo nnawoona wiira enawookhaliherani ohudha itthu dhootepa otthuneya.