Yeesu Aahaavaha Eyooca Atthu Awaatta

Nihiku nimodha arummwa yaaronwa awa nteko woolalerya, yaahitthika ekhulumunwe vawaatta. Ndho Yeesu aahaakusa aaroiha oBetesaaida wiira yamuumule vakhaani. Masi ehalaka vakhaani ophiya, Yeesu aahiwoona atthu awaatta enttharelaka. Hata Yeesu okathi ole aatthuna okhala meekhe ni arummwa-ye, veene aahiwaakhela atthu ale moopheta. Yeesu aahaapenusa ale yaawereiwa ni aahipacera waahudhiha. Nihiku noothene, Yeesu aahaahudhiha atthu ale voohima dha Omwene wa Muluku. Odhoodhilo ene, arummwa yaahirowa onleela Yeesu wiira: ‘Atthu ala aavoliwa etala. Mwaaleele wiira erowe onttettheni wiira yakoce etthu yooca.’

Yeesu aahiwaakhula arummwa-ye wiira: ‘Nhaarume atthu ala orowa, mwaavahe nyuweena etthu yooca.’ Arummwa yaahitikihiwa ni yaahinkoha Yeesu wiira: ‘Muntthuna wiira nathume iphaawu naavahe atthu ala ootheene?’ Nrummwa mmodha a yaale aitthaniwa Filipi, aahilotta wiira: ‘Hata naarina nsurukhu wawaata, khinaawerya othuma iphaawu dhaaya waakhwaniwa ni atthu ootheene ala.’

Yeesu aahaakoha wiira: ‘Khinaanana vaava eyooca vakhaani?’ Andre aahaakhula wiira: Nirina iphaawu 5 ni ihopa piili pahi ikhaani-ikhaani ihimphiyera ata etthu. Yeesu aahilootta wiira: ‘Mwaleele atthu wiira ekilaathi vamalasini ikhurupu-ikhurupu’. Atthu yaahikilaathi ikhurupu dha atthu 50 ahindho 100. Nuumala-vo Yeesu aahikusa iphaawu-idhe ni ihopa, aliipela wiirimu ni avekela. Nuumala-vo aahannya arummwa-ye wiira yaakawele atthu. Alopwana 5.000 yaari opuro ole, ohaahelamo athiyana ni anaahima, yaahuuca mpakha ovoona. Ndho wiira eyooca ele yaahanle ehihononeye, arummwa yaaahittottela mpakha odhala iseestu 12! Nyuwo khamunkhupali wiira ole waari mwiiriirya muulupale?

Ndho atthu ootheene yaahitikinihiwa ni ele Yeesu aapanke iye, ndho mwaha wa elo yaanitthuna onkhaliha mwene-ya. Masi Yeesu aahidhuwela wiira nanlelo khiwaaphin’ye okathi wiira Yehova ankhalihe Mwene. Ndho aahaleela atthu ootheene wiira eroowe mmawannya ni aahaaleela arummwa-ye wiira elapuwele nlima na oKalileya. Arummwa yaahiwela nkalawani ekarowa. Ni Yeesu aahirowa omwaako meekhe. Mwaha wa eseeni? Mwaha wa wiira aatthuna onvekela Tiithye. Ata Yeesu aakhalana miteko dhawaatta, aaniivaha okathi wiira avekele.