Okhwa wa Yeesu

Makhulupale a nankuttho, yaahinkusa Yeesu enroiha empa ya kuvenatoore Pilaatu. Nuumala ophiya, Pilaatu aahaakoha wiira: ‘Nlopwana ola otthenkeni?’ Awo yaahimwaakhula wiira: ‘Nlopwana ola onniihima okhala Mwene!’ Noomala Pilaatu aahinkoha Yeesu wiira: ‘Niire nyuwo mwa Mwene a ayuuda?’ Yeesu aahimwaakhula wiira: ‘Omwene aka kahiyo wa olumwinku ola.’

Nuumala Pilaatu woona wiira Yeesu khaarina nlattu, aahiruma wiira aroihiwe wa kuvernatoore a Okalileya wiira oone akhala wiira Eroodi ammuphwanyana nlattu. Eroodi aahoona wiira Yeesu khaapanke etthu yootakhala, tivondho aahiruma wiira atthikiheriwe wa Pilaatu. Pilaatu aahaaleela atthu wiira: ‘Nnakhala miyo nnakhala Eroodi khaniphwannyena nlattu nlopwana ola. Miyo kinoontaphula kinhiye arowe.’ Ndho atthu ootheene yaari opuro ole, yaahipacera onyakula yiiraka: ‘Mmwiiphe! Mmwiiphe!’ Moottharelana atoropa yaahimmana Yeesu ni nwaxulo, onsenyera ni yaahimmana isooku. Noomala yaahinwariha mmuruni ekhara ya miiwa epacera ontheya, yiiraka: ‘Ehaali, mwene ayuuda.’ Pilaatu aahitthikela waaleela atthu ale wiira: ‘Nlopwana ola nkimphwannyena nlattu.’ Masi atthu ale yaanikhanyerera yiiraka: “Akhoomeliwe!” Ndho Pilaatu, aahinvahererya wiira akhomeliwe.

Yeesu aahikusiwa aroihiwa opuro waaithaniwa oKoolkota. Nuumala ophiya, atoropa yaahinkhome vanttaikhoni. Okathi owo, Yeesu aahivekela airaka: ‘Tiithi, mwaalevelele, awo khandhuwela etthu aniira awa.’ Atthu yaari opuro ole yaahuumelela ontheya Yeesu, yiiraka: ‘Akhala wiira mwa Mwaana a Muluku, nkhuruwe vanttaikhoni! Mwiidhoopole.’

Nakirime mmodha aakhomeliwe vamodha ni Yeesu, aahinvekela airaka: ‘Nkuupuwele mwaphiya Moomweneni mwinyu.’ Yeesu aahinlaihera owo, airaka: ‘Nnookhala ni miyo Mparayiisu.’ Mwawaakuveya, yaahikhumelela ewiiriphi yeelo yaavirinhe iwoora ttharu. Mariya, amaama-ye Yeesu ni arummwa akina, yaari waattamela opuro aakhomeliwe Yeesu. Ndho Yeesu aahinvekela Yoohaani wiira ankhapelele Mariya nkhama amaama-ye.

Wookhidherani, Yeesu aahilotta wiira: ‘Itthu dhootheene dhoomaliheriwa!’ Noomala Yeesu olotta moolumo ala, aahuuramiha muru akhwa. Okathi owo, yaahikhumelela etetere yuulupale. Ni ekoortina ya ntempulu yeelo yaakawanya nipuro nawaarya ni nipuro nawaaryasa, yaahipereya eriyari. Nuumala toropa mmodha aahilotta wiira: ‘Mweekhweeli, ola ari mwana a Muluku.’