Ohihimusiwa wa Yeesu

Nuumala Yeesu okhwa, nlopwana mmodha oothaaciri aitthaniwa Yooseefe, aahinvekela Pilaato wiira amwaakhulelihe okhumiha vanttaikhoni nrutthu wa Yeesu. Moottharelana owo aahikhumiha nrutthu wa Yeesu vanttaikhoni oottiha makhura awunkhela, avitikelela ni ekuwo yooreera nuumala avitha nikhuku nipheya. Owo aahikusa nluku nuulupale attiyela nikhuku nno. Ndho makhulupale a anankuttho yaahirowa onleela Pilaato wiira: ‘Ninnoova ahudheri akina a Yeesu orowa okhumiha nrutthu-ye nkhukuni, nuumala epacere olaleya wiira owo oohihimusiwa. Nrumihe wiira ettiyeleliwe ephuro ni atoropa akina elipelele mahiye.’

Nuuvira mahiku mararu, Mariya Madaleena ni athiyana akina yaahirowa omahiye ohiihiyu. Nuumala ophiya yaahoona wiira naahikhumihiwa nluku naakhuneela ohoolo wa nikhuku. Okathi yaavolonwa awa mmahiye yaahoona nlaikha nenno naaleenle wiira: ‘Nhoove. Yeesu oohihimusiwa. Nrowe mwaaleele ahudheri-ye wiira erowe yaakumane nuuwo Okalileya.’

Mwawaakuveya Mariya Madaleena aahirowa omwaadhya Peedru ni Yoohaani. Nuumala waaphwanya aahaaleela wiira: ‘Ookhala okunse nrutthu wa Yeesu!’ Peedru ni Yoohaani yaahirowa omahiye. Okathi yaaphin’ya awa yoona wiira mmahiye mmwe khiyaarimo etthu, yaahitthikela owaani.

Masi Mariya Madaleena aahitthikela omahiye. Owo aahoona malaikha maili, alotta wiira: ‘Nkidhuwele otthu oroihiwaawawo nrutthu wa Pwiya aka.’ Nuumala-vo Mariya aahimoona nlopwana nkina uupuwelaka wiira aari nlipa ookhapelela exarti, owo aahinleela wiira: ‘Atokweene, safatali nkileele opuro mphwenhe nnyu nrutthu wa Pwiya aka.’ Masi nlopwana ole aahimwiithana airaka: ‘Mariya!’ Naanaanoru owo aahiwerya ondhuwela wiira aari Yeesu. Mariya aahikhuwela airaka: ‘Nhudhihi!’ Ni aahimphara. Nuumala-vo, Yeesu aahinleela Mariya wiira: ‘Nrowe mwaaleele adhinnaka itthu dhootheene moonne nnyu.’ Mwawaakuveya, Mariya aahirowa athimakaka waaleela ahudheri wiira oomoona Yeesu.

Nihiku nimodha, ahudheri aili yeettaka nkhwaha ekhumaka oYerusaleemu erowaka wEemawusi, aahaakhumelela nlopwana mmodha apacera weetta naawo nramphani ni ahaakoha etthu yaavanela awa. Ahudheri ale yahimwaakhula wiira: ‘Khamwiwale itthu dhinkhumelenle? Mahiku mararu avinre, makhulupale yaahirumiha wiira iiphiwe Yeesu. Masi nenna-va athiyana akina anlotta wiira owo oohihimusiwa.’ Nlopwana ole ahaakoha airaka: ‘Nyuwo khamunkhupali moolumo a maprofeeta? Awo yaalotte wiira Yeesu ankhwa ni ohihimusiwa.’ Nlopwana ole aahaathokiherya ahudheri ale moolumo a Muluku. Nuumala ophiya wEemawusi, ahudheri ale yaahinvekela wiira evirihe okathi nuuwo. Okathi wa oca, nlopwana ole aahipaka nivekelo. Ndho awo yaahiwerya odhuwela wiira aari Yeesu. Masi naanaanoru owo aahirimeela.

Ahudheri ale aili yaahikhuma etthimaka erowaka waaleela arummwa akina yaari oYerusaleemu itthu dhootheene dhaakhumelenle. Okathi yaari awa mpani, naananoru Yeesu ahaakhumelela. Woopacerani arummwa khiyaakhupali wiira aari Yeesu. Tivo Yeesu ahaaleela wiira: ‘Moone matataka ni nkiphare. Yahaatikhiwa khalai wiira Kiriistu aanhihimusiwa mookhwani.’