Kwaarta a Ekateya Aahihudha Ekhweeli

Elapo ya oFilipi, aahikhala-wo mwaamwali mmodha aavoloiwe nnepa wootakhala. Nnepa owo waanimwiiriha mwaamwali ole olotta itthu dha nhoolo ni mapatarau-ye yaaniphwanya nsurukhu wawaatta mwaha wa nteko-ye. Okathi Paaulu ni Siila yaaphin’ye awa oFilipi, mwaamwali ole anaatthara mahiku ootheene. Nnepa ole waanimwiiriha okhuwela airaka: ‘Alopwana ala arumeyi a Muluku Muulupalesa.’ Ndho Paaulu aahiruma nnepa ole wootakhala wiira: ‘Miyo kinnoorumani ni ndhina na Yeesu wiira okhume mweerutthuni wa nthiyana ola!’ Mwawaakuveya nnepa ole waahikhuma mweerutthuni-mwe.

Okathi mapatarawu-ye yoonne awa wiira khekawerya tho ophwanya nsurukhu enrumeelaka mwaamwali ole, awo yaahinanariwa vawaatta. Tivondho yaahinkusa Paaulu ni Siila yaaroiha wa makhulupale yaaphuka milattu a esidadi ele, ekaaleela wiira: ‘Alopwana ala khaniiwelela malamulo ni annikhumihera ohiiwanana esidadi yootheene ela!’ Ndho makhulupale ale yaahirumiha wiira Paaulu ni Siila emaniwe ni ewaleliwe nkateya. Kwaarta aahinkusa Paaulu ni Siila yaawalela nkateya wooriipamo, aatthuka metto-dha ni aatthukelela nttaikho.

Okathi-ya yoole, Paaulu ni Siila yaahipacera omwiipela icipo Yehova ni anaperesu ootheene yaaniwiiwa yiipaka macipo awo. Ohiyu eriyari, mootutusera yaahikhumelela esikinyaatthi yeelo yairinhe ekateya yootheene ottikinyeya. Mikhora dhootheene dha ekateya ele dhaahihuleya ni ikorenti dhaatthukiwena anaperesu ootheene dhahitthukuwa. Kwaarta aahitthimakela nkateya ni ahoona wiira mikhora dhootheene dhaahihuleya. Uupuwelaka wiira anaperesu ootheene yaahitthyawa, aahikusa ekatana akaya wiidhiipha.

Mwawaakuveya Paaulu aahikhuwela anleelaka wiira: ‘Nhiidhiiphe! Hiyo niri muumu!’ Kwaarta ole ahiitthimaka akokhora ohoolo wa Paaulu ni Siila. Akaakoha airaka: ‘Kipake eseeni wiira koopowe?’ Awo yaahimwaakhula wiira: ‘Nyuwo ni amudhi nnyu atthu antthuneya omwaamini Yeesu.’ Tivondho Paaulu ni Siila yaahinlaleerya Kwaarta ndho owo ni atthu a vatthekoni-ve yaahikhala makiristau.