Opwetesiwa wa Yerusaleemu

Khula okathi, atthu a oYuda yaanihiya onkokhorela Yehova, ekaakokhorela amuluku etheeru. Masi Yehova aanehererya waakhalihera awo mwa miyakha dhawaatta. Owo aanaaruma maprofeeta oovirikana wiira yaalopole, masi khiyaiwa ata etthu. Ohiya-vo awo yanaalodhowela maprofeeta a Yehova. Ndho Yehova amalinhe dhai okokhorela iwe weetheru?

Okathi ole mwene a oBabilooniya yoowo aitthaniwa Nabukodonozore, anipwetesa ni anikusa isidadi dhoovirikana. Owo aahituphela oYerusaleemu, ankusa mwene Yowakhimi, makhulupale, anakhtto, alopwana ni athiyana a oYuda aaroiha oBabilooniya. Nitho Nabukodonozore aahikusa mireerelo dhootheene dha Ntempulu mwa Yehova. Noomala-vo aahinkusa Zedekiiya, ankhaliha mwene a oYuda anranttelihaka ni Yowakhimi.

Zedekiiya animwiiwelela mwene a oBabilooniya, masi maprofeeta makina awootta ni atthu akina yaaninleela Zedekiiya wiira anrukunuwele mwene a oBabilooniya. Ndho Yeremiiya aahinlopola Zedekiiya airaka: ‘Akhala wiira nnohiya omwiiwelela mwene a oBabilooniya, inookhumelela itthu dhawaatta dhotakhala, atthu awaatta ekaanvoliwa etala, ekanwereiwa ni okhwa.’

Noovira miyakha 8, Zedekiiya aahilakela onrukunuwela mwene a oBabilooniya. Ndho aahavekela nikhalihero anakhotto a wEexiitu. Ndho Nabukodonozore aaharuma anakotto-ye otuphela oYerusaleemu. Masi Yeremiiya aahinlopola-tho Zedekiiya airaka: ‘Mwivahererye wa mwene a oBabilooniya, Yehova olontte wiira akhala wiira nnopaka elo, epoma ela khempwetesiwa.’ Masi Zedekiiya aahaakhula airaka: ‘Miyo kivahererye wa mwene Nabukodonozore? Nkinkhalakhala!’

Noovira mwaakha mmodha, mwene a oBabilooniya aahituphela oYerusaleemu. Ahipattiha esidadi ele, Etempulu, aahaaipha atthu awaatta ni yaahakusa atthu ikonto dhawaatta yaatthukela oBabilooniya.

Zedekiiya aahitthyawa oYerusaleemu, masi aBabilooniya yaahimwiikara emphara ni enroiha wa mwene Nabukodonozri. Ndho mwene Nabukodonozore aahirumiha wiiphiwa ane Zedekiiya, paapantthu-ya awoonaka. Ni ahisonyola maitho a Zedekiiya arowa antthukela nkateya. Zedekiiya ahikhala oBabilooniya mpakha okhwa. Masi Yehova aahaalaihera atthu a oYuda wiira: ‘Dhavira miyaakha 70, atthu kinawatthikihera elapo-ya.’

Masi munnidhuwela wiira marapasi makina yampheta Yehova yaahiruuhiwa oBabilooniya? Eseeni yaaya wakhumelela, niire yaanvikaniha omwiiwelela Yehova?