Yehova Aahinkhapelela Yeesu

Khalai, yaahikhala atthu yaakhala laatu onkhuma dhuwa a Wiisarayeeli yaawo yaakhupali wiira etthitteeri dhaaniwerya waakhalihera ni oweettiha. Ndho ohiyu omodha, atthu awo yaahoona nthuko waarya wiirimu nkhama etthiteeri, tivondho yaahilakela ottharelela. Ndho etthitteeri ele yaahaaroiha oYerusaleemu. Okathi yaaphin’ya awa yaahaakoha atthu yiiraka: ‘Oruuwi mwaana oyariwe naanano yoowo on’ya okhala mwene aYuuda? Hiyo nireenle onkokhorela.’

Nuumala Eroodi mwene a oYerusaleemu wiiwa elottiwaka wiira ooyariwa mwene mpheya, owo aahixanka vawaatta. Tivondho aahaakoha anankuttho-ye wiira: ‘Mwene owo anaanaano aaya oyariwa elapo seeni?’ Ndho anankuttho awo yaahimwaakhula wiira: ‘Aaya ooyariwa oBeteleheemu.’ Ndho Eroodi aahiwiitthana alopwana ale yeettihiwa ni itthitteeri akaaleela wiira: ‘Atthu erowe oBeteleheemu yaamoone mwaana owo. Nuumala-vo atthu etthike, ere ekileele nipuro oriiye wiira ni miyo-tho kankokhorele.’ Masi Eroodi aamootha.

Ndho alopwana ale yaahitthikela weetta nkwaha ettharaka etthitteeri ele mpakha ophiya oBeteleheemu. Ndho etthitteeri ele yaaheemela mooluluwanya ni empa emodha. Ndho alopwana ale, yahivolowa empa ele emphwanya Yeesu vamodha ni amaama-ye, Mariya. Awo yaahikokhora ni yaahinvaha itthu dha nsurukhu wawaatta nkhama ewooru, erupani ni eperfuume ya miira. Masi niire alopwana ale yaarummwe ni Yehova wiira enkoce Yeesu? Naari.

Ohiyu-ya yoole, Yehova aahinleela Yooseefe moolohani wiira: ‘Eroodi ontthuna oomwiipha Yeesu. Munkuse mwaana ola ni Mariya amaama-ye ntthyawele wEexiitu; mwakhale weiwo mpakha miyo wooleelani wiira ntthike.’ Mwawaakuveya, Yooseefe vamodha ni emudhi-ye yaahitthyawela wEexiitu.

Nitho Yehova aahaaleela alopwana ale yeettihiwa ni itthitteeri wiira ehitthikele wa Eroodi. Okathi Eroodi onne iye wiira alopwana ale khiyarowa ootthika, aahinanariwa vawaatta. Nitho okhala wiira Eroodi khampwanya Yeesu, aahirumiha wiira yiiphiwe anamwane ootheene anaalopwana a oBeteleheemu, yaawo yaarina iyaakha dhaalikana ni Yeesu. Masi Yeesu aaira ari ottaiwene, wEexiitu.

Noovira ookathi, Eroodi aahuukhwa. Ndho Yehova aahinleela Yooseefe wiira: ‘Nenna-va pooti ootthikele elapo nnyu.’ Yooseefe, Mariya, ni Yeesu yaahitthikela wIsarayeeli, ni yaahimaka esidadi yaitthaniwa oNazareeti.