Itiini Dhawootha Dhinaattaivihera Dhai Atthu ni Muluku?

Akhala wiira Muluku toopheta seeni itthu dhootakhala dhimpakiwa awa ni itiini dhinlotta wiira dhinninkokhorela Muluku? Olotta mooluluwanya, itiini idho ti dhawootha okhala wiira dhinihudhiha itthu dhawootha voohima dha Muluku. Ndho, itiini dhawootha dhinaattaivihera dhai atthu ni Muluku? Muluku onoonela dhai itthu idho? Eseeni on’ya iye opaka?

1. Dhoohudhiha dha itiini dhawootha dhinaattaivihera dhai atthu ni Muluku?

Itiini dhawootha ‘dhinnirukunsa ekhweeli ya Muluku ni wootha.’ (aRoma 1:25) Mwa ntakihero, itiini dhawaatta khadhinhudhiha ndhina na Muluku. Masi Biibiliya onlotta wiira tivootthuneya orumeela ndhina na Muluku. (aRoma 10:13, 14) Vaavo dhinkhumelela awa itthu dhootakhala, maphaatiri, mapastore ni ahooleli akinaku a itiini anlotta wiira: “Yootthuna ya Muluku.” Masi elo etthu yawoothiwa. Muluku khampaka etthu yootakhala. (Munsome Yakobo 1:13.) Mooripiha nrima, itthu idho dhawoothiwa dhinnaattaivihera atthu ni Muluku.

2. Itthu dhinpakiwa ni itiini dhawootha dhinaattaivihera dhai atthu ni Muluku?

Biibiliya onlotta wiira itampi dha itiini dhawootha ‘khadhinkontareya’. (Wiisuupulula 18:5) Mwa miyaakha dhawaatta itiini dhawootha dhinnikhalihera ikhotto. Ohiya-vo, itiini dhawootha dhinniwiiphiha atthu imilyawu dhawaatta. Ahooleli akinaku a itiini dhawootha aathaciri okhala wiira annaakhanyerera atthu aneettela etiini idha okhumiha nsurukhu wiira eliverye itthu arawana. Tthiri, itiini dhawootha khadhinaathokorerya atthu nkhama Yehova onaathokorerya iye. Ahooleli a itiini dhawootha anlotta wiira arummwale ni Muluku, masi itthu ampaka awa khadhinoonihera wiira arummwale ni Muluku. Ennooneya wiira awo khanindhuwela Muluku hata vakhaani.—Munsome 1 Yohani 4:8.

3. Muluku onoonela dhai itiini dhawootha?

Akhala wiira itthu dhimpakiwa ni itiini dhawootha dhinnoonanarani, khindho Yehova onoonela dhai? Ahooleli a itiini dhawootha annattaivihera atthu ni Muluku ni khanaathokorerya saana atthu aneettela etiini idha. Yehova onnaapheta atthu ni onnixanka mwaha wa itthu dhinpakiwa ni ahooleli a itiini. Muluku oolaihera wiira moohilekela onopwetesa itiini dhootheene dhawootha ni ‘khadhinrowa-tho ophwanyiwa’ (Wiisuupulula 18:21) Ndho elo enoonihera wiira Muluku onoomaliha itiini dhootheene dhawootha.—Wiisuupulula 18:8.

NHUDHE ITTHU DHIKINA

4. Muluku khanaakhulela itiini dhoothedhene

Atthu awaatta anuupuwela wiira itiini iphuro dhoovirikana masi dhin’ya wa Muluku. Masi niire elo ekhweeli? Munsome Matheyo 7:13, 14, nuuvinya mwaakhule nikoho ninttharelana:

• Eseeni Biibiliya onlotta iye voohima dha ephuro emphwanyiha ekumi yoohimala?

Moone EVIIDIYU, nuuvinya mwaakhule nikoho ninttharelana.

EVIIDIYU: Niire Muluku Onnaakhulela Itiini Dhootheene?—Ekhaani (3:22)

• Niire Biibiliya onlotta wiira itiini dhootheene dhinnindhiveliha Muluku?

5. Itthu dhimpakiwa ni itiini dhawootha khadhinoonihera wiira Muluku toopheta

Itiini dhawootha dhinnaattaivihera atthu ni Muluku mwa inamuna dhawaatta. Enamuna emodha yootakhala dhinipaka awa elo, okhalihera ikhotto. Nirowe noone ntakihero nimodha. Moone EVIIDIYU. Nuuvinya mwaakhule makoho anttharelana.

EVIIDIYU: Moopora Itiini Dhaakhalihera awa Ekhotto ya Naili ya Olumwinku Wootheene (2:22)

• Eseeni itiini dhapanka awa okathi wa Ekhotto ya Naili ya Olumwinku Wootheene?

• Nyuwo nnoonela dhai itthu idho dhipanka awa?

Munsome Yohani 13:34, 35 ni 17:16. Nuuvinya mwaakhule makoho anttharelana:

• Nyuwo nnoona wiira Yehova onoonela dhai vaavo itiini dhinkhalihera awa ikhotto?

• Itiini dhawootha dhookhalana nthowa mwaha wa itthu dhawaatta dhootakhala. Itthu seeni dhootakhala dhimpakiwa ni itiini dhawootha, nnoona nnyu wiira itiini idho khainoonihera opheta wa Muluku?

6. Muluku ontthuna waakhalihera atthu wiira ekhume itiini dhawootha

Munsome Wiisuupulula 18:4,a (Moone enoota.) Nuuvinya mwaakhule nikoho ninttharelana:

• Itiini dhawootha, dhinniwoototha atthu. Nyuwo nnoonela dhai noomala odhuwela wiira Muluku ontthuna waakhalihera atthu wiira ekhume itiini dhawootha?

7. Nhihiye ohudha voohima dha Muluku ekhweeli

Niire itthu dhootakhala dhimpakiwa ni itiini dhawootha dhinnireerela woohihani omwaattamela Muluku? Mmuupuwelele mwaana mmodha ohiniiwelela miruku dhooreera dha apaapaye. Mwaana owo onnilakela othaama vatthekoni va apaapaye ni apacera opaka itthu dhootakhala. Ndho, paapa owo ahikadhiveliwa ni itthu dhoothakhala mwane ompaka iye. Niire waaya okhala vaxariya onvaha nthowa paapa mwaha wa itthu dhootakhala mwaana ompaka iye?

• Niire waaya okhala vaxariya onvaha nthowa Yehova ni ohiya ohudha voohima dha yeene mwaha wa itthu dhootakhala itiini dhawootha dhimpaka awa?

WUULUULA

Itiini dhawootha dhinnaattaivihera atthu ni Muluku, dhinnaahudhiha atthu itthu dhawoothiwa ni dhinnipaka itthu dhootakhala. Ndho Yehova onopwetesa itiini dhootheene dhawootha.

Ipontu dhuulupale

• Nyuwo nnoonela dhai itthu itiini dhawootha dhinhudhiha awa ni dhimpaka awa?

• Yehova onoonela dhai itiini dhawootha?

• Eseeni Muluku on’ya iye wiiriha itiini dhawootha?

NTHOKODHE ITTHU DHIKINA

Moone inamuna piili itiini dhawootha inoonihera awa wiira khadhimpaka yootthuna ya Muluku.

“Niire Itiini Dhootheene Inoolikana? Niire Itiini Dhootheene Dhininroiha wa Muluku?” (Mwaha ori nsaaitini jw.org)

Seeni Yehova ontthuna iye wiira ninkokhorele vamodha ni atthu akina?

“Niire Tivootthuneya Okhalana Etiini?” (Mwaha ori nsaaitini jw.org)

Moone yawiiraneya ya phaatiri mmodha yoowo aapacenre waakanyera etiini iye. Hata eri dhiidho, owo khaahin’ye okoca ekhweeli voohima dha Muluku.

“Eseeni Yamwiirinhe Phaatiri Ohiya Ekerexa Eye” (Despertai!, Fevereiro de 2015)

Mwa iyaakha dhawaatta itiini dhinnihudhiha itthu dhimootheryaka Muluku, atthu akinaku anuupuwela wiira Muluku khanaathokorerya atthu ni tootakhala nrima. Nhudhe ekhweeli voohima dha itthu tthaaru dhinoonihera wootha iwo.

“Itthu Dhawoothiwa Dhinwiiriha Atthu Onttaivela Muluku” (A Sentinela, 1 de Novembro de 2013)