YOOSOMA 21
Ihapari Dhooreera Dhinlaleiwa Dhai?
Moohilokela, Yehova on’ya orumeela Omwene-ye wiira amalihe mixankiho dhihu dhootheene. Ela ehapari yooreera enreerela odhuweliwa ni atthu ootheene. Yesu aahaleela ahudheri-ye wiira elaleeye ehapari ela yooreera! (Matheyo 28:19, 20) Anamoona a Yehova aniiwelela dhai ele Yesu arumme iye?
1. Eprofesiya ya Matheyo 24:14 enaakhwanela dhai olelo-va?
Yesu ahilaihera khalayiru wiira: ‘Ihapari idha dhooreera dha Omwene dhinoolaleiwa elapo yootheene.’ (Matheyo 24:14) Anamoona a Yehova annihakalala ovara nteko ola wootepa otthuneya. Hiyo ninnilaleerya ihapari dhoreera olumwinku wootheene ilottelo dhinxira 1.000! Wiira nivare mookociheya nteko ola wootheene onnitthuneya wiilipihera vawaatta. Ndho khinaaya owerya ovara nteko ola, nihikhaliheriwaka ni Yehova.
2. Itthu seeni nimpaka nhu wiira niwerye waalaleerya atthu?
Hiyo, ninnivira mapuro ootheene ankhala atthu ni yoolakela ya waalaleerya ihapari dhooreera. Naatakihaka Makiristau a eseekulu yoopacera, ninnilaleerya ‘mmaitthekoni’ mwa atthu. (Miteko 5:42) Elo, enninikhalihera wiira niwerye olotta ni atthu imilyawu dhawaatta khuta mwaakha. Okhala wiira atthu awaatta khankhalaka owaani, hiyo ninnilaleerya mapuro awaatta atthu. Hiyo ninnikoca okathi wooreerela wiira naaleele atthu akina voohima dha Yehova ni ele ontthuna iye.
3. Taani arina nritti woolaleerya ihapari dhooreera?
Makiristau ootheene akhalana nritti wa waalaleerya atthu akina ihapari dhooreera. Hiyo ninnivara nteko owo ni nrima nhu wootheene. Khuta ntthu a hiyo, onniilipihera ovara nteko owo okhala wiira onnoopola ikumi dha atthu. (Munsome 1 Timootheyo 4:16.) Khaninaakhela etthu mwaha wa ovara nteko owo, okhala wiira Biibiliya onlotta wiira: ‘Nyuwo nvahiwe mahala, ndho nvahe mahala.’ (Matheyo 10:7, 8) Kahiyo wiira atthu ootheene annitthuna wiiwa ele ninlaleeya nhu, masi hiyo khaninhiya olaleerya okhala wiira nintthuna omwiiwelela Yehova ni ohakalaliha nrima-ye.
NHUDHE ITTHU DHIKINA
Moone itthu dhikina Anamoona a Yehova anipaka awa wiira ewerye olaleerya elapo yootheene. Nitho moone moopora Yehova onaakhalihera iye.
Elaleeryaka olumwinku wootheene: (A) oCosta Rica, (B) wEstados Unidos, (C) oBenim, (D) oTailândia, (E) oYap, (F) oSuécia
4. Hiyo ninniilipihera vawaatta wiira nalaleerye atthu ootheene
Anamoona a Yehova anniilipihera vawaatta wiira yalaleerye atthu ankhala mapuro ootheene ihapari dhooreera. Moone EVIIDIYU, nuuvinya mwaakhule nikoho ninttharelana.
Nyuwo nnoonela dhai itthu dhootheene Anamoona a Yehova ampaka awa wiira elaleerye?
Munsome Matheyo 22:39 ni aRoma 10:13-15, nuuvinya mwaakhule makoho anttharelana:
Nteko nhu woolaleerya onoonihera dhai wiira ninnapheta atthu?
Yehova onwoonela dhai atthu ale anlaleerya ihapari dhooreera?—Moone eversu 15.
5. Hiyo ninvara nteko vamodha ni Muluku
Nookhalana dhawiiraneya dhawaatta dhinoonihera wiira Yehova tonhoolela nteko ola. Moone ntakihero nimodha ni ele yaamwiiranenle munna a oNova Zelândia oniitthaniwa Paul. Nihiku nimodha aalaleerya iye othana, owo aahimphwanya nthiyana mmodha aanvekenle Muluku ohiihiyu ene. Owo ahinvekela Muluku arumeelaka ndhina na Yehova wiira ntthu mmodha arwe owannye wiira ankhalihere ondhuwela Muluku. Paul onlotta wiira: “ Noomala iwoora ttharu miyo kaahiphiya owannye.”
Munsome 1 aKorinto 3:9, nuuvinya mwaakhule makoho anttharelana:
Yawiiraneya nkhama ela, enoonihera dhai wiira Yehova toneettiha nteko woolaleerya?
Nsome Miteko 1:8, nuuvinya mwaakhule nikoho ninttharelana:
Seeni nintthuneya nhu okhaliheriwa ni Yehova wiira nivare nteko woolaleerya?
Niire Mwanidhuwela?
Khuta esumana, mithukumano dhihu dha eriyari ya esumana ninnihudha moopora woolaleerya. Akhala wiira mootaka orowa onthukumanoni, moonenle dhai moopora ninhudhihiwa nhu olaleerya?
6. Hiyo ninimwiwelela Muluku nirowaka olaleerya
Eseekulu yoopacera, atthu akina yaawiitta arumeyi a Muluku yaheehererya waakhottihera atthareli a Yesu olaleerya. Masi Makiristau a okathi ole, yaahaakihera ehaakhi-ya erumeelaka ‘nlamulo wiira ewerye olaleya ihapari dhooreera mootaphuwa.’ (aFilipi 1:7) Olelo-va, Anamoona a Yehova annipaka etthu emodharu.a —Moone enoota.
Nsome Miteko 5:27-42, nuuvinya mwaakhule nikoho ninttharelana:
Seeni nihinhiya nhu olaleerya ihapari dhooreera? —Moone eversiikulu 29, 38 ni 39.
ATTHU AKINAKU YOOKOHANI WIIRA: Seeni Anamoona a Yehova anlaleerya awa ihapari dhooreera?
Nyuwo mun’ya waakhula dhai?
WUULUULA
Yesu aahaaleela atthareli-ye wiira yaalaleerye ihapari dhooreera atthu a maloko ootheene. Yehova onnaakhalihera atthu-ye ovara nteko wooreera.
Ipontu dhuulupale
Ihapari dhooreera dhinlaleiwa mooporani olumwinku wootheene?
Nteko nhu woolaleerya ihapari dhooreera onoonihera dhai wiira ninnaapheta atthu?
Nnoona wiira nteko woolaleerya onniruuha ohakalala? Mwaha wa seeni?
NTHOKODHE ITTHU DHIKINA
Moone moopora Anamoona a Yehova anlaleerya awa isitati dhuulupale.
Etthu seeni Anamoona a Yehova ampaka awa wiira yaakhalihere atthu atthanwe ekhotto?
Atthu Atthanwe Ekhotto Annivahiwa Itthu Dhootheene Dhinaathowa (5:59)
Margarita oorumeela ekumi-ye yootheene alaleeryaka. Moone seeni opaka elo emphwanyinha awa ohakalala.
Moone dhoothanla itribunaale dhipanka awa wiira dhikhalihere nteko woolaleerya mootaphuwa.
“Anamalaleerya a Omwene Anniroiha Milattu-dha Otribunaale” (Omwene wa Muluku Onnilamulela!, muru 13)
a Enoota: Muluku tonirumme olaleerya ihapari dhooreera. Tivondho, Anamoona a Yehova khanlipelela wiira yaakhulelihiwe ni makhulupale a elapo wiira elaleerye ihapari dhooreera.