YOOSOMA 47
Niire Moolikana Wiira Mpatisiwe?
Nyuwo moohudha itthu dhawaatta voohima dha Yehova ni yoosoma nnyu ya Biibiliya. Woonawene moopaka marukunuso makina wiira nvarihele nteko ele munhudha nnyu. Masi pooti okhala etthu ekina enookhoottihani wiivahererya wa Yehova ni opatisiwa. Yoosoma ela, nin’ya woona itthu vakhaani dhinookhoottiherani opatisiwa ni moopora woowerya omaliha.
1. Niire ontthuneya odhuwela itthu dhootheene dhiri mBiibiliyani wiira mpatisiwe?
Wiira mpatisiwe nhaana okhalana ‘odhuwela weekhweeli.’ (1 Timootheyo 2:4) Elo khentaphulela wiira nwerye opatisiwa nhaana odhuwela waakhula makoho ootheene munkohiwa nnyu voohima dha Biibiliya. Hata ntthu opatisiwe khalai khanhiya ohudha voohima dha Yehova. (aKolosi 1:9, 10) Masi nhaana odhuwela dhoohudhiha dhoopacera dha Noolumo na Muluku. Asitokweene a mmulokoni anawookhaliherani ovarerya akhala wiira moohudha itthu vakhaani wiira mpatisiwe.
2. Itthu seeni dhikina munreerela nnyu opaka nhinatthi opatisiwa?
Nhinatthi opatisiwa nhaana ‘orukunusa nrima nnyu ni otoroka mweettelo nnyu.’ (Nsome Miteko 3:19.) Elo entaphulela wiira nhaana ottharuwa itthu dhootheene dhoonanara mwaapaka nnyu khalai ni onvekela Yehova wiira oleveleleni. Nitho elo entaphulela wiira moolakela okhala moovarihana ni otthuna wa Yehova ni khamuntthuna opaka etthu owo olontte iye okhala yoohiloka. Etthu ekina munreerela nnyu opaka, ori orowela mithukumano dhootheene ni olaleerya vamodha ni muloko.
3. Seeni nhinreerela nnyu woovelela opatisiwa?
Atthu akina annoovelelela opatisiwa yoovaka ohaakhwanihera itthu dhootheene an’ya awa onlaihera Yehova. Ekhweeli wiira ivaara dhikina pooti opaka etthu yoohiloka. Masi nhiliyale wiira Yehova khanlipelela wiira arumeye-ye ekhale oomalela aahiidho oohittheka. (Nsome Esalimo 103:13, 14.) Owo onnihakalala vaavo onwoonaiyene mpakaka ele munwerya nnyu! Ndho owo onawookhaliherani. Yehova oolaihera wiira khiyaavo etthu ‘enwerya onivalaanya ni opheta wa Muluku.’—Munsome aRoma 8:38, 39.
NHUDHE ITTHU DHIKINA
Ondhuwela saana Yehova ni waakhulela nikhalihero-ne onawoovahani ikuru wiira nwerye omaliha khuta nxankiho onookhoottihani opatisiwa.
4. Mundhuwele saana Yehova
Mpakha vaayi munreerela nnyu ondhuwela Yehova nhinatthi opatisiwa? Nhaana ondhuwela Yehova mpakha opacera ompheta ni otthuna ondhiveliha. Moone EVIIDIYU wiira ndhuwele etthu anaskola a Biibiliya a olumwenku wootheene apanka awa wiira endhuwele saana Yehova. Nuuvinya mwaakhule nikoho ninttharelana
Nkhama moonne nnyu eviidiyu, itthu seeni dhaakhalihenre atthu akina wiilokihera wiira epatisiwe?
Munsome aRoma 12:2, nuuvinya mwaakhule makoho anttharelana:
Niire munnaakanyera itthu Biibiliya onhudhiha iye? Niire munnaakanyera akhala wiira Anamoona a Yehova anhudhiha ekhweeli?
Akhala wiira munnaakanyera eseeni munreerela nnyu opaka?
5. Nvilele khuta nxankiho onookhoottihani opatisiwa
Ootheene nhu niniviriha mixankiho okathi ninlakela nhu ovahererya ekumi nhu wa Yehova ni opatisiwa. Wiira moone ntakihero nimodha, moone EVIIDIYU, nuuvinya mwaakhule makoho anttharelana.
Nkhama moonne nnyu eviidiyu, mixankiho seeni Narangerel owenrye iye ovilela wiira anrumeele Yehova?
Ompheta Yehova wankhalihenre dhai Narangerel ovilela mixankiho?
Munsome Miruku 29:25 ni 2 Timootheyo 1:7, nuuvinya mwaakhule nikoho ninttharelana:
Seeni ennivaha olipa nrima wiira niwerye ovilela mixankiho?
6. Nroromele nikhalihero na Yehova
Yehova onawookhaliherani wiira nwerye onhakalaliha. Moone EVIIDIYU, nuuvinya mwaakhule makoho anttharelana.
Nkhama moonne nnyu eviidiiyu, seeni yamooceliha naskola mmodha a Biibiliya opatisiwa?
Eseeni elipinhe onroromela awe Yehova?
Munsome Yesaya 41:10, 13, nuuvinya mwaakhule nikoho ninttharelana:
Akhala wiira nnawiivahererya wa Yehova, seeni munreerela nnyu okhupali wiira nnoowerya waakhwanihera itthu dhootheene munlaihenre nnyu Yehova?
7. Mwaacerere oxukhurela winyu opheta wa Yehova
Wuupuwelela moopora Yehova onoophetaiyeni enoowiirihani waacerera onxukhurela winyu ni otthuna onrumeela owo mahiku ootheene. Nsome Esalimo 40:6, nuuvinya mwaakhule nikoho ninttharelana:
Mareeliho seeni a Yehova antepa woodhivelani?
Profeeta Yeremiya aanimpheta vawaatta Yehova ni Nuulumo-ne, owo aanivaha efaita yuulupale eparakha ya onrumeela Yehova. Yeene olontte dho: “Masu anyu akitteliha murima, Apwiya, Muluku ówerya sothene! Miyo k’awinyu: Tivó masu anyu àsariha murim’aka otteliwa n’upuha.” (Yeremiya 15:16) Mwaakhule makoho anttharelana:
Seeni okhala Namoona a Yehova eraawa eparakha ya vamekhaaya?
Niire nyuwo munnitthuna opatisiwa wiira nkhale Namoona a Yehova?
Niire dhookhala itthu dhikina dhinookhoottiherani opaka elo?
Mwa moonelo nnyu, itthu seeni munreerela nnyu opaka wiira mpatisiwe?
ATTHU AKINAKU ANLOTTA WIIRA: “Miyo kinoova opatisiwa, noomala kipake etampi yuulupale.”
Niire nyuwo nnuupuwela dhiidho?
WUULUULA
Nkhaliheriwaka ni Yehova nnowerya ovilela khuta nxankiho onookhoottihani opatisiwa.
Ipontu dhuulupale
Niire nhaana odhuwela itthu dhootheene dhiri mBiibiliyani wiira mpatisiwe?
Marukunuso seeni munreerela nnyu opaka nhinatthi opatisiwa?
Seeni nhinreerela nnyu ohiya woova owoocelihakani opatisiwa?
NTHOKODHE ITTHU DHIKINA
Moone etthu en’ya wookhaliherani opaka yoothanla ya opatisiwa.
“Niire Nhilokihera Wiira Mpatisiwe?” (A Sentinela, Março de 2020)
Moone moopora woowerya mixankiho vakhaani dhikhanle wookhoottihani nyuwo opatisiwa.
“Eseeni Enkikhoottihera Opatisiwa?” (A Sentinela, Março de 2019)
Moone moopora nlopwana mmodha oxinttale iye mixankiho dhuulupale wiira apatisiwe.
Woopacerani, nlopwana mmodha oniitthaniwa Ataa anaakanyera akhala wiira aanireerela opatisiwa. Moone etthu yankhupalinhe wiira aanireerela opatisiwa.