Otesenyari Onnikhalihera Wuupuwelela

Woonawene nyuwo onnooliperya wuupuwelela itthu nhudhe nnyu. Elo enniiraneya ni atthu awaatta. Niire munnuupuwela malikanyiho ookhweya Yeesu arumeela iye? Voohaakanyera munnuupuwela itthu alontte iye ni itthu malikanyiho awo annihudhiha awa. Emodha-modharu, akhala wiira nnawoona itthu munsoma nnyu elo pooti wookhalihera wuupuwelela itthu nhudhe nnyu. Mun’ya owerya dhai opaka elo? Nyuwo nnoowerya mpakaka itesenyu.

Atthu ampaka itesenyu vaavo ansoma awa onnaakhwela wuupuwelela itthu ipheya ahundha awa. Opaka itesenyu khonkhalihera pahi wiiwasasa moolumo, masi onnikhalihera odhuwela epontu yuulupale munhudha nnyu. Nyuwo pooti opaka elo, hata nhidhuwela otesenyari saana. Enamuna ela ennaakhalihera atthu awuuluvala waakhwela wuupuwelela itthu anhudha awa.

Tivondho okathi mun’ya nnyu opaka yoosoma nnyu yoomwaneene enttharela, mweehererye opaka itesenyu voohima dha etthu nhudhe nnyu. Ndho mwaapaka elo, enawoona wiira okamookhweelani wuupuwelela itthu munhudha nnyu!