YOOSOMA YA MWAHA 15
NCIPO 30 Muluku Aka, Moopoli Aka ni Tiithi Aka
Hiyo Ninnoona Okhala ‘Vooreera Omwaattamela Muluku’!
“Miyo okisivela omwaattamela Muluku.”—ESAL. 73:28.
ETTHU NIN’YA NHU OHUDHA
Nin’ya woona moopora nikhanle nhu omwaattamela Yehova ni mareeliho nin’ya nhu ophwanya akhala wiira ninoopaka elo.
1-2. (a) Eseeni ntthu onreerela iye opaka wiira nkhalena oxirikha woolipa ni ntthu nkina? (b) Eseeni nin’ya nhu woona yoosoma ela?
NIIRE nyuwo mookhalana nxirikha nnyu muulupale? Eseeni mwaapanke nnyu wiira owo akhale nxirikha nnyu? Woonawene nyuwo mooviriha okathi wawaatta nuuwo wiira ndhuwele mixankiho ovirinhe iye, itthu dhinindhivela ni dhininnanara. Nitho moowerya woona mikhalelo dhooreera dha nxirikha nnyu muntthuna nnyu otakiha. Ndho noovira okathi, elo yoowiirihani opacera ompheta nxirikha nnyu.
2 Wiira nilipihe oxirikha wihu ni ntthu nkina tivootthuneya wiivaha okathi ni ikuru. Nitho nihaana opaka etthu emodharu wiira nikhalena oxirikha wuulupale ni woolipa ni Yehova. Yoosoma ela, nin’ya woona etthu ninreerela nhu opaka wiira nimwaattamele Muluku ni mareeliho nin’ya nhu ophwanya akhala wiira ninoopaka elo. Masi wiira nipacere, nin’ya woona seeni oraawa vooreera omwaattamela nxirikha nhu muulupale, Yehova.
3. Seeni oraawa vooreera wuupuwelela mireerelo dhinkhumelela mwaha wa omwaattamela Yehova?
3 Voohaakanyera, nyuwo munnikhupali wiira omwaattamela Yehova etthu yooreera. Ndho akhala wiira ninawuupuwelela moopora oraawa vooreera opaka elo, enoonitumererya ohihiya omwaattamela Yehova. (Esal. 63:6-8) Mwa ntakihero, hiyo noodhuwela wiira oca eyooca yooreera, opaka exersiisiyu, orupa ni owurya maadhi awaatta onnikhalihera okhalana ekumi yooreera. Masi hata atthu awaatta edhuwelaka elo, awo khanvaha efaita itthu idho ni annihiya opaka itthu dhaakhanle waakhalihera okhalana ekumi yooreera. Ndho wuupuwelela mireerelo dhinkhumelela vaavo nimpaka nhu itthu idho, elo enniniiriha ohihiya opaka. Mwa enamuna emodharu, hiyo noodhuwela wiira omwaattamela Yehova onniniiriha okhala saana. Masi wuupuwelela mireerelo dhinkhumelela mwaha wa opaka elo, enoonitumererya otepa omwaattamela nxirikha nhu Yehova.—Esal. 119:27-30.
4. Moovarihana ni Esalimo 73:28, eseeni Asaafi aalakenle iye opaka?
4 Nsome Esalimo 73:28. Nlipa aatinkhe Esaalimu 73 aari nlevi aathanleliwe ovara nteko ntempulu wa Yehova nkhama nlipa awiipa macipo. Woonawene owo aahiviriha iyaakha dhawaatta anrumeelaka Yehova moororomeleya. Masi hata eri dhiidho, aahoona okhala vootthuneya wuupuwelela ni waakhalihera atthu akina woona wiira ti vooreera ‘omwaattamela Muluku.’ Ndho, mireerelo seeni dhinkhumelela vaavo nimpaka nhu elo?
“OMWAATTAMELA MULUKU” ONNINIPHWANYIHA OHAKALALA
5. (a) Eseeni nimphwaya nhu mwaha wookhala waataana woolipa ni Yehova? (b) Moovarihana ni Miruku 2:6-16, Miruku Yehova onnivaha iye dhinnikhalihera dhai ni onikhapelela?
5 Vaavo ninkhalana nhu waataana woolipa ni Yehova, ohakalala wihu onitepa wunnuwa. (Esal. 65:4) Akhala mathowa awaatta anniiriha okhupali elo. Mwa ntakihero, hiyo ninnittottela nreerelo wawaatta miruku dhoovareleya nteko dhimphwanyaneya mbiibiliyani. Miruku idho dhinninikhapelela ni onikhalihera ohipaka itthu dhikhanle onikhumihera mixankiho ni oxaka opaka itampi dhuulupale. (Nsome Miruku 2:6-16.) Tivondho Biibiliya onlotta iye wiira: ‘Oohakalala ntthu yoole onaaphwanya akhili, ni ntthu yoole omphwanya miruku.’—Mir. 3:13.
6. Eseeni yaamwiirinhe nasaalimu ohiya okhala ohakalala?
6 Ivara dhikina axirikha a Yehova pooti oriipiwa nrima. Nlipa aatinkhe Esaalimu 73 aahihiya okhala oohakalala noomala opacera wuupuwelela itthu dhoohiloka. Owo aahinyoonyiheya ni aahipacera waakhalela nrima atthu ootakhala, okhala wiira uupuwela wiira atthu ahininrumeela Muluku ni ahineettela malamulo-ye yaanikhala saana. Ndho elo yaahimwiiriha woona wiira atthu ootakhala ni awiikuserera, yaari oothaciri, yaahikhala ekumi yooreera ni khidhaaphwanya mixankiho. (Esal. 73:3-7, 12) Mwaha wa itthu dhootakhala ni ohixariya oona iye, owo aahipacera wuupuwelela wiira khomphuriha etthu wiilipihera onrumeela Yehova. Ndho elo yaahimwiiriha wiikhupanyera airaka: ‘Mweekhweeli, miyo kireenre nrima mahala ene, nitho kinyanwe mahala ene, kooniheraka wiira nkitthenke.’—Esal. 73:13.
7. Eseeni ninreerela nhu opaka vaavo ninriipiwa nhu nrima? (Moone-tho efootu ya ekaapa.)
7 Masi nasaalimu ola khaahin’ye oriipiwa nrima omwiirihaka ohiya onrumeela Yehova. Owo aahipaka etthu wiira arukunuse muupuwelo-ye. Tivondho owo ‘aahivolowa nipuro nawaarya na empa ya Muluku,’ ari opuro owo, Yehova aahinkhalihera orukunusa muupuwelo-ye. (Esal. 73:17-19) Yehova, nxirikha nhu muulupale, owo onnidhuwela vaavo ninriipiwa nhu nrima. Ndho akhala wiira ninoonvekela Yehova malakihero ni waakhulela nikhalihero onnivaha iye anrumeelaka Biibiliya ni muloko, nikhupali wiira ninoowerya ophwanya ikuru ninramela nhu wiira niwerye ovilela oriipiwa nrima. Nitho okathi ninxanka nhu vawaatta nihikadhuwela etthu yoopaka, Yehova onoonilipiha ni onimaaliha.—Esal. 94:19.a
Nlevi aatinkhe Esaalimu 73, eemenle ‘nipuro nuulupale nawaarya na empa ya Muluku’ (Moone ettima 7)
“OMWAATTAMELA MULUKU” ONNINIIRIHA OKHALANA YOOLAKELA YA EKUMI NI NLIPELELO NA NHOOLO
8. Mathowa seeni ootepa otthuneya anniiriha omwaattamela Muluku?
8 Hiyo ninnoona okhala vooreera omwaattamela Yehova mwaha wa mathowa maili ootepa otthuneya. Noopacera, okhala wiira onniniiriha okhalana yoolakela ya ekumi yoohakalaliha. Nanaili, onninivaha nlipelelo noororomeleya na nhoolo. (Yer. 29:11) Vano, nirowe nithokorerye vakhaani mireerelo idho.
9. Omwaattamela Yehova onnikhalihera dhai okhalana yoolakela ya ekumi?
9 Vaavo nimmwaattamela nhu Yehova onniniiriha okhalana yoolakela ya ekumi. Atthu awaatta olelo-va, khankhupali wiira Muluku ookhala. Awo khandhuwela wiira ekumi yookhalana yoolakela ni anikhupali wiira nhoolo apinaatamu ootheene valaponi anookhwa. Masi osoma Nuulumo na Muluku, noonikhalihera okhupali wiira Muluku ‘ookhala, ni wiira onnaatthuvela ale animwaadhya ni nrima wootheene.’ (aHeb. 11:6) Ohiya-vo, Yehova onipattunse wiira ninrumeela. Ndho vaavo nimpaka nhu elo, ninnikhalana ekumi yoohakalala.—Otum. 10:12, 13.
10. Moovarihana ni Esalimo 37:29, eseeni Yehova onaalaihera iye ale aninlipelela?
10 Atthu awaatta olelo-va, khaaana nlipelelo na nhoolo. Awo anuupuwela wiira etthu yootepa otthuneya mweekumini ovara nteko, othela aahiidho otheliwa, waayara anamwane ni opweha nsurukhu okhanle waakhalihera nhoolo noomala wuuluvala. Awo khandhuwela itthu Yehova onlaihenre iye opaka nhoolo. Masi moovirikana naawo, arumeyi a Yehova anilipelela itthu Muluku olaihenre iye. (Esal. 25:3-5; 1 Tim. 6:17) Hiyo ninninroromela Muluku nimwaattamela nhu ni ninnikhupali wiira onawaakhwanihera itthu olaihenre iye. Ndho dhookhala itthu dhawaatta dhooreera ninlipelela nhu nhoolo, ohela mpuwa eparakha ya onkokhorela Yehova mahiku ootheene Mparayiisu.—Nsome Esalimo 37:29.
11. Eparakha seeni araawana ale ammwaattamela Muluku?
11 Omwaattamela Yehova onniniphwanyiha mireerelo dhikina dhawaatta. Mwa ntakihero, Yehova onnilaihera onilevelela vaavo ninttharuwa nhu opaka etampi. (Yes. 1:18) Ndho noomala wiiraneya elo, nihaana oxaka wiivaha mathowa mwaha wa itampi nipanke nhu khalai. (Esal. 32:1-5) Nitho, nookhalana eparakha yoopaka itthu dhininhakalaliha Yehova. (Mir. 23:15) Voohaakanyera nyuwo munnuupuwela mareeliho makina nimphwanya nhu mwaha wookhala axirikha a Yehova. Masi eseeni en’ya wookhalihera ohihiya omwaattamela Yehova?
ETTHU EN’YA WOOKHALIHERANI OHIHIYA “OMWAATTAMELA MULUKU”
12. Eseeni munreerala nnyu opaka wiira mmwaattamele Muluku?
12 Akhala wiira mwa nkiristau oopatisiwa, nyuwo moopaka itthu dhawaatta wiira nkhale nxirikha a Yehova. Itthu idho dhinhela mpuwa, ohudha ekhweeli voohima dha Yehova Muluku vamodha ni Yeesu Kiriistu, ottharuwa itampi dhihu, woonihera omwaamini Muluku ni wiilipihera opaka yootthuna ya Yehova. Masi wiira nikhalena waataana woolipa ni Muluku, nihaana ovikaniha opaka itthu idha.—aKol. 2:6.
13. Itthu seeni tthaaru dhin’ya onikhalihera ohihiya omwaattamela Yehova?
13 Eseeni en’ya onikhalihera ohihiya omwaattamela Yehova? (1) Nihaana onsoma Biibiliya khuta nihiku ni ohudha etthu ni itthu ninsoma nhu. Okathi nimpaka nhu elo, yoolakela nhu ehikhale pahi ohudha ikhweeli dhoopacera voohima dha Muluku. Masi nihaana waadhya odhuwela ele Muluku ontthuna iye ni ohiya weettihiwa ni malakihero amphwanyaneya mbiibiliyani. (aEefe. 5:15-17) (2) Nihaana olipiha waamini wihu nuupuwelelaka inamuna dhoovirikana Yehova onoonihera iye wiira onninipheta. (3) Nihaana ohihiya onyokha itthu ininnanara Yehova ni oxaka weetta ni atthu ampaka itthu dhootakhala.—Esal. 1:1; 101:3.
14. Moovarihana ni 1 aKorinto 10:31, itthu seeni ninreerela nhu opaka khuta nihiku wiira ninhakalalihe Yehova? (Moone-tho efootu.)
14 Munsome 1 aKorinto 10:31. Tivootthuneya wiilipihera opaka itthu dhininhakalaliha Yehova. Ohiya pahi orowela mithukumano ni ovara nteko woolaleerya. Elo entaphulela wiira nihaana opaka khuta nihiku itthu dhinihakalaliha Yehova. Mwa ntakihero, vaavo ninkhala nhu oororomeleya ni itthu dhootheene ni ninaavaha nhu atthu akina itthu nirinhuna, ninninhakalaliha Yehova. (2 aKor. 8:21; 9:7) Yehova ontthuna wiira noonihere wiira ninnittittimiha ekumi onivanhe iye. Hiyo ninimwaattamela Namavaha ekumi nidhuwelaka wiiphemela eyooca, owuurya ni nipakaka itthu dhikina wiira nikhapelele ekumi nhu. Vaavo niniilipihera nhu ohakalaliha Yehova, hata ni itthu ikhaani, owo onnitepa onipheta.—Luka 16:10.
Weettiha mikukutta mwa enamuna yoophareleleya, wiikhapelela nipakaka exersiisiyu, oca eyooca yooreera ni okhala atthu oovaha, itthu ninreerela nhu opaka wiira niwerye ohakalaliha Yehova (Moone ettima 14)
15. Yehova ontthuna wiira naathokorerye dhai atthu akina?
15 Yehova onnaareerela nrima atthu ootheene, elo tiilo, atthu ooreera nrima ni ootakhala nrima. (Math. 5:45) Owo ontthuna wiira naathokorerya saana atthu akina nkhama onaathokorerya iye. Mwa ntakihero, nihaana oxaka ‘onveiha ntthu ni onyakulihana, masi nikhale ooreera nrima ni noonihere okhala oomaala ohoolo wa atthu ootheene.’ (Tito 3:2) Ndho hata atthu akina ehinkhupaliki Yehova, hiyo khaninuupuwela wiira na atthu ootepa otthuneya waaxira awo. (2 Tim. 2:23-25) Hiyo ninnitepa olipiha waataana wihu Yehova vaavo ninaareerela nhu nrima ni waathokorerya saana atthu akina.
NHIHIYE “OMWAATTAMELA MULUKU” HATA NTANKE OPAKA ETAMPI
16. Nlipa aatinkhe Esaalimu 73 aidhoonela dhai noovira okathi vakhaani?
16 Niire nyuwo munuupuwela wiira khamumphwanela ophetiwa ni Yehova mwaha wa itampi mpanke nnyu khalai? Nkhama nithokorerye nhu, nlipa aatinkhe Esaalimu 73 aidhoona dhiidho. Owo aahikhupanyera airaka: “Miyo kaahanle vakhaani ohapuwa; ni kaahanle vakhaani otherekuwa.” (Esal. 73:2) Nitho owo onaakhulela alottaka wiira ‘aahiriipiwa nrima vawaatta’ ni ‘aahipakeya nlolo nkhama mwaamunana’ ohoolo wa Yehova. (Esal. 73:21, 22) Niire mwaha woopaka itampi, elo yaahimwiiriha owo wuupuwelela wiira khaaphwanelela oleveleliwa ni ophetiwa ni Yehova?
17. (a) Noomala nasaalimu oriipiwa nrima vawaatta, eseeni opaka iye? (b) Eseeni ninhudha nhu ni yawiiraneya ya nasaalimu? (Moone-tho efootu.)
17 Akhala wiira nasaalimu ole oona wiira aahinyanyaliwa ni Yehova, woonawene muupuwelo owo waahimala noovira okathi vakhaani. Masi hata aariipiwe nrima vawaatta, owo aanoona okhala vootthuneya omwattamela Yehova. Ndho elo yaahimwiiriha onleela Yehova wiira: ‘Okathi wootheene kiri ni nyuwo [Yehova]; mookipharela ntata naka neelopwana. Munnikeettiha ni miruku dhinyu, ni nnoorowa okireerela nrima.’ (Esal. 73:23, 24) Nitho nihaana onvekela Yehova wiira anilipihe vaavo ninoona nhu wiira waamini wihu woopacera ovukuwa aahiidho okathi ninriipiwa nhu nrima mwaha wa dhoovonya dhihu. (Esal. 73:26; 94:18) Hata nipanke etampi yuulupale, onniweryaneya otthikela wa Yehova ni nikhupaliki wiira owo ori ‘oolikane ene wiira anilevelela’ (Esal. 86:5) Ndho okathi ninriipiwa nhu nrima vawaatta, ti vootepa otthuneya omwaattamela Yehova.—Esal. 103:13, 14.
Vaavo ninttettheya nhu nkhalelo wa omunepani, nihaana omwaaattamela Yehova ni okhalela nthiti ovara miteko dha omunepani (Moone ettima 17)
NHIHIYE “OMWAATTAMELA MULUKU” MAHIKU OOTHEENE
18. Eseeni ennikhupali wiira khaninhiya omwaattamela Yehova mahiku ootheene?
18 Hiyo khaninrowa ohihiya omwaattamela Yehova mahiku ootheene ni ohudha itthu dhawaatta voohima dha owo. Ninnikhupali elo, okhala wiira Biibiliya onlotta wiira iphuro, akhili ni odhuwela wa Yehova ti ‘wootepa waatta.’—aRoma 11:33.
19. Moovarihana ni Isaalimu, eseeni ninreerela nhu okhupali?
19 Esalimo 79:13 enlotta wiira: ‘Ndho hiyo, atthu nnyu ni nikotto ninyu, ninrowa wooxukhurelani mahiku ootheene, ni ninoolaleya ottottopeliwa winyu mpakha maloko an’ya okhumelela nhoolo.’ Ndho nikhupali ni nrima wootheene wiira naahihiye omwaattamela Muluku ninoophwanya mareeliho oohimala. Nitho nkhama nasaalimu, nyuwo nnoowerya olotta wiira: ‘Muluku tonlipiha nrima aka, ni kinlipa ni yoowo mahiku ootheene.’—Esal. 73:26.
NCIPO 32 Rwaani wa Yehova!
a Atthu axankale ni arina nxankiho wa oriipiwa nrima mootepana pooti ovekela nikhalihero na mameetiku. Wiira ndhuwele itthu dhikina, mmoone A Sentinela, No. 1 a 2023.