Nhihiye Weettihiwa ni Waamini

1. Eseeni yaamwiiriha Paaulu ohakalala vaavo uupuwela iye itthu apanke iye ottuli?

OKATHI omodha, nrummwa Paaulu aahidhuwela wiira aahala vakhaani okhwa. Masi hata eri dhiidho, owo aahikhalana mathowa awaatta yaamwiiriha ohakalala. Okathi uupuwela iye ekumi yoohakalaliha aariiyena ottuli, owo aalontte wiira: ‘Kootthimaka mpakha ophiya opontha, kootthara waamini.’ (2 Tim. 4:6-8) Paaulu aahipaka dhoothanla mwa miruku nkhama nkiristau ni aanikhupali wiira aahinhakalaliha Yehova. Nkhama Paaulu, hiyo nintthuna opaka dhoothanla dhooreera dhikhanle onhakalaliha Yehova. Ndho, nin’ya owerya dhai opaka elo?

2. Ontaphulelani weettihiwa ni waamini?

² Aihimaka yeene vamodha ni Makiristau makina oororomelelaya, Paaulu olontte wiira: ‘Hiyo nineettihiwa ni waamini, ohiya ni itthu ninoona nhu.’ (2 aKor. 5:7) Eseeni Paaulu aatthuna iye olotta ni moolumo ala? Mbiibiliyani, noolumo nawi ‘nineettihiwa’ nintaphulela moopora ntthu onthala iye weettiha ekumi-ye. Ntthu oneettihiwa ni itthu dhinooneya, ompaka itthu moovarihana ni itthu onoona iye, wiiwa ni dhimmudhivela. Masi ntthu oneettihiwa ni waamini, onnipaka dhoothanla attharaka moonelo wa Yehova. Ohiya-vo, miteko-dhe dhinnoonihera wiira onnikhupali wiira Yehova onoontthuvela nhoolo ni otthara miruku Yehova oonivaha iye anrumeelaka Biibiliya dhinniphwanyiha nreerelo.—Esal. 119:66; aHeb. 11:6.

3. Mireerelo seeni dhinkhumelela vaavo nineettihiwa nhu ni waamini? (2 aKorinto 4:18)

³ Ekhweeli wiira ivaara dhikina wiira nipake dhoothanla nihaana ohela mpuwa itthu ninoona nhu, wiiwa ni dhinnidhivela. Masi akhala wiira vaavo nimpaka nhu dhoothanla dhootepa ootthuneya ninlipa pahi ni itthu ninoona nhu, wiiwa ni dhinnidhivela, elo pooti oniiriha opaka dhoothanla dhoohiloka dhikhanle onikhumihera mixankiho. Mwaha wa seeni? Okhala wiira ivaara dhikina itthu ninoona nhu, wiiwa ni dhinnidhivela, pooti okhala dhoohiroromeleya. Tivondho akhala wiira ninoopaka dhoothanla neettihiwa ni itthu dhinooneya, noovira okathi elo pooti oniiriha opaka yoothanla ehinvarihana ni yootthuna ya Yehova. (Mus. 11:9; Math. 24:37-39) Masi neettihiwa ni waamini, ninoowerya opaka dhoothanla ‘dhinaadhivela Apwiya.’ (aEefe. 5:10) Otthara miruku dha Muluku dhinoonikhalihera okhalana nrettele mmuupuweloni ni ophwanya ohakalala weekhweeli. (Esal. 16:8, 9; Yes. 48:17, 18) Ndho naahihiye weettihiwa ni waamini, ninoophwanya ekumi yoohimala nhoolo.—Munsome 2 aKorinto 4:18.

4. Nin’ya owerya dhai odhuwela akhala wiira nineettiwa ni waamini aahiidho ni itthu dhinooneya?

⁴ Nin’ya owerya dhai odhuwela akhala wiira nineettiwa ni waamini aahiidho ni itthu dhinooneya? Wiira nidhuwele nihaana wiikoha wiira: Eseeni enkikhalihera opaka yoothanla? Niire kinuupuwela pahi itthu kinwerya woona? Aahiidho niire kinnipaka dhoothanla kittharaka miruku dha Yehova? Yoosoma ela, nin’ya woona moopora nin’ya nhu ohihiya weettihiwa ni waamini mwa inamuna tthaaru dhootepa ootthuneya dhinttharelana: (1) Vaavo ninthala nhu nteko woovara, (2) vaavo nininthanla nhu ntthu oothelano ni (3) vaavo ninvahiwa nhu malakihero ni ntthenkeso wa Yehova. Khuta muru, nin’ya woona etthu ninreerela nhu opaka wiira niwerye opaka dhoothanla dhooreera.

VAAVO NINTHANLA NHU NTEKO WOOVARA

5. Eseeni ninreerela nhu wuupuwelela nihinatthi othanla nteko woovara?

⁵ Ootheene nhu ninnitthuna ophwanya nteko on’ya onikhalihera okhalana itthu dhinnithowa vamodha ni atthu a ettheko nhu. (Mus. 7:12; 1 Tim. 5:8) Miteko dhikina dhinnaakhalihera ananteko ophwanya nsurukhu omphiyera wiira etthume itthu dhinaathowa khuta nihiku ni ophweha wiira waakhalihere nhoolo. Masi miteko dhikina dhinlivwa nsurukhu vakhaani omphiyera pahi othuma eyooca, okhalana opuro wookhala ni ikuwo dhoowara. Ekhweeli wiira nihinatthi othanla nteko woovara nihaana odhuwela toko-toko nsurukhu nin’ya nhu nikalinvwa. Masi akhala wiira nno nthowa nuulupale ninniiriha othanla nteko, elo enoonihera wiira nineettihiwa ni itthu dhinooneya ohiya ni waamini.

6. Weettihiwa ni waamini, on’ya onikhalihera dhai othanla saana nteko woovara? (aHeeberi 13:5)

⁶ Neettihiwa ni waamini, elo enoonikhalihera wuupuwelela akhala wiira nteko nintthuna othanla khonre ohonone waataana wihu ni Yehova. Wiira nipake elo, nihaana wiikoha wiira: ‘Niire nteko ola onvekela opaka itthu Yehova onnyokha iye?’ (Mir. 6:16-19) ‘Niire nteko ola onookiiriha olova mithukumanoni, ovara nteko woolaleerya, opaka yoosomaka yoomwaneene vamodha ni oviriha okathi ni emudhi aka?’ (aFil. 1:10) Akhala wiira makoho ala aahiidho nimodha nnaakhula aayo, nhaakhulele ovara nteko owo, hata ohikhweyaka ophwanya nteko nkina. Okhala wiira nineettiwa ni waamini, ninnipaka dhoothanla dhinoonihera wiira ninnikhupali ni nrima wootheene wiira Yehova onoonikhapelela anivahaka itthu dhinnithowa.—Math. 6:33; munsome aHeeberi 13:5.

7-8. Munna Javier oonihere dhai wiira eetthihiwa ni waamini? (Moone-tho efootu.)

⁷ Moone moopora munna Javier,a yoowo onkhala wAmérica do Sul, aawenrye iye odhuwela wiira tivootthuneya weettihiwa ni waamini. Owo onlotta wiira: “Miyo khaahidhaatikhiha emperesa emodha wiira kipacere ovara nteko yoowo kaayaka kikaakhela nsurukhu wawaatta oxira ole kaakhelaka nteko aka wa khalai.” Masi Javier aanitthuna vawaatta orumeela nkhama piyoneeru. Owo onnitthikela olotta airaka: “Miyo kaahiitthaniwa wiira kikohakohiwe ni xerenti muulupale a elapo ele. Kihinaakuve opacera okohiwa kaahinvekela Yehova wiira akikhalihere okhupali wiira owo oodhuwela ele eri yooreera wa miyo. Miyo kaatthuna nteko wooreera waalivwa nsukukhu wawaatta, masi ohaaya okaapasa waakhwanihera dhoolukama dhaka dha omunepani.”

⁸ Javier onlotta wiira: “Okathi kaapakeliwa aka makoho, xerenti aahikileela wiira kikanvara nteko okathi wawaatta oxiri ole ananteko ootheene yaavekeliwa awa. Mwa nttittimiho, kaahaleela wiira nkarowa owerya ovara iwoora dhawaatta mwaha wa miteko dhikina dha omunepani.” Ndho Javier aahikhootta nteko ole. Noovira isumana piili, owo aahipacera orumeela nkhama piyoneeru. Noomala ovira miyeeri vakhaani, owo aahiphwanya nteko waavekela okathi vakhaani. Owo onlotta wiira: “Yehova ohaakhula mavekelo aka ni okikhalihera ophwanya nteko onkaakhuleliha okhala piyoneeru. Miyo kinnihakalala vawaatta mwaha woophwanya nteko onkikhalihera okhalana okathi wawaatta wiira kinrumeele Yehova vamodha ni anna ni arokora.”

9. Eseeni munhudha nnyu ni yawiiraneya ya Trésor?

⁹ Eseeni ninreerela nhu opaka akhala wiira ninoona wiira nteko nhu khonoonihera wiira nineettihiwa ni waamini? Nirowe nithokorerye yawiiraneya ya munna Trésor, yoowo onkhala oCongo. Owo onlotta wiira: “Miyo waanikidhivela vawaatta nteko kaavaraka. Okhala wiira khaanakhela nsurukhu wawaatta waaxira ivaara tthaaru ole kaakhela aka nteko aka wa khalai, ni atthu awaatta yaanikittittimiha.” Masi nteko owo, waanimwiiriha Trésor olova mithukumanoni, okhala wiira waavekela oviriha iwoora dhawaatta avaraka nteko. Ohiya-vo, aanikhanyereriwa wootha wiira atthu ehidhuwele itthu dhoohiloka dhaapakiwa ni emperesa. Trésor aahoona wiira aanireerela ohiya ovara nteko emperesa ele, masi aanoova ohiwerya ophwanya nteko nkina. Eseeni yaankhalihenre? Owo onlotta wiira: “Habakuki 3:17-19 okikhalihera wiiwasasa wiira hata kaaya ohiya ovara nteko ole, Yehova ankikhapelela akivahaka itthu dhaakithowa. Tivondho miyo, kahinvekela ohiya”. Owo ommaliha olotta airaka: “Atthu awaatta anvara nteko anoona wiira ntthu onaakhela nsurukhu wawaatta onoopaka itthu dhootheene onwerya iye wiira avare nteko owo, hata elo etaphulelaka orumeela okathi aaya iye oviriha ni emudhi-ye ni apakaka itthu dha omunepani. Miyo kinnihakala mwaha wa woona wiira koopaka etthu wiira kikhapelele waataana waka ni Yehova vamodha ni emudhi aka. Noovira mwaakha mmodha, Yehova aahikikhalihera ophwanya nteko wooreera onkikhalihera othuma itthu dhinkithowa ni onkiiriha okhalana okathi wawaatta wiira kinrumeela Yehova. Woonawene vaavo ninimphweha nhu Yehova opuro woopacera, pooti oniphwanya nxinkiho wa othoiwa nsurukhu. Masi okathi wootheene Yehova oninikhapelela.” Ndho akhala wiira ninoororomela miruku ni dhoolaihera dha Yehova, ninoopaka dhoothanla dhinoonihera wiira nineettihiwa ni waamini, noomala Yehova onoonireeliha.

VAAVO NININTHANLA NHU NTTHU OOTHELANO

10. Itthu seeni woonawene dhikhanle omwiiriha ntthu weettihiwa ni itthu dhinooneya vaavo oninthanla iye ntthu oothelano?

¹⁰ Ekasamentu yoovaha ya Yehova ni ephattu ntthu otthuna othela aahiidho otheliwa. Vaavo nrokora oninthala iye munna oothelanano, woonawene pooti ovarerya mikhalelo, ethoni, mweettelo, moopora onkhapelela iye nsurukhu, moopora atthu akina ammoonela awa, miritti oriiyena mweemudhini munna owo ni akhala wiira onnihakalaliha.b Ekhweeli wiira itthu idha ti dhootthuneya. Masi akhala wiira nrokora onvarerya dheidho pahi vaavo oninthanla munna oothelano, elo enoonihera wiira oneettihiwa ni itthu dhinooneya.

11. Eseeni munreerela nnyu opaka wiira moonihere wiira nneettihiwa ni waamini vaavo nninthanla nnyu ntthu oothelano? (1 aKorinto 7:39)

¹¹ Yehova onnihakalala vawaatta vaavo munna aahiidho nrokora ontthara iye miruku dhiri mbiibiliyani wiira anthanle ntthu oothelano! Mwa ntakihero, munna aahiidho nrokora owo onniiwelela miruku dha mbiibiliyani alipelelaka oviriha ‘iyaakha dha omiravo’ ehinatthi onthanla ole onreerela iye oothelano. (1 aKor. 7:36) Awo annoona akhala wiira ntthu an’ya awa othelano ookhalana mikhalelo Yehova onlotta iye wiira nlopwana aahiidho nthiyana akhalena. (Mir. 31:10-13, 26-28; aEefe. 5:33; 1 Tim. 5:8) Akhala wiira ntthu ohikhanle Namoona a Yehova onnoonihera oodhiveliwa naawo, awo anneettela miruku dhini: ‘Nthelane mwa Apwiya pahi,’ dhiri 1 aKorinto 7:39. (Munsome.) Nitho khanhiya woonihera wiira aneettihiwa ni waamini ni annikhupali wiira Yehova onawaavaha mmuupuweloni nikhalihero anramela awa.—Esal. 55:22.

12. Eseeni munhudha nnyu ni yawiiraneya ya Rosa?

¹² Nirowe nithokorerye yawiiraneya ya piyoneera mmodha a oColômbia, yoowo oniitthaniwa Rosa. Mwaha wa nteko aavara iye, aahivaanela vawaatta ni nlopwana mmodha ahaakhanle Namoona a Yehova, yoowo oonihere odhiveliwa nuuwo. Rosa aahidhiveliwa ni nlopwana owo. Owo onlotta wiira: “Owo aakhala nkhama nlopwana ooreera nrima. Owo anaakhalihera vawaatta atthu nttetthe-ye, aahikhalana mweettelo wooreera ni aanikithokorerya mwa enamuna yavameekhaaya. Owo aahikhalana mikhalelo dhooreera dheidho kaaramela aka wiira akhalena nlopwana aaya okithela, masi owo kaari Namoona a Yehova.” Owo onnitthikela olotta airaka: “Ndho khiyaari etthu yookhweya onleela wiira miyo nkaatthuna onamorari ni veene, okhala wiira muupuwelo aka waanitthuna. Okathi ole, miyo kaaniidhona okhala meekhaaka ni kaanitthuna otheliwa, masi nlelo kaaira kihimphwanye munna aatthuna okithela.” Hata eri dhiidho, Rosa khaahin’ye mwaha ole omwiirihaka opaka etthu yoohiloka ni weettihiwa ni itthu dhinooneya. Owo aahuupuwela moopora waataana-we ni Yehova waaya awa okhala aakhulenle onamorari ni nlopwana ole ahaari Namoona a Yehova. Ndho owo aahihiya olotta ni nlopwana ole moomalela ni aahiluttuweliwa ovara itthu dha omunepani. Noovira okathi vakhaani, owo aahilaleiwa orowela Eskola ya Anamalaleerya a Omwene ni neena-va owo onrumeela nkhama piyoneera avameekhaaya. Rosa onlotta wiira: “Yehova ookivaha mareeliho awaatta yaawo ankiiriha okhala oohakalala.” Ekhweeli wiira khonkhweya opaka itthu dhootheene Yehova onnivekela iye. Masi akhala wiira ninaweettihiwa ni waamini, ninawaakhela mareeliho awaatta.

VAAVO NINVAHIWA NHU MALAKIHERO NI NTTHENKESO WA YEHOVA

13. Eseeni ekhanle oniiriha weettihiwa ni itthu dhinooneya vaavo ninvahiwa nhu malakihero ni ntthenkeso?

¹³ Ivaara dhawaatta ninnaakhela malakihero ninvahiwa nhu ni ntthenkeso wa Yehova aannikhalihera onrumeela saana Yehova. Malakihero awo pooti ovahiwa ni asitokweene a mmulokoni, asitokweene a esirkwiitu, anna a ekomisau ya efiliyaali ni anna a Nikhuru Noolamulela. Masi ankhi akhala wiira khanniiwasasa nthowa niwiirinhe anna awo onivaha malakihero? Woonawene hiyo pooti opacera wuupuwelela mixankiho dhikhanle okhumiheriwa ni malakihero awo. Nitho elo pooti oniiriha olipela dhoovonya dha anna awo aanivaha malakihero.

14. Weettihiwa ni waamini on’ya onikhalihera dhai wiiwelela malakihero ninvahiwa nhu ni ntthenkeso? (aHeeberi 13:17)

¹⁴ Vaavo nineettihiwa ni waamini, ninoororomela wiira Yehova toneettiha ntthenkeso ni onnidhuwela makhalelo nhu. Opaka elo, enooniiriha wiiwelela malakihero ninvahiwa nhu mwawaakuveya ni moonelo wooreera. (Munsome aHeeberi 13:17.) Hiyo ninnidhuwela wiira vaavo niniiwelela nhu ninnikhalihera muloko okhala wawiiraana. (aEefe. 4:2, 3) Nnaamwi anna awo annivaha malakihero eri ohimalela, ninniroromela wiira Yehova onoonireeliha akhala wiira ninawiiwelela. (1 Sam. 15:22) Nitho ninnikhupali wiira Yehova onookocihera itthu dhootheene dhintthuneya okathi wooreerela.—Mik. 7:7.

15-16. Eseeni yaankhalihenre munna mmodha ohihiya weettihiwa ni waamini hata aakanyera malakihero aavahiwe iye? (Moone-tho efootu.)

¹⁵ Vano, nirowe nithokorerye yawiiraneya enoonihera mireerelo dhinkhumelela vaavo nineettihiwa nhu ni waamini ni niniwiiwelela malakihero ninvahiwa nhu ni ntthenkeso. Nnaamwi oPeru atthu awaatta enlottaka elottelo ya Espanhol, masi ahooleli a ittheko dhawaatta a nttetthe ole anlotta ilottelo dhooyareliwa nkhama Ekexuwa. Mwa iyaakha dhawaatta, anna ni arokora yaaniwaadhya atthu yaalotta elottelo ya Ekexuwa wiira yaalaleerye. Noovira okathi, yaahipaka marukunuso wiira yiiweleliwe malamulo a kuveernu voohima dha moopora wa waaphwanya atthu a elottelo ele. (Rom. 13:1) Mwaha wa elo, anna akina yaahipacera wiikoha akhala wiira marukunuso ale khiyarowa okhumihere nxankiho nteko woolaleerya nttetthe ole. Masi mwaha wa wiiwelela malakihero ale, yaahoona wiira Yehova aahireeliha wiilipihera-wa waalaleerya atthu a elottelo ya Ekexuwa.

¹⁶ Kevin, yoowo ori ntokweene a elottelo ya Ekexuwa aahiriipiwe nrima vawaatta vamodha ni atthu akina mwaha wa marukunuso ale. Owo olotta wiira: “Miyo kaaniikoha wiira: ‘Nin’ya owerya dhai waaphwanya atthu a elottelo ya Ekexuwa?’” Ndho, eseeni Kevin apanke iye? Owo onlotta wiira: “Miyo kaahuupuwela yawaatikhiwa ya Miruku 3:5 ni ntakihero Moise. Yehova aahaavaha malakihero aIsarayeeli yaakhala nkhama khiyaavareleya nteko. Owo aahinleela Moise wiira aakhumihe aIsarayeeli Weexiitu mpakha Nlima Nooseera, opuro yoowo waakhala nkhama khiyaare awerye woopowa mmatatani mwa atthu a Weexiitu. Masi hata eri dhiidho, awo yaahiiwelela, ni Yehova aahireeliha apakaka mwiiriirya wootikiniha wiira awoopole.” (Okhu. 14:1, 2, 9-11, 21, 22) Noomala Kevin aahipaka marukunuso wiira aiwelele malakihero ale a nteko woolaleerya. Ndho eseeni yaakhumelenle? Owo onlotta wiira: “Miyo kaahitikinihiwa noomala woona moopora Yehova aanireelinhe iye. Khalai naaniviriha okathi wawaatta nivaraka nteko woolaleerya, masi ivaara dhikina naamphwanya ntthu mmodha aahiidho atthu aili yaalotta Ekexuwa. Nenna ninnilaleerya nttetthe araawa atthu awaatta anlotta Ekexuwa. Ndho opaka elo, enninikhalihera ovaanela ni atthu awaatta, okhalana irevisiita ni dhoosoma dha Biibiliya dhawaatta. Ohiya-vo mwaattelo wa atthu anreela mithukumano dhihu ohaacerereya.” Voohaakanyera, vaavo nineettihiwa nhu ni waamini, Yehova onninireeliha vawaatta.

17. Eseeni nhundhe nnyu yoosoma ela?

¹⁷ Yoosoma ela, nihoona moopora nin’ya nhu ohihiya weettihiwa ni waamini, vaavo nimpaka nhu dhoothanla tthaaru dhootepa ootthuneya nithokorenrye nhu. Ndho ekumi nhu yootheene nihihiye weettihiwa ni waamini vaavo nimpaka nhu dhoothanla voohima dha maraarelo, okathi woomumula, osoma iskola dhuulupale ni moopora wa waahuwa anamwane. Khuta yoothanla nimpaka nhu mweekumini mwihu, nihaana oxaka opaka itthu nittharaka pahi itthu ninoona nhu. Masi nipake dhoothanla neettihiwaka ni waataana wihu ni Yehova, miruku onnivaha iye ni ele olaihenre iye wiira oninikhapelela. Napaka elo, ninoowerya ‘weetta ni ndhina na Yehova, Muluku nhu, mahiku ootheene.’ —Mik. 4:5.