Nhihiye Otthara Eprokaraama Nnyu ya Onsoma Biibiliya Khuta Nihiku

Niire ivaara dhikina mwaha wa waatteliwa miteko, onnooliperyani otthara eprokaraama nnyu ya onsoma Biibiliya khuta nihiku? (Yox. 1:8) Akhala wiira ti dhiidho, mweehererye otthara emodha wa ipontu idha dhinttharelana:

• Mpake etthu en’ya ekawuupuserani khuta nihiku. Mmwaativari alaarmi ntelefoonini mwinyu wiira akawuupuserani ewoora muntthuna nnyu onsoma Biibiliya.

• Nkampweha Biibiliya nnyu opuro munwerya nnyu omoona. Akhala wiira nninrumeela Biibiliya awimpirimiriwa, nkampweha opuro munwerya nnyu omoona khuta nihiku.—Otum. 11:18.

• Munwiriyane aaudiyu a Biibiliya ookaravariwa. Munwiriyane vaavo munvara nnyu miteko dhinyu. Piyoneera oniitthaniwa Tara yoowo ori maama ni onvara nteko ohiyu, olontte wiira: “Onwiriyana aaudiyu a Biibiliya ookaravariwa vaavo kinvara aka miteko dha vaate, onnikikhalihera ohihiya otthara eprokaraama aka ya onsoma Biibiliya khuta nihiku.”

• Nhihiye wiilipihera. Akhala wiira enookhumelela etthu mootutusera enwiirihani ohiwerya otthara eprokaraama nnyu, nsome iveersu vakhaani nhinaakuve orowa orupa. Hata iri vakhaani, opaka elo enawookhaliherani vawaatta.—1 Ped. 2:2.