Anna Awuuluvala—Nyuwo Mookhalana Efaita Yuulupale Mmulokoni
“Vaavo kinuupuwela aka ottuli, kinnihakalala ni itthu kaawerya aka opaka okathi kaari aka rapasi. Masi nenna kuuluvanle aka, nkinwerya opaka itthu nkhama khalai.”—Connie, orina iyaakha 83.
Woonawene ni nyuwo khamunwerya opaka itthu dhawaatta nkhama mwaaira nnyu khalai. Hata nvirinhe iyaakha dhawaatta munrumeelaka Yehova moororomeleya, nyuwo pooti opacera okhalana muupuwelo woohiloka mwaha wa makhalelo nnyu a naanaano. Mwa ntakihero, nyuwo pooti opacera olikanyiha itthu mumpaka nnyu nenna-va ni idhe mwaapaka nnyu khalai. Ndho akhala wiira elo enniiraneya ni nyuwo, eseeni munreerela nnyu opaka?
ELE YEHOVA ONOOVEKELAIYENI
Mwiikohe wiira: ‘Eseeni Yehova onlipelela iye wa miyo?’ Woonawene nyuwo nnoowerya ophwanya nimaaliho va Otumererya 6:5, yoowo oni: ‘Nkampheta Yehova Muluku nnyu ni nrima nnyu wootheene, ni ekumi nnyu yootheene ni ikuru dhinyu dhootheene.’
Yawaatikhiwa ela, ennoonihera wiira etthu Yehova ontthuna iye wiira mpake, ori wiilipihera onrumeela moovarihana ni makhalelo nnyu. Ekhweeli ela pooti wookhaliherani oxaka wiilikanyiha ni atthu akina aahiidho itthu munwerya nnyu ni mwaawerya nnyu opaka khalai.
Muupuwele ela: Okathi mwaari nnyu rapasi, itthu seeni mwaawerya nnyu opaka mmutekoni mwa Yehova? Arumeyi awaatta a Yehova yaawo yuuluvanle, anlotta wiira khalai yaanipaka itthu dhootheene yaawerya awa mmutekoni mwa Yehova. Elo yaari etthu mwaawerya nnyu opaka moovarihana ni makhalelo nnyu a khalai. Eseeni munreerela nnyu onvaha Yehova nenne-va? Masi nenna-va makhalelo nnyu arukununwe awa, woonawene munniilipihera opaka ele munwerya nnyu moovarihana ni makhalelo nnyu. Akhala wiira nnoopaka elo, nnawoona wiira itthu mwaampakela nnyu Yehova khalai ni idhe nnimpakela nnyu nenna-va, khaivirikanne. Khalai mwaapaka ele mwaawerya nnyu, ni nenna-va mumpaka ele munwerya nnyu moovarihana ni makhalelo nnyu.
Okathi mwaari nnyu rapasi, mwaampakela Yehova ele mwaawerya nnyu, ni nenna muuluvanle nnyu nnimpakela ele munwerya nnyu moovarihana ni makhalelo nnyu
NYUWO NNOOWERYA WAAKHALIHERA ATTHU AKINA
Ohiya wuupuwelela itthu nhinwerya nnyu opaka nenna-va, muupuwelele iparakha nrinnyuna dha waakhalihera atthu akina oreela wa dhawiiraneya dhinyu. Mweekhweeli, nkhama nkiristau awuuluvala, nyuwo pooti owerya opaka itthu dhikina dheidho mwaaya nnyu ohiwerya opaka okathi mwaari nnyu rapasi. Mwa ntakihero, nyuwo pooti weehererya opaka ela:
Waaleele atthu akina dhawiiraneya dhinyu. Nthokorerye moolumo ala yaatikhiwe mbiibiliyani anttharelana:
Mwene Davidi: ‘Miyo kaari rapasi, ndho vano kihuuluvala; masi nkitanke omoona naxariya anyanyaliwe; hata ane evekaka eyooca.’—Esal. 37:25.
Yooxuuwa: ‘Vano, miyo kihanle okhwa. Ndho nyuwo moodhuwela saaneene ni nrima nnyu wootheene ni ekumi nnyu yootheene, wiira itthu dhootheene dhooreera Yehova, Muluku nnyu, oolaihenreiyeni dhihaakhwanela. Mweekhweeli itthu dhootheene dhihaakhwanela. Khiyaavo hata etthu emodha ehaakhwanenle.’—Yox. 23:14.
Woonawene ni nyuwo mwaataka olotta moolumo nkhama awo. Davidi ni Yooxuuwa yaalontte dhawiiraneya dha mweekumini-mwa. Ndho okhala wiira arumeyi ala oororomeleya a Yehova yaalontte itthu yoone awa ni yaaiwale awa mwa iyaakha dhawaatta, moolumo-ya yaanwerya waakhalihera atthu akina.
Ni nyuwo-tho akhala wiira mpacenre khalai onrumeela Yehova, pooti olotta dhawiiraneya dhinyu ni mareeliho mphwannye nnyu. Niire nyuwo munnuupuwela okathi woohakalaliha Yehova aareelinhe iye arumeyi-ye? Nyuwo pooti ottottela nreerelo eparakha elo wiira mwaaleele atthu akina ele Yehova aapanke iye okathi owo! Elo pooti okhumihera mireerelo dhawaatta nhuupuwela nnyu. Ndho nyuwo pooti waalipiha anna ni arokora vaavo nnaaleela nnyu dhawiiraneya dhinyu.—aRoma 1:11, 12.
Enamuna ekina ya waalipiha anna ni arokora ori orowela mithukumano Empa ya Omwene, vaaweryaneyaka. Mwapaka elo, nnoowerya olipihiwa ni waalipiha anna ni arokora. Connie yoowo ninlontte nhu ottuli, onlotta wiira: “Orowela mithukumano Empa ya Omwene, onnikikhalihera oxaka oriipiwa nrima. Elo enniweryaneya okhala wiira vaavo kinkhalaka vamodha ni anna ni arokora, awo annikoonihera opheta wuulupale. Ndho kinneehererya woonihera waaxukhurela kaavahaka ipresenti ikhaani. Ni miyo kinniilipihera ovara miteko dha omunepani vamodha ni anna ni arokora.”
YEHOVA ONNIVAHA EFAITA NTEKO NNINVARELA NNYU MOOROROMELEYA
Mbiibiliyani aakhalamo matakihero awaatta a atthu yaawo makhalelo-ya yahaawaakhuleliha opaka itthu nkhama khalai, masi yaaphetiwa ni Yehova. Moone ntakihero na mwiisarayeeli mmodha awuuluvala yoowo aaitthaniwa Simeyooni aakhanle mpakha oyariwa wa Yeesu. Woonawene okathi aarowa iye osekurya otempulu, aaniwoona marapasi ekhapelelaka miteko dhootepa otthuneya. Ndho Simeyooni oonela dhai? Woonawene Simeyooni uupuwela wiira kharina efaita vamithoni va Yehova mwaha wa ohiwerya onrumeela Yehova nkhama khalai. Masi moonelo wa Yehova waari woovirikana. Yehova aanimoona owo okhala ‘naxariya ni nrumeyi-ye oororomeleya,’ ndho mwaha wa elo, aahinreeliha anvahaka eparakha ya omoona Yeesu ari mwaana. Nitho Yehova aahinrumeela Simeyooni wiira alotte eprofesiiya voohima dha mwaana owo wiira aankhala Mesiya nhoolo! (Luka 2:25-35) Onnooneya wiira Yehova khaamoona Simeyooni nkhama ntthu awuuluvala, masi ntthu aarina waamini woolipa ni eettihiwa ni ‘munepa wawaarya.’
Yehova aahinreeliha Simeyooni anvahaka eparakha ya omoona Yeesu ari mwaana ni olotta eprofesiiya ya wiira owo aankhala Mesiya nhoolo
Ni nyuwo nkhupali wiira Yehova onnivaha efaita yuulupale nteko nninvarela nnyu moororomeleya moovarihana ni makhalelo nnyu. Okhala wiira etthu eri yootepa otthuneya vamaithoni va Yehova, ‘onvaha ele ninwerya nhu, ohiya ele nihinwerya nhu.’—2 aKor. 8:12.
Ndho nkahakalala ni ele munwerya nnyu opaka. Mwa ntakihero, inamuna seeni dha nteko woolaleerya nkhanle nnyu orumeela hata okhalaka okathi vakhaani? Ohiya-vo, niire mwaanwerya waalikarela anna ni arokora aahiidho owaatikela iwarakha wiira mwaalipihe? Mweekhweeli opaka itthu idho inoonihera opheta, inawaakhalihera vawaatta anna ni arokora saasaasa vaavo andhuwela awa wiira ipakiwe ni atthu apacenre khalai onrumeela Yehova moororomeleya nkhama nyuwo.
Atthu akina khanwerya opaka itthu dhikina mwaha wa makhalelo-ya. Moone yawiiraneya emodha ya wÁfrica Oriental eri ekwaaturu eni: “Aahoona Wiira Ekumi-ye Yookhalana Yoolakela.”
Nhiliyale wiira ntakihero ninyu na onrumeela Yehova moororomeleya mwa iyaakha dhawaatta, nnoowerya waalipiha atthu akina. Nyuwo mwa ntakihero nuuupale na ovilela. Ndho mwaha wa elo, nkhupali wiira ‘Muluku naxariya, owo khanre aliyale nteko nnyu ni opheta winyu ndhina-ne ni ohihiya winyu waarumeela ale oororomeleya.’—aHeb. 6:10.
NHIHIYE WIILIPIHERA WAAKHALIHERA ATTHU AKINA
Asomi anlotta wiira atthu awaatta awuuluvala aniilipihera waakhalihera atthu akina, annikhalana ekumi yooreera, annuupuwela saana ni annikhala okathi wawaatta.
Ekhweeli wiira opaka itthu dhooreera khommaliha wuuluvala. Omwene wa Muluku pahi ton’ya owerya omaliha nthowa ninniiriha wuuluvala ni okhwa, ori ohimalela niravihiwe nhu.—aRoma 5:12.
Masi hata eri dhiidho, nteko nninvarela nnyu Yehova ohela mpuwa waakhalihera atthu akina wiira endhuwele, onoowerya olipiha nlipelelo ninyu ni pooti okhalihera ekumi nnyu. Anna ni arokora awuuluvala, ndhuwele wiira Yehova onnivaha efaita nteko nninvarela nnyu, ni anna ni arokora a muloko nnyu annixukhurela mwaha wa ntakihero ninyu na waamini.