კორინთელეფშა მეჭარილ პირველ წერილ

7 ასე თიშა გინიბლენქ, მუდგაშ გურშენ თქვა მოპჭარით: კოჩშო უჯგუშ რე, ვემიჸუნას ოსურ დო ვა უღუდას სექსუალურ ურთიერთობა*; 2 მარა, რახანს უზნეობა* ირდიხას რე მოდვალირ, თითოეულ კოჩის ჸუნდას მუშ ოსურ დო თითოეულ ოსურკოჩის ჸუნდას მუშ ქომონჯ. 3 ქომონჯიქ ოკო შეასრულას მუშ მოვალეობა* ოსურწკუმა დო ოსურქ ხოლო ოკო შეასრულას მუშ მოვალეობა ქომონჯწკუმა. 4 ოსურს სრულას მეტო ვაკუთვნ მუშ სხეულ, თინა მუშ ქომონჯის ოკუთვნ; ვართ ქომონჯის ოკუთვნ მუშ სხეულ სრულას, თინა მუშ ოსურს ოკუთვნ. 5 ათეშენ ვარია ვა უწუათ ართიანს თეშე, მარა იშენდოიშენ-და, შეილებუნა ვარიაშ რაგად, ნამდა ლოცვას გეგმურთათ დრო, ოღონც მუჟამსით თეს ჟირხოლო ქიმირაგადუანთ, მარა ხვალე ჭიჭე ხანით. თეშ უკულ კინ ართიანს დართით, მუშენდა შილებე დუდშეკებაქ ვაიბაღან დო სატანაქ მიგოჩილითუან. 6 თე ირფელ თიშენ გიწით, ნამდა გიჩქუდან, მუშ კეთებაშ ნება გიღუნა, მარა თენა კანონ ვა რე. 7 მა მისხუნ, ჩქიმცალო მითინქ ვედექორწინას, მარა არძას მუშ-მუშ ძღვინ უღჷ ღორონთშე: ნამთინეს თენა, ნამთინეს თინა.

8 დაუქორწინებელეფს დო ქომონჯღურელ ოსურკათას ურაგადუქ, ნამდა თინეფშო უჯგუშ იჸუაფ, ჩქიმცალო ქუდოსქიდან, 9 მარა, დუდშეკება ვა უბაღუნან-და, დექორწინან, მუშენდა უჯგუშ რე დექორწინან, ვინემ სექსუალურ სურვილეფს ეიაჸუნან.

10 დაქორწინებულეფს ურაგადუქ, მარა მა ვარინ, უფალ, ნამდა ოსურქ ვეჩეთხუას ქომონჯის, 11 მარა, ჩეთხიებუნ-და, ვეგეთხუას, ვარდა ქომონჯის დართას; ქომონჯიქ ხოლო ვეჩეთხუას მუშ ოსურს.

12 მარა შხვეფს უფალ ვარინ, მა ურაგადუქ: ჯიმას ურწმუნო ოსურ ქოჸუნს, მარა თინა თიწკუმა ცხოვრებაშენ ვარიას ვეჩიებუნ-და, ოკო ვეჩეთხუას მუშ ოსურს; 13 ოსურს ქოჸუნს ურწმუნო ქომონჯ დო თინა თიწკუმა ცხოვრებაშენ ვარიას ვეჩიებუნ-და, თიქ ხოლო ოკო ვეჩეთხუას მუშ ქომონჯის, 14 მუშენდა ურწმუნო ქომონჯ მუშ მორწმუნე ოსურიშ საშვალებათ მიღენს ხვამას* დო ურწმუნო ოსურ — მორწმუნე ქომონჯიშ საშვალებათ; თაშ ვა რდასინ, თინეფიშ ბაღანეფ ვემიღენდეს ხვამას, მარა ასე ღებულენა*. 15 ურწმუნო მეუღლეს ჩათხია ქაკონ-და, ჩეთხუას; თეცალ დროს ჯიმა ვარდა და ვალდებულ ვა რე, თიწკუმა დოსქიდას, მუშენდა ღორონთ მშვიდობაშა ელაიჩანა. 16 მუ გიჩქჷ სი, ოსურ, ეგება ირსხე სქან ქომონჯ?! ვარდა მუ გიჩქჷ სი, ქომონჯ, ეგება ირსხე სქან ოსურ?!

17 თაშ ნამდა, თითოეულქ თეშ გაგრძელას ცხოვრება, მუჭოთ თიმწკუმა რდჷ, მუჟამსით იეჰოვაქ გიშეგორ. თე მითითებას არძა კრებას ვარზენქ. 18 ღორონთიქ წინადაცვეთილ კოჩ გეგშეგორ-და, ვეგნირთას წინადაუცვეთელო, დო, წინადაუცვეთელ გეგშეგორ-და, ვეგნირთას წინადაცვეთილო. 19 ვართ წინადაცვეთა ნიშნენს მუთუნს დო ვართ წინადაუცვეთელობა; მთავარ ღორონთიშ კანონეფიშ მეჸუნა რე. 20 თითოეულქ თეშ ქუდოსქიდას, მუნერით თიმწკუმა რდჷ, მუჟამსით ღორონთიქ გიშეგორ. 21 ღორონთიქ გიშარგორუნ თიმწკუმა, მონა ქორდ-და, თეშე ვენერვიანა, მარა, გათავისფალებაშ საშვალება ქუმგაჩამუნ-და, გეგმირინე თინა. 22 არძა, მით მონა რდჷ, მუჟამსით უფალიშ მოწაფეთ იჸუ გიშაგორილქ, უფალიშ თავისფალ მსახურო გინმირთუ, დო, არძა, მით თავისფალ რდჷ, მუჟამსით მოწაფეთ იჸუ გიშაგორილქ, ქრისტეშ მონათ გინმირთუ. 23 დიდ ფასშა რეთჷ ნაჸიდერ, ათეშენ მეტო ვეგნირთათ კოჩიშ მონეფო. 24 ჯიმალეფ, თეშ ქუდოსქიდით, მუჭოთ თიმწკუმა რდითჷ, მუჟამსით ღორონთიქ გიშარგორეს.

25 დაუქორწინებელეფშო* მუთუნ მითითება ვემემღებ უფალშე, მარა ქოფთქუანქ ჩქიმ აზრის, ართგურ კოჩიშ აზრის, მით უფალქ იჭყოლოფუ. 26 ასე თიცალ დრო რე, ნამდა ქოუჯგ, კოჩიქ შურო ვედექორწინას. 27 ოსურამ ქორექ-და, ვეფიქრა თიწკუმა ჩათხიაშე, დო, უოსურე ქორექ-და, ვეფიქრა ოსურიშ მოჸუნაფაშე. 28 მარა, დექორწინებუქ-და, თენა ცოდათ ვა გათვალუ; დაუქორწინებელქ დაქორწინება გინოჭყვიდ-და, თენა ცოდათ ვათვალუ, მარა თეცალეფს მეტ ოწუხებელ აღვენუნა. მა თის ვოცადუქ, ნამდა ეგოჩილითუათ თეცალ პრობლემეფ.

29 ჯიმალეფ, ხვალე თენა ვარინ, გირაგადუთ, ბრელ დროქ ვა დოსქიდ. ათეშენ ამდღარშე ოსურამეფქ უოსურეეფცალო იცხოვრან, 30 ინგარან თინეფქ — ვენგარან თინეფცალო, ოხიოლუნან თინეფქ — ვახიოლუნან თინეფცალო, ჸიდულენან თინეფქ — მუჭოთ მუთუნ ვაპალუნან თინეფცალო 31 დო თე უბადო ქიანაშე სარგებელს ღებულენან თინეფქ — თინეფცალო, მით სრულაშე ვა ღებულენა თიშე სარგებელს, მუშენდა თე ქიანაშ სცენა ითირუ. 32 მა მოკო, ნამდა ზედმეტ ოწუხებელ ვაიღუდან. დაუქორწინებელ კოჩ თიშე ფიქრენს, მუთ უფალს ოკო, მუშენდა უფალს მოუჰამუას, 33 მარა დაქორწინებულ კოჩ ირდღაშიან ოწუხებელშე ფიქრენს, მუშენდა ოკო, მუშ ოსურს მოუჰამუას; 34 თის ქოთ ართშე აფჷ ოფიქრებელ დო ქოთ მაჟიაშე. თეშნერო ოსურკოჩ, მიდგას ქომონჯ ვა ჸუნსჷ ვარდა დღას ვა ჸოფე გათხილ, უფალიშ საქმეეფშე ფიქრენს, მუშენდა წმინდა რდასჷ სხეულით დო აზრეფით*, მარა გათხილ ოსურკოჩ ირდღაშიან ოწუხებელშე ფიქრენს, მუშენდა ოკო, მუშ ქომონჯის მოუჰამუას. 35 თეს თქვან საჯგირობუოთ გირაგადუთ, თიშენ ვარ, ნამდა მუდგაინ უფლებეფ მიდაიღათ, თიშენ ნამდა, თეშ იცხოვრათ, მუჭოთ დუგოსქვანა დო უფალიშ მსახურებას მუთუნქ ვეგეცილან.

36 დაუქორწინებელ ქარწყე, ნამდა ვეშულებ სექსუალურ სურვილეფიშ კონტროლ დო ნაბეტან ახალგაზრდა ხოლო ვა რენ-და*, შეულებ დექორწინას, ვეშეცოდენს. 37 მარა, მით ვარწყე დაქორწინებაშ საჭიროებას, შეულებ დუდიშ კონტროლ დო გურს მტკიცას აფჷ გინოჭყვიდილ, ვედექორწინას, ჯგირო იქციებ. 38 თაშ ნამდა, მით იქორწინებ, ჯგირო იქციებ, მარა მით ვექორწინებ — უჯგუშო.

39 ღორონთიშ კანონით ოსურქ შხვაშა ოკო ვედექორწინას ონდო მუშ ქომონჯ ცოცხალ რე, მარა, ქომონჯიქ დოუღურ-და, ოსურ თავისფალ რე დო შეულებ, მის ოკონ თის აჸუნას, ოღონც მიდგას აჸუნუ, უფალიშ მსახურ ოკო რდასჷ. 40 მარა, ჩქიმ აზრით, ვეგეთხუაფუნ-და, უმოს ბედნერ იჸუაფ. ბჯერსჷ, ნამდა ღორონთიშ წმინდა შურ* ფხელმძღვანელენს.