კორინთელეფშა მეჭარილ პირველ წერილ

8 ასე კერპეფშა შეწირულიშ გურშენ რჭარუნთ: მუშო ოკო რაგად, თეშ გურშენ მუდგარენ რჩქინა არძას მიღუნა; რჩქინა ამაყო გინაშქვანს, მარა ჸოროფა გურშა ელუკინანს. 2 მითინ თე საკითხშე ირფელ მიჩქუნია, ქოფიქრენს-და, თის დიო ხოლო ვა უჩქჷ ირფელ. 3 მიდგას ღორონთ უჸორს, თის ღორონთ იჩინენს.

4 შემლებუნანო კერპეფშა შეწირულიშ ჭკუმუა? ჩქი მიჩქუნა, ნამდა კერპ მუთუნ ვა რე დო სინამდვილეს ღორონთ ართ რე. 5 მარა რენა ითამ ღორონთეფ ქოთ ცას დო ქოთ დიხას, მუშენდა ხალხის მიორჩქ, ნამდა რე ბრელ „ღორონთ“ დო ბრელ „უფალ“. 6 ჩქი მიჩქუნა, ნამდა რე ხვალე ართ ღორონთ, მუმა, თიქ გაჭყჷ ირფელ დო ჩქი ხოლო თიშო ფცოცხლენთ, დო რე ართ უფალ, იესო ქრისტე, ნამდგაშ საშვალებათ რე ირფელ დო ჩქი ხოლო თიშ საშვალებათ ვორეთ.

7 მარა თენა არძას ვა უჩქჷ. ადრე ნამთინე კერპთაყვანიშმცემელ რდჷ დო მუჟამსით კერპეფშა შეწირულს ჭკუმუნს თენა კერპთაყვანიშმცემლობას მონაწილებათ მიორჩქ დო მუშ სუსტ სინდის ბრალს გედვანს. 8 მარა ოჭკუმალ ვემმეხვარებუნა, უჯგუშ ურთიერთობა მიღუდან ღორონთწკუმა. ვა პჭკუმუნთ-და, თეთ მუთუნ ვა მოკორდუნა, დო, ქოპჭკუმუნთ-და, მუთუნ ვა მაძინუნა. 9 მარა კურცხას რდათჷ, ნამდა თქვან უფლებაქ ეკახაბარკალ ქუაცალქ ვეჸუას თინეფშო, მიდგას სუსტ სინდის უღჷ. 10 მართალ რე, სი გიჩქჷ, ნამდა კერპეფ მუთუნ ვა რე, მარა სუსტ სინდის უღუნ თიქ, კერპეფიშ ტაძარს ოჭკუმალს ჭკუმუნქინ თეშ ქორძირ-და, შილებე თიქ ხოლო ოჭკუმას კერპეფშა შეწირულ დო თეშნერო მუშ სინდისიშ წინააღმდეგ მიდართას. 11 სი ქოიჩქ, ნამდა თეცალ ოჭკუმალიშ ჭკუმუათ მუთუნს ვაშენქ, მარა თეთ სუსტ სინდის უღუნ თის რწმენას ეკმურღვანქ. რშუდას, ნამდა თინა სქან ჯიმა რე, ნამდგაშ გურშენ ქრისტექ ღურჷ. 12 მუჟამსით თეშნერო სქან ჯიმაშ წინააღმდეგ ცოდენქ დო თიშ სუსტ სინდისის ოცილუქ, თეთ ქრისტეშ წინააღმდეგ ცოდენქ. 13 ათეშენ ჩქიმ ჯიმაშ რწმენას ოჭკუმალ ქაცილუნ-და, შურო ვა პჭკუმუნქ ხორცის. ვარიას იფჩიებუქ თი ირფელიშ კეთებაშე, მუთ ჩქიმ ჯიმაშ რწმენას ეცილებ.