მათე

24 მუჟამსით იესო ტაძარშე გიმიშ, მოწაფეეფქ ქიმერთეს თიშა დო უწუეს, ქიდეკვირუკო ტაძარიშ შენობეფს. 2 თიმწკუმა თიქ უწუ: „ხომ ქარწყეთ თე ირფელს?! დამჯერით: ირფელ აკოცენს, ქუა ქუას ვეგესქიდუ“.

3 მუჟამსით იესო ზეთისხილიშ გვალას ხედჷ, მოწაფეეფქ ცალკე ქიმერთეს თიშა დო კითხეს: „ქომწით, მუჟამ მოხვადუ თენა დო მუ იჸუაფ თიშ ნიშან, ნამდა მოულირ* რექჷ დო თე ქიანაშ* ბოლოქ ქუდოდირთჷ?“

4 იესოქ თინეფს უპასუხ: „კურცხას რდათჷ, ნამდა მითინქ ვემგოჩილითუან, 5 მუშენდა ბრელ ქუმურს ჩქიმ სახელით დო თქუანს, ქრისტე ვორექია, დო ბრელს მიოჩილითუანს. 6 ქიგეგენთ ომეფიშ ხონარს დო ქიმირჩქილუანთ ამბეეფს ომეფიშ გურშენ. ვა დოშქურდათ, თე ირფელქ ოკო მოხვადას, მარა თენა დიო ხოლო ვა რე თე ქიანაშ ბოლო.

7 ერ ერს გეგნენტერებ დო სამეფო სამეფოს, იჸუაფ ოჭკუმალიშ სინაკლებე დო დიხანწალუეფ, მინ ართ დო მინ მაჟია ადგილს. 8 თე ირფელ მშობიარობაშ ჭუეფიშ დაჭყაფ რე.

9 თიმწკუმა თხოზინს ქუდოიჭყანა დო დორჸვილუნა; არძა ხალხ გოიჯოგუანა ჩქიმ სახელიშ გურშენ. 10 თიმ დროს ბრელ მიოდინუანს რწმენას. ართიანს გიჯოგუანა დო ნტერეფს ქაშუჸოთანა ხეშა. 11 ბრელ ტყურა წინასწარმეტყველ გემკორჩქინდუ დო ბრელს მიოჩილითუანს. 12 უკანონობაშ* მოძინაშ გურშენ ხალხიშ უმენტაშის ჸოროფა მეუდინუ, 13 მარა მით ბოლოშახ მითვინენს, გინოსქიდუ. 14 იქადაგენა სახიოლო ამბეს სამეფოშ გურშენ მთელ მსოფლიოს, ნამდა არძაქ ქიმირჩქილუას* დო თიმწკუმა ქუდოდირთუ თე ქიანაშ ბოლო.

15 მუჟამსით ქოძირუნთ დანიელიშ ნაწინასწარმეტყველებ საზიზღარ მუდგარენს, ნამუთ წმინდა ადგილს გერე დო ირფელს ჯალაგანს (მით თეს კითხულენს, გურ ქუგუჩას), 16 იუდეას იჸუაფუნან თინეფქ გვალეფშა ინტან, 17 ჸუდეს გიმეჸინ* თიქ მუთუნიშ ეიოჭოფშა ვემნორთას დინახალე 18 დო ვართ ჸვანას მუშენსინ თიქ დირთას ჸუდეშა გინაქუნალიშ ეიოჭოფშა. 19 ორსულეფიშ დო თი დიდალეფიშ ცოდა, მიდგას თიმ დროს თოთო ბაღანეფ აჸვენუნა*! 20 ილოცით, ნამდა ზოთონჯის ვარდა საბატონს ვა გაჸუან ონტებელქ, 21 მუშენდა თიმწკუმა თიცალ დიდ გაჭირება იჸუაფ, მუნერით ვა ჸოფე ქიანაშ დაჭყაფშე ამდღარშახ დო ვართ უკულ იჸუაფ. 22 თი დღალეფს ვა მაკორდუნ-და, კოჩ დოძახებულ ვეგნოსქიდუ, მარა გიშაგორილეფიშ გურშენ მაკორდუ თი დღალეფს.

23 თიმწკუმა ქრისტე ამარ რე ვარდა ემერ რენია, მითინქ ქოიწუეს-და, ვედეჯერათ, 24 მუშენდა გამკორჩქინდუნა ტყურა ქრისტეეფ დო ტყურა წინასწარმეტყველეფ, მით მერეთ დო გასაკვირ საქმეეფს გაკეთენა, ნამდა, ქეშიალებუეს-და, გიშაგორილეფ ხოლო მიოჩილითუან. 25 წინასწარ ქოიწით თე ირფელ. 26 ათეშენ, ამარ, უდაბნოს რენია თინა, მითინქ ქოიწუეს-და, გიჩქუდან, ვედათ თექ; ვარდა ჸუდეს რენია, ქოიწუეს-და, გიჩქუდან, ვედეჯერათ. 27 მუჭოთ გოვალუაშ დროს ბჟაეიოლშე ბჟადინოლშახ სინთანს, თაშ იჸუაფ თიმწკუმა, მუჟამსით კოჩიშ სქუა ქუმურს. 28 სოდეთ ნძორ რე, არწივეფ ხოლო თექ დიშაყარუნა.

29 გაჭირებაშ დღალეფ მიკილენსინ ხეთეშე, ჩხანა დეუკმელებ დო თუთა მეტო ვა გოსინთანს, ცაშე მურიცხეფ გეგთოცენს დო ზეციურ ძალეფ ქიდიზარზალუანს. 30 თიმწკუმა ცას გემკორჩქინდუ კოჩიშ სქუაშ ნიშან დო დედამიწაშ არძა ტომ წუხებათ კიდირშა მინჭანს ლიკვის; ქოძირუნა კოჩიშ სქუას, ნამუთ ცაშ მუნაფეფს დიდ ძალათ დო დიდებულებათ მიშას იჸი. 31 თინა საყვირიშ დიდ ხონარიშ გოსიმაფა დო ხეთეშე, მუშ ანგელოზეფს მიდაშქვანს დო თინეფ გეკოშაყარანა მუშ გიშაგორილეფს დედამიწაშ ოთხხოლო კუნთხუშე დო ცაშ კუნთხუეფშე.

32 ქიდეკვირით ლუღიშ ჯას დო ქიდიგურეთ: მუჟამსით ახალ ნოჸელეფ მიკუღ დო ფალუნს, გიჩქუნა, ნამდა ზაფხულ მონჭაფილ რე. 33 თქვა ხოლო, მუჟამსით ქოძირუნთ თე ირფელს, გიჩქუდან, ნამდა კოჩიშ სქუაშ მოულა მონჭაფილ რე*. 34 დამჯერით: თე თაობა ვა ღურუ, ონდო თე ირფელ ვა მოხვადუ. 35 ცა დო დიხა მისპუ, მარა ჩქიმ სიტყვეფ ვეშესრულასინ თეშ ვა დოსქიდუ.

36 მუმაშ მეტ მითინს ვა უჩქჷ, მუჟამ დოდირთუ თი დღა დო საათ — ვართ ზეცას ანგელოზეფს დო ვართ სქუას. 37 მუჭოთ ნოეშ დროს რდჷ, თეშ იჸუაფ თიმწკუმა ხოლო, მუჟამსით კოჩიშ სქუა ქუმურს. 38 მუჭოთ დიდწყარალაშ მოულაშახ ჭკუმუნდეს, შუნდეს, ოსურ მოჸუნდეს დო ითხუაფუდეს თი დღაშახ, სოიშახ ნოე კიდობანშა მინიშ, 39 დო მუთუნ ვანარღუდეს, ონდო დიდწყარალაქ ვა მორთჷ დო არძა ვა მოსპჷ, თაშ იჸუაფ თიმწკუმა ხოლო, მუჟამსით კოჩიშ სქუა ქუმურს. 40 თიმწკუმა ჟირ კოჩ იჸუაფ ჸვანას: ართის მიდეჸუნანა დო მაჟიას ქიდიტენა; 41 ჟირ ოსურკოჩ ქუნდას იჸი ხეშ სქიბუთ: ართის მიდეჸუნანა დო მაჟიას ქიდიტენა. 42 ათეშენ კურცხას რდათჷ, მუშენდა ვაიჩქუნა, ნამ დღას მოურს თქვან უფალ.

43 ართ მუდგარენ გიჩქუდან: ჸუდეშ მინჯეს ქარჩქინას, მახირალ სერით ნამ საათის* მოურსუნ, კურცხას იჸუაფ დო ჸუდეს ვა გატახაფუანს. 44 ათეშენ ირიათო მზათ რდათჷ, მუშენდა შურო ველუთინ თი დროს* ქუმურს კოჩიშ სქუა.

45 მი რე ართგურ დო გონიერ მონა, ნამდგას ბატონქ დავალ, მუშ დროს ქიმეჩას ოჭკუმალ მუშ მსახურეფს? 46 ბედნერ რე მონა, ნამდგას ბატონ დუნორთის დავალებურ საქმეს ორთუნ თეშ ძირუნს! 47 დამჯერით: მთელ მუშ ქონებას თის ჩაბარენს.

48 მარა, თე მონა უბადო ქორე დო გურს ქოთქუანს, ჩქიმ ბატონ იგვიანუანსია, 49 დო შხვა მონეფიშ ლახუას დო შუმილიეფწკუმა შუმა-ჭკუმუას ქიდიჭყანს-და, 50 თიშ ბატონ, ზუსტას თი დღას დო თი საათის ქუმურს, მუჟამსით შურო ველჷ, 51 ვა ზოგენსინ თეშ დასაჯენს დო თინეფწკუმა ქიმურჩქინანს ადგილს, მიდგას დუდ წმინდეფო მოუღუნა. თექ ქიდიჭყანს თინა ნგარას დო კიბირიშ ჭკირჭკინს“.