პირველ თესალონიკელეფ

3 რახანს შურ მოლუდეს თქვან ამბეშ გაგებაშა, იფიფქრით, ნამდა ათენს დოსქილადა უჯგუშ იჸუაფუდ. 2 ათეშენ თქვანდა მიდვაშქვით ტიმოთე, ჩქინ ჯიმა, ღორონთიშ მსახურ, ქრისტეშ გურშენ სახიოლო ამბეშ გუმაცხადებელ, ნამდა გუგამანგარესკო დო გურშა ეიქექუესკო თქვან რწმენაშ საჯგირობუოთ, 3 მუშენდა თე ოწუხებელეფქ მითინიშ რწმენას ვეცილკო. თეცალ ოტანჯებელეფშა დუდ ვემაჩილითენა, თენა თქვა ხოლო გვალო ჯგირო გიჩქუნა. 4 თქვანწკუმა ვორდითინ, წინასწარ გირაგადუდით, ნამდა ოტანჯებელ მაჸიდეს დო, მუჭოთ გიჩქუნა, ქოთ თაშ ქუმოხვად. 5 ათეშენ თქვანდა ტიმოთე გოუტე, ნამდა ამბე ქუმომიღუკო, ქორდით დო ვარ ართგურეფ. შურ მოლუდ თქვან ამბეშ გაგებაშა, მუშენდა მოშქურუდ, ეშმაკიქ ხომ ვემიოჩილითუ დო ხანდაქ წყარშა ხომ ვენომცუეს-მაქ.

6 ტიმოთექ ამარდე დირთჷ თქვანდე დო ჯგირ ამბე მიღჷ თქვან ართგურობაშ დო ჸოროფაშ გურშენ, ნამდა ირიათო ჸოროფათ მიშინანთ დო მუჭოთ ჩქი მოლუნა შურ თქვან ძირაფაშა, თეშ თქვა ხოლო შურ გოლუნა ჩქინ ძირაფაშა. 7 ათეშენ, ჯიმალეფ, მართალ რე, ბრელ მუთუნ მორკუნა დო გაჭირება მიღუნა, მარა თქვან გიმორჩქინელ ართგურობაშ გურშენ ამბეშ გაგებაქ გურშა ემქექუეს. 8 რახანს ქიგებგით, მუნერ მტკიცას გერეთ უფალიშ საქმეს, შურქ მუმადგეს, 9 ბოლოშა ვეგმმახანტენა ღორონთწკუმა ჩქინ მარდულობა თი ხიოლშენ, ნამუთ ღორონთიშ წოხოლე თქვანიშ გურშენ მიღუნა! 10 ამდღა დო ამსერ შურ დო გურით ვოხვეწუთ ღორონთის, ნამდა ქორძირათ დო ქიმგეხვარათ რწმენაშ გამანგარებას.

11 ბლოცულენთ, ნამდა ღორონთიქ, ჩქინ მუმაქ, დო უფალ იესოქ გომინწყან შარა თქვანდა მაულარო! 12 თიშე ხოლო ბლოცულენთ, ნამდა უფალქ გურ ეიფშან ართიანიშ დო შხვეფიშ ჸოროფათ, მუჭოთ ჩქი მაფუნა გურ ეფშა თქვან ჸოროფათ, 13 მუშენდა ჩქინ ღორონთიშ დო მუმაშ წოხოლე თქვან გურეფ რდასჷ მტკიცე, წმინდა დო ბრალ ვეგეძუნ ფერ, მუჟამსით ჩქინ უფალ იესო ქუმურს* მუშ არძა წმინდაწკუმა* ართო.