მაჟია კორინთელეფ
11 ნოტე, ქუგურზუდათ ჩქიმ ჭიჭე უჭკუეობას! მარა, ეშ, ქოთ ქოურზუთ. 2 მა თქვან დუდ დევეპირ საქომონჯოს, ქრისტეს, დო მოკო, თქვან დუდ გინოფჩე მუჭოთ წმინდა ცირასქუა. ათეშენ რე რთხილანთინ, მუჭოთ ღორონთ რთხილანა. 3 მარა მოშქურ, თქვა ხოლო თიქ ვა გაღოლან, მუდგაქ ევას აღოლ, ნამუთ გვერქ მუშ მაზაკვალობათ მიოჩილითუ; თქვან გონებაქ ხოლო ვეგლელას დო ვემიოდინუათ ართგურობა დო სიწმინდე, მუშენდა ქრისტეშ მიმაჸუნალ ართგურ დო წმინდა ოკო რდასჷ. 4 თეს თიშენ გირაგადუთ, ნამდა, ხეთეშე ღებულენთ თიცალ კოჩის, მით თქვანდა მოურს დო იესოშ გურშენ ჩქი გოგურეთინ თის ვარინ, შხვას გოგურუანა, ვარდა დუდშე მირჩქილეთინ თი სახიოლო ამბეს ვარინ, შხვა სახიოლო ამბეს გიქადაგენა, ვარდა დუდშე მიღითინ თი ძალაშ* მანგიორო შხვა ძალას ღებულენთ. 5 მიმორჩქ, ნამდა თქვან „მანგარ“ მოციქულეფშე ნაკლებ მუთუნით ვა ვორექ. 6 მერეთ მორაგადე ვა ვორექ-და, რჩქინა ვარა ქომიღ. თენა თქვანწკუმა ირნერო დო ირ საქმეს ქუვოძირეთ.
7 ცოდათ მათვალუნო თინა, ნამდა უფასოთ დო ხიოლით გიცხადენდით სახიოლო ამბეს დო თქვა დიდება მეიღებუდესკონ თიშენ, მა დუდის გიმუკინ?! 8 შხვა კრებეფშე ბღებულენდჷ მოხვარას დო თეშ გიშეშ, ითამ თინეფიშ ხარჯშა გომსახურუდით. 9 მარა, მუჟამსით თქვანწკუმა ვორდჷ დო გამჭირდჷ, ოღალო მითინშა ვეგემნჯირალ; მაკედონიაშე მოულირ ჯიმალეფქ ხვეიანო მომღეს თინა, მუთ მოსაჭირუდ. თაშ ნამდა, ირნერო ვოცადუდ, ოღალო ვეგემნჯირალუდუკო თქვანდა დო ვართ ანწ გიგანჯირუთ. 10 მუჭოთ ქრისტეშ მიმაჸუნალ, ვემვოტენქ თეშ გურშენ ცქვაფას მთელ აქაიას. 11 მუშენ ვორთუქ თეს? თიშენიო, ნამდა ვა მიჸორთ? ღორონთის უჩქჷ, ნამდა მიჸორთ.
12 რენა თიცალეფ, მით იცქვანა დო იჩიებუნა, ნამდა ჩქინცალ მოციქულეფ რენა. ათეშენ კინ გუვაგრძელენქ თიშ კეთებას, მუდგას ვორთუდ, მუშენდა თინეფს ცქვაფაშ მიზეზ მოუსპე. 13 თეცალეფ ტყურა მოციქულეფ რენა, შხვეფს ოჩილითუანა დო დუდის ქრისტეშ მოციქულეფო ასაღენა. 14 მარა გასაკვირ მუ რე, სატანა ხოლო სინთეშ ანგელოზო ვასაღენსო დუდის?! 15 ათეშენ ვართ თინა რე გასაკვირ, ნამდა თიშ მსახურეფ ხოლო სიმართლეშ მსახურეფო ასაღენა დუდის. მარა საბოლათ თის მიღენა, მუთ მუნეფიშ საქმეეფშე ხვადუნა.
16 ხოლო ართშა გირაგადუთ, მითინქ ვეფიქრას, ნამდა უჭკუე ვორექ, მარა იშენ თაშ ქოფიქრენთ-და, იმწკუმა მემღით, მუჭოთ უჭკუე, ნამდა მა ხოლო თინეფცალო ქიფცქუე. 17 ასე თეს იფჩიებუქინ, თეთ უფალიშ მაგალითის ვემეპჸუნქ, უჭკუე კათაცალო იფქციებუქ, მით მუშ დუდშა რე მენდებულ დო იცქვანს. 18 ბრელ იცქვანს თით, მუდგათ თე ქიანას იცქვანა, ათეშენ მა ხოლო ქიფცქვანქ. 19 თქვა ხომ თიცალ „ჭკვერეფ“ რეთჷ, ნამდა მუჭოდგა უთვინენთ უჭკუეეფს. 20 ხვალე თენა ვარინ, უთვინენთ თინეფს, მით მონათ გინგოშქვანა, მით თქვან ქონებას რგებულენს, მით მიდმაიღანა თის, მუთ გიღუნა, მით ჟიშე გიგოჯინენა დო მით სახეს მიგოგანა.
21 ჩქინო ონჯღორე რე თინა, მუდგას ასე იფჩიებუქ, მარა თეს თიშენ ვორთუქ, ნამდა თქვანდე ნამთინეშ თოლს თეშ იძირე, ითამ მოშქურუდან.
მარა, ცქვაფა შხვეფს ვა ოონჯღორუნან-და, თეშ რაგად მუდგა უჭკუეობათ ვეძირედასინ, ვართ მა მოონჯღორ. 22 ებრაელეფ რენანო? მა ხოლო ებრაელ ვორექ. ისრაელეფ რენანო? მა ხოლო ისრაელ ვორექ. აბრაამიშ გამნარყეფ რენანო? მა ხოლო აბრაამიშ გამნარყ ვორექ. 23 ქრისტეშ მსახურეფ რენანო? ხანგაცალო ვარზენქ პასუხის: მა უმოს მანგარ მსახურ ვორექ — უმოს ბრელშა ვოხედ ციხეს, მის უჩქჷ, მუზმაშა ბლახეს დო მუზმაშა ენომჯინუ ღურაშა. 24 ხუთშა მიბღჷ იუდეველეფშე ჟარნეჩშე ართით ნაკლებ როზგ, 25 სუმშა ბლახეს კეტით, ართშა ქუალეფ მომინჭეს, სუმშა გინიბღჷ გემიშ აკოტახუა, მთელ დღა დო სერს შქა ზღვას ინვოხედ. 26 შარას მიფშინ, ბრელშა პჸოფექ ოშქურანჯ სიტუაციეფს მალწყარეფს, ოშქურანჯ სიტუაციეფს გიმარნაფალეფშე, ჩქიმ ხალხშე, შხვა რჯულიშ ხალხშე, ოშქურანჯ სიტუაციეფ მიღუდ ქალაქის, მიკოლაფირ ადგილეფს დო ზღვას; ოშქურანჯ სიტუაციეფ მიღუდ თინეფშე, მით ჩქინ ჯიმალეფო ასაღენდეს დუდის. 27 თეს გეძინელ, ბრელს ფხანდენდჷ დო მუფშენდჷ, ბრელშა მითანუაფ სერეფ, შქირენულ დო ჸუმენულ ვორდჷ, ბრელშა დოფსქილადექ ოჭკუმალიშ უმშო, ბრელშა პჸოფექ ჩხურუს დო ვა ნობღვე მიკაქუნალ.
28 თე ირფელს გეძინელ, ირდღას პწუხენქ არძა კრებაშო. 29 მითინს უჭირს დო თიწკუმა ართო მა ვამჭირსო?! მითინქ რწმენა მიოდინუ დო თენა მა ვა მაწუხენსო?!
30 ოკო ქიფცქუე-და, თით ქიფცქვანქ, მუდგას ძალიერ ვა ვორექ. 31 უფალ იესოშ მუმას დო ღორონთის, ნამუთ ირიათო განდიდებულ ოკო რდასჷ, უჩქჷ, ნამდა ტყურას ვეფჩიებუქ. 32 დამასკოს ვორდინ, გამგებელ, ნამუთ მეფე ჰარიტატის ომსახურუდ, ქალაქის ყარულენდჷ, ნამდა ოპჭოფუკო, 33 მარა კალათით გეგმომიჸუნეს აკოშკაშე, ნამუთ ქალაქიშ კიდალას უღუდ, დო თეშნერო ვენტჷ გამგებელს.