მათე
28 საბატონქ მიკილ დო მარაშ პირველ დღა თანდუდუნ, მაგდალელ მარიამქ დო მაჟია მარიამქ სასაფლაშა ქიმერთეს.
2 დიხანწალუა ქუმოხვალამედ, მუშენდა ზეცაშე იეჰოვაშ ანგელოზის გეგმურთუმუდ დო დიდ ქუა გეგნუკერკელუაფუდ. ანგელოზ თე ქუას გეხედ, 3 ვალცალო სინთანდჷ დო თიშ ბარგ თირიშმარჩია რდჷ. 4 ყარულეფ შიშით კანკალანდეს დო ღურელიშ ფერ ქიგნოდვალუდეს.
5 ანგელოზიქ ოსურკოჩეფს უწუ: „ვა გაშქურინან! მიჩქჷ, იესოს გორუნთ, ნამუთ ძელს მიკაჭკადეს. 6 თინა თაქ ვა რე, გეთელ, მუჭოთ იჩიებუდ. ქუმორთით დო ქოძირით ადგილ, სოდეთ გესვანჯუდ! 7 უკულ ჩქარას მეუთ დო თიშ მოწაფეეფს ქუწით, ნამდა თიქ გეთელ! თინა უმოს ადრე ქიმურს გალილეაშა დო თექ ქოძირუნა. თენა მაფუდ თქვანდა ორაგადე!“
8 შქურნაფილეფქ, მარა მანგარ გახარებულეფქ, ხეთეშე ქიდიტუეს სასაფლა დო მიდერულეს, ნამდა თიშ მოწაფეეფს ქუგაგებაფუესკო თე ამბე. 9 იესოქ ქეშეხვად თინეფს დო უწუ: „თქვან ჯგირობუა!“ თინეფქ ხოლოშა ქიმერთეს, ბირგულ ქუდაშქვეს თიშ წოხოლე დო კუჩხეფს ქახუტოლეს. 10 იესოქ უწუ: „ვა გაშქურინან! მეუთ დო ქუწით ჩქიმ ჯიმალეფს, ნამდა გალილეაშა მიდართან დო თექ ქობძირუნა“.
11 თინეფ დიო ხოლო შარას მიშეს, მუჟამსით ყარულეფშე ნამთინექ ქალაქშა გემშართჷ დო უნჩაშ მღვდელეფს ქოუწუ ირფელ, მუდგაქ მოხვად. 12 თინეფქ უხუცესეფწკუმა ართო გეკიშაყარეს, ნამდა გეგმა ქუდანწყუესკო. უკულ ჯარიშკოჩეფს ბრელ ვარჩხილიშ მონეტა ქიმეჩეს 13 დო უწუეს: „თაშ ქოთქვით, სერით, ბლურდესინ, თიშ მოწაფეეფქ ქუმორთეს დო მიხირესია. 14 თეს გამგებელ ქიგეგენს-და, ჩქი გეუნწყუნთ ირფელს, თქვა მუთუნშა ვა გაშქურინან“. 15 თინეფქ ხოლო გეჭოფეს ვარჩხილ დო ირფელ თეშ გაკეთეს, მუჭოთ უწუეს. თე ამბექ მთელ იუდეას მადვჷ დო ამდღარშახ თაშ რე.
16 ეშობას ვითაართ მოწაფექ მიდართჷ გალილეაშა, თი გვალაშა, სოდეთ იესოქ უწუ, ნამდა შეხვადუდ. 17 ქოძირესინ, ბირგულ ქუდაშქვეს თიშ წოხოლე, მარა ნამთინეს ბოლოშახ ვა ჯერდჷ, ნამდა თინა იესო რდჷ. 18 იესოქ ქიმერთჷ თინეფშა დო უწუ: „მთელ ძალაუფლება ზეცას დო დედამიწას ჩქიმდა რე მოჩამილ. 19 ათეშენ მეუთ არძა ერიშ ხალხშა, ქუდაგურეთ თინეფს დო ქიმეხვარით, ჩქიმ მოწაფეეფო გინირთან; დონათით თინეფ მუმაშ, სქუაშ დო წმინდა შურიშ* სახელით, 20 ქუდაგურეთ თი ირფელიშ მეჸუნა, მუთ ჩქიმდე დიგურეთ*, დო მა ირდღას თქვანწკუმა იპჸუაფუქ თე ქიანაშ* ბოლოშახ!“