პეტრეშ მაჟია წერილ
3 საჸოროფოეფ, ამარ უკვე მაჟია წერილს რჭარუნთ, დო მუჭოთ პირველ წერილს გიწით, თე წერილს ხოლო გუგოშინანთ, ნამდა სწორ აზროვნება გიღუდან, 2 მუშენდა რშუდან წმინდა წინასწარმეტყველეფიშ ნარაგად სიტყვეფ დო უფალიშ დო მარსხებელიშ კანონ, ნამდგაქ თქვანდა მოციქულეფიშ საშვალებათ იჸუ გინოჩამილქ. 3 პირველ რიგის, გიჩქუდან, ნამდა ბოლო დღალეფს გემკორჩქინდუნა გიმაძიცალეფ, მუნეფიშ გემოშა მიქციებუნა 4 დო თქუანა: „სო რე თინა, მიდგაქ სიტყვა მერჩეს, მოურქია*?! ჩქინ ჯვეშეფიშ ღურაშ უკულ მუშენ ვეთირ მუთუნქ დო ირფელ კინ თეშ მუშენ რე, მუჭოთ თე ქიანაშ გოჭყაფაშე რდჷ?!“
5 თინეფ გარძახ ივარიენა თის, ნამდა ბრელ ხანიშ წოხოლე არსებენდჷ ცა, დო დიხა ხოლო, ნამდგაქ ღორონთიშ სიტყვათ წყარშე ეშეკინ დო წყარეფ შქას მანგარას ქიგედირთჷ, 6 დო ნამდა თინეფიშ საშვალებათ მისპჷ თიმწკუმაიან ქიანაქ, მუჟამსით წყარქ დოფორ თინა. 7 ღორონთიშ სიტყვათ ასეიან ცა დო დედამიწა ხოლო დაჩხირშო დო უღორონთე ხალხიშ გასამართლებაშ დო მოსპუალაშ დღაშო რე კინოჩუალირ.
8 საჸოროფოეფ, ირიათო რშუდან, ნამდა იეჰოვაშო* ართ დღა ანთას წანა რე დო ანთას წანა – ართ დღა. 9 იეჰოვა* ვეგნმოდვანს მუშ დუნაპირებუშ შესრულებას, მუჭოთ ნამთინეს მიორჩქ. სინამდვილეს თინა გითვინენა, მუშენდა მითინიშ მოსპუალა ვაკო. თეშ გინაწონს, ოკო, ნამდა არძაქ ინარღას დაშებულ*. 10 იეჰოვაშ* დღა მახინჯცალო ქუმურს. თიმწკუმა ცა თოლიშ დოვალაფაშა გურგინით გენადგურებ, ცაშ დო დედამიწაშ ნაწილეფ თეშ გოფურუ, ნამდა გეკოცენს დო დედამიწა დო თიშ საქმეეფ გეგმიარგამებ.
11 თე ირფელ თაშ გაკოცენს-და, დეფიქრით, მუნერეფ ოკო რდათჷ! წმინდა საქციელ ოკო გუგორდან დო თქვან საქმეეფშე ღორონთიშ ართგურობა ოკო იძირედას, 12 მუშენდა შურ დო გურით ელუთ დო თოლშა აწოირენა დრო, მუჟამსით ქუმურს იეჰოვაშ* დღა, ნამუთ ცას დაჩხირით მოსპუნს დო თიშ ნაწილეფს სიფურალეთ დანდღულუანს! 13 მარა, მუჭოთ თიქ დემეპირეს, ველუთ ახალ ცას დო ახალ დედამიწას, სოდეთ დამკვირდებულ იჸუაფ სიმართლე.
14 ათეშენ, საჸოროფოეფ, რახანს ელუთ თე ირფელს, ირნერო ეცადით, ღორონთიშ წოხოლე ქიგედირთათ სუფთეფქ, ბრალუგუდვალუეფქ დო მშვიდობაშ ხეშემანწყუალეფქ. 15 ხვალე თენა ვარინ, ჩქინ უფალიშ მოთვინება რსხებათ მირჩქინით, მუჭოთ თენა ღორონთშე მეღებულ სიბრძნეთ ჩქინ საჸოროფო ჯიმაქ, პავლექ, ხოლო მორჭარეს. 16 თე ირფელიშ გურშენ თინა მუშ არძა წერილს ჭარუნს, მარა თე წერილეფს მუდგარენ-მუდგარენეფ ძნელ გაგებელ რე, მუდგას ურჩქინჯეფ დო ჭიჭე რწმენამეფ წმინდა წერილეფიშ შხვა ადგილეფცალო მუშობრათ თირანა დო თეთ დუდის იდინუანა.
17 ათეშენ, საჸოროფოეფ, რახანს თქვა თე ირფელ გიჩქუნა, კურცხას რდათჷ, მუშენდა თქვა ხოლო ვემგოჩილითუან უბადო ხალხიშ ტყურეფქ დო ვეგნგორთაფუან სიმართლეშ შარაშე, ნამდგას მტკიცას გერეთ. 18 იმენდ მიღჷ, უმოს მეტ ჭყოლოფას დო რჩქინას მიღენთ ჩქინ უფალ დო მარსხებელშე, იესო ქრისტეშე. დიდება თის ქოთ ასე დო ქოთ სადღამუშოთ! ამინ!