ებრაელეფშა მეჭარილ წერილ

13 ვადინუათ ჯიმალურ ჸოროფა! 2 ირიათო გეგმირჩქინით სტუმარიშ ჸოროფა, მუშენდა ნამთინეს, შურო აზრის ვა რდუნ თეშ, ანგელოზეფ მეუღებ სტუმარო. 3 რშუდან თინეფ, მით რწმენაშ გურშენ ჭოფილ რენა, ითამ თქვა ხოლო ჭოფილ რდათჷ თინეფწკუმა ართო; თინეფ ხოლო რშუდან, მიდგას უდუნდებელო ოქცუნა, ითამ თინეფწკუმა ართო იტანჯებუდათ*. 4 არძაშ ჩილდოქომონჯალა ღირსუან დო უღალატო რდასჷ, მუშენდა არძა უზნეოს* ღორონთ გასამართლენს. 5 იცხოვრით ფარაშ ჸოროფაშ უმშო დო გეუჯერდით თის, მუთ გიღუნა, მუშენდა ღორონთიქ თქუ: „დღას ვა დოიტენქ დო დღას ვემგოტენქ“. 6 ათეშენ მუთუნშა ვა მოშქურუნა დო იფჩიებუთ: „იეჰოვა* ელამრე, ვა მაშქურინე, მუ აღოლნე კოჩის ჩქიმდა?!“

7 რშუდან თინეფ, მიდგას თქვან შქას ხელმძღვანელობა ოვალ, მიდგაქ ღორონთიშ სიტყვა გინორჩეს; ქიდეკვირით თინეფიშ ჯგირ საქციელიშ შედეგეფს დო მიაჸუნით თინეფიშ რწმენაშ მაგალითის.

8 იესო ქრისტე მუთ გოღა რდუნ, თინა რე ამდღა ხოლო, ვა თირე დო ვართ დღას ითირუ.

9 შარას ვეგოჩილითუან ტყურა გურაფეფქ! უჯგუშ რე, ღორონთიშ ჸოროფათ გემანგარათ გურ დო ვართ ხოლო თი წესეფიშ მეჸუნათ, ნამუთ ოჭკუმალს ოხუ, მუშენდა თინეფ, მით თე წესეფს რენა გინოჸუნელ, თეშე მუთუნ ჯგირობუას ვა ღებულენა.

10 ჩქი მიღუნა სამსხვერპლო; კარავს მსახურენან თინეფს ვა უღუნა უფლება, თე სამსხვერპლოს შეწირულ ჭკუმან. 11 მსხვერპლო შეწირულ ცხოველეფს, ნამდგაშ ზისხირ მღვდელმთავარს წმინდაშეწმინდა ადგილშა მინუღ ცოდაშ შესაწირო, ბანაკიშ გალე ჭუნა. 12 ათეშენ იესოქ ხოლო ქალაქიშ კარმინოლიშ გალე იტანჯჷ, ნამდა მუშ ზისხირით გასუფთუკო ხალხ. 13 იმწკუმა ჩქი ხოლო გიმიბლათ თიშა ბანაკიშ გალე დო თიქ გაურზუნ თეშ ქუგურზათ ონჯღორეს. 14 მიჩქუნა, ნამდა თაქ ვა მიღუნა ქალაქ, ნამუთ სადღამუშოთ იჸუაფ, ათეშენ შურ დო გურით ველუთ მომავალს იჸუაფუნ თი ქალაქის. 15 იესოშ საშვალებათ ირიათო შეპწირათ ღორონთის ოცქვაფურ მსხვერპლ – ჩქინ ნინათ სახალხოთ გუვაცხადათ თიშ სახელ. 16 თეს გეძინელ, ვეგიჭყოლიდუათ ჯგირიშ კეთება დო შხვას ხოლო გურთით თინა, მუთ გიღუნა, მუშენდა ღორონთის მანგარო მოწონს თეცალ მსხვერპლ.

17 დემორჩილით დო ქუგუგონეთ თინეფს, მიდგას თქვან შქას ხელმძღვანელობა ოვალ, მუშენდა ირიათო კურცხას რენა თქვანიშ გურშენ დო რთხილანა; თინეფს თეშ გურშენ ანგარიშ აჸინა ობარებელ ღორონთშა. თაშ ქიმიქციებუთ-და, თინეფ მუნეფიშ საქმეს ხიოლით გაკეთენა დო ვართ ხოლო წუხებათ, მუთ გლახა იჸუაფუდ თქვანო.

18 ვემიოტუათ ჩქინო ლოცვა, მუშენდა ბჯერა, ნამდა სუფთა სინდის მიღუნა დო მოკონა, ირფელს პატიოსანო მიფქცუათ; 19 თეს უმოსო თიშენ რთხინთჷ, ნამდა შემალებუას, მალას დუგართათ.

20 მშვიდობაშ ღორონთიქ გათელ ჩქინ უფალ იესო, შხურეფიშ დიდებულ ჭყიშ, ნამდგაქ ღორონთშა მიღჷ სადღამუშო შეთანხმებაშ ზისხირ. თე მშვიდობაშ ღორონთის 21 თქვანდა ქიმუჩამუდას ირფელ, მუთ თიშ ნებაშ შეიოსრულებერო გოსაჭირუნა; იესო ქრისტეშ საშვალებათ თინა მოკეთებაფუანა ირფელს, მუთ მუშო რე მოსაწონ. დიდება თის სადღამუშოთ! ამინ!

22 ჯიმალეფ, ელაიჩანთ, მთელ გურით მიღათ ჩქიმდე თე გურიშემაკინალ წერილ; თეშით ბრელ მუთუნ ვა მომჭარუ თქვანდა. 23 მოკო, გიჩქუდან, ნამდა ჩქინ ჯიმა, ტიმოთე, უკვე გათავისფალებურ რე დო, მალას ქუმორთ-და, ართო ქოიძირუანთ.

24 მომკითხით არძა, მიდგას თქვან შქას ხელმძღვანელობა ოვალ, დო არძა წმინდა! მოკითხვას გიჩინანა ჯიმალეფ იტალიაშე!

25 ნამთინს ვა მორრკებუდან ღორონთიშ ჭყოლოფა!