იაკობიშ წერილ
2 ჩქიმ ჯიმალეფ, მუჭო შილებე გიშაკერძაფას გიმირჩქინანდათ თიშ უკულ, მუთ ჩქინ დიდებულ უფალ, იესო ქრისტე, ირწმუნით? 2 ფთქუათ, კრებაშა მინურს ჟირ კოჩ: ართის ოქროშ ბეჭედეფ მაგჷ დო ძვირიან ბარგ მიკაქუნს, მარა მაჟია უღონობას ცხოვრენს დო წინდამ ბარგით მინურს. 3 ძვირიან ბარგ მიკაქუნსინ თის პატიცემათ ოქცუთ დო ურაგადუთ: „მოზოჯ, ათე საპატიცემლო ადგილს ქუდოზოჯ“; თეშ გინაწონს, უღონობას ცხოვრენსინ თის ურაგადუთ, კუჩხის ქიგერდა ვარდა ჩქიმ კუჩხიშ გიოდგუმალწკუმა ქუდოზოჯია, 4 თეცალ საქციელით ართის მაჟიაშე ვეგშართუნთო დო თიცალ მოსამართლეეფს ვაგურუთო, მით უსამართლო გადაწყვეტილებეფს ღებულენა?!
5 ქომრჩქილით, ჩქიმ საჸოროფო ჯიმალეფ! ღორონთიქ თინეფ ვეგშეგორუო, მით თე ქიანაშ თოლს უღონოეფ რენა, ნამდა რწმენას ქონებიერეფ დო თი სამეფოშ მემკვიდრეეფ ჸოფედესკო, ნამუთ მუშ მოჸოროფეეფს დეპირ?! 6 მარა თქვა არდებულო ოქცუთ უღონოეფს. ქონებიერეფს ვა რენო, უჩა დღაშა გეურეთ დო სასამართლოეფშა მეუსერგელუაფუთინ?! 7 თინეფ ვა რენო, თი დიდებულ სახელს ლანძღუნან, ნამუთ ღორონთიქ მერჩეს?! 8 წმინდა წერილეფ იჩიებ: „მოჯგირე* სქან დუდცალო გიჸორდას“. თე დიდებულ კანონს* ქიმეჸუნთ-და, ჯგირს ორთუთ, 9 მარა კინ გიშაკერძაფას ქიგმირჩქინანთ-და, გიჩქუდან, ცოდენთ დო კანონ გიმაარგამენს, ნამდა ბრალ გერძუნა.
10 კოჩ არძა კანონს ქიმეჸუნს, მარა ნამდგაინ ართის ქიგნურთანს-და, მთელ კანონს გინურთანს. 11 თიქ, მიდგაქ თქუ: „ვემრუშა“, თენა ხოლო თქუ: „ვაჸვილა“. ვა მრუშენქ, მარა ქოჸვილუნქ-და, კანონს იშენით გინურთანქ. 12 ირო თეშ იჩით დო მიქცით, მუჭოთ თინეფს ოსქვანა, მით თავისფალ ხალხიშ კანონით გესამართლებუნა. 13 თინა, მით ჭყოლოფას ვეგმირჩქინანს, ჭყოლოფაშ უმშო გესამართლებ. ჭყოლოფა გასამართლებას გიორჯგინანს.
14 ჩქიმ ჯიმალეფ, კოჩ ქიჩიებ, რწმენა მიღუნია, მარა თიშ რწმენას საქმეეფ ვეკოჸუნს-და, მუ აზრ უღჷ თეცალ რწმენას? ქირსხენსო თის თეცალ რწმენა?! 15 მაგალთო, ნამდგაინ დას ვარდა ჯიმას ბარგ ვა უღჷ დო გვერდო შქირენულ რე, 16 დო თქვა ურაგადუთ, აბა ჯგირო მიძირუდა, ტიბას ქიმკიქუნ დო ოჭკუმალ ვემირკავა, მარა მუთ ოსაჭირუნ თის ვარზენთ-და, მუ აზრ უღჷ თეშ რაგადის?! 17 თაშ რე რწმენა ხოლო, საქმეეფ ვეკოჸუნს-და, ღურელ რე.
18 მიდგარენქ შილებე თქუას, სი რწმენა გიღჷ, მარა მა – საქმეეფ. საქმეეფიშ უმშო ქუმოძირე სქან რწმენა დო მა საქმეეფით ქუგოძირანქია ჩქიმ რწმენას. 19 ხომ ქორწანა, ნამდა ღორონთ ართ რე? ქორწანან-და, გვალო ჯგირ. მარა თენა დემონეფს ხოლო წანა დო შიშით კანკალანა. 20 თქვა უჭკუეეფ, ვაიჩქუნანო, ნამდა რწმენა საქმეეფიშ უმშო პოტიკ რე?! 21 ჩქინ მუმა აბრაამქ საქმეეფით ვეჸუო მართალო მერჩქინელქ, მუჟამსით მუშ სქუას, ისაკის, სამსხვერპლოს წირენდჷ?! 22 მუჭოთ ორწყეთ, აბრაამიშ რწმენას საქმეეფ ეკოჸუნდჷ დო მუშ საქმეეფით ქაძირუ, ნამდა ნამდვილ* რწმენა უღუდ. 23 თეთ შისრულ წმინდა წერილეფს ენოჭარილქ: „აბრაამქ ირწმუნ იეჰოვა* დო ათეშენ მართალო იჸუ მერჩქინელქ“, დო იეჰოვაქ* მუშ მეგობარო მიშინუ თინა.
24 მუჭოთ ორწყეთ, კოჩ საქმეეფით იჸუაფ მართალო მერჩქინელ დო ვართ ხოლო ხვალე რწმენათ. 25 მეძავ რახაბიქ ხოლო საქმეეფით ვეჸუო მართალო მერჩქინელქ, მუჟამსით მთელ გურით მიღჷ დიხაშ მათოლიერებშა ტყობაშე გოტებულეფ დო უკულ შხვა შარათ გოუტუ თინეფ?! 26 თაშ ნამდა, მუჭოთ სხეულ რე ღურელ შურიშღალაშ* უმშო, თეშ რწმენა რე ღურელ საქმეეფიშ უმშო.