იაკობიშ წერილ
1 იაკობ, ღორონთიშ დო უფალ იესო ქრისტეშ მონა, რჭარუნთ შხვადოშხვა ადგილს მიკოცუმილ 12 ტომს:
ჯგირობუა!
2 ჩქიმ საჸოროფო ჯიმალეფ, ირნერ გაჭირებას* ხიოლით ქეშეხვადით, 3 მუშენდა გიჩქუნა, ნამდა თეშნერო გიმოცადებულ რწმენა მოთვინებას გოგურუანა. 4 მოთვინებას გათებაფეთ მუშ საქმე, ნამდა მუთუნ კილ ვაიღუდან, შხვანერო ქოფთქუათინ, რდათჷ სრულყოფილეფ დო მუთუნ ბრალქ ვეგგადვან.
5 თქვანდე ნამდგაინს სიბრძნე ქარკუნ-და, ირიათო თხუას ღორონთის, დო ღორონთ, ნამუთ არძაწკუმა გურხვე რე დო მითინს ვეგიორაგადანს*, ქიმეჩანს თის სიბრძნეს, 6 ოღონც რწმენათ დო ეჭვიშ უმშო ითხუას, მუშენდა ეჭვიან კოჩ მოგენს ზღვაშ ტალღას, ნამდგას ბორია იხვამილუანს დო იშო-აშო გილუღ. 7 თეცალ კოჩ მუთუნს ოკო ველუდას იეჰოვაშე*. 8 ეჭვეფ უღუნ ფერ კოჩის გინოჭყვიდუა უჭირს დო დღას ვეგერე ართ აზრის.
9 უღონობას ცხოვრენსინ თი ჯიმას ხოლო ხიოლ უღუდას, მუშენდა ღორონთიშ თოლს პატიგედვალირ რე. 10 ხიოლ უღუდას თი ქონებიერს ხოლო, ნამუთ თანდაბლობას გურაფლენს, მუშენდა ქონებიერ კოჩ მინდორიშ ყვავილცალო ქიმკოდინუ. 11 მუჭოთ თაკარია ჩხანათ გოხუმაფილ მცენარეს პეულ უცენს დო სისქვამე უდინუ, თეშ ქონებიერ კოჩ ხოლო გოდინუ მუშ ქონებაწკუმა ართო.
12 ბედნერ რე კოჩ, მით განსაცდელეფს ურზუ, მუშენდა იეჰოვა* მიწონუანს თის დო მიღენს სიცოცხლეშ გვირგვინს, ნამუთ ღორონთიქ მუშ მოჸოროფეეფს დეპირ. 13 განსაცდელიშ დროს მითინქ ვა თქუას, ღორონთ გიმოფცადუნსია, მუშენდა მითინს ვეშულებ ღორონთის უბადობა გაკეთებაფუას დო ვართ მუ შეუხვამილუანს მითინს უბადობას*. 14 სინამდვილეს, თითოეულს გიმოცადუნს კინ მუშ სურვილ, ნამუთ ეიჸუნუანს დო ოჩილითუანს თის. 15 მუჟამსით სურვილ ჩხვიჩხვეფს გიდგუნს, კოჩის ცოდაშა მიჸუნანს დო ცოდა საბოლათ ღურას მუღანს თის.
16 ჩქიმ საჸოროფო ჯიმალეფ, ვედეღორათ! 17 ირნერ ჯგირ დო სრულყოფილ ძღვინს ზეცაშე მოურს, ბჟაშ, თუთაშ დო მურიცხეფიშ გუმაჭყაფალშე, მით ვა მოგენს ოროს, ნამუთ ირიათო ითირუ. 18 თიქ სიცოცხლე მუჩეს, მუჟამსით მუშ სიმართლეშ სიტყვა გუმოგებაფუეს, მუშენდა თიშ ნება რდჷ, მუშ გუნაჭყეფუეფ შქას პირველგიშაგორილეფ ჩქი პჸოფედითკო.
19 ჩქიმ საჸოროფო ჯიმალეფ, რშუდან: არძა მზათ ოკო რდასჷ მარჩქილაფარო დო მითინქ ვეჩქარას რაგად ვარდა გურიშმოულა, 20 მუშენდა კოჩიშ რისხუა ხეს ვა უნწყუნს ღორონთიშ სიმართლეს. 21 თანდაბლურო მიღით ღორონთიშ სიტყვა დო ქიმეჩით საშვალება, ჩხვიჩხვეფ გიდგას თქვან გურეფს, მუშენდა თის შეულებ თქვან რსხება.
22 საქმეთ ქაძირეთ, ნამდა მეჸუნთ ღორონთიშ სიტყვას; ვა რდათჷ ხვალე მარჩქილეეფ. დუდ ვედეღორათ დო ვეფიქრათ, ნამდა მორჩქილაფა ხოლო დასაბაღ რე. 23 მით ღორონთიშ სიტყვას ირჩქილე, მარა ვემეჸუნს, მოგენს კოჩის, ნამუთ სარკეს მუშ სახეს ოკვირ. 24 მუშ დუდის ქაკვირ, მარა სარკეშე გემკურსუნ, თიმწუთის ოჭყორდუ, მუნერ რე. 25 მარა თინა, მით ოკვირ თავისუფლებაშ სრულყოფილ კანონს დო მეჸუნს თის, ვა მოგენს კოჩის, ნამდგას ხეთეშე ოჭყორდუ მორჩქილაფირ; თინა საქმეშ მაკეთებელ რე, მუთ ბედნერობას მოუღანს.
26 მიდგას დუდ ღორონთიშ თაყვანიშმცემელო მიორჩქ, მარა ნინას ვეწიჭოფანს, დუდის იღორენს დო თიშ თაყვანიშცემა პოტიკ რე. 27 ჩქინ ღორონთიშ დო მუმაშ თოლს სუფთა დო წმინდა თაყვანიშცემა თინა რე, ნამდა ქიმვეხვარათ ომბოლეფს დო ქომონჯღურელ ოსურკათას, მიდგას მოხვარა ოსაჭირუნა, დო დუდ დიფთხილუათ თე უბადო ქიანაშ უწმინდურებაშე.