ლუკა
6 საბატონს იესო დო თიშ მოწაფეეფ ჸვანას მიკიშეს. მოწაფეეფქ ქობალიშ კაკალიშ გინოწილუა დო ჭკუმუა ქიდიჭყეს. 2 ფარისეველეფქ თენა ქოძირესინ, უწუეს: „მუშენ ორთუთ თის, მუთ კანონით საბატონს ვეშილებე?“ 3 იესოქ უპასუხ: „დღას ვაიკითხირუნანო, მუ აკეთ დავითიქ, მუჟამსით თის დო თიშ მაჸალეეფს მაშქირენეს?! 4 მუჭო მინორთჷ ღორონთიშ კარავშა, ეჭოფ შესაწირ ქობალ*, ოჭკუმ დო მუშ მაჸალეეფს ხოლო ქიმეჩ, ნამდგაშ ჭკუმუა კანონით მღვდელეფიშ მეტ მითინს ვეშულებუდ?!“ 5 უკულ უწუ: „კოჩიშ სქუა საბატონიშ უფალ რე!“
6 ხოლო ართ საბატონს თიქ გემნორთჷ სინაგოგაშა დო ხალხის ოგურუანდჷ. თექ რდჷ ართ კოჩ, ნამდგას მარძგვან ხე გოხუმაფილ აფუდ. 7 ფარისეველეფ დო მწიგნობარეფ ოკვირუდეს იესოს, დასქილიდუანდ დო ვარ თის საბატონს, მუშენდა ოკოდეს, მუდგაინნერო ბრალ ქიგედვესკო. 8 იესოს უჩქუდ, მუს ფიქრენდეს თინეფ, მარა ხეგოხუმაფილ კოჩის იშენით უწუ: „გედირთ დო შქას ქეშადირთ“. თიქ ხოლო ქიმერთჷ დო შქას ქეშადირთჷ. 9 უკულ იესოქ თინეფს კითხჷ: „კანონით ქიშილებენო საბატონს ჯგირიშ ვარდა გლახაშ კეთება, სიცოცხლეშ* რსხება ვარდა მოსპუალა?“ 10 იესოქ თინეფს თოლ ქიგნულინუ დო ხეგოხუმაფილ კოჩის უწუ: „გოთინ ხე!“ თიქ ხოლო გოთინ ხე დო დუსქიდ თიქ. 11 თინეფქ მანგარო გერისხეს დო ართიან შქას ქიდიჭყეს მორაგად, მუ უკეთებუდესკო იესოშა.
12 თიმ დღალეფს იესოქ გვალაშა გეკორთჷ, ნამდა ქილოცუკო; თინა მთელ სერს ლოცულენდჷ. 13 გოთანდუნ, ქუდუძახ მუშ მოწაფეეფს, თინეფშე ვითოჟირ გეგშაგორ დო მოციქულეფ ქიგიოდვჷ. 14 თენეფ რდესჷ: სიმონ, ნამდგას პეტრე გიოდვჷ, დო თიშ ჯიმა ანდრია, იაკობ დო იოანე, ფილიპე დო ბართლომე, 15 მათე, თომა, ალფეშ სქუა იაკობ, სიმონ, ნამდგას „დუდგინოდვალირს“ უძახუდეს, 16 იაკობიშ სქუა იუდა დო იუდა ისკარიოტელ, მიდგაქ იესოს უღალატ.
17 იესოქ თინეფწკუმა ართო გეგმორთჷ გვალაშე დო თუდო გაჩერდჷ. თექ ქიანაშ მოწაფე დო ანაყუ ხალხ რდჷ შაყარელ. თინეფ თიშ მარჩქილაფშა დო ლახალაშე ოსქილიდაფშა მთელ იუდეაშე, იერუსალიმშე, ტვიროს დო სიდონიშ ზღვაპიჯშე რდესჷ მოულირ. 18 ხვალე თენა ვარინ, უბადო შურეფით გატანჯებულეფ ხოლო სქიდუდეს. 19 არძას ოკოდ, ხე ქიმეთხუკო იესოს, მუშენდა ძალა გიშეშ თიშე დო სქიდუდეს.
20 თიქ მუშ მოწაფეეფს ქიგნაჯინ დო ქადაგება ქიდიჭყჷ:
„ბედნერეფ რეთჷ, უღონოეფ, მუშენდა თქვან რე ზეციერ სამეფო.
21 ბედნერეფ რეთჷ, მით ასე შქირენულეფ რეთჷ, მუშენდა დირძღუთ.
ბედნერეფ რეთჷ, მით ასე ინგართ, მუშენდა გიძიცანთ.
22 ბედნერეფ რეთჷ, მუჟამსით ხალხის ჯოგუთ, ოჭიშის გირთინუანა, რლანძღუნა დო უბადოს გიძახუნა კოჩიშ სქუაშ გურშენ. 23 გეხარით დო ხიოლით გილასხაპით, მუშენდა დიდებულ ჯილდო გელუნა ზეცას; თინეფიშ ჯვეშეფ ხოლო თაშ ოქცუდეს წინასწარმეტყველეფს.
24 მარა თქვან ცოდა, ქონებიერეფ, მუშენდა გურიშექექაფა უკვე სრულას გაფუნა მეღებულ.
25 თქვან ცოდა, მით ასე რძღელეფ რეთჷ, მუშენდა შქირენ გაჸინა.
თქვან ცოდა, მით ასე იძიცანთ, მუშენდა თვალუა დო ნგარას ქიდიჭყანთ.
26 თქვან ცოდა, თქვანდე არძა ჯგირს ქორაგადანს-და, მუშენდა თინეფიშ ჯვეშეფ ტყურაწინასწარმეტყველეფშენ ხოლო თაშ იჩიებუდეს.
27 მარა თქვა, მით მირჩქილეთ, გირაგადუთ: გიჸორდან თქვან ნტერეფ დო ჯგირ უკეთით თინეფს, მიდგას ჯოგუთ, 28 დოხვამეთ თქვან მაჭყალეფ, ილოცით თინეფშო, მით შეურაცხყოფას მიგორინუანა. 29 მით ართ ღვანწკის მიგოგანს, მაჟია ხოლო ქიმუჭოფე, დო მით გინაქუნალს მიდაიღანს, ბარგ ხოლო ქიმეჩ. 30 მითინ მუთუნს ქორთხინს-და, ქიმეჩ, დო, მითინ მუთუნს მიდაიღანს-და, დორთინაფა ვემითხუა.
31 თეშ მექცით შხვეფს, მუჭოთ აშო გოკონა, მიგექცუან.
32 ხვალე თქვა უჸორთინ თინეფ ქოიჸორან-და, მუ ჯგირობუას ელუთ? ცოდამეფ ხოლო თაშ იქციებუნა. 33 მუჟამსით ჯგირს ხვალე თინეფს ურთუთ, მით აშო გოქცუნა ჯგირო, მუ ჯგირობუას ელუთ? ცოდამეფ ხოლო თაშ იქციებუნა. 34 მიდგაშე დორთინაფას ელუთინ ხვალე თინეფს ქიმიასხენთ-და*, მუ ჯგირობუას ელუთ? ცოდამეფ ხოლო მიესხენა ცოდამეფს დო აშო სრულას დორთინაფას ელუნა. 35 თეშ გინაწონს, გიჸორდან თქვან ნტერეფ, ჯგირ აკეთით დო თეშ მიესხით, ნამდა უკახალე დორთინაფაშ იმენდ ვაიღუდან. შედეგო მიღენთ დიდ ჯილდოს დო იჸუაფუთ უზენაესიშ სქუალეფ, მუშენდა თინა უმარდულეფს დო უბადოეფს ხოლო ჯგირო ოქცუ. 36 რდათჷ მოჭყოლოფეეფ, მუჭოთ თქვან ზეციერ მუმა რე მოჭყოლოფე.
37 მიოტეთ შხვეფიშ გასამართლება* დო თქვა ხოლო ვეგესამართლებუთ; მეტო ვეგედვათ ბრალ დო ვართ თქვა გიგადვალუნა ბრალ. ქაპატით დო თქვა ხოლო გეპატიებუნა. 38 ვედგენარღან შხვეფშო მუთუნქ დო ვართ აშო დენარღებუნა; ქიანაშის ქინოირღვანა ლუბაშა, ინოტაბაკელს, გოკასილს დო გინოცენსინ ფერს. მუშენდა, მუჭოთ თქვა ოქცუთ შხვეფს, აშო ხოლო თეშ მიგექციებუნა“.
39 თეცალ მაგალით ხოლო ქუმუჸუნ თინეფს: „ჸვერეს ჸვერეშა ქეწაჸუნნენო?! ქეწაჸუნ-და, ჟირხოლო ნთხორილს ვენოლუნო?! 40 მოწაფე მასწავლებერშე უმოს ვა რე, მარა არძა, მით სრულყოფილ გურაფას ღებულენს, მუშ მასწავლებერცალ იჸუაფ. 41 მუშენ უჯინექ სქან ჯიმაშ თოლს ოდიარეშ ღერიას, მუჟამსით სქან თოლს ჯიკის ვარწყექ?! 42 მუჭო ურაგადუქ სქან ჯიმას, მორთ, თოლშე ოდიარეშ ღერიას გელაიღანქია, მუჟამსით სი ჯიკ ალაიძ თოლშა?! დუდ წმინდათ მოიღუნ! დიო ჯიკ გელეღ სქან თოლშე დო უკულ უჯგუშო ქოძირუნქ, მუჭო ჩუთხინუე სქან ჯიმას თოლშე ოდიარეშ ღერია.
43 ჯგირ ჯა გლახას ვემკიღანს დო ვართ გლახა ჯა მიკიღანს ჯგირს. 44 არძა ჯა მუკნაღელით იჩინებე. მითინ ვემკოწილუნს ძიგირშე ლუღის ვარდა კაკლარშე – ჸურძენს. 45 ჯგირ კოჩ ჯგირს იჩიებ, მუშენდა თიშ გურ ჯგირით რე ეფშა, მარა გლახა კოჩ გლახას იჩიებ, მუშენდა თიშ გურ გლახათ რე ეფშა. პიჯ თის იჩიებ, მუდგათ გურ რე ეფშა.
46 უფალ, უფალია, მიძახუთინ, გირაგადუთინ თის მუშენ ვართუთ? 47 გიწინთ, მის მოგენს თი კოჩ, მით მოურს ჩქიმდა, ურჩქილე ჩქიმ სიტყვეფს დო მეჸუნს თინეფს: 48 თინა მოგენს კოჩის, ნამდგაქ ტომბას გეშანთხორ კირდე ადგილ დო თექ ქიგედგჷ ჸუდე. წყარქ ქუმოსოფ დო მალწყარქ ქახირცქჷ ჸუდეს, მარა ვა დაქანცუ თიშა, მუშენდა ჯგირო რდჷ გეშენებულ. 49 თეშ გინაწონს, მით ირჩქილე ჩქიმ სიტყვეფს დო ვემეჸუნს თინეფს, მოგენს კოჩის, ნამდგაქ ჸუდე დიხას ოსხირიშ უმშო გეიაშენ. მალწყარქ ქახირცქუნ, ჸუდექ ხეთეშე თეშ გეკოცუ, ნამდა ქუა ქუას ვეგესქილადე“.