მოციქულეფიშ საქმეეფ
23 პავლექ სინედრიონს ქიგნაჯინ დო თქუ: „ჯიმალეფ, ამდღარშახ სუფთა სინდის მიღჷ ღორონთიშ წოხოლე“. 2 თენა უნჩაშ მღვდელ ანანიაქ ქიმირჩქილუნ, თიშ ხასლას გერდესინ თინეფს უზოჯ, პიჯშა ქიმუგამუდესკო თიშა. 3 თიმწკუმა პავლექ თის უწუ: „ღორონთ ქუმგოგანს, სი დარჩიალებურ კიდალა, გეხექ დო კანონით მასამართლენქ დო ავრე კინ სი ვემეჸუნქ კანონს, მუჟამსით ჩქიმ ლახუას ზოჯუნქ!“ 4 ხასლას ელურდესინ თინეფქ უწუეს: „ღორონთიშ მღვდელმთავარს ლანძღუნქო?“ 5 პავლექ უპასუხ: «ჯიმალეფ, ვა მიჩქუდ, ნამდა თინა მღვდელმთავარ რდჷ. ჭარილ რე: „გლახა მუთუნ ვა თქუა სქან ხალხიშ მმართველშენ“».
6 პავლეს უჩქუდ, ნამდა სინედრიონიშ ართ ნაწილ სადუკეველეფ რდესჷ დო მაჟია ნაწილ — ფარისეველეფ, ათეშენ არძაშ გასაგონო ხონარმაღალო თქუ: „ჯიმალეფ, მა ფარისეველ ვორექ, ფარისეველეფიშ სქუა, გათელებაშ იმენდიშ გურშენ მასამართლენა“. 7 თენა თქუნ თიშენ, ფარისეველეფ დო სადუკეველეფ შქას ნირზიქ გეტირხჷ დო თექ აკოშაყარელ ხალხიქ ჟირო გირთჷ, 8 მუშენდა სადუკეველეფს ვართ გათელებაშ წანა, ვართ ანგელოზეფიშ დო ვართ შურიშ, მარა ფარისეველეფს წანა თე ირფელ. 9 ათეშენ მანგარ ღვარაფიქ გეტირხჷ. ნამთინე ფარისეველ მწიგნობარქ გემწოდირთჷ დო ჩხუპ ქიდიჭყჷ: „ჩქი თე კოჩშა მუთუნ გლახაქ ვა მაგორეს, მარა თის შურქ ვარდა ანგელოზიქ ქუდურაგადუ-და …“ 10 მუჟამსით ნირზიქ უმოსო ქიმიძინ, ანთასიშდუდის აშქურინ, პავლე ვაკოსოფანია, ათეშენ ჯარიშკოჩეფს უზოჯ, პავლეშა ქიმერთესკო, თევრეშე სასწრაფოთ გეგმიჸუნესკო დო ყაზარმაშა მიდეჸუნესკო.
11 თიმ სერს პავლეს უფალქ გეგმეცხად დო უწუ: „გემანგარ! მუჭოთ იერუსალიმს ამოწმენდჷ ჩქიმ გურშენ გურგედვალირო, თეშ ოკო დამოწმე რომს ხოლო“.
12 გოთანდუნ, იუდეველეფქ ართიან შქას ქიმირაგადუეს დო დიფუჩუეს, ნამდა ვართ ჭკუმუნდეს დო ვართ შუნდეს, ონდო პავლეს ვა ჸვილუნდეს. 13 სოდგარენ 40-შე მეტ კოჩიქ მირაგადუ თენა. 14 თინეფქ უნჩაშ მღვდელეფშა დო უხუცესეფშა ქიმერთეს დო უწუეს: „ჩქი დიფუფჩეთ, ნამდა ოჭკუმალს პიჯის ვეგებდვანთ, ონდო პავლეს ვა პჸვილუნთ. 15 ათეშენ სინედრიონწკუმა ართო ოკო ქიმუჩინათ ანთასიშდუდის, ნამდა თინა აშო ქუმოიჸუნან; ქუწით, ითამ გოკონა, უმოს უჯგუშო გეგმირკვიათ თიშ საქმე, დო ონდო თაქ მიჸუნანდანინ, ჩქი შარას ქიგლაფხვადუთ დო დოპჸვილუნთ“.
16 პავლეშ დასქუაქ ქიგეგ, მუ ულამუდეს თინეფს, ათეშენ ყაზარმაშა მიდართჷ დო ირფელ პავლეს ქეჩუ. 17 პავლექ ართ ოშიშდუდ ქიჭანუ დო უწუ: „მიდეჸუნ თე ბოშ ანთასიშდუდშა, მუდგარენ აფჷ ორაგადე“. 18 თაშ ნამდა, ოშიშდუდიქ ქიმუჸუნ თინა ანთასიშდუდის დო უწუ: „პატიმარ პავლექ მიჭანუ დო ფთხუ, თე ბოშ ქუმოიჸუნიკო, მუშენდა სქანდა მუდგარენ აფჷ ორაგადე“. 19 ანთასიშდუდიქ ხე ქუმოთხჷ თის, ცალკე გემკიჸუნ დო კითხჷ: „მუ გაფჷ ორაგადე?“ 20 თიქ უპასუხ: „იუდეველეფქ მირაგადუეს, ნამდა ქორთხუან, ჭუმან სინედრიონშა ქიმუჸუნე პავლე, ითამ ოკონა, უჯგუშო გეგმირკვიან თიშ საქმე. 21 ვადაჸუნა თინეფს, მუშენდა 40-შე მეტ კოჩის ულამ, შარას ქიგლახვადას პავლეს. თინეფქ დიფუჩუეს, ნამდა მუთუნს ვა ჭკუმუნა დო ვა შუნა, ონდო ვა ჸვილუნა თის. თინეფ უკვე მზათ რენა, ხვალე სქან პასუხის უჯინენა“. 22 ანთასიშდუდიქ გოუტუ თინა დო უზოჯ: „მითინწკუმა ვა თქუა, ნამდა თე ამბე მიწი“.
23 თიქ ჟირ ოშიშდუდ ქიჭანუ დო უწუ: „კესარეაშა ოულარო ონჯუაშ 9 საათშო* მამზადით 470 ჯარიშკოჩ, თინეფშე 70 — ცხენამ დო 200 ჭვირთამ. 24 მამზადით ცხენეფ დო პავლე გამგებელ ფელიქსშა მუთუნქ ვაღოლასინ თეშ მიდეჸუნით“. 25 თიქ თეცალ წერილ დოჭარ:
26 „დიდებულ გამგებელ ფელიქსის კლავდიუს ლისიაშე. ჯგირობუა! 27 თე კოჩ იუდეველეფქ ოჭოფეს დო თიშ ჸვილუა ულამუდეს, მარა ხეთეშე ქიმებრთჷ ჩქიმ ჯარიშკოჩეფწკუმა ართო დო იბრსხჷ თინა, მუშენდა ქიგებგჷ, ნამდა რომიშ მოქალაქე ჸოფე. 28 მოკოდ, ქიგებგიკო, მუს გედვანდეს ბრალს, ათეშენ თინეფიშ სინედრიონშა ქიმიპჸუნ. 29 ქობძირ, ნამდა თიცალ მუდგარენეფშე გედვანდეს ბრალს, მუთ მუნეფიშ კანონს ოხუ, მარა ოჸვილარ ვარდა ციხეს დახუნაფალ მუთუნ ვა დუშებ. 30 ჩქიმდა ამბექ ქუმორთჷ, ნამდა თიშ წინააღმდეგ გეგმას ორსხუანა, ათეშენ სქანდა უტენქ თის დო ბრალს გედვანან თინეფს ხოლო უზოჯუნქ, სქან წოხოლე ქორაგადუან, მუ უღუნა თიშ წინააღმდეგ“.
31 ჯარიშკოჩეფქ მიდეჸუნეს პავლე, მუჭოთ ანთასიშდუდიქ უზოჯ დო სერით ანტიპატრიდაშა ქიმიჸუნეს. 32 მაჟია დღას თინა ცხენამ ჯარიშკოჩეფს ქუჸუნუეს დო მუნეფქ ყაზარმაშა დირთეს. 33 გენორთეს კესარეაშა ცხენამ ჯარიშკოჩეფქ, გამგებელს წერილ გეგნოჩეს დო პავლე ხოლო ქიმუჸუნეს. 34 თიქ წეკითხჷ წერილ დო პავლეს კითხჷ, ნამ პროვინციაშე რექია; პავლექ უპასუხ, ნამდა კილიკიაშე რდჷ. 35 თიქ პავლეს უწუ: „თე საქმეს გურგედვალირო ქიმიბრჩქილუანქ, მუჟამსით სქან ბრალიშგიმადვალარეფ ქუმულა“. გამგებელქ ზოჯჷ, ნამდა თინა ჰეროდეშ სასახლეს დაცვაშ თუდო ქოჸოფედუკო.