მაჟია კორინთელეფ
1 რჭარუნთ პავლე, ღორონთიშ ნებათ ქრისტე იესოშ მოციქულო გიშაგორილ, დო ჩქინ ჯიმა ტიმოთე ღორონთიშ კრებას, ნამუთ კორინთის რე, დო მთელ აქაიას მახორუ არძა წმინდას*:
2 ჭყოლოფა დო მშვიდობა ვა მორრკებუდან ღორონთშე, ჩქინ მუმაშე, დო უფალ იესო ქრისტეშე!
3 დიდება ჩქინ უფალიშ, იესო ქრისტეშ, ღორონთის დო მუმას, ჭყოლოფათ ეფშა მუმას დო ირნერო გურიშემაქექაფალ ღორონთის, 4 ნამუთ ირნერ გაჭირებას გურშა ემქექუანა. თიშე მეღებულ გურიშექექაფა ძალას მარზენა, ნამდა ჩქი ხოლო ეუქექუათ შხვეფს გურშა, მუდგა გაჭირებას ვა რდანინ. 5 ბრელ ოტანჯებელ მიღუნა, მუშენდა ქრისტეშ მიმაჸუნალეფ ვორეთ, მარა გურიშექექაფა ხოლო ბრელ მიღუნა ქრისტეშ საშვალებათ. 6 გაჭირებას ქუვორეთ-და, თენა თქვან გურიშ ეიოქექაფალო დო ორსხებელო რე; გურექექაფილ ქუვორეთ-და, თიშო ვორეთ, ნამდა თქვა გაჸუან გურქ ექექაფილქ. თენა მიგეხვარებუნა, თქვა ხოლო ქუგურზათ თიცალ ოტანჯებელს, მუნერსით ჩქი ფხვადუთ. 7 თაშ ნამდა, ბოლოშა მიღუნა თქვან იმენდ, მუშენდა მიჩქუნა, ნამდა, რახანს ჩქინცალო იტანჯებუთ, გურიშექექაფას ხოლო ჩქინცალო მიღენთ.
8 ჯიმალეფ, მოკონა, გიჩქუდან, მუ გაჭირებას შეფხვადით აზიას; თიცალ დღა გინიბღით, ნამდგაშა ჩქინით მუთუნით ვაგმარზინედეს დო ვართ გინოსქილადაშ იმენდ მიღუდეს. 9 ღურამესაჯებულეფცალო ბგინაფლენდით დუდის, მარა თექ თიშენ მოხვად, ნამდა ჩქინ დუდიშ ვარინ, ღორონთიშ იმენდ მიღუდესკო, ნამუთ ღურელეფს ათელენს. 10 თიქ ტანჯებულ ღურაშე მირსხეს დო ბჯერა, ნამდა ანწ ხოლო მირსხენა. 11 თქვა ხოლო შეილებუნა მიმეხვარათ მთელ გურით რაგადებულ ლოცვეფით. ბრელ ქილოცენს-და, ღორონთ ქიმირჩქილუანს თინეფიშ ლოცვეფს დო ქიმმეხვარებუნა. შედეგო ბრელ გინუგანს ღორონთის მადლობას თი მოხვარაშენ, ნამუთ მიბღით.
12 თით იფცქვანთ, ნამდა სუფთა სინდის მიღუნა, მუშენდა წმინდათ დო ღორონთშე ნაგურეფ სიალალეთ იფქციებუდით თე ქიანას მახორუ ხალხ შქას, დო მითუმეტეს, თქვანწკუმა. თეს გეძინელ, კოჩიშ სიბრძნეთ ვარინ, ღორონთიშ გიმორჩქინელ ჭყოლოფათ ფცხოვრენთ. 13 თიშ მეტის მუთუნს ვა რჭარუნთ, მუდგაშ კითხირ* დო გაგება შეგალებენა, დო იმენდ მიღჷ, ნამდა თე ირფელს ხოლო ბოლოშახ ქენანჭუთ. 14 ნამთინექ უკვე ქიმეხვადით, ნამდა შეილებუნა ჩქინით იცქუათ, თეშ მუჭოთ ჩქი ქიფცქვანთ თქვანით ჩქინ უფალიშ, იესოშ, დღას.
15 თეშა დარწმუნებულ ვორდჷ, ათეშენ დიო თქვანდა მილამუდ მოულა, ნამდა ჩქიმ მოულათ მაჟიაშა ხოლო გუგახარითკო. 16 მოკოდ, მაკედონიაშა ულაშ დროს გემკოიშარეთკო დო თევრეშე დუნორთის კინ თქვანდა ქუმოფრთიკო; უკულ თქვა იუდეაშა მიდმაზარენდით. 17 აბა, ტყურათ ბრაგადანდიო, ნამდა თეშ კეთება მოკოდ?! მუჟამსით მუდგარენს გინოპჭყვიდუნქ, მა მუჭო მონწყუნსინ თეშ იფქციებუქო, ართშა ართის იფჩიებუქო დო მაჟიაშა — მაჟიას? 18 მუჭოთ ღორონთ რე სანდო, თეშ თინა ხოლო სანდო რე, მუდგას გირაგადუთ: ჩქი ართშა ართის ვეფჩიებუთ დო მაჟიაშა — მაჟიას. 19 თეს გეძინელ, ღორონთიშ სქუა, ქრისტე იესო, ნამდგაშ გურშენ ჩქი — მა, სილვანუსიქ* დო ტიმოთექ — გიქადაგით, ართშა ართის ვეჩიებ დო მაჟიაშა — მაჟიას; თინა მუშ სიტყვაშ მენდულ რე. 20 ღორონთის მუზმა დუნაპირებ ვა უღუდასინ, არძა იესოშ საშვალებათ ისრულებ*. ათეშენ თიშ საშვალებათ იფჩიებუთ ლოცვას „ამინს“ ღორონთიშ ოდიდებელო. 21 ღორონთ რე თინა, მიდგაქ წმინდა შურით* გიშაბგორეს დო მით მარწმუნენა, ნამდა ჩქი დო თქვა ქრისტეს ვოკუთვნუთ. 22 ღორონთის ბეჭედგეშქუმალირ ვაფუთ; თე ბეჭედ წმინდა შურ რე, ნამუთ გურშა ენომდვეს დო თენა რე თიშ ნიშან*, მუთ მომავალს შისრულებ.
23 ღორონთ რე მოწმე, ნამდა ვა მოკოდ, უფრაშო იგინითკო დუდ, ათეშენ დიო ვა მომრთუმ კორინთშა. 24 თეს თიშენ ვეფჩიებუქ, ნამდა თქვან რწმენას ვოუნჩაშუთ; ჩქი თქვანწკუმა ართო ფხანდენთ, ნამდა ხიოლ გიღუდან. თქვა თქვან რწმენათ გერეთ მტკიცას.