მათე

19 თეშ ჩიება გათუნ, იესოქ გალილეა ქიდიტუ დო იორდანეშ მელე იუდეას მოუძუდუნ თი ადგილეფშა მიდართჷ. 2 ბრელ ხალხ ეკოჸუნდჷ თის დო ოსქილიდუანდჷ თინეფს.

3 თი დროს ფარისეველეფქ ქიმერთეს თიშა დო მიოჩილითაფარო კითხეს: „არძანერ მიზეზით შილებენო ოსურწკუმა ჩათხია?“ 4 იესოქ უპასუხ: «ვა გაფუნანო ნაკითხირ, ნამდა ღორონთიქ დუდშე ადამიანეფ გაჭყუნ, ქომოლკოჩო დო ოსურკოჩო გაჭყჷ თინეფ 5 დო თქუ: „ათეშენ მიოტენს კოჩ მუმას დო დიდას, ქიმკაჭაბუ მუშ ოსურს დო თე ჟირ ართ ხორცო გინირთუ“? 6 თაშ ნამდა, თინეფ უკვე ჟირ ვარინ, ართ ხორც რენა. ათეშენ კოჩიქ ვა ჩუთხინუას ართიანს თინეფ, მით ღორონთიქ ართ ხორცო გინაშქვჷ*». 7 თინეფქ უწუეს: „იმწკუმა მუშენ თქუ მოსექ, მიდგას ოსურწკუმა ჩათხია ოკო, თის ჩათხიაშ მოწმობა ქიმეჩასია?“ 8 თიქ უპასუხ: „თქვა თქვან გაფუდეს აჩემებულ, ათეშენ მერჩეს მოსექ ოსურწკუმა ჩათხიაშ უფლება, მარა დაჭყაფშე თაშ ვა ჸოფე. 9 გირაგადუთ: მით ოსურს ეთხიებ, მარა მიზეზ ღალატ* ვა რე, დო შხვა მოჸუნს, მრუშენს“.

10 მოწაფეეფქ თის უწუეს: „თაშ ქორენ-და, იმწკუმა უჯგჷ, შურო ვემიჸუნას კოჩიქ ოსურ“. 11 იესოქ უპასუხ: „არძას ვეშულებ თაშ ცხოვრება; ხვალე თინეფს შეულებუნა, მიდგას თეშ ძღვინ უღუნა. 12 რენა თიცალეფ, მიდგაქ კილუანო დებადეს დო ვეშულებუნა ოსურიშ მოჸუნაფა, თიცალეფ ხოლო რენა, მით შხვეფქ გინაშქვეს კილუანო* დო თიცალეფ ხოლო – მით ზეციერ სამეფოშ გურშენ გინოჭყვიდუნა, ვემიჸუნან ოსურ. მიდგას შეულებ თაშ ცხოვრება, იცხოვრას“.

13 ხალხიქ ბაღანეფ ქიმუჸუნ თის, ნამდა ხელეფ ქიგუდვალუდკო* დო ქილოცუკო თინეფშო, მარა მოწაფეეფ უვარიენდეს თინეფს. 14 იესოქ უწუ: „დანებით დუდ ბაღანეფს, ნუმ ოცილუთ, ქუმაშქვით ჩქიმდა, მუშენდა თეცალეფიშ რე ზეციერ სამეფო“. 15 უკულ ხელეფ ქიგედვჷ თინეფს დო მიდართჷ თევრეშე.

16 თიშა ართ ახალგაზრდაქ ქიმერთჷ დო კითხჷ: „მოძღვარ, ნამ ჯგირ საქმეეფ ოკო ვაკეთე ულიებ სიცოცხლეშ მიოღებელო?“ 17 იესოქ უპასუხ: „მა მუშენ მოკითხუქ, ნამ რე ჯგირ? ჯგირ ხვალე ღორონთ რე*. სიცოცხლეშ მეღება ქუგოკონ-და, ირიათო მიაჸუნ თიშ მცნებეფს“. 18 თიქ კითხჷ: „ნამ მცნებეფს?“ იესოქ უპასუხ: „ვაჸვილა, ვემრუშა, ვეხირა, ვეგედირთა ტყურამოწმეთ, 19 პატი ცი სქან მუმას დო დიდას დო მოჯგირე* სქან დუდცალო გიჸორდას“. 20 ახალგაზრდაქ უწუ: „თე ირფელს ვორთუქ, მეტ მუ ოკო ვაკეთე?“ 21 იესოქ უპასუხ: „სრულყოფილება ქუგოკონ-და*, მეუ, გეგმოჩ სქან ქონება, უღონოეფს ქიმეჩ დო ზეცას უჯგუშ ქონება გაღვენუ; უკულ ქუმორთ დო ქეკმაჸუნ!“ 22 მუჟამსით ახალგაზრდაქ თე სიტყვეფ ქიმირჩქილუ, გურდამონკებულქ მიდართჷ, მუშენდა დიდ ქონებაშ მენდულ რდჷ. 23 იესოქ მოწაფეეფს უწუ: „მართალს გირაგადუთ: ქონებიერ კოჩის გუჭირდუ ზეციერ სამეფოშა მინულა. 24 ხოლო ართშა გირაგადუთ: აქლემშო უმოს ადვილ იჸუაფ ლიშიშ კილარხუაფალს გითულა, ვინემ ქონებიერშო ღორონთიშ სამეფოშა მინულა!“

25 მოწაფეეფს მანგარო გუკვირდეს იესოშ ნარაგადიქ დო თქუეს: „შურო მითინ გეგნოსქიდუნო?!“ 26 იესოქ ქიმკაჯინ თინეფს დო თქუ: „თენა კოჩშო ვა რე შეიოლებერ, მარა ღორონთშო ირფელ შეიოლებერ რე“.

27 თიმწკუმა პეტრექ უწუ: „ჩქი ირფელ ქიდიპტეთ დო სი ქეგკაჸუნით. მუს მიბღენთ თეშე?“ 28 იესოქ უპასუხ: „მართალს გირაგადუთ: ირფელიშ გაახალებაშ დროს, მუჟამსით კოჩიშ სქუა მუშ დიდებულ ტახტის ქუდოზოჯუ, თქვა, მიდგაქ მა ეკმაჸუნით, 12 ტახტის ქუდოზოჯუნთ დო ისრაელიშ 12 ტომს გასამართლენთ. 29 მიდგაქ ჩქიმ სახელიშ გურშენ დიტუ ჸუდე ვარდა ჯიმალეფ, ვარდა დალეფ, ვარდა მუმა, ვარდა დიდა, ვარდა სქუალეფ, ვარდა დიხეფ, თე ირფელ ოშ თისხი აში დო ულიებ სიცოცხლეს ხოლო მიღენს.

30 მარა ბრელ, მით პირველ რე, ბოლო იჸუაფ დო ბოლო – პირველ“.