იუდაშ წერილ
1 იუდა, იესო ქრისტეშ მონა დო იაკობიშ ჯიმა, რჭარუნთ თინეფს, მით გიშარგორეს დო გიჸოროფუეს ღორონთიქ, ზეციერ მუმაქ, მით რთხილანა, ნამდა იესო ქრისტეწკუმა ართო ქიჸუათ:
2 ღორონთიშ ჭყოლოფას, მშვიდობას დო ჸოროფას უძინუდას თქვან შქას!
3 საჸოროფოეფ, შურ დო გურით ქუმოკოდ, თქვანდა ქუმომჭარუდუკო თი რსხებაშ გურშენ, ნამდგაშეთ არძა ბღებულენთ ჯგირობუას, მარა უკულ გურ გუჩინ, საჭიროთ მიბრჩქინ, ელაიჩითკო, ნამდა დუდუდუზოგებუო იბრძოლათ თი რწმენაშო, ნამდგაქ წმინდეფშა ართშა იჸუ გინოჩამილქ დო ნამუთ სადღამუშოთ სქიდუ. 4 თეშ მოჭარუა თიშენ გინოპჭყვიდ, ნამდა თქვანდა ტყობაშე გემნიღეს დუდ თიცალეფქ, მიდგაშათ, მუჭოთ წმინდა წერილეფ იჩიებ, ბრელ ხანიშ წოხოლე რე განაჩენ გიშაღალირ. თე უღორონთე კათა ღორონთიშ ჭყოლოფათ ამართლენა მუნეფიშ ნირგულ საქციელს*. ჩქი ხვალე ართ ბატონ დო უფალ პჸუნა, იესო ქრისტე, მიდგას თინეფ ოჭიშის ურთინუანა.
5 მოკო, ქუგგოშინათ თინა, მუთ თეშით ხოლო გვალო ჯგირო გიჩქუნა: თიშ უკულ, მუთ იეჰოვაქ* ეგვიპტეშე გიშეჸუნ ხალხ, ურწმუნოეფ მოსპჷ. 6 ანგელოზეფ ხოლო, მიდგაქ ღორონთშე დავალებურ საქმე დო ზეცას მუნეფიშ ოკვირდე ქიმწიტუეს, სადღამუშოთ დობორკჷ დო წკურუმ უკმელაშა გოუტუ, ნამდა სასამართლოშ დღაშახ თექ ქოჸოფედესკო. 7 თინეფცალო სოდომ დო გომორაქ დო თინეფიშ გოხოლუა ქალაქეფქ ხოლო უზნეობას ქიმეჩეს დუდ დო ცოდამ სხეულიშ უწუნდურ სურვილეფს გეიაჸუნეს*, მუდგაშ გურშენ სადღამუშო დაჩხირით მისპეს. თინეფიშ მაგალით ჩქინო ჭკუაშ დაგურაფალ რე.
8 თეშ უმკუჯინუო, თინეფს ხოლო, მიდგაქ თქვანდა ტყობაშე მიშეღეს დუდ, დღაშ დო სერით გლახაშ აზრ უღუნა* დო უზნეობათ მუნეფიშ სხეულს უწუნდურო გინმაშქვანა, ძალაუფლება უღუნან თინეფს მუთუნო ვემირჩქინანა დო ღორონთშე აფჷ დიდება მეღებულინ თინეფს ლანძღუნა. 9 თეშ გინაწონს, მთავარანგელოზ მიქაელქ, მუჟამსით ეშმაკის მოსეშ სხეულიშ გურშენ ონირზუდ, მუშ დუდის ვემეჩ უფლება, ოლანძღარ სიტყვეფით ბრალ ქიგედვუკო თის; ხვალე თინა უწუ, იეჰოვაქ* გუგანჭყორასია. 10 მარა თენეფ თის ლანძღუნა, მუდგაშ აზრის ვა რენა, დო მუთ უჩქუნა, თინა ხოლო ცხოველეფცალო ინსტიქტურო უჩქუნა დო მუნეფიშ საქციელით დუდის გილმელუანა.
11 ვაი თინეფიშ ცოდა, მუშენდა კაენიშ შარას ქიგიოდირთეს, ბალაამიშ გლახა შარას ქიგიაჸუნეს ჯილდოშ მიოღებელო დო კორახცალო ძალაუფლება უღუნან თინეფიშ წინააღმდეგ ბუნტიშემატახალ ჩიებათ მადინაფ შარას ქიგიოდირთეს! 12 თინეფ წყარიშ თუდო რენ ფერ კირდეეფს მოგენა, ნამუთ ვეძირე, თქვან სუფრეფს მიკუხენა დო თქვანწკუმა ართო შუნა დო ჭკუმუნა; თი ჭყიშეფს მოგენა, მით უონჯღორეთ ხვალე მუნეფიშ ქვარაშენ ფიქრენა; მოგენა მუნაფას, სოვრეშეთ ვა ჭვენსჷ დო ბორიას იშო-აშო გილუღ; მოგენა ჯალეფს, ნამდგას მუთუნ ვემკუღ დამორჩილიშ დალიას, ჯინჯშახ გეხუმაფილს* დო ჩხვიჩხვამო ეშალაფირს; 13 მოგენა ზღვაშ ტალღეფს, ნამუთ პოპორანს, თინეფიშ უონჯღორე საქციელ თე ტალღეფიშ ჟვეპურცალ რე; უგამაგეთ გილმალ მურიცხეფს მოგენა; წკურუმ უკმელას რენა ინორღვაფილ, სოდეთ სადღამუშოთ დოსქიდუნა.
14 თინეფიშ გურშენ ენოქიქ, ადამშე მაშქვითაქ, ხოლო იწინასწარმეტყველ: „ქუმორთჷ იეჰოვაქ* მუშ ვითობით ანთას წმინდა ანგელოზწკუმა ართო, 15 ნამდა არძა გასამართლას დო ბრალ ქიგედვას უღორონთეეფს მუნეფიშ უღორონთე საქმეეფიშ გურშენ, ნამდგას უღორონთე ცხოვრებათ ორთუდეს, დო გეგმაარგამას ცოდამეფიშ უბადობა დო ბრალ ქიგედვას თინეფს მუშ წინააღმდეგ ნარაგად არძა გლახა სიტყვაშ გურშენ“.
16 თეცალეფ ირიათო ძღირძღინუნა, იჭირებუნა მუნეფიშ რინაშ გურშენ, მუნეფიშ სურვილეფს რენა ეჸუნელ, სქვამ-სქვამ სიტყვეფით იცქვანა დო მუნეფიშ სამოგებოთ შხვეფს პიჯის უფერუანა.
17 მარა თქვა, საჸოროფოეფ, ქიგიშინით თინა, მუთ ჩქინ უფალიშ, იესო ქრისტეშ, მოციქულეფქ გიწუეს; 18 თინეფ გირაგადუდეს, ნამდა ბოლო დროს გემკორჩქინდუდეს გიმაძიცალეფ, მით მუნეფიშ გემოშა, უღორონთეთ მიქციებუდეს. 19 თენეფ კრებაშ გორთუალას უნწყუნა ხეს, ცოდამ სხეულს მუთ ოკონ თიშე ფიქრენა* დო ღორონთიშ წმინდა შურ* ვა უღუნა. 20 მარა თქვა, საჸოროფოეფ, დუდ გემანგარით თქვან წმინდა რწმენათ დო ილოცით წმინდა შურით, 21 ნამდა ირიათო ღორონთიშ ჸოროფაშ ღირსეფ რდათჷ*, ონდო ჩქინ უფალ იესო ქრისტეშე ელუთ ჭყოლოფას ულიებ სიცოცხლეშ იმენდით. 22 გემუანო ქიმუდირთით თინეფს*, მიდგას ეჭვეფ უღჷ. 23 დაჩხირს გემდუღით დო ირსხით თინეფ; თეს გეძინელ, შხვეფწკუმა ხოლო გეგმირჩქინით ჭყოლოფა, მარა კურცხას რდათჷ დო ცოდამ საქმეეფით წიკვილ ბარგ ხოლო გიჯოგეთ.
24 ღორონთის შეულებ, დორთხილუან, ნამდა მუთუნს ვეკახაბარკათ დო დიდ ხიოლით, ბრალუგუდვალუეფ გერდათ თიშ დიდებაშ წოხოლე. 25 ღორონთის, ჩქინ მარსხებელს, ნამუთ ხვალე ართ რე, ჩქინ უფალ იესო ქრისტეშ საშვალებათ ცქვაფა, დიდება, ძალა დო ძალაუფლება დღამუშის – ქოთ ულირს, ქოთ ასე დო ქოთ სადღამუშოთ! ამინ!