იაკობიშ წერილ
3 ჩქიმ ჯიმალეფ, თქვანდე ბრელქ მასწავლებერქ ოკო ვეჸუას, მუშენდა მიჩქუნა, ნამდა მასწავლებერეფს უმოსო მიმეთხიებუნა პასუხ ღორონთიშ წოხოლე. 2 ჩქი არძა ხშირას ფჩირთუთ. მით სიტყვათ ვა ჩირთუ, სრულყოფილ რე დო მთელ სხეულიშ ეწოჭოფუა შეულებ. 3 ცხენს ეწაჭოფალო ლაგამს ქეუდვანთ-და, სოდგა მოკონან, თექ მაჸუნნენა. 4 ქვერსემ გემეფს ხოლო, ნამუთ ძალიერ ბორიას მეურაჸ, ჭიჭე რულ თევრე მიკართინუანს, სოვრეთ კოჩის ოკო.
5 თაშ რე ნინა ხოლო, სხეულიშ ჭიჭე ნაწილ რე, მარა ბრელს იცქვანს. ჭიჭე დაჩხირს ხოლო ვეშულებუნო ქვერსემ ტყაშ გინოჭუალა?! 6 ნინა ხოლო დაჩხირ რე. სხეულიშ თე ნაწილ ეფშა რე უბადობათ, მთელ სხეულს გილმალუანს, კოჩიშ სიცოცხლეს დაჩხირს უნტენს დო მუს გეენაშ* დაჩხირ ონტუ. 7 კოჩის შეულებ მათვინიერას ირნერ მხეც, ფრინველ, ქვეწარმავალ დო ირფელ, მუთ წყარს ხე, დო ქოთ მოუთვინიერებ, 8 მარა ნინაშ მოთვინიერება მუთუნ კოჩის ვეშულებ. თინა რე კვარჩხ, მოცილე დო მაჸვილარ შხამით ეფშა. 9 ნინათ ვადიდენთ იეჰოვას*, მუმას, დო კინ ნინათ პჭყენთჷ ღორონთიშ ამნახანტო გოჭყაფილ კოჩის. 10 ართ დო იგივე პიჯშე ეკმურს ხვამა დო ჭყალა.
ჩქიმ ჯიმალეფ, ვა რე ჯგირ, თაშ ხვადუნ. 11 ქუმურსო ართ წყურგილშე ლიგე წყარ დო წყითე წყარ?! 12 ჯიმალეფ, გემკიღანსო ლუღ ზეთისხილს ვარდა ბინეხ – ლუღის?! თეშნერო ვართ წყითე წყარიშ წყურგილშე ურსჷ ლიგე წყარ.
13 მი რე თქვან შქას ბრძენ დო გოხვალამირ? ქაძირუას თენა მუშ ჯგირ საქმეეფით დო თეწკუმა ართო, ლიბ ხასიათით, ნამუთ სიბრძნეშე მოურს. 14 გურს მენჯარიშობა დო ართიანიშ ინტერეს ქოიღუნან-და, ვეცქუათ, მუშენდა მეტყურეეფ გიშმურთ. 15 თენა ზეცაშე მოურსუნ თი სიბრძნე ვარინ, თე ქიანაშ სიბრძნე რე, ხორციელ* დო დემონურ. 16 სოდეთ მენჯარიშობა დო ნირზ რე, თექ ერია-მორია დო ირნერ უბადობა რე.
17 თეშ გინაწონს, სიბრძნე, ნამუთ ზეცაშე მოურს, პირველ რიგის წმინდა რე, უკულ მშვიდობიან, ვა რე აჯამ, მზათ რე მორჩილებაშო, ეფშა რე ჭყოლოფათ დო ჯგირ საქმეეფით, ვეგმირჩქინანს გიშაკერძაფას დო აფერისტობას. 18 თინა, მიდგას ჯგირ ურთიერთობა უღჷ შხვეფწკუმა, მშვიდობას უნწყუნს ხეს დო შედეგო თის ორთჷ, მუთ სწორ რე.